حييّت يا جمس(ن) جـداد(ن) مشاريــه** عبارتين (ن) بمية ألف(ن) شرينــــــــــاه

31 / 01 / 2010, 37 : 01 AM

السلام عليكم ورحمة الله وبركاته ..

موضوع من ترتيبي وجمعي ..
لهواة الجمس GMC ...
وهو أهداء الى صقيقي قصام ..

والى أبوغيداء .. ولايهون الربع>>> هذولا اللي اخبرهم بهالمنتدى يقدرون المدعو
جمس 79 .

كثيرا ماسمعنا قصائد عن الجمس ..

كتب عنه الكثير وابدع في وصفه القليل ..

من اللذين اجادوا فيه وصفه ..

حييّت يا جمس(ن) جـداد(ن) مشاريــه=عبارتين (ن) بمية ألف(ن) شرينــــــــــاه
أربـع ميا وخمسين من عند أهاليــــــه=آخر موديل بعالم الشرق عــــــــــــــــزاه
حالف حرام إني لاسوقه واعدّيـــــــــه=يوم إن ولْد أمه قصر ما تهقــــــــــــــواه
جمس(ن) اليا شفته اعزا لك تقهويــــه=يا ِطيْب طِيْب القهوجي كان قهــــــــــواه
تقول معزوم(ن) لحفلة سواريـــــــــه=جاك امتـشـيـّك وامتعطر ومحــــــــــــــلاه
سوّاه لطوال الشوارب مسوّيــــــــــه=ما يركبه يا كــود حامي حمايـــــــــــــــــاه
حر(ن) كفخ من فوق عالي مباديــــه=قرم(ن) تلطّـّم وأشقر الكنت طـفـّـــــــــــــاه
يا ليت راعي الجمس يومه يسمّيــــه=على اسم عـنـتر والا بو زيـــد سمّــــــــــاه
حيثه شنب يستاهل المدح زاهيــــــه=ملعـون أبو من لا قمـز له وحيّــــــــــــــــاه
من عزته ما ركبو أهل الدلع فيــــــه=ولا ســـــــــوّوقــــــــووه أولاد دادا وداداه
الجمس أحبه حب غــال(ن) لغاليــــه=حب(ن) عظيم(ن) حب نمر(ن) لوضحــــــاه
ومن حشمته لا جيت اسافر اماليـــه=ولا خـلـّص المشــوار جيت آترضـّــــــــــــاه
يا شيب عيني يوم آجي له واراضيه=مثل الذي وسط الخلا شــــــــاف لامـــــــــاه
خـطر(ن) ليا ناديته يقول لبيــــــــــه=ومن دون سايــــق يشتغـــــل من ورايـــــاه
هو ميت(ن) فيّ وانا ميت(ن) فيـــــه=ولو هو جديد أحب شوفـــــه وطريــــــــــاه
حالف يمين اني لاابيعه ولا أهْـفـيـــــه=لوربّـحـوني بألف ألف(ن)مــــــــــــــــــدلاّه
يوم الردي يـبـيع صاحبْه بجْـنـيــــــه=والله ما ابيعه دامــها أم الطلــــي شــــــــــاه
حتى وأنا في المسجد الفرض اصلّيْــه=أدعي لجمسي يا عسى الخلــــــد مثــــــواه
وان كان عنّي راح ماني بناسيـــــــــه=كــود البدو حب المقاطــين تــنــســـــــــــاه
وتحرم علي نوره حرام(ن) مقـفـّــــيه=وتحرم علي البيض من كل منـــحــــــــــاه
يا ويـن أبلقـى لي حريص (ن) أوصّيه=لا غبت عن جمســـي يـــزوره ويرعـــــاه
في ذمتــي بغالي الروح لاافديــــــــــــه=وما مـــــلك عمر المعـنّــا ومخـبـــــــــــاه
ومن جلدي البالي لاوقــّـي سماريـــــــه=ومن هو سعى للجمس ما خاب مسعــــاه
يا لايمي في الجمس غــادي وسفـّـــــيه=بلاك ما شفـتـه ولا شـفـت حـلــيــــــــــاه
لي جمس مابه جمس مثله يباهـيــــــــه=ولا في جموس الشرق تلقى سجايـــــــاه
من شاف فوقـيّه وطالع بحـــــــــــدريه=والله ان يمـوووت ساعــتـه داه بــــــرداه
رمز الفخامه والاناقه مع التـيـــــــــــــه=الحسـن والابــداع والعـقــل والجـــــــــاه
ذي اس از انترناشيونال عند قــانـيــــه=ما يكســــح اللي للـمـهـمــات يـقـنــــــــاه
مخروط والمخروط صعب(ن) تحديــــه=ويصعـــب على متن البسيطــه مجـــــاراه
ومكينته على أربعــين وحواليـــــــــــه=وعــمــوده على العشرين حنا خرطــــــناه
لاقام بنزينه تـشـخـر سِـواقـيــــــــــــه=الكـلـبـلـيـتر أسـمـــع أمــــــــــــــره وودّاه
وعلى المـكـينه والبـسـاتــم يـوديـــــه=وحـمــر التـوانــك جـمّــها ماذخــرنـــــــاه
يا دوب تـحـتر البـساتــــــم وتــــوذيه=طــش الرديـتـر غــترته وألـحـقـه مـــــــاه
كن لــون بنزينه بصـفـّـاية(ن) فيـــــه=أحمر شفايــف عـضّــــها الـــزين بشـْــفـاه
وكن لون زيته يوم تكشف معـاريـــــه=ذهب جـواهرجـي على الكــف راعــــــــاه
وقـزوز بالـشـكمان رجـلـيـه وايـديـــه=بـمـكـيـنة(ن) بالـخـام الاســــود مغــطـّــاه
ونوع الكرونــه رقم 7 بـطـاريْـــــــــه=ورقـــم 3 احتيــــاط(ن) حـفـظـنــــــــــــاه
وتروسهــا حجم 4 يا مــقــــدّيْــــــــه=مثل الـقـلاده فـــوق صــدر الخــونــــــداه
مثل المسدس يـبرمه من يـعـبـيــــــه=أبو محاله لا وطـــا الترس مــــــــاطــــــاه
يـفـتر سـير المروحه من تــواليـــــه=وســير(ن) بــراس الديـنـمو قام يشــعــــاه
المروحـه هـفـّـت وضفـّـت ســوافيـه=ذعــذاع غــربي(ن) تـقـافــت عـشـأيــــــاه
وسـرنـدل(ن) حـمـر البـساتـم تـلالـيـه=وعـمـود تـيـمن غـرهــدن في حـجـأيـــاه
صـمّـام بـوجـيّـه بنار(ن) يـغـذيـــــــه=وتولـدت شــرارتـه وأكـمـل اغـــــــــــذاه
ومفتـول دفـرنـسـه عن القاع حاميــه=عن صكــة الـقـيعـان يـدفـع مـنايــــــــــاه
الجمس كـنّـه مـتـهـم جاء مـحـامـيــه=دفـرنس والقاضـي غــراز(ن) بـصحـــراه
وكـبر المـطـبّـه ما يـغـيّر هــقاويـــــه=ومساعـــداته عن يـمـيـنــه ويـســـــــراه
والاذرعـه عن ميلة(ن) به تــــواسيه=كنها عـضـود ملاكـم(ن) شـرب غرشـــاه
وان شال حمل(ن) ما يـكـثـّر شكاويـه=ما شي يـهـمّـه والـسـسـت كلها افـــــداه
كن رفرفين حول حوضه مداويـــــــه=شـيهـانـتـين(ن)حـوّمـن بالـخـضـــــــيراه
وكن لـون كـبّوته ولـمـعـة عراويــــه=اخــدود أصاله بأحمر اللـون تـطـلـيــــــه
وكنّه كلوديا شيفر(ن) في تـمْـــــدريه=تـعـرض لنا آخر موديـــلات الازيــــــــاه
وكن زول بـدْيــه يوم يغـريك صافيــه=مـرلين مــرّو وسط فلم(ن) لـفـتـنـــــــاه
وكن الكـفـر لا جيت بالوصـف ابـدّيــه=حـب خال(ن) بـسـنـدي كرفرد شـفـنـــاه
وكن نقـشة جنوط الكفر في محانـيـــه=سـجاد شـيرازيـة(ن) في مـصــــــــلاّه
وصـقـلة قـزازه يوم أردّ النـظـر فيـــه=من وجـنـة كـلـودا الشمالي حــلايــــاه
ولـون الـمـرايــه من يراعـيه يلـهـيـه=من خـلـقـتـه كن أطـرق الـعـود يـجـــلاه
ولو هـي بها للـعـين فـتـنه وتـمـويـه=بها تـشـوف العين اخـريم الابـره ومنشاه
أصفى من اللولو بمحّـار شـاطـيــــه=مـعْ واحـــــــــد(ن) في مـبرم السـلك دلاّه
وبـغـمـزة سميره بنت توفيق أحلـّيـه=لا أعـطـى الاشـاره والمـواتـر تـقـفـّـــــاه
مطـربل(ن) مثل الصوامــع عـواليـــه=والا غـبـيـط(ن) قــرّح الـخــيل تـتــــلاه
والا ولـيـفـي واشقر القرن كاسـيــــه=من فـوق كــرس(ن) تربـــّع وواســـــاه
والله فلا يلـحـق موديلـه سـفـافـيـــه=الـبـهـبـهـاني من حـفـيـزه خـطـفـنـــــــاه
مفضله عن نـوع لكـــزس وكـوبـيــه=ومـحـشـّمه عن ما في حـفـيزه وجـــدناه
له تـنـدة(ن) بيضاء تعـلـّـت مـتاكـيـه=كـنـهـا كـنـيـسة راهـب(ن) يـطــــــلب الله
وكـن الجميحيات من فــوق أعــاليــه=شـمع(ن) بـبـيت القدس ولـّع من أعـــلاه
والا كما رجــم(ن) زما في صحاريــه=على تــليعة مــرقبه شــبوا ارطــــــــــاه
كن أيمن اصـطـبّه والايسر موازيــــه=عـساكر(ن) كل(ن) بـيـمـناه مـشـكـــــاه
وعيون من قـدام تـوْضـي مساريــــه=كواكـب(ن) يـشـبح لها واحــد(ن) تــــاه
لا شـعـشـعـن والليل مِـرخ(ن) علابـيـه=مثـل الزمــرّد شــرّعـنّـــه صـبـايـــــاه
والا مرايـة حـاكم(ن) عند عــذْريــــــه=قـدّامها مـصـباح تعكس شــظـايــــــاه
جمس(ن) شهر بين الامم اسم راعـيـه=تـاشـروا في البـيـت الابيض خُـبـَــاراه
يوم اكـتـمل نموذجــه عـنـد والـيـــــه=وتـكـامل الـهـيـكـل بـكـامـل مـزايــــــاه
وكل(ن) هــتـف للـثــانــــــي اوكيه اوكيه=ثم صـمـمـوا سبعين مليون شــــــرواه
هذا خـلاصة علم من فـكّـروا فـيـــــه=وتسعــين عام(ن) لين زجّــوا مـطـأيــاه
صنعة مريكاني ماهوب نهيه ناهيـــه=بيموت أبو فـسـيّــه ما ســّوا سوايــــاه
جمـس(ن) يقـرّب مبعـدات المناويــه=دام الفتـى ما حـرّفـوا ســــر دنـيــــــــاه
سحبة غريــق(ن) مد للقارب ايديـــه=سحبــة سـويّـتـشـه راس مفتاح نــــزّاه
واليا أشـتـغـل كنّه يذكّرك يا هيــــــه=مسحوب مشعـان الهتيمي ومَـغـْـنـــــــاه
وكن ريحـته لا دسْـت بنصه تحمْيــه=عـطـر(ن) فرنسي من براضان مجنـــــاه
وكن حـس ماطـوره ورنّة بواجـيـــه=يِـسْـمِـعْـك دلـعــــــونه ولالا ومــلالالالاه
وصـوته لمـنّـه مشـى يا مـمشّيـــــه=عـــزف(ن) كلاسيـكـي بكــازا سـمـعـنــاه
ونـغـمـة صـلانـصـيره ليا قمت توحيه=تـقـسـيـــم عـود(ن) والمروّس تـقـفـــاه
وكنّــه لمنّه قحـص أجــراس تـنـبـيــه=عن قـصـف جــّوي ســور بغـداد مرمـاه
واليا احـترك وانته على الـقـار مـْوطيه=يـدْخـلك في الـجـو الرومانـسي بممشـاه

أيضا .. قال آخر

يالله ياللي عنـدك العمـر مكتـوب = ياللي حقوق العبد عنـدك مصانـه
انت الولـي يالله يامصبـر ايـوب = بأمرك شموخ النفـس ولاّ طمانـه
مايلعب الطاروق ياكـود لاعـوب = يلعب على القيفـان طلقـن لسانـه
وابلعب الليله على قاف مسحـوب = ولخشا الكسر دام اللحن في مكانـه
كن البحر هـذا ولافيـه متعـوب = هـذا البحـر بينـي وبينـه ميانـه
عندي على هذا البحر احسن اسلوب = واخص به موتـر وابعطـي بيانـه
المرعب اللي بقوته ارعب اجيوب = فيه المكينـه تنتفـض بـه رعانـه
الجمس ماغيـره ابـد سيـد دروب = يشق وجـه القـار لطلـق عنانـه
انا اشهد انه ياهل الجود مركـوب = وعند الـذي يهـواه قـدر ومكانـه
الجمس لامنّه خذا الخـط مهيـوب = كنه على السجات يملـك حصانـه
ياصاحبي عيبه ولا فيـه عـذروب = والعيب الآخر يرفع الراس شانـه

وقال الآخر ..

قال اللذي بالشعر بيطار وسياسي = لاقال قولٍ جميع الناس يمضونه
شرّاي اربع سلندر صابه افلاسي = تقزر سنينه وهو مايوفي اديونه
ياراعي الجمس خذت الفوز بالكاسي = لله درّ اللذي بالدين يشرونه
لاروّح الليل بردٍ والهوى قاسي = فاركب على الجمس خلّه يلعب افنونه
ياسايقه شيّكه من غير وسواسي = ودورية الطرق ماوالله يجيبونه
انا مجرّب وانا بالعلم حساسي = ولا قيل لي كلمةٍ بالجمس مضمونه
والجمس لامن ركبته طار عوماسي = لو طال ممشاه مايتعب دركسونه
مضبوط في هيكله والقير والشاسي = وكنها تروسه مع التعشيق مدهونه
خبّ الصلف بالحموله يفرس افراسي = ولاداس ربع السليتر جاب طبلونه
ردوّ سلامي وانا باكشف لكم راسي = وشكري على مصنعه واللي يجيبونه

وأخترت لهم من الصور مايلي ..

هذا 72 مدري هو يجوز لهم ولا لا .

لاهــود اللــيل بــرد والــهوا قــــاســــي=فأركــب عــلى الــجمس خــله يــلعب فــنونــه

لا ضاق صدري في المدينه قعدت ألوب=تضايقت من بطن البلاد ومداخلها
ولا عاد باقي كود وايتات ودبش وعزوب=وناس تسلم قبل يبدا السلام ألها

شف بس وين السويتش . ياسلام .

يوم دق السلف كنه ياخواني = يسبق المفتاح قدحه للشراره
كن صوته فحل ذودن للعماني= لاهدر والقيد حده عن بكاره
لاعاطاه البنص ياخذ فالمكاني = سجتن منها الكفر يردم زباره
ولاعطاه اثنين زاد ابه الجناني = من حمار اقزوزه تشب الزقاره
مثل حرٍ شايفن برقن سماني = شافهن في صيهدن دونه قراره
ماخذا في هدته اربع ثواني=رددو فعلٍ فعله اهل الصقاره
ان عرض لك مهر فايز بالرهاني = وان عقبته ما تشوف الا غباره

وفي الختامـ احب اهدي هذي القصائد الصوتيه لكل من :

الشاعر عزام الخريف والجمس في اليوتيوب

http://www.*******.com/watch?v=BM0rHyCr5F8

وآخر

http://www.*******.com/watch?v=zjPKbv7l0y8

وأخيرا وليس آخرا ..

اتمنى ان تصل هذي الهديه المتواضعه الى عشاقها .

تقبلوا سلامي : أخوكم راعي الاولة .

31 / 01 / 2010, 13 : 08 AM

يا لبى الجمس اه بس
سلمت يدينك يا القرم لكن أظن انك كاتب موضوعين عن هالموضوع وشكرا

31 / 01 / 2010, 29 : 08 AM

الله الله وش ْ هالجمال جمس ْ وشعر بس خسآرة الروآبط ِ ماتشتغل
يستاهل َ قصآأمُ
كنْ بخير

31 / 01 / 2010, 54 : 08 AM

الله الله على الزين
تراي من عشاق الجمس
جعلك تسلم ياراعي الاوله ويستاهل قصم وابوغيداء
تقبل مروري

31 / 01 / 2010, 18 : 09 AM

الله هالله ،
احب الصالحين ولست منهم ،

لاهنت ياراعي الاوله على القصيدهـ الجزله ويستاهل قصام وبو غيداء من قدهمـ . <--- تسني بهم ماعاد تشيلهم الارض .

31 / 01 / 2010, 39 : 10 AM

تسلم يميييييينك على الموضوع يازين الجمس...

31 / 01 / 2010, 07 : 06 PM

اقتباس:

المشاركة الأصلية كتبت بواسطة قصام


	يا لبى الجمس اه بس سلمت يدينك يا القرم لكن أظن انك كاتب موضوعين عن هالموضوع وشكرا

ويمينك يالذيب ..

الله هالله موضوعين لانه عيت تزبط معي تنسيق القصده اتوقع فيه مشكله بالربنامج بالمنتدى .. او ان المشكله من عندي ..

وتستاهلون الطيب قصام ..
انشهد انكم عشقتوا . وماخسرتوااا .

صحيح اني منب احرص ع هالمواتر بس مهيب شينه .

بس البلا انه راحت موديلاتها ..

31 / 01 / 2010, 18 : 06 PM

اقتباس:

المشاركة الأصلية كتبت بواسطة » اِلـَوَفْآءْ بـِنْـتْ


	الله الله وش ْ هالجمال جمس ْ وشعر بس خسآرة الروآبط ِ ماتشتغل يستاهل َ قصآأمُ كنْ بخير

عقبال مايسمحون لكم بالسواقه ..

وتشترين جمس بهبهاني .. شكمانين .؟

وتراحيب ع المرور

31 / 01 / 2010, 20 : 06 PM

صيد الخواطر .. طير شلوى .

الله يحييكم ومتشكرين ع المرور .

31 / 01 / 2010, 28 : 06 PM

اقتباس:

المشاركة الأصلية كتبت بواسطة » اِلـَوَفْآءْ بـِنْـتْ


	الله الله وش ْ هالجمال جمس ْ وشعر بس خسآرة الروآبط ِ ماتشتغل يستاهل َ قصآأمُ كنْ بخير

على فكرة انسخوا الرابط . وضعوا في خانه النجوم رابط يوتيوب .

الذين يشاهدون محتوى الموضوع الآن : 1 ( الأعضاء 0 والزوار 1)