الفرسان-- 10

فارسنا اليوم ليس كالمعتاد ؛ بل هو القائد ؛ قائد الفرسان ؛ من النادر ان يتوفر في المنتديات شخصه ؛ الهدوء و الحنكة و مخافه الرب قائد وضع مخافه الله طريقاً به يستنير و على خطاها يسير ؛ شغله الشاغل مدينته و خدمتها قاد منتدى بتمير تسمى فكانت البداية كاي بداية من الصفر انطلق ؛ لم تكن الساحات الا فارغات ؛ ومع الخطوة أخرى و اكتمل المنتدى ؛ تميزنا بتميز المنتدى تحت ادارة نادرة ؛ فكل نادراً غالي فاضحى النادر علينا غالياً ؛

اترككم مع هذه المقابله النادرة فحياكم :

---------------------------------

-ماسبب اختيارك هذا الاسم ( النادر ) ؟

على فكره اسمي سابقاً كان (HAMAD) ثم غيرته الى (النادر) لان أي شي غالي يسمى (نادراً) وأنا أحب

أن أكون غالي عندكم وعشان كذا قلت اخلي اسمي النادر لعل وعسى أن أكون نادراً
----------------------------------------------------
- أين تقيم نفسك بين أعضاء المنتدى ؟
- ليس أنا من يقيم النادر اترك التقييم لكم واعتقد أن أسلوبي معكم شويه قوي ورسمي بزيادة وعشان كذا

ادري بكون عندكم الأخير ؟
----------------------------
-عضو ترى انه ماحد اهتم به في المنتدى ؟

الحقيقة في اثنين هما التيكا و أمير الحب فهم مميزين ولم يستغلوا بشكل المطلوب ؟؟
----------------------------------------------------
- عضو آخر ما خذ اكبر من وضعه الطبيعي ؟
عارف نفسه بدون أن اذكره الغثيث (؟؟؟؟؟؟؟)
-----------------------------------------------------
- عطيت شحاذ 20 ريال ؛ وبعدها لقيته باليورومارشية عند المحاسب يسدد له 1000 ريال قيمة بلاي ستيشن و بعض الألعاب ؛ وش ردت فعلك ؟
ابد ابزر عيوني عليه واحمد ربي وامشي واخليه
------------------------------------------------------
- كم عمرك أول مرة صمت ؟ وبأي مرحلة دراسية ؟
كان عمري تقريبا 9سنوات . وكنت بصف سادس ابتدائي .
-----------------------------------------------
- وأنت صغير كم مرة أفطرت و ماحد درى عنك؟

أفطرت كثير بس كلمة ماحد درى عني هذى قويه فيه رب العالمين داري عني بس الله يعفو ويتسامح

-------------------------------------------
- موقف محرج أو طريف في رمضان لن تنساه ؟

مواقف كثيرة بس اذكر مره من المرات كنت أنا واحد الأصدقاء جالسين برا وكان الجو حلو المهم مع السواليف راحت علينا نومه وما قمنا ألا على طلوع النهار وفاتنا السحور وجانا هوش وكرش من أهلنا .
-----------------------------------------
- طبق ماتتحمل غيابه عن الفطور ؟
المعجنات بأنواعها خاصة الخبز المحشي الي يسموانها (مخبات التاجر) وحطها فى بالك ياللي بتعزمنيلاشوف السمبوسه ترى ما حبها ؟
------------------------------------------
- السحور اللي تحس انه فعلاً يلبد بطنك ؟
الكبسة مع اللبن من جد تخليك تصوم يومين بدون جوع .
---------------------------------------------
- عادة رمضانية تتمنى تنتهي ؟
- الألعاب النارية خاصة الجديدة تقول دنميت من قوتها والأطفال الله يصلحهم ما يلعبون إلا عند المساجدخصوصاً وقت الصلاة الواحد وده من الحنقة يقطع صلاته ثم يروح يحوسهم ثم يشوتهم بالشارع
-----------------------------------------
- أكثر سؤال قعدت تفكر فيه ؟ ولماذا ؟
السؤال رقم (2) صعب الواحد يقيم نفسه أحس السؤال ماله داعي بس جاوبنا والشكوا على الله
------------------------------------------
- كنت واقف عند الإشارة وأذان المغرب قريب و اللي وراك يدقق بواري ويشر بيده يبيك تقطع الاشارة ؛ وش بتسوي ؟
هذا إذا وقفت فخله يدق بوري بقطعها أصلا والله يعين اللي قدامي مني .
-------------------------------------------
- من هو أول عضو تتوقع أن يرد على هالمقابلة ؟
أكيد الحصاد اوالعالمي مايحتاج مسنترين فى هالساحه خاصه العالمي والله يعز التمر
-------------------------------------------
- عضو تحرص تقراء مواضيعه؟
تميراوي الرياض + حنين الماضي + مخاوي تمير + قمر تمير + ندى + مشاعر+ الدبلوماسي
-----------------------------------------
- عضو تحرص تقراء ردوده ؟
حنين الماضي + تميراوي الرياض + الدبلوماسي
--------------------------------------------
- عضو أذا شفته راد ماتفكر تقراء رده؟
العضوا اللي يشارك لزيادة مشاركاته بس هذا أنا اطمر ردوده طمر
---------------------------------------------
- عضو تتمنى انك تعرف اسمه شخصياً و ماقدرت ؟
حنين الماضي + تميراوي الرياض + الدبلوماسي أتمنى معرفتهم وتري بعزمهم على الفطور اذا عرفتهم وينهم يسمعون تسمع ياحنين الماضي(والله يا جماعه أني ما عرفهم بس من جد حبيتهم وهم من جد يخلونالواحد يحبهم من أسلوبهم وأخلاقهم )
-------------------------------------------------
- وأخر عرفته؟
الحصاد + السنافي + ولد عنبر + أبو سعود
--------------------------------------------
-عضو تتمنى رجعته وفقدته ؟

كثير بس الحين مذكر غير حالم اليل وراعي الرايه
----------------------------------------------
-عضو تقدره في المنتدى وبماذا تلقبه ؟
الحقيقة اللي أقدرهم كثير وحرام أنسى احد منهم بس على سبيل المثال (أدمن و مخاوي تمير والحصاد وهادي ومشاعر وقمر تمير وووووووووووووووووووووووووووووووووو كل واحد له حب لهذا المنتدى )
------------------------
اخير لا يسعني الا ان اشكر الاخ النادر على تقبله الدعوة و تحمله لنا و لاسئلتنا ..

تحياتي

قمر تمير

أخي النادر
مقابلة ممتعة الله يعطيك العافية أنت وقمر
اللي تقدره منيب معهم وأنت تحلف لي أني أغلى واحد
أو أنا مع (وووووووووووووو ) عرفت قصدك أوريك
ماتحب المكرونة عارفين مبطي لحقتها سمبوسة (تدلع )
بعذرك كأنك مسواك يمكن تلمح تبي تمر ( لو عبسة ما تشوفها )
حاطينك مدير وتقطع الإشارات (نبي نفصلك )
هالحين مستعجل بارجع لك
العالمي
تمدح الحصاد عشانه معطيك ورقة قبل كم يوم
لودريت عطيتك ورقتين (نصراوي يدور مشاكل )

اخوي النادر >>> ماتحب السمبوسة و يتهمك العالمي انك ماتحب المكرونة اجل انت ميت جوع وش تحب؟

تخيل جيت عند واحد عازمك عى مكرونة و ماجاب غيرها >>>> وش بتقول له؟؟

وبعدين تعال انت يالعالمي وش سالفتك يوم تعلم بالورقة اللي عطيت النادر ؟! >> يعني زعل عشان ماعلمتك وش مكتوب بها ( طق قهر )

وبعدين ياخي انت مو مهم عند النادر >> توك تدري << اهم مافيك التمر و بعته كله الله يخلف عليك في غيره

---------
اشكر اخي النادر على هذه المقابلة المميزة ( تحملنا شوي مهوب اللقاك باكر طاقني ايقاف )

وكذلك اشكر مراقبتنا المميزة على هذه المقابلة المميزة ايضاً ؛

وحتى العالمي اشكره بعد على كيستين التمر يوم مالقى شراي

تحياتي

الحصاد

حضرة المدير العام النادر مطلوب عاجلا للايضاح وهات معك على دربك كلا من العالمي و الحصاد لكي ندري الخلل عند من لاني اشوفك تقول ماحب السمبوسة و هم يتكلمون انك ماتحب المكرونة
هل السمبوسة هي نفسها المكرونة عندكم في تمير؟ ابي تفسير عاجل لان الحصاد يوم يناديني يقول انكم متطورين
وتقول انك ماتوقف في الاشارات يعني انت مهبل بخلق الله يرتاعون اذا شافوك مقبل بس الله يستر عليك
مدري عنكم جايكم على شكلها مزح اخاف تزعلون كلكم مراقبة و مدير و مشرف و مراقب ولحالي عضو يعني طقم منتدى

السلام عليكم
شكرا لكم على المقابلة الممتعه
يس اللي يسمعنا وحنا نطري الاشارات وقطعتها يقول عندنا اشارات
كلها اشاره وتشر

وما عليك منهم يالعالمي خلهم يدقون صفريين قبل عشان يكلمونك
وشكراااااااااااااا .

مااااااش مقابلة النااااادر فيها شي مهووب طبيعي

والا منتب معي ؟؟؟

احس ان شي محترق او محرقينه بالعنيه

لكن هين والله لأحك واطلع اللي ورى القراااااااااااااااااره

مشكوووور على هالمقابلة الحلوووووووه



سلام

اود ان اقدم شكري وتقديري للأخ الغالي النادر

على إطرائه واتمنى ان اكون عند حسن ظنه و ظن الجميع

والله ولي التوفيق

يالنادر

العالمي جايك جايك

مطري المكرونه والتمر لو ما تاكلهن

لكن كانك تبي المرباع الله الله بوصفات الشيف العالمي

اولاً اشكر اختي قمر تمير على هذه المقابله والله يعطيها العافيه
اخوي العالمي
كيف حالك وراك داخل علينا مع الشارع الثاني اركد شوي وبعدين انت تعرف معزتك عندي مايحتاج والدليل التمر اللي وصلني منك
اما كلامك عن المكرونه فانا والله ماحبها ومحرص عليها الا اذا توهقت بعزيمه فانا اطب فى اللحم واخلي المكرونه لهم
وبخصوص الاشاره انت عارف الوضع عندنا بتمير كلها اشارتين واذا مستعجل خذ راحتك ؟؟
اما بخصوص الورقه مالك دخل هذا سر بيني وبين الحصاد
تحياتي لك

هلا اخوي الحصاد اخبارك اقولك والله السمبوسه ماحبها اذا شفتها يجيني مثل النفاضه تروع شكلها
وبقولتك اذا جاب الواحد مكرونه على العشاء معناها توهقت وراح علينا العشاء بس هذي رساله للجميع
انا ماحب المكرونه وبس
تحياتي لك