الفرسان - 3

بسم الله اخواني اخواتي حياكم الله اليوم مع الفرسان و مع ضيفتنا اليوم ضيفه جمعت الحاضر والمستقبل و الماضي تطلع للمستقبل و تعايش مع الحاضر و اصالة الماضي تقول عن نفسها : تجتمع الورقة بها في خفتها ؛ هي ضيفة خفيفة بل بسمة و رقة نظيفة اخترقت الزمن واخذت المكان المناسب لها في منتديات تمير انها رقة الماضي فلنستمتع بما جادت بها :

ماسبب اختيارك هذا الاسم ( رقة الماضي ) ؟هذا الاسم سمتني فيه وحدة من صديقاتي من زمااااااان..والى الان هذا لقبي عند الاغلبية ممن يعرفوني..

2- أين تقيم نفسك بين أعضاء المنتدى ؟موانا اللي اقيم نسي...واذا ملزمين انا اقيم نفسي مو مشكلة..>>ماخذه في نفسها مقلب..
طيب اقيم نفسي على اي اساس؟؟
انا اقيم نفسي اني تميراوي نشيط نوعا ما..وهذا يرجع لكم انتو اللي تقيموني..

3- عضو ترى انه ماحد اهتم به في المنتدى ؟العضو اللي يدخل ويطلع ولاترك له بصمة في اي موضوع..يعني بالعربي ماله حس في المنتدى...اما العضو الفعال بالعكس يكون موضوع اهتمام
من المنتدى..

4- عضو آخر ما خذ اكبر من وضعه الطبيعي ؟
ما ادري!!!!الى الان لم اصل له..ففي المنتدى الكل له وضعه المناسب له...

5- عطيت شحاذ 20 ريال ؛ وبعدها لقيته باليورومارشية عند المحاسب يسدد له 1000 ريال قيمة بلاي ستيشن و بعض الألعاب ؛ وش ردت فعلك ؟اروح اشحذ منه...ههههه
لا لا امزح...تطير عيوني عليه!!!وراح يفهمها من النظرات..وماراح اتكلم ولا كلمة!!!بس الله يستر
لايطيح عفشه من (الروعة)عيوني!!!

6- كم عمرك أول مرة صمت ؟ وبأي مرحلة دراسية ؟اول مرة صمت كان عمري تقريبا8سنوات في رابع ابتدائي..لكن كنت اصوم ايام معدودة..
واول مره اصوم الشهر كامل كان عمري 11سنة في سادس ابتدائي..>>>كان انجاز بالنسبة لي..

7- وأنت صغير كم مرة أفطرت و ماحد درى عنك؟يمكن مرة وحدة او مرتين..بس انا ع طول اعترف لامي واقولها..لاني كنت اصوم وهي ما تبيني اصوم..

8- موقف محرج أو طريف في رمضان لن تنساه ؟موقف طريف في ايام الطفولة:كنت مع وحدة من قريباتنا وهي اكبر مني بكم سنة وكانت تصوم..طبعا انا كان ودي اصوم
بس امي تعيي علي..المهم سألتها وشلون تتحملين؟؟قالت انا اصوم واذا جعت ادخل في الدولاب واكل حلاو..
والله سوي مثلي محد يدري عنك!!!المهم يوم جا بعد كم يوم قلت بصوم لكن صمت بدون سحور..وكنت اذا جعت ادخل الدولاب واكل حلاو.
كنت اسوي هالشي مع اني مو مقتنعه فيه..المهم اني في ذاك اليوم جعت مرررررة الا واجي وادخل الدولاب واطلع لي
الحلاو واسمي اكل..ومن زين الشطاره كنت ادخل في دولاب اختي..وكان ذاك اليوم راح نطلع نفطر برى..دخلت اختي
الغرفة بتاخذ ملابسها لا واااااا تصرخ..تقول اسمع صوت في الدولاب..طبعا انا ما مسكت نفسي طلعت
وانمسكت بالجرم المشهود...طبعا اهلي قالوا خلوها مسكينه صغيرة وما تتحمل..
اما بالنسبة لموقف طريف وانا كبيرة:من كم سنه كانت الاختبارات النهائية في رمضان..طبعا الواحد يالله يمديه يصلي
ويذاكر وينام..المهم انا قلت لازم اضحي بشي من الثلاث اشياء (وهي النوم,الاكل,المذاكرة)طبعا المذاكرة صعب اضحي
عنها لانها هي الاساس..المهم قلت خلاص لازم اضحي بالاكل خصوصا اني ما احب الاكل وبعده النوم مباشرة..
المهم في يوم من ايام الاختبارات كان عندنا مادة طويلة ومن يوم ما خلصت المذاكرة ع طول نمت طبعا بدون سحور..
وجا يوم الاختبار..والكل متوتر وانا ميييييييييته جوع...قلت خلاص هانت شوي واطلع من الاختبار بعدها انام
وما احس بالجوع...وفي اثناء الاختبار اسمع صوت عصافير بطني "تصوي" وانا احاول اضغط عليه يكفي..
وزاد الطين بلة ان الاستاذه المراقبة علينا استاذه عزيزة علي وكانت واقفة جنبي ..وبطني ولله الحمد هدا شوي..
وارتاح بالي شوي الحمد لله..ومادريت الا ويطلع صوت العندليب اللي بطني بس هالمرة جت قووووووية..انا ما مسكت نفسي
جلست اضحك والاستاذه اللي جنبي ماااااااااتت من الضحك لدرجة ان عيونها تدمع..طبعا الكل مستغرب في القاعة..يعني
اختبار وهذولا فاضين يضحكون..والحمد لله عدا الاختبار ع خييير,وما احد درى بالسالفه الا انا والاستاذه اللي بجنبي,,,,

9- طبق ماتتحمل غيابه عن الفطور ؟
انا مو حريصه ع طبق معين ماعدا اسكالوب الدجاج..لاني احب التنويع..ولكن غالبا الطبق اللي افقده ع الفطور
هي السمبوسة واحيانا ما اكل منها..بس لها فقدة...


10- السحور اللي تحس انه فعلاً يلبد بطنك ؟
طبعا الكبسة...خصوصا المقلوبة...مع اني اجلس بعدها فترة ما انام ولا ارتاح الين يتهضم شوي..
11- عادة رمضانية تتمنى تنتهي ؟
الاكل الكثير..والسهر مع انه يكون في غير رمضان..ايه صح وغير المغازل اللي يصير
في مكة عند الحرم..استغفر الله في رمضان يزيدون نشاط في المغازل لا وبعد عند الحرم!!!


12- أكثر سؤال قعدت تفكر فيه ؟ ولماذا ؟سؤال رقم14.لاني ما ادري ايش اللي يحصل وش ينفذون الان!!!
13- أحسن رمضان عندك ( أوله – وسطه – أخره ) وليش ؟رمضان كله خير وبركة,,فأوله مغفرة واوسطه رحمة واخره عتق من النار..
وافضل شي عندي اخره..والسبب احس بشعور رااااااائع خصوصا في مكة..ما يمدي نطلع من التراويح
الا وتجي القيام بعدها...يعني احس اني احلل اليوم كله في خير وطاعة..وعسى الله يتقبل..وخصوا اني من
النوع اللي ما يحب يكون فاضي...احب اشغل وقتي..وياسلااااااام لما يمون في عبادة..

14- عمل أو فكرة تتمنى من أهل تمير ينفذونها في رمضان ؟انا اصلا ما اعرف ايش اللي ينفذونه الان..اخاف اقول شي ويكون منفذ الان..لكن بقول اللي اتمنى انهم ينفذونه
ولا ادري هل هو منفذ الان او لا؟؟اتمنى انه تقام حملة في رمضان لجمع التبرعات لاخواننا في النيجر..كما اتمنى ان يكون
هناك محاضرات ودروس في العقيدة والصوم..وان يكون للنساء نصيب منها..
15- كنت واقف عند الإشارة وأذان المغرب قريب و اللي وراك يدقق بواري ويشر بيده يبيك تقطع الاشارة ؛ وش بتسوي ؟ياسلااااااام...هذا اذا سقت ان شالله افكر وش اسوي!!
بس تدرون يعني لو كنت اسوق السيارة كان ما احتريت اللي وراي يدقق بواري اقطع الاشاره بدون طلب منه!!!والله يستر..

16- جيت للبيت و لقيت أخوك عازم 5 مصريين و 8 هنود و بنغالي ونيجيريين ؛ اكيد تفطر معهم بس أي جنسيه تبي تصف معهم؟
السؤال قال"اخوك" انا بعتبرها "اختك"..لان "اخوك">>مافيه امل..
يمكن اجلس جنب المصريين بس بعد ما اخذ عهد منهم بعدم البربرة اثناء الاكل..>>>هذا اذا قعدت معهم..

17- من هو أول عضو تتوقع أن يرد على هالمقابلة ؟
اكيد انتي لانك انت راح تنزليه..او يمكن اخي الحصاد..لانه ما شالله عليه متابع ممتاز لكل جديد بالمنتدى..

18- عضو تحرص تقراء مواضيعه؟فيه كثييييييييييير اعضاء تعجبني مواضيعهم..ومنهم:قمر تمير,صدى التاريخ,هيمان,السنافي,ندى....الخ

19- عضو تحرص تقراء ردوده ؟الحصاد..لان رده يكون جديد مو مكرر ومنسوخ..

20- عضو أذا شفته راد ماتفكر تقراء رده؟
ما فيه عضو ما اقرا رده..خصوصا لما اكون انا كاتبة الموضوع..
لكن لو مو انا اللي كتبت الموضوع والموضوع ليس محل للنقاش..فانا لا اقرا ردود اي عضو
مكررة..

21- عضو تتمنى انك تعرف اسمه شخصياً و ماقدرت ؟مافيه ...لانه ما يهمني اسمه الشخصي..كثر ما يهمني كتاباته ورده..كان من كان..

22- وأخر عرفته؟
فيه كثير خصوصا ممن كانوا في المهرجان..لكن الان لو تسألوني منهم ما ادري..لانه هذا مو من اهتماماتي..

23- عضو تحرص انه مايعرفك؟مافيه...مشرفه واعتقد اني معروفة لدى الكل..

24-اكله تتمنى تعرف شلون تسويها ؟امممممممممممم....مافيه..ما عندي هوايه للطبخ.يكفي الاكل..
لكن اذا اشتدت الحاجة..فالطبخة هي اسكالوب الدجاج..

25-مكان في البيت تحب تدخله وشو وليش ؟
طبعا اكيد غرفتي...مكان الراحة والوناسة والنووووووووووووم..

26-عضو تتمنى رجعته وفقدته ؟فيه كثيييييير اعضاء فقداناهم..بذكر اللي تحضرني اسمائهم:ام رحموني,ام توتو,كرم..

26-مكان في البيت ما تحب تدخله وليش؟البدروم(القبو)..لاني اخاف منه وما احبه الا في الشتاء..

27-عضو تقدره في المنتدى وبماذا تلقبه ؟حيرتوني!!!
كثير اعضاء في المنتدى اقدرهم ..طبعا الادارة في المقدمة والمراقبين والمشرفين دون استثناء..
والقبهم بخلية النحل التي تسعى جاهدة في مصلحة الخلية..
اما من الاعضاء:والله محتااااااااارة كلهم فيهم الخير والبركة,,,

سووووووري ع الاطالة..بس تعرفون الفلسفة زينه..ههههههه

يووووووووه

موتيني من الضحك يا رقة الماضي

اجل متوزية بالدولاب ؛؛ وتاكلين حلاو ؛؛؛ ( نفس اللي كنت اسويه بس كنت اكل سكر في غير رمضان )

و الا عصافير بطنك اللي تصوي ؛؛ يكفي يكفي مير ماتفهم هالعصافير

بس تبين الصدق ؛؛

اشونك ماتسوقين كان وش يفك الناس منك عند الاشارة >>>>>>> طايره ه ه و تقطعينها

على العموم اشكرك على السؤال 19 شكله مدح او هو مدح

والله وسعتي صدري ع هالفجر

والشكر وصول للاخت قمر تمير على هالمقابلة المميزة

تحياتي

تكفوووووووووووون وشو سكالوب الدجااااااااج

والله اجابات قوووووية وفيها دبلوماااسية

عيني عليكم بااااااارده

ولو تعرفين تجاوبين صح مهو مثلي


مشكووووووووووووووورين





سلام

رقة
في الدالوب
يقولون البنات على نياتهم
القطو وهو القطو (من أمهر المخلوقات في التخفي )مايطري عليه الدالوب
ليت أختك صكت عليك (مادامت معزومة ) وخذت المفتاح معها
ويمكن تجلس للسحور بعد
وش رايكم في العنوان يصلح رواية
وأخيرا أشكركم على المقابلة الممتعة
العالمي

اخي الحصاد مشكور على ردك وطلتك واكيد رقة الماضي ضيفه خفيفت الدم والظل

اخي هادي

شرفنا مرورك وردك

وياهلا بك

العالمي

كم ابهجني ردكم ومروركم

ويا هلا

فرسان المنتدى

غطا على فرسان القناة الاولى

وخاصة اليوم

بردود رقة الماضي

الا وشو سكالبو الدجاج ؟؟

هلا والله بحكم انكم ما عرفتو الاسكالوب
فممكن تزورون هاالرابط تلاقون فيه الاسكالوب

http://www.tumaer.com/vb/showthread....8067#post78067

الإخوة
طلعتونا من الدالوب للمطبخ
أختي قمر
خلو الرابط مايفتح الا في الليل
لاتخربو الصيام
ترى هيمان نفسه ضعيفة على الريح
العالمي