يناديني باسم غيري ,غلط باسمي خمس مرات

20 / 10 / 2011, 05 : 01 AM

يناديني باسم غيري ,غلط باسمي خمس مرات
مره قال ياطيبه تعالي قربي لميني

ومره قال يانوره وينك ليه هالغيبات
ترا والله بعدك طال وانتي حيل وحشتيني

ومره قال يا هاجر ارحمي من بحبك مات
كيف الحب يصفالك ويرضى انك تخليني

ومره قال يا ساره فديت عيونك الحلوات
بنظره وحده من شفتك أسرتيني وسحرتيني

ومره قال يا اشواق شوقي زاد بي الآهات
فديتك يالغلا كله بحبك لي تلوميني؟

سألته من هي ذي نوره وضاعت منه الكلمات
قال لحظه يا عمري دقيقة بس سمعيني

قلت اصبر على غدرك وارضى بقسمتي بسكات
شسوي وحبك الغادر سكن داخل شرايني

تلعثم في حكيه وضاع, قامت ترتجف الشفاة
قال ارجوك يا حبي ترا انتي ظلمتيني

قلت احكي وقول الصدق تراه الصدق هو منجاة
احذر تكذب بحكيك ان كنت بالحيل تغليني

قال الصدق يا روحي هذا ماضي-ن- وفات
مراهق كنت في صغري ادور حب يسليني

طفل العب بحوش الدار وشفت بدارنا طفلات
حلوه جت تزور اختي , طيبه بنت جيراني

كبرت ورحت متوسط يمها مدرسة بنات
لمحت نويره بالهده ,صرخت وقلت عفستيني

ومره وانا متضايق , شبكت النت دخلت الشات
هاجر نكها يلفت , وسوالفها لعبت فيني

كبرت اكثر وزاد الشوق وساره زينة الزينات
بفرع المنطقه شفتها أجمل ما رأت عيني

ومره رحت أنا للسوق مع حَمود بوقذيلات
لمحت اشواق في مطعم , بنظرتها تناديني

ماض-ن- راح من مده , دفنته في قبر أموات
لكن زلت لساني , رجيت أنج تِعِذريني

انسي هذي الغلطه , وانسي كل هالزلات
قدرك أكبر بقلبي , انتي فرحة سنيني

انتي حلمي الأجمل , لقيت بحضنك البسمات
لقيت الفرحه بعيونك,باحساسك ملكتيني

قلت ابشر يا بوعيالي ,بنسى ماضي الغلطات
ماهو بيدي هذا الشي , خوفي لا تخليني

بلاني ربي بزوج-ن- حياته كلها هفوات
بعد عشرة خمس سنين , باسم خمسه يناديني

ياخوفي بالسنه الجايه , تناديني يا فرَحات
تقول هذي بنهر النيل , شفتها وسحرت عيني !