مواقف طريفة

هذه مواقف الواقع من احد الاشخاص يتحدث على نفسه ولغيره..


1-موقف ما راح انساه كنت داخل مسجد وقت المغرب ومتأخر والامام يقرا في سورة بعد ما خلص من الفاتحة وكان الميكرفون متعطل المهم دخلت متحمس وبالحق على الصلاة معهم الا وعلى دخلتي اسمع الامام يقول (ضالين ) وانا على دخلتي كبرت وقلت آمين .. الا واللي في الصف الاخير ماتوا من الضحك وقطعوا صلاتهم .. وانا احسب الامام في الفاتحه وهو يقرا سورة ثانية .. وسكت الامام شوي وكأن وده يضحك .. واناما علي قاصر ضحكت معهم المضحك اني كنت متحمس ...

2-تقول كنا في مكة ايام الحج وكانت خيمتنا في مكان مرتفع بعيد عن سيـارات الماء .. ذهب أخوي يجيب ( ثلـج) وجاب قطعة كبيرة شايلها فوق كتفه ثم جت ثنتين من خواتي الصغـار بيساعدونه على إنزال الثلج وكان حريص .. بحيث انه لف قطعة الثلج بإحرامه اللي على كتفه حتى ماتثـلـج ( تبرد) يدين خواتي المهم خواتي سحبوا إحرامه ( السفلي ) بدلا من اللي فوق اللي فيه الثلج .. وبسرعة ... طاح الإحرام وطاح الثلج .. وطاحوا أخواتي من الضحك....

3-واحد تزوج على زوجته ( ومن الحرة اللي فيها )... جت في ليلة عرسة خذت ثيابه اللي بيلبسها
ومسحت عليها قشر برشوم " والبرشوم فاكهه لها اشواك رهيبة وماتنشاف

4-اتصلوا علينا المطار قالوا ترى شغالتكم وصلت .. وعلى شان نفتك من تفويض استلام رحت بنفسي أخذ الشغاله .. المهم وصلت المطار وخذات الشغالة بطبيعة الحال معها شنطه فيها ملابسها .. استلمت الشغاله وطلعنا للسيارة فتحت الشنطه على شان تحط شنطتها .. تفاجأت ... أن الشغاله مدت رجلها بتركب في الشنطه قدام العالم .. وانا ما مسكت نفسي ما قلت لها لا قعدت اضحك وما مسكت نفسي وقمت أشر لها على شان تنزل والعالم تضحك .. المهم في الاخير نزلت من الشنطه .. بس بعد ما كل الموجودين جاهم مسيل الدمووع من الضحك

5-فيه وحده من القديم تستحي مرة مرة .. ولما تزوجت كانت تستحي حتى تتكلم مع زوجها .. وكانوا الحريم يلومونها على هالحياء الزايد ويقولون لها لازم تحكين مع زوجك و تمزحين معه تدفينه بيدك مثلاً .. وصممت هالمرأة على كسر هالحاجز من الحياء الزايد ... ومرة من المرات هي وزوجها بالسطح يوم جاء الزوج بينزل مع الدرج ألا وهي تسرع وتدفه ( تدفعه ) وهي تبسم .. تدحرج المسكين وترن ترن مع هالدرج الى ان وصل آخر درجة وهو بعد ما استوعب وش اللي صــــــار …

6-وحده يوم عرسها بعد ما خلصت من التجميل والتسريحة .. يوم جت تطلع على الحريم والرزة على المنصة .. شافت بعض ( الحمرة ) في يدها دخلت تغسل يدها وفتحت الحنفية .. ومـادرت الا والدش يصب على راسها !!

7-فيه وحده تقول في اول ايام زواجي طلب مني زوجي ان افتح له علبة بيبسي .. وبغيت احرك الجو بشي من الفرفشة .. قمت وفتحت العلبة قدام وجهه و… يا للهول طاااااااش البيبسي على وجه وملابسه والجدار .. وانا مع خوفي جتني حاله هستيرية من الضحك وانا اشوف هالموقف ..

8-وفيه وحده بعد تقول في الاسبوع الاول من زواجي حلمت اني العب مع اخواني وقام اخوي الصغير واخذ شي من اغراضي وقمت الحقه حتى مسكته وقمت اضربه واصفقه .. يوم توقظت لقيت اني اضرب زوجي !!

9-وحده تقول قبل المغرب كانت امي تامرنا بفتح الشبابيك حتى يطلع الذباب برا … ومرة من الايام سالت المعلمة : لماذا نفتح النوافذ في منازلنا ؟ ورفعت اختي الصغيرة يدها ، وقالت وهي متحمسة : علشان نطرد الذباب يا استاذه !!!

10-وحده تقول كانت اختي جالسة عند التلفزيون أثناء استعراض برامج الغد وجاء في العرض ( ثم نقدم لكم نشرة الاخبار المصورة الثالثة والاخيرة فرحت اختي مرة وراحت لامي : يمه يمه الحمد لله خلصنا من الاخبار بكرة الحلقة الاخيرة

11-واحد من الاطفال سمع كثير عن الدش ومخاطرة .. وانه فاسد وحرام .. وكان عند احد معارفهم ( دش ) وهالطفل ما يعرف وش هو بالظبط .. فقال : ال فلان عندهم دش اللي يغسل منه يصير كافر ..

12-تقول احد المدرسات ان طالبة في الاول الابتدائي كانت بنتا للفراشة اللي في المدرسة … ولدت ام هالبنت وكانت بعض المدرسات مجتمعين عند مديرة المدرسة ( هدى ) .. نادوا البنت و سألوها عن حال امها ؟ وش جابت ؟ قالت هالبنت جابت امي بنت وتقول امي بنسميها ( المديرة ) .. وكانت تقصد بنسميها هدى !!!

13-وحده تقول كانوا جيراننا من اهل القصيم .. اشترينا مرة تمر قصيمي من النوع الـسكري .. وقام ولدي ياكل منه ويقول ايه علشان اصير قصيمي مثل ولد جيراننا .. وبعد شوي سمعته يردد : فيه فيه .. وسالته وش فيه ؟ قال : اقول فيه .. ليش ما صرت اقول : بـوه …

14-هذا مره بجامعة الملك سعود, أبواب الجامعه الخارجيه للكليات زجاج , المهم في ذلك اليوم الاغبر,,كان عندي محاضرات من الصبح الى الساعه 2 الظهر,,طلعت من المحاضره الساعه 2 دايخ وماشوف شي اتجهت للباب الخارجي ,,,ماشي طبيعي وما دريت الا ذاك الصوت طعععععع ,الا يوم صدمت الباب الخارجي الزجاج بوجهي,,شلون مادري والله نسيته,,طاح العقال والكتب واحتست والخشم راح فيها,,التفت الا السكيورتيه ميتين من الضـحك,,,جمعت اغراضي وغادرت الموقع فوراً

15 ..فيه وحده .تقول لي موقف مبكي ومضحك في نفس الوقت..الزمان عيدالاضحى المكان الراشد مول في الخبر...كنت اتسوق انا والوالده..وكان المكان مزحوم بشكل مش طبيعي اختكم كاشخه بنفسها وماشيه يارض انهدي محدش قدي المهم كنا في الطابق الثالث..امي اقترحت ان ننزل بالمصعد لكني صممت النزوول بالسلم الكهربائي وما ان حطيت رجلي على بداية السلم الا ياعروبه عينك ماتشوف الا النورززاتقلبت من اوله الي اخره...طبعا العبايه في جهه والغطابجهه والشنطه اعطاني اياها واحد جزاه الله خير مادري وين لقاها امي سوت نفسها ماتعرفني واتبرت مني..المهم وسط ذهول المتفرجين جاتني نوبة ضحك هستيريه..الظاهر من الفشله..بدل من البكاء...

16-يوم زواجي ... (يازينه من ذكرى) كان معي كرسيدا جي ال اكس 86 .. قال الخال (اخو الوالدة.. ذاك توه مابعد صار خال) ابعطيك سيارة مرسيدس من حقات المعرض تكشخ به كم يوم .. قلت زين، المهم اتفقنا انه يوقف الشبح عند بيت أهل المره، يوم جينا نطلع.. ركبنا .. دورت اللي يفتح الحبات .. مالقيته.. فتحته بيدي، يوم ركبنا .. شغلت السيارة (اشوى.. الحمدلله) .. بس بحلت أدور أزرار الأنوار.. ومرة تشتغل المساحات .. ومرة حبات البيبان (لقيتهن..) ومرة .. وبعد مشقة لقيته، المهم .. جينا للمشي .. كان قدم السيارة صندوق زبالة بلاستك كبير .. يعني مالها إلا وراء... يالله عاد وين الريوس؟؟ ومحاولة .. وثانية وعاشرة … ومافيه فايده… حتى توكلت على الله وصدمت صندوق الزبالة ومشيت قدام … ويسره ربك…. المهم إن المره دريت إن السيارة مهب لي .. بدليل عدم معرفتي كيف تعمل، وكنت محرج بلحيل خاصة اني استحي قوة… بس ربك هونها علي يوم اني دريت عقب ثلاثة أيام ان فستان العرس كانت متسلفته من بنت خالته … وقالت خل نرجعه، قلت الحمدلله مافي حدا أحسن من حدا

17-وحده تقول موقف عادي يصير لي دايم لاني صراحه قرويه ومشفوحه مره رايحين لشقق مفروشه انا والاهل وامير ندخل العصنصير من هالباب واجي اقابل الباب واتكي على الجدار المقابل للباب ويوقف اللفت " وراني كل شوي لي اشم " المهم يوم وقف الاليفاتور" كشخه؟؟" قمنا نستنى نستنى مارضى يفتح الباب ونقعد نحوس انا اوخوي بالباب نبي نفكه غصب …...... اخر شي يوم جيت اتكي على الجدار الي وراي صار الباب يفتح من جهه ويطلع للدور الثاني ويفتح من الجهه المقابله والله انواع الفشايل الناس يتفرجون علينا وحنا معطينهم ضهرنا ونشتغل بالجدار ذاك احد فهم شي؟؟

18-وحده تقول قبل كم سنة وما راح انساه مرة رحت المكتبة ونزلت من السيارة وشريت مجلة المهم من حماسي على قرايتها صرت اقراها وانا طالعة من المكتبة وانا منسجمة مع المجلة دخلت السيارة وقعدت اقرا الا السواق يطق قزازة السيارة وناظرت القزازة الثانية الا صاحب السيارة مبتسم وطبعا استحيت من هالموقف مرة ما كان لي داعي ابدا وارجو انه ما في احد تعرض لهاموقف المحرج

19-يوم زواجي حصل لي موقف عجيب جداً ،، تزوجنا انا وخوي في نفس الليلة والحمد لله كانت أختين المهم في اخر ليلة الزواج طبعاً انا بأخذ زوجتي واخوي بياخذ زوجته وكل منا بيروح الفندق حصل لبس وركبت معي زوجة اخوي !! المهم انا ماعرفت ومشيت من عند قاعة الافراح وهاتك سوالف وكلام طبعاً افكر انها زوجتي شوي قالت انت عبدالعزيز قلت لا نوره اضحك عليها شوي الا وهي جد قالت اقلك انت عبدالعزيز قلت لا ( واختبصت وصار وجهي قوس قزح ) وعرفت انها مو زوجتي رديتها واخذت زوجتي ، ركبت معي زوجتي وقالت لي ليش تسوي هالحركة الباااااايخة قلت وش يعرفني انها ماهي انتي (( قالت وتقولها بعد بسرعة نسيتني )) وشوي قلبت غيره وش قلت لها وليه كلمتها و.و.و.حتى عرفت انا غيوره جداً

20-وحده تقول كنت في العطلة الصيفية الماضية ما أظن أنساه أبد بس عاد لاحد يضحك كنت رايحة إلى الراشد ومعي بنت خالتي وأخوي وكنا في الدور الثاني على ما أظن المهم كان قبالي محل عبد الصمد القرشي ومابين إحنا واقفين ما أدري وش كنا ننتظر سرحت شوي وكنت أناظر لوحة المحل وأقراها طبعا الكل يتابع الجزيرة وبرنامج الإتجاه المعاكس في ذاك الوقت برعاية نفس الشركة والي يتذكر الدعاية راح يضحك علي المهم قريت بصوت مرتفع بعض الشيء اللوحة وكان مكتوب فيها عبد الصمد القرشي للعود والعنبر والعطور وكملت على موجب الدعاية إلي كنت أسمعها في الجزيرة نبع له جزور وما أنزل عيوني عن اللوحة إلا وألاقي المحاسب الي في المحل ميت من الضحك على خبالي ويحاول يكتم الضحك لدرجة تغير لون وجه طبعا أنا كنت في قمة الإحراج ودي الارض تنشق وتبلعني وأخوي أستغرب الضحك ووسألني وش مسوية أنحشت بالأول من المكان لأنه أخونا المحاسب ماسكت أبد وخبرت أخوي بالقصة وخلاني مهزله للصغير والكبير ماخلا أحد في البيت ماضحكه علي هذا الي حصل مسكينة رنين والله ضحكو عليها

21-وحده تقول كنت فى السنه الثاني ثانوي كنت راجعه من المدرسه تعبانه ونمت عشان بكرة على اختبار مرة مهم وصعب المهم نمت ولااحد صحاني ماصحيت الا الساعه سته الصباح مربوكه ونازله من الدرج اصيح ليش مااحد صحاني لقيت وحده من الشغالات جالسه فى الصالون تحت تتفرج على التلفزيون الصباح صرخ عليها ليش انا خلاص بسقط بالامتحان النهائي ياويلي المهم انا اصيح قلت خلاص انا برسب فى الماده اكيد والشغاله تناظرني مرتاعه وانا اقول لها روحي انتي السبب طبعا لااحد يلومني انا منفعله شوي المهم طلعت لغرفتي وتفرجت شوي على الكتاب وانا ارتجف من الخوف والبس مريولي والم شعري واطلع اركض لقيت السيارة عند الباب طلعت فيها وناديت على السواق وقلت له روح للمدرسه والشغاله تناظرني بعين وهي مستغربه شوي والا اسمع صوت اذان والجو ظلام ولااستوعبت الجو الا الساعه كانت سته المغرب وماما طالعه تركت الشغاله عندى وانا نايمه خايفه على وبعدها طحت على الكرسي في السيارة وشغلت السيارة وجلست اذاكر فيها وكانت احلى مذاكرة لي في حياتى ونجحت في ماده الاب امتياز

22-قبل سنين مضت أيام الطفولة كنت أنا والشباب نلعب في الشارع واحد من الشوارع الضيقة عندنا كورة طبعاً المهم شاتها واحد من العيال وراحت في بيت مهجور كان سكانه من العمالة الأجنبية المهم اخوك الملقوف سوى فيها عنترة وحاول يفتح الباب بحرفنه وفعلا فتحته ودخلت أبي الكورة ولما حنيت ظهري لأخذ الكورة غيمت علي سحابة ما أدري من طلعت رفعت راسي وإذا ذا الزول اللي مايدخل من باب المجلس- وهو يمسك كتفي. جلست أتعتع بالكلام ..والله مادريت إنك ساكن هنا والله ما أسويها مرة ثانية والله والله ... الزول اللي يجازيه بالخير قلي آخر مرة أنا يوم سمعت الكلمة صاروخ وعين ماتشوف إلا غباري

23- المواقف كثيرة الله لا يعيدها مثـل واحد الليلة رايح لمستشفى الحرس الوطني وأرضية المستشفى توهم ماسحينها بمطهرات ويتزحلق ويطيح على ظهره ويقعد يضحك (من الحياء طبعا) ويجتمعون عليه الناس واللي يسمي عليه واللي يضحك.. وهو من الفشيلة يتبسم بوجيه خلق الله ويقول " ماتعورت والله..عادي "...(تراه مو أنا ولا ظهري يعورني ولا شيء.

اسف على الاطاله (منقول)

تحياتي وتقديري

يعطيك العااافية يالغاااااالي !!!!

تحيااااتي

والله سواااااااالفك ما تنمل

مشكور يالغالي



سلام

هههههههههههههههه

والله سوالف رووووووعة..

تسلم اخي مغاط جابر..

ننتظر جديدك..

تحياتي,,,,,