أزمـــــة مــواعيـــن

وحده يتسلف زوجها الف ريال ويحطها على راتبه الــ 2500 ريال عشان يشتري لها جهاز اي فون ويروح هالزوج يتسلف لتغطيه مصاريف بيته وعياله الى نهاية الشهر

والثانيه راتبها فوق الــ 15 الف ريال وصايرتن مثل مندوب المشتريات بالجهات الحكوميه لو تشري لعيالها عصير بالسوق جت لزوجها وقالت عطني انا شريت لعيالك بها الكثر .. !! فهي تجيد استخدام النصوص القرآنيه الكريمه فيما يعود لصالحها

وتعتبر أن الانفاق عليها جزءً من تحقيق كرامتها وتنفيذٌ لقوله تعالي (وَلِلرِّجَالِ عَلَيْهِنَّ دَرَجَةٌ) وقوله سبحانه : (الرِّجَالُ قَوَّامُونَ عَلَى النِّسَاء بِمَا فَضَّلَ اللّهُ بَعْضَهُمْ عَلَى بَعْضٍ وَبِمَا أَنفَقُواْ مِنْ أَمْوَالِهِمْ ) ولايمر شهر الا تقول لزوجها عطني مصروفي ومصروف عيالك وياويلك يالزوج لو تبدي تذمرك ولا تتهمها بالبخل لانها بترد عليك على طول استدلالاً بها النصوص الشرعيه

..

وبادئ ذي بدء ولكي لايطمر علينا من يتهمنا بمعاداة المرأه لكي يلوي عنق الموضوع ويمسكنا جاده اخرى ساقول مستعينا بالله : كلامنا عن ظاهره معينه وموجوده على ارض الواقع ولاحد ينكرها وكلامنا عنها لايعني عدم وجود نماذج اخرى عكس ماذكرنا فاركدوا بارك الله فيكم ..

المهم نرجع لمحورنا عن الجبروت النسائي المغلف بالاستكانه .. ان الزوج المسكين ضايع بالطوشه ان قصر والله معطيه قالوا بخيل وان عطى وهو حاله ضعيف قالوا خبل ( وراغبتن عليه الحرمه ) والاكيد انه لو عطي حلاله وماله كله وعلى مدار سنين عديده وقصر يوم واحد راح تهب فيه وتقوله ( ماعمري شفت منك خير ابد ) يعني ماعندها مشكله تمسح تاريخه الحاتمي معها كله بثواني..

بعض الحريم من تطلع للدنيا لابد ان تحط قدامها نموذج او كائنه حيه اخرى تتجاكر معها وطبعا يختلف نوع المجاكر حسب العمر وباختلاف العمر يختلف مضمون المجاكر .. فمن هي طفله تتجاكر مع باقي الاطفال من بنات عماتها او خالاتها على العابها وان عندها العروسه الفلانيه واللعبه الفلانيه وبعد ماتكبر شوي يكون المجاكر في الشباشب تكرمون مدري وش سبب اهتمام المراهقات بالشباشب واضف اليها نوع الجوال وبعد ماتزوج وترزق باطفال ينتقل المجاكر لحياتها الزوجيه وبيتها والسفر وعاده مايكون هالشي في اول الحياه الزوجيه ويستمر لغاية اواخر الثلاثينات وبعد مايكبرون العيال .. وحتى في الكوره والتشجيع تلقاها ماتدري وش الكوره ولا وين ربي حاطها وتقولك اشجع الهلال ( مع الخيل ياشقراء ) بحكم ان اغلب جماهير الهلال من العنصر النسائي والمراهقات تحديداً ، وانها تسمع من البنات انهم هلاليات وتبي تشبب عمرهاوتسوي صغيره فتقولك هلاليه .. بعكس الجمهور النصراوي اللي اغلب مشجعينه ناس ناضجه وراكده

وتوصل لمرحله الاربعينات والخمسينات ( سبحان الله مشغلهن الله بكل مرحله عمريه الله ربنا وربهن ) هنا تنتقل ساحات المجاكر والتنافس لميادين اخرى منها المطبخ والمواعين وترامس القهوه والحافظات فالمرأه في الاربعينات والخمسينات قمة غرامها شي اسمه مواعين وأطقم دلال ولا اباريق ولا طقم ببالات وفنجايل .. ولايمر اسبوع الا هي طامره للسباله والا العويس وطاقتن لها ترامس جديده ولا حافظات ولا طقم صين ولا ميلامين .. ونستطيع ربط هالاهتمام بالمواعين بها المرحله بسن اليأس ففي هالعمر ماتقدر على الانجاب او الظهور مثل ماكانت في العشرينات والثلاثينات ولها السبب تتحول بقدرة قادر لانسانه تقدر المواعين

ويمتد هذا التنافس المحموم حتى في الستينات والسبعينات عند العجايز وينحصر عادة في المداحم في صلاة التراويح هذا مكاني .. لا هذا مكانتس .. ولا في أجلة الصلاة

ولاتستغرب لو دخلت مصلي النساء في صلاة التراويح وشفت فراغ بين كل وحده والثانيه يمديك توقف فيه هايلكس .. فكل وحده منهن نفسها بخشمها ومتمسكه بمكانها ولامزحزحها عنه شي

ولدي مونــسّ

تسعى المرأه دائما لخلق عدو وهمي لها او تخصيص عدو افتراضي سواء من الاقارب او الاصدقاء او الجيران والغرض منه رمي مشاكلها النفسيه عليه او الصحيه يعني دائما وفي حال تعبت أو أوجعها شي ولو كان صداع سرعان ماترمي الكره في مرمي العين والحسد وإنها منظوره وإن اللي فيها نفس ولا عين فلانه عقب ماشافتها في عرس الفلان ..( والعرس اصلا رايحن ثلاث ارباعه كله تخزخز ومن الحضور كافه ) وهالربط بين العين والمشاكل الصحيه مستمر وملازم لكل الفئات العمريه النسائيه .. والمصيبه لاجاك بـزرها متبقطتن خدوده من العافيـه ماشاء الله ولاجـت عنـد احــد قالـت ( والله ولدي مونس ماعاد ياكل !!) وهو لو تحــط قدامه وجبـة مــاك رمّها بقراطيسها ..<< بس يقالك تطفي العيون عنه وين تطفين العيون وانتي مثل اللي تسد لها مدخل سياره بعلبة ببسي

وفي عالم السحر والشعوذه للاسف اكثر المتعاملات فيه نساء واكثر مايستخدمنه اما لتفريق او لمحبه . وهن لو يجي طاري هالسحر عندهن كل وحده نفضت جيبها ( إسم الله علينا إسم الله علينا )..

ولو افترضت ان اسباب العين موجوده ( والعين حق ) وكانت أحد أهم هالاسباب هي الزواجات هل تتوقعون مقاطعتهن لهذه الزواجات ؟ .. مستحيل

لأن اتوقع لو أجتمع الانس والجن لمنعها من حضور زواج ماقووها

اضف عليها انه بحرمانهن من حضور هالزواجات سيحرمن من مايصاحبها من احداث ومشاوير ومشاغل وروحات وجيات واستديو تحليلي بعد كل زواج >> اهم شي

وعجيبات هالحريم كيف كل وحده منهم مدهره عشان تكون اللي مامثلها احد في ذيك المناسبه وبالاخير تشكي اصابتها بالعين وش له تروحين طيب ؟

العين حق ولكن ماهو ترمي كل مشاكلك على العين وحسد الاخرين لك .. تلقى من تقول فيني عين ماتحُصّن نفسها بالاذكار و بعيده عن ربها وربما هي نفسها دايم ماتحكي بالناس وتتعرض لهم

مدري وش السر للان في غرابه مجتمعنا فحنا غير بكل شي

فالمرأه تحس وانت تشوف بعض المشاهد والتصرفات انها ماتقدر تسد فمها ابد

فكم من ناقله لتفاصيل مايدور ببيتها عند الزميلات والصديقات

وكم من ناقله لتفاصيل بيت زميله او صديقه وثقت فيها واخبرتها عن مشكله زوجيه تمر بها

لدرجه بعضهن تحس محلوفن عليها ماتكتم سر

كفانا الله وياكم وأمة محمد صلى الله عليه وسلم أجمعين شر العين والحسد والسحر ونسأل الله جل في عُلاه ان يرفع عن كل مُبتلى آمين

على الهامش

ترسل احداهن لبدايه

زوجي مهمل بيته وعياله ونايم وهي مخليه زوجها وقاعدتن تراسل القناه الساعه 2 بالليل

والسؤال التقليدي المحوم للتسبد اللي ماتمر دقيقه الا تشوفه على شريط الرسايل

يابنات اخر مره جتني الــ................ متي يكون موعد ولادتي ؟؟

اعتقد ان قناة بدايه اكبر مثال على غرابة بعض هالحريم يعني هل نساء العالم العربي ماعندهن تلفونات يرسلن ؟؟

ام ان اغلب نساء العالم العربي والخليج سعوديات !!

آخـر كــلام

شرديني ..اتبعيني

وزعيني في تضاريس الثواني

في محطات .. ومواني

اهدمي مجدي اللي ضمنّته

ملايين المعاني

احرقي خيمة حناني

شرديني

شردي طيور الأماني

اجبري ايامي ترحل عن زماني

غيري طعم القصايد في لساني

شرديني

اتبعيني

أنا بيتي هناك في اللاشي مكاني ..

وبــس ..

يعآفيك ربي ~
ونآآ معك شآآت قنآه بدآيه..
من جد شي تأأفهه وآقل من تآآفه..
ولا وحدهـ ترسل<< ولدي طآآح وانفقش رأأسه ايش اسوي ~~ ولا تقول ولدي شرب زجآآجة عطر شسوووي من جد شي يقهههر وش هالبروود والبيآخه...
وآلبآآقي الله يستر ~

آخوك ~
آلجرح آرحم

موضوع يونس ويضحك

المشكله ان عدد القنوات التلفزيونيه كل يوم يزداد والمتابعين سعوديين مهما تنوعت توجهاتها

المتابعين سعوديين ... ما شاء الله عليهم وكأن ما عندهم شي غير متابعة التلفزيون ...!!!

ومن جد ما عندهم شي غير متابعة التلفزيون :)

وقناة بداية ممولها الدسم هو سيدات محدودات الثقافة وكثيرات اللقافة
وفي المقابل القنوات الشعرية والنعرات القبلية يمولها ضعاف العقول ملىء الجيوب
من الرجال اللي اصلا ماعندهم ما عندهم ثقافة واتحدى يمر مسج من غير خطأ إملائي

المهم موضوعك حلو واسلوبك احلى ولو انه استفزازي للحريم

تسلم الأنامل يا شواق

اقتباس: المشاركة الأصلية كتبت بواسطة الجرح ارحم    يعآفيك ربي ~ ونآآ معك شآآت قنآه بدآيه.. من جد شي تأأفهه وآقل من تآآفه.. ولا وحدهـ ترسل<< ولدي طآآح وانفقش رأأسه ايش اسوي ~~ ولا تقول ولدي شرب زجآآجة عطر شسوووي من جد شي يقهههر وش هالبروود والبيآخه... وآلبآآقي الله يستر ~ آخوك ~ آلجرح آرحم

هلابك اخوي .. مثل هالمسجات تخليك ودك تكسر التلفزيون وتحسّر على مثل هالعقليات
شاكر لك هالحضور والتعليق

من جد أنا معك
ولكن كنك قسيت
شوي على الحريم
ترى فيه رجال نفس
هالعقليه وبدون زعل
ومشكور وننتظرا بداعك القادم

طرح مميــــــــز جدآ
وآسلوب آكثر من رآئع ..
آعجبني آسلوب آلطرح كثيرآً..
بصرآحه يآشوآق جبتـهـآ صح ..~
كل كلـآمك وآقعي ..~
آحييك على روحك آلمرحه وقلمك آلنآدر ..
...................{كل آلود}

,

السلام علييكم ,
بقدر مـ أدخل موضوعكَ روُح المرحَ على نفسيّ وآضحكني كثييراً ولآمس الـ وآقعية ,
لكنني آبقى آمرأة آخذتنيّ الحمية العصبية
لكنني أومن بـ الديمقراطية , آويد كلُ كلمة ذكرتهآ فعلاً تبقى إهتمآمآت المرأة سطحية جداً لآ أدري لمآذا ..!؟
آم لسببَ أن المرأة هذي هي حيآتها منزلهآ .. لبسهآ .. أولادهآ .. لاتدخل في اشيآء كبييرة تحتآج الى عمق تفكيير ,
لآن الرجل هو من تولى هـ آلمسولية وترك لها فرآغ آصبحت تسدة بـ هذه الآهتمآمات ِ
لكنَ هنآكِ نسآء عظيمآتِ يتميزنُ بحنكة وتفكيير قد يكونونْ 20% , لكنهم يبقونَ فخراً للمرأة
منهم من تحملتِ مسولية أبنآئها , وكافحت الحياة مع زوج مهمل لبيتة , أو مدمن لـ مخدارتِ صارعتِ الحياة وعاشتِ ,
منهن من ترملتِ صغيرة وآخذت دور الأم والأب لآبنائها وكافحتِ لتربيهم ,
كم أن هنآك من جانبَ اخر آو خلنآ نقول 40% من الرجآل في هذا الوقت أصبح إهتمآماتة وتفكييرة بشكله ومظهره أكثر من المرأة
ونرآه في شباب هذا الوقت بكثثرة ,

سلمت َ ,

_

تسلم اخوي على الموضوع الرائع فعلا اخي كلامك سليم وبصراحة انا ارى المراة الخليجة عموما والسعودية خصوصا تحتاج لدورات تثقيفية في الحياة الزوجية والاهم تثقيف للمرأة الموظفة في كيفية التعامل مع الراتب لأن والله اكثر نساءنا يروح راتبها الضعيفة على خررررررابيط0000000

اقتباس: المشاركة الأصلية كتبت بواسطة المتميزة 26    موضوع يونس ويضحك المشكله ان عدد القنوات التلفزيونيه كل يوم يزداد والمتابعين سعوديين مهما تنوعت توجهاتها المتابعين سعوديين ... ما شاء الله عليهم وكأن ما عندهم شي غير متابعة التلفزيون ...!!! ومن جد ما عندهم شي غير متابعة التلفزيون :) وقناة بداية ممولها الدسم هو سيدات محدودات الثقافة وكثيرات اللقافة وفي المقابل القنوات الشعرية والنعرات القبلية يمولها ضعاف العقول ملىء الجيوب من الرجال اللي اصلا ماعندهم ما عندهم ثقافة واتحدى يمر مسج من غير خطأ إملائي المهم موضوعك حلو واسلوبك احلى ولو انه استفزازي للحريم تسلم الأنامل يا شواق

للاسف فيهن متعلمات وطالبات ومن كل فئات المجتمع ..

اشكر لك طلتك يالمتميزه

اقتباس: المشاركة الأصلية كتبت بواسطة جنون الورد    من جد أنا معك ولكن كنك قسيت شوي على الحريم ترى فيه رجال نفس هالعقليه وبدون زعل ومشكور وننتظرا بداعك القادم

هالحين وش دخل الرجال بالسالفه
ادري ماهم خالين ويبلهم من يفرد لهم موضوع خاص فيهم ولكن كلامنا عن هالظاهره محل الموضوع
البارح وحده تقول الفزعه ولدي طالبين منه ثلاث مواضيع للإذاعه ؟؟
يعني عجزت لاتشغل مخها وتجيب موضوع لولدها ..
دمت بخير