رثاء في فقد من احب

قصيدة رثاء في من أحبها قلبي وكانت مثل والدتي انها خالتي وشقيقة والدتي والتي حاولت فيها مخاطبة والدتي ولكنها رفضت الاستماع إلى أي بيت في رثاء شقيقتها في الوقت الحاضر


يمه ترى مــــــاقدر الـرب صاير

والعبد ماله عـــــن تدابــير مولاه

يمه غدا وقتك كثـــــــير الغــباير

والحزن خيم ما تفـــيد المواســاة

يمه على فرحـك نسوق البـــشاير

بس الحزن لازم نشوفه ونـقـــراه

يمه مصيبتنا بـــــها الفكر حايــــر

راح العـزيز اللي عزيزن بممشاه

الصبح طيب مــفرحــــن كل زاير

والعصر عينه ودعت كل من جاه

ودعك يا دنيا القهــــر والحسايـــر

واقبل على ربـــــن طمعنا برحماه

يا رب صبـرنا بـكــتـــــــه النظاير

والقلب جرحه نازفـــــــن ماقويناه

نبكيه صبح وليل والدمــــــع حاير

وكل العرب تبكيه من فعــــل يمناه

شفت الحزن في القلب والوقت جاير

وفي المقبــــــــره بانت ساعة دفناه

ومن يوم حطـــوه وبدا الترب ثاير

وحطوا نصايب قبـــره وبان مثواه
شبت بقلبــــي نار مـثل السعـــــاير

وأبعدت عن ناسي وريقي نشف ماه

وجوني يعـــــزوني وعينــي تساير

مالي جدا حتى البكاء صرت مااقواه

يا خالتي عـقـبــك نثرنا العــــــباير

وآهـــــــــات قلبي ما توقف لها آه

والختم ربي عالمــــن بالــضماير

يسكنـــه بالفردوس بأعلى علاياه

حمد بن إبراهيم العثمان

اقتباس: يمه على فرحـك نسوق البـــشاير بس الحزن لازم نشوفه ونـقـــراه

شكرا يابوعاصم على هالقصيدة الجميلة والنظم الجيد
وعسى الله يرحم خالتك واموات المسلمين ويعظم اجر امك واهل الفقيدة وذويها

صح لسآنك على القصيده المؤثره
وعظم الله أجركم وغفر الله لهآوجمعكم بها في الفردوس الأعلى ... .
والله يخلي لكم الوآلده ويطول بعمرهآ على طآعته ..

جزاك الله خير اخوي على القصيدة جدا مؤثرة
والله يغفر لها ويرحمها ويخلي لنا الوالده ويطول في عمرها

عظم الله أجركم وغفر الله لها ..
والله يخلي لكم الوالده ويطول بعمرها ..

رثائيةٌ مؤثرة ومشاعرُ صادقة
جادت بها قريحة شاعرٍ عذب
غفرالله للفقيدة وأسكنها فسيح الجنان
بوركتَ وبورك حرفك ودام ألقك
تقديري

آمين
آمين
آمين

قصيده لآمست المشاعر
صح الله لسانك ... ورحم الله خالتكَ ... واسكنهآ الفردوس الأعلى

اقتباس: المشاركة الأصلية كتبت بواسطة المدرس    الصبح طيب مــفرحــــن كل زاير والعصر عينه ودعت كل من جاه

قصيده مؤثره ومشاعر صادقه
الله يغفر لها ويرحمها وعظم الله اجركم

الله يرحمها ويغفر لها ،
والله يخلي لكم الوالده ويخليها لنا ويطول بعمرها .

قصيدة مؤثرة

رحم الله خالتك رحمة واسعة

وامد الله والدتك بصحه والعافيه وطولت العمر