ساره " تذكرني بـ"خالد" 00 السياري في قصيدة باكية !!

ساره " تذكرني بـ"خالد" 00 السياري في قصيدة باكية !!

--------------------------------------------------------------------------------

بسم الله الرحمن الرحيم

حمدا لله وصلاة وسلاما على النبي المصطفى 00 أما بعد 00

000000000000

000000000000



فيروي هذه الرواية الراوية محمد الشرهان وبلهجته العامية حيث يقول : هذا الشاعر عبدالله محمد السياري له اولاد أكبرهم خالد كما ان له إخوان هو الشاعر عبدالله واكبرمنه ناصر والباقين أصغر منه ، الحاصل ان عبدالله السياري ولده خالد درس وتعلم وتخرج من الجامعه كان الولد وجه رجال يملأ عينك في الكلام وفي الحديث وفي الفهم ، يملأ عين اللي يقابله وكان يعني من غير قصور بالباقين كان هو واجهتهم هو الواجهه لهالبيت هذا ولهالعائلة وكان محبوب ودمث الاخلاق وحبيب وطيب وشاعر ويميز الكلام وقرأ الرجاجيل ويعرفهم ، ويعرف الأشخاص اللي هو يقابلهم كلن يعطية على حسب مقامه ، تعلم ودرس وتخرج من الجامعه وتعيّن واستمر وعقب فترة تزوج ولما تزوج ومضى على زواجه في حدود أربعة أشهر أخذ له بيت بجنب اهله وقام يأثث بالبيت هذا ويجهزه على أساس يبي ينتقل فيه بزوجته ، وكان الولد هذا الله يرحمه الظاهر مركب له صمام في القلب يوم انه صغير ويجوز انه ما لاحظ أو ما أعار الاهتمام لحكاية الصمام هذا ومتابعته والأعمار بيد الله سبحانه ، الحاصل انه يعني صاير وش أقول عنه ولد حبيب تتعب وانت تقول رجل ودمث الأخلاق وطيب وسمح البال ودائما كل الناس تحبه وكل الناس تقدره ، يقول ابوه يحكي علينا ان الولد صار يأثث بالبيت وهذا ينزله وهذا يجيبه وهذا كذا وهذا كذا ويمكن تعب بالشيل والحط ، ( أنا والله شايفه الله يرحمه قبل وفاته يمكن بيوم بيومين شايفه مقابلني ومسلم علي عقب المغرب مسولف عليّ ومعلمني عن تأثيثه للبيت وان مابقي له إلا شيئ بسيط مقابلني انا شخصيا ومهرجه لأن هو من أعز اصدقائي اللي اعتز بهم) فيوم من الأيام وأنا في العمل عقب هالكلام بيومين مادريت إلا يتصل عليّ واحد بالتلفون قال لي ( خالد يطلبك الحل)، كيف؟ قال: نعم البارح ، جيت عاد سألت ابوه في العزاء ، قلت وشلون؟ قال: والله ابد حنا متجمعين ومسولفين ومتعشين ذيك الليلة ماعندنا خلاف سرى من عندنا الساعة 12 رايح لغرفته فوق وقعد هو ويا زوجته 00إلا يوم نادى زوجته قال: يامره، قالت : نعم
قال: نادي ابوي وامي ناديهم
قالت : وش تبي بهم
قال: ناديهم ابهرجهم بسرعة ناديهم كنه يبدو عليه التعب والارهاق ، راحت الحرمه ونادتهم وجو وقعدوا عنده ابوه وعمه ووالدته ، بعد والدته ماشاء الله عليه جيده وتتحمل ، فتقابلوا عنده وش فيك وانا ابوك سلامات بسم الله عليك عسى ماشر ، قال والله يابوي كني احس روحي إنّي أنا مانا بنشيط لكن ابوصيك وصاة ياابوي ، اول شيئ أبطلب منكم أنت يابوي وعمي ووالدتي مادامكم حاضرين عندي ، إنكم تحللوني وتدعون لي بالخير ، أنا والله ما أدري عن روحي ، لكن بأوصيكم وصاة لاتنسونها المره هذي (اللي هي زوجته طبعا) تعرفون انها على وشك ضنا لكن ان جاني ولد سموه على جدي وان جاني بنت سموها على والدتي وانا أبيكم تحللوني ان كان بادر مني شيئ وتبيحوني ، أحس ان روحي إني مانا بالحيل ، ويوم روعهم بالكلام ذا المهم أسرع من قولة ياراشد يوم بردت رجليه ويديه ويوم طاح عليهم يتلون يبونه يوم طاح بينهم يفوق شوي يوم طلعت روحه وتوفى ركضوا فيه بالمستشفى إلا ما فيه فايده قالوا مات الولد ، المهم راحوا به دفن الولد وتوفى الله يغفر له لكن قعدت الجرايد يجي شهر أو أزود وهي تنشر مرثيات عنه ، وحتى اللي مايعرفه وشاف غيره يقصد قصد فيه ، راحت الأيام تفرقوا الناس والمره راحت اهلها وبعد فترة أضنت المره ، وجابت هاك البنية اللي مصلصلة اشباهها عليه ( سبحان الله ) جابت هاك البنية والبنية قعدت عندهم ، فزت البنية صار عمرها ثلاث سنين قاموا يزورونها اهلها اللي هم جدانها إلا جاء يوم الجمعه أو يوم الخميس جابوها عندهم ومن محبتهم لها عندهم عيال واجد غيرها لكن من محبتهم لها ومحبتهم لأبوها قبل يغلون البنية هذي يلبسونها زين ويدارون خاطرها يكدون شعرها يكحلون عيونها يحطون عليها خماخم يزينونها يلاحظونها يلبسونها الذهب الزين مدلـله ، كل يقول تعالي ياامي عندي تعالي يابنتي عندي تعالي ، والا البنية ذكية ومنتبهه بس ماتدري من هو ابوها من هذولا كل من قال لها تعالي يابنتي عندي تحسبه ابوها فبعد ما مضى فترة هالمده ثلاث سنوات أو اربع سنين الجرح اللي في كبد السياري عبدالله بعد وفاة ابنه مثل جرح القاطب اللي ماتبين ماتبينه العبره ولا تبين الشيء الا عقب هالفترة ذا وخاصة الا جت هالبنية عندهم وشافها لا شاف هالبنت هذي تأثر ما عاد يصبر راح صد ركب سيارة عنده ونيت مصفّح راح ودوّر له جبل ولا شيئ متعلي وراح فيه إلين تهلهل عيونه من البكا ويطلع اللي في خاطره ويعود ولهذا عبّر عن هالحاله بالأبيات هذي والحقيقة انها حزينة وهذه من جودتها ومن قوتها وابيكم تدعون له ولموتى المسلمين بالجنة الله يغفر له وللجميع يقول :


متي مالعباير ضيقت صدري المشحون
ونوت عيني الحرّى تنثر عبايرها
ركبت المصفح مبعد الهقوة المامون
وتنزحت بعيون على الصبر عاسرها
تنحرت لي رجم على الوادي المصيون
تعلّيت به والعين جابت ذخايرها
على فقد(خالد) ونتي ونة المطون
تكض العيون الدمع والحزن حاشرها
أنا أظني أحيا مابقالي وأنا محزون
من الصدمة اللي رب الأرباب خابرها
إلا شفت ساره تدّرج بينهم بالهون
تعثر وتنهض وأقشر الحظ عاثرها
تنادي ببابا مادرت ذخرها مدفون
تعلق بمن شافت وتنخى عشايرها
تنحيت عنهم وأسبلت عيني المخزون
اطمّن وألدّ بناظري لا يناظرها
وإلا خف حزني صحت ياربعنا تكفون
على الكبد حطّوها تطفي سعايرها
هلا مرحبا ياكل عمري ونون النون
ضنا من خياله شايفه في نواظرها
أنا اشم ريحه فيك لو قيل لي مجنون
عيون الخلي لو نامت الليل عاذرها


0


ارجو ان يكون في هذه القصة والقصيدة العبرة عن الدنيا الفانية وتفيد في يقظة القلوب 0





انتهى ،،،



حقيقة قصيدة جد مؤثرة !

مشكووور على هذا النشاااط

مشكووووور بريبره على الاختيار


سلام

فعل قصة مؤثرة
يعطيك ياخوى ماقصرت

فعل قصة مؤثرة
يعطيك ياخوى ماقصرت

ومؤثره

مشكووور اخوووي على القصه الرائعه...