رحلتي إلى لندن & بيروت شعبان 1431هـ

اليوم / الأثنين 7/ 8/ 1431هــ

خط السير : الرياض – جده – لندن – بيروت – الرياض

موعد الاقلاع : الساعه 2.10 فجراً

بعرج قليلا على موقف صار لي في مطار جده فموعد وصولي لها كان في 8 م ورحلتي للندن 2 الفجر وفيه جلسه يمكن 6 ساعات فقررت اطلع من المطار لاي كوفي شوب قريب من المطار اتكي فيه لين يجي موعد الرحله ومن الفهاوه الزايده يوم نزلت من الطياره لقطت شنطه ماهي لي ( تشابه شنطتي الخالق الناطق ) <<< احسب والله العالم ماصنعت الا لي هالشنطه ، خاصه انه في مطار الرياض ماحط لي التاق المعروف في الشحن الجوي حطي شريط آخر المهم اني مادققت ولقطت الشنطه وطلعت من المطار . رحت لكوفي يبعد 10 دقايق عن المطار وصليت المغرب والعشاء وعقبها رحت لطاولتي وتكيت وطلبت وتعشيت وتقهويت وهات ياشواهي شربتها ذاك اليوم .. يوم جت الساعه 12 وصار باقي ساعتين على الرحله قلت الحين الوقت حلو اني اروح المطار وانا طالع من الكوفي وانا امسك الشنطه بفتحها بطلع منها غرض ، وانا اوزي يدي الا طالع لي شيله وانا اللي اوزيها بعمق الا طالع لي ملابس نسائيه وانا انخبص ( التفكير الحين اني خذت شنطه ناس جايين عمره وهالحين يمديهم وصلوا مكه وانا باقي لرحلتي ساعتين هذي والله الحاله ) ويرشدني ربي اطالع التاق اللي على الشنطه فيه اسم العايله ورقم الحجز وانا اكلم الخطوط ( الحجز ويرد علي الموظف وانا اللي اخمه بالسالفه قال فيه رقم جوال لاهل هالحجز والشنطه دق عليه وشف ) اتصلت على الجوال اللي عطاني الا يطلع مغلق وادق مره ومرتين وثلاث مغلق وبعد مايئست ارسلت مسج ارجو الاتصال للاهميه .. بها اللحظه وصلت المطار باردن وجهي وافكر في تكليف احد اصدقائي بجده يجي ياخذ شنطه الناس ويكلمهم ياخذ شنطتي ويرسلها لي فديكس ولا شحن ولا مع اي احد رايح لندن .. بها اللحظه دق الجوال وانا اللي ارد الا اهل الشنطه قال اللي مسافرين الاهل رايحين عمره ( يوم قال عمره قامت تصور لي شنطتي بلوبي فندق دار التوحيد ) قال بس خذ رقم اخوي معهم كلمه والا بخليه يدق عليك الحين .. وفعلا بيض الله وجهه شوي الا اخوه يدق قال حنا نزلنا ولا لقينا شنطتنا وشفنا شنطتك بحكم الشبه ولا عليها اسم فاستخرت وفتحتها للتاكد الا يوم دريت انها لواحدن زقرت ماهيب لاهلي ورحت بلغت الخطوط انا فاقدين شنطتنا وسجلنا الجوال وخلينا شنطتك مكانها ( طبعا اكلمه وانا طاير رايح للامتعه اللي ماستلموها اهلها وانا اكلمه الا تطيح عيني علي شنطتي وكنها تقولي وش تحس به وانت لاقط شنطه ماهيب لك طالعن فيها رحت واخذتها ورحت قسم الشحن وسلمت شنطة الناس وقال حنا نتصل بهم يجون يستلمونها ومن باب التاكيد كلمت صاحبها وقلت له ترا سلمت شنطتكم وتلقونها بالمطار والعذر والسموحه منكم ..

تم الحجز للذهاب بتاريخ 19/ يوليو 2010 والعوده في 5 اغسطس على الخطوط السعوديه مع استثناء رحلة لندن – بيروت مع الخطوط البريطانيه

اقلعنا بحفظ الله الساعه 2.10 فجراً

ووصلت للندن بحدود الساعه 6.30 بتوقيت لندن ( الفرق بينا وبينهم ساعتين بالصيف )

الحمد لله تمت الاجراءات بيسر وسهوله وكذلك استلام العفش وهالمره عاد مامشيت الا متاكد من شنطتي وفاتحها خذت التكسي وشغل عداده وللفندق واسمه lanes brough hyde park London كانت تكلفة المشوار بحدود 60 باوند يعني 350 تقريباً طبعا مو من بعد المشوار ولكن التكاسي بشكل عام غاليه عشان كذا يفضل من يروح للندن يستعمل الباصات والا الاندرقراوند وباصات طبعا مرتبه ونظيفه والتذكره ب 2 باوند ( 12 ريال تقريبا ) وسريعه لان الباصات لها مسارات خاصه ماتعطل .

ميزه المنطقه اللي فيها الفندق هي قربها النسبي من جميع المواقع السياحيه بلندن ( الهايد بارك ، شارع اكسفورد ، متجر الهارودز ،اجواروود ( شارع العرب ) ، قصر باكنغهام ، بيق بن ، عين لندن ) طبعا هذا بالمشي وولو انك بتمشي مشي مو سهل ولكن توصلها بالمشي والباص احلى وبالاندرقراوند احسن واحسن ..
البرنامج اليومي كان فيه زياره حديقه الهايد بارك بشكل اساسي يعني يومي وكذلك شارع اكسفورد اما المواقع السياحيه فعلى التساهيل يعني بدون جدوله لاطقت بالراس نصيته .خاصه البيكاديلي والهاردوز ( من شرته قطر من محمد الفايد والظاهر ان كل اهل قطر يجون ينامون فيه )
السياح من كل مكان ومن الخليج خاصه الامارات وقطر والكويت والسعوديين الأقل نسبيا من بين السياح الخليجين .
الجو كان معتدل بالفتره اللي رحت فيها لندن يعني لاحر ولا برد واقرب للبراد من للحر خاصه بالليل ان صرت جالس لك بكوفي مكشوف تقول ( وينك يالفروه وتمنى لو تجيب لك غمر ارطى ولا سمر وتشب فيه ) ..
الشحاذه موجوده خاصه في شارع الاجورود ( شارع العرب ) اما في الاماكن الثانيه فشحاذه مرتبه اما يعزف او يعرض عروض بهلوانيه

مابي اطول عليكم وأتركم مع الصور

الهايد بارك

هنا السياكل لها مسارها وياويلك لو ماتوخر

بحيره فكتوريا

واحلالاه يالشوزل

أكثر مافي الهايد بارك هالسناجب ( من يصيده ولايتعرض له عليه غرامه كبيره )

عين لندن ( London Eye )

العربيه للعود موجود بشارع اكسفورد وبشارع اجور رود

محطه اندرقراوند

البيكاديلي

هذا الهرم حق البريطانيين بري مارك تلقاه في اول شارع الاكسفورد رابع عمارة بعد الهايد بارك ومقابل فندق تيستل ماربل ارتش وكمبرلاند ( انصح من يذهب للندن لزيارته تجد كل حاجتك وباسعار مناسبه جدا وبضاعه جيده )

بعد كم يوم قررت اروح للاوتيلت في قرية بستر
الاوتليت او القرية المخفضة يعني مجمع او مكان تلقى فيه جميع محلات الماركات العالميه بس يكون عليها تخفيض كبير والسبب في التخفيض اما انها تكون موديلات الموسم الماضي وهذا اغلب شي او انها موديلات الموسم الحالي بس يكون البضاعه فيها بعض العيوب .. يعني مثلا زرار طايح ولا خياطه مايله من جهه معينه ولا القطعه فيها شي وغيره طبعا من اشهر مراكز الاوتيلت في اوربا هو الموجود بجنب لندن وبالتحديد في بيستر والقرية هذي موجودة بجنب مدينة اوكسفورد اللي فيها الجامعه العريقة والمعروفة..

تبعد عن لندن مسافة ساعه تقريبا بالقطار .. ويمكن بعد تروحون لها عن طريق الباص..

عشان تاصل للاوتليت تنطلق من محطة قطارات في لندن مثل مارليبورن او بادنقتون لقرية بستر ولما تاصل محطة القطارات في بستر (اسمها بيستر نورث) تاخذ تاكسي (ميني باص) وهي موجودة بكثره هناك راح يوصلك للاوتليت بتقريبا 2 الى 3 باوند ويبعد الاوتليت عن محطة القطارات اقل من خمس دقايق..

هذا الاوتيلت فيه اكثر من 120 محل من جميع الماركات العالمية المشهورة في جميع المجالات زي الملابس النسائية والرجالية وملابس الاطفال والاكسسوارات والشنط .

بعض أشهر الماركات الموجوده هناك:
Bally, Clarks, Timberland, Burberry, D&G, Diesel, Levi's, Dior, DKNY, Calvin Klein, Cerruti 1881, Celine, Dunhill, Donna Karan, Ermenegildo Zegna, Guess, Hugo Boss, Kipling, , Puma,

التخفيض على البضايع الموجودة في الاوتليت هذا يصل الى 60% على مدار السنة

وهذي الصور من الطريق من لندن لبستر

منظر ليلي لعين لندن

متعوب عليها هاللقطه

في الهايد بارك قهوه عقب العصر

.....

رحلة بيروت
موعد الاقلاع 6 م بتوقيت لندن
الخطوط البريطانيه BMI
وصلت مطار هيثرو على الساعه 3 ونص تقريبا وكانت الاجراءات سهله جدا ولكن خفت من احتساب الوزن الزائد ( هناك مايرحمون ويمكن تدفع قيمه الوزن الزايد تعادل قيمه تذكره طيران جديده وحصل لي هالشي سابقا في مطار دوله اوربيه ولكن الحمد لله تبت من ذيك المره فوزعت العفش بشكل مناسب ) وانا رايح بشنطه وراجع بثنتين ولكن الحمد لله تسهلت الامور ..
أقلعنا برعاية الله

ووصلنا بيروت بحدود الساعه 10 ونص مساء والاجراءات بالمطار تمت بسهوله وكان مفترض اخلص بعشر دقايق ولكن ( كان جنبي بالطياره سيده مسنه وساعدتها في تعبئه الاستماره واستلام عفشها ونشبت لي تعزم اسير عليهم )
عاد هالمره كان فيه سائق بانتظاري وهذا ساعدني كثير يعني من الكاونتر واستلام العفش للسياره على طول ( عندهم كداده مثل اللي نشوفهم بمطار الرياض ولكن انصح بالتنسيق وحجز سائق لاستقبالك مسبقا احسن ) .. وللفندق على طول بشارع الحمراء صح وسط البلد زحمه وحر ولكن الفندق كان اكثر من ممتاز ونظيف جدا وراقي

طبعا الزياره اليوميه المجدوله هي السولييدر لفتره مابعد العشاء وهو الشارع الاشهر ببيروت وعليه المقاهي والمطاعم اما فتره مابعد الظهر فهي مفتوحه إما الذهاب لجونيه او طلوع الجبل باتجاه عاليه أو بحمدون
السعوديين غالبيتهم في عاليـــه والكويتين في بحمدون وكانها هذي منطقه سعوديه وهذي منطقه كويتيه .. والاجواء بالجبل طبعا افضل من بيروت من ناحيه انخفاض درجه الحراره ولطافه الجو ..أما الأسعار فغاليه وبشكل مبالغ فيه ..
- انصح من يزور بيروت باستئجار سياره صغيره ( تطلع يوميتها 40دولار ممكن تعادل 150 ريال موديل 2010) وهي افضل طبعا من تكسي ممكن يوديك الجبل ذهاب فقط بنفس هالمبلغ او يمكن ب 60 دولار يعني اذا طلعاتك كثيره ومشاويرك يمكن تدفع 120 دولار باليوم فاستئجار السياره ارحم .. وأما ان كانت مشاويرك محدوده فانصح بصراحه ( بتكسي بيروت ) مكتب خاص وسيارات خاصه فخمه تكلمهم ويرسلون لك السايق بمكانك اللي انت فيه ويقولون لك سعر المشوار قبل ولا فيه مجال للاحتيال وسيارات مرسيدس ولو تبي بانوراما ، اما التاكسي العادي فاغلبهم للاسف شغال استغلال بالخليجيين سواء من ناحية الاسعار او حتى التعامل .

أتركم مع الصور :


الصوره التاليه من مطعم جنة بحمدون

مغارة جعيتا

جونيه

السولييديــر

وحان موعد العوده وكان موعد الاقلاع الساعه 8 بتوقيت بيروت ، هالمره يوم خلصت تسليم العفش الا قدامي شغاله شكلها سيلانيه تصيح طايفتها الرحله وتطلبني اكلم من جوالي على كفيلها اقوله ، قمت كلمته وقلت له ترا شغالتكم راحت عنها الطياره .. شوي الا جايني طاير يجي 20 شغاله مثل وضعها قلت شكل طيار الرحله حقتكم قفلت معه وشغل ومشى فاضي وجهتهم لمكتب الامن بالمطار قلت روحو لهم يسنعونكم وتوجهت للبوابات ( اتذكر دخل وقت المغرب قبل موعد الرحله وحنا جالسين قدام البوابه والمذيع الداخلي للمطار يصدح باغاني فيروز وليييييه هالحين شلون تصلي وهذي تغني واخرتها توكلنا على الله وصلينا وكعادتي اخر من يركب الطياره ( مدري وش هالسر سواء برحله داخليه أو دوليه سواء رحت مبكر ولا متاخر اخر من يركب محاكيكم ) .. اقلعنا بحفظ الله

ووصلت الرياض عند العاشره والنصف مساء ..

اتمنى ينال تقريري المتواضع رضاكم

اخوكم : شواق

رحله سعيدة

شكرأ اخوي شواق رحله سعيدة والله يوفق الجميع

الحمد لله على السلامة يا شواق جيت وجبت الغنايم معك الله ان تحيه وهلابك الف..


والله يا شواق انت فيك مني شوي بس اخر واحد او اول واحد الطياره ماراح تطير على طول بس الواحد يفتك من الزحمه..

وما شاء الله عليك من لندن الى لبنان رحله جميله ورائعه

طيب وراك ما صدت البط او عليه رسوم مخالفه .

تشكر أخوي شواق على هذا التقرير الجميل

جهد متميز وعمل تشكر عليه..

أسأل الله لك التوفيق

الحمد الله على السلامه اخوي شواق
رحله مميزه وتغطيه رائعه
والله يسهل امورك في الرحله الجايه

مشكور اخوي على التصوير المميز
تحياااتي لك
وتستاهل النجوم

اقتباس: المشاركة الأصلية كتبت بواسطة وحش المنتدى    رحله سعيدة

اقتباس: المشاركة الأصلية كتبت بواسطة الشمالي    شكرأ اخوي شواق رحله سعيدة والله يوفق الجميع

الله يحييكم واشكر لكم طلتكم

اقتباس: المشاركة الأصلية كتبت بواسطة أبـوحـمـد    الحمد لله على السلامة يا شواق جيت وجبت الغنايم معك الله ان تحيه وهلابك الف.. والله يا شواق انت فيك مني شوي بس اخر واحد او اول واحد الطياره ماراح تطير على طول بس الواحد يفتك من الزحمه.. وما شاء الله عليك من لندن الى لبنان رحله جميله ورائعه طيب وراك ما صدت البط او عليه رسوم مخالفه . تشكر أخوي شواق على هذا التقرير الجميل جهد متميز وعمل تشكر عليه.. أسأل الله لك التوفيق

ياهلا بك يابو حمد ويسلمك ربي من كل شر اخوي

بالنسبه للطياره .. مرات يزعجونك النداء الاخير ولاجيت تبي تدخل الممر الا العالم طابور والا لو دخلت الا هذا شاطفك وهذا كرسيه وراك وتقوم من مكانك عشان يقعد بس لاصرت الاخير تدخل الا كلن بمكانه

اما البط يابو حمد غرامات وحاله لو تعرض له ..

شاكر لك طلتك يابو حمد وثناءك العطر

أما رحلة لندن .. فعلى ما أعتقد أنها من الرحلات المكلفة ... والاتكيتية .. يعني تبي لها ناس معهم لغة وشغلات مالها سنع ... يعني ما أحس أني بيوم من الأيام أبتواجد في بريطانيا ..

أما بيروت فمناظرها غير وطبيعتها حلوة ...





خصوصاً إذا جت مثل هالصورة ...

رحلة موفقة وبعيدة عن شواربنا يا شواق ..

والحمدلله على السلامة ..

رحلة سعيدة يا شواق

وهذه هي الرحلات ولا بلاش

وكما قال المهند ان هالديار صعبه علينا المرواح لها

حدنا دول الخليج وجاي وان تطورنا رحنا لمصر وسوريا