ما يمنع نشارك الشباب في أمطار الخاتلة والحفنة الاربعاء 21/5/1431

السلام عليكم ورحمة الله وبركاته ..

لقيت لي برنامج رهيب .. يصغر الصور ويكتب عليها ويحط لها إطار .. وشيءً مانعرفه بضغطة زر .. فقلت ليش مانجرب ونشارك الشباب هالفرحة المُطرية ... والجوية ...

كنت طالع العصر يم جهة أم الشقوق .. فيوم وصلت الغراميل شفت سحابة سوداء جنوب عني ... قلت ياولد .. خل ألحق هالسحابة .. ياقربها على الفويلق ..
يوم شفت سيف الرحمة .. قلت جابه الله .. أبلقطه وأرقى عليه .. كودي أشوف السيل وينه فيه .. لكن عجزت آصل له .. كل ماجيت حوله نحاش ..
** أنتم تشوفونه .. عند مراح الإبل ..



** المراد .. عقبت مسحية روضة نورة اللي للخط السريع .. وتعديت الفويلق ... وماش السحاب كل ماله يقص جنوب... فما ردني إلا ديرة يقال لها الخاتلة ..



** سبحان الله .. ما أمداني أدخل هالديرة .. إلا البركة تنزل عليهم .. طاح علينا مطر طيب بالحيل بالحيل ..



** ومشت الشوارع .. ومريت من عند هاللوحة ..



** وطحت لي في شباب .. تحت مظله .. والنعم بهم .. دعوني للقلطة يوم شافوني وحيد .. فشكرتهم ونشدتهم عن درب الطوقي .. ومشيت من عندهم والمرازيم منطلقة ..



** تبينت في علو الديرة من شمال .. على جال طعس .. وعطيتهم لقطة ..



** ظهرت من الديرة على وين .. على وين .. ياولد .. قلت أنا لعبتي الشلالات .. يالله للطوقي .. والدعوة كلها ماء .



** ما تشوف إلا الوبل ... والحزوم والطعوس تمشي من قوة ماشاء الله ..





** هالشعيب في الطريق ... مليان عقب أمس .. ويمشي من الوبل ...



** وهالشباب لقيتهم مغرزين .. وبيّن أن حالتهم حالة ..



** مريت على سرعتي .. روضة الخفس ... وأنا على الطريق العام .. لقيتها طهاة وحدة .. قلت الحمدلله .. مابدهاش أضيع وقت وأنزل .. مابقي إلا عشر ويذن المغرب .. خل ألحق على شلالالالالالات الطوقي ..
جيت للشلالات ... فلقيت ... كل شيء قد فات ... ومن قو الجفاف .. الناس كاشته تحت الكوبري .. وعلى قول القواله .. أنه الظهر يمشي ... والعهدة على الراوي ..



** قلت .. وين أروح ياولد .. وين أروح .. ووين أروح ... العين أظلمت .. وطريقاً جيت معه لاتعود معه .. فقلت يالله للحفنة ..يوم أني أقبلت عليها ... إلا هالحزوم محوله .. من السحابة اللي قبل شوي..



** يوم إني شفت كتبتة الصمان .. خفق قلبي .. توجهت مع الدوار يم الحفنة .. لقيت كل الحزوم صابه على بعضها ...



** المهم وما امداني أتعدى الحفنة .. طلع لي في الصورة ذا التمساح ... مدري وش الله جابه .. أنا رافع لي صورة وطلع لي بدالها .. فما حبيت أني احرمه من الظهور الإعلامي مرة ثانية ..



وفي النهاية ... ترى الدعوة وسعة صدر ... يالله لك الحمد .. ويوم أني شفت تقارير الشباب عن سيول سدير ...اللي ماكتب لي أني أشوفها .. قلت ما يمنع أننا نجرب هالبرنامج الجميل ... ونشارك بموضوع بسيط ..
وتراه ما يستاهل أي تقييم ... أو نجمه ..

شكراً لصبركم ..

أمير وبس

بحروفك وكلماتك وصورك

حتى لو تفيض ولو ما تكتب اي شيء

فانت أمير وبس

دائماً وابداً التميز والروعة هي عنوانك

فلا تنسانا في البرنامج

نسيت يا ابو مهند مدري ليش احب الخاتلة واهلها

هل لطيبتهم ولكرمهم وحسن اخلاقهم امر في ذلك

يعطيك العافيه يالمهند على الصور الى يشرح الصدر

مشكور ويعطيك العافيه

أي والله مايمنع نشوف مثل
جمال هالتقرير الجديد المميز وهذا أول تقرير عن الخاتله

وبيض الله وجهك ولا خيب تعبك
ومبارك عليك هالخير ياملك الرحلات....

أحترامي وتقديري وشوقي لتقاريرك؟

من اللي يمنعك يالمهند؟
انت لوتحط صورة ساقي يمشي عندي كنه نهر النيل.

اقتباس: المشاركة الأصلية كتبت بواسطة المهند    السلام عليكم ورحمة الله وبركاته .. سبحان الله .. ما أمداني أدخل هالديرة .. إلا البركة تنزل عليهم .. طاح علينا مطر طيب بالحيل بالحيل .. ..

سبحان الله كلك بركه يالمهند!!!!انت من يوم تمشي والغمام فوق راسك .ماتجي بكره تسيلنا .

يعطيك العافيه يالمهند على الصور ...

مشا الله الله يجعل فيها البركه ان شاء الله
تسلم اخوي المهند على التقرير المميز والتمساح الي مدري وش جابه
تحياتي لك .

الله يعطيك العافية .... على التقرير المميز أمطار ووناسه وسعة صدر
كل الشكر والتقدير لك على مجهودك الرائع
والله يجعلهآ أمطآر خير وبركه
مآشآء الله على هالمرآزيم مصفوفة صفه جذبت أنتبآهي
بيت وآحد وفيه ستة مرآزيم !!