من وحي الخيال 10

السلام عليكم ورحمة الله وبركاته

هذه القصة كتبتها من زمااااان وكانت بعنوان ( العزيمه )

وشاركت فيها في أحد المسلسلات التلفزيونية لكن ما حصل نصيب لعرضها

وسأطرحها في المنتدى على أجزاء ..


فبسم الله نبدأ ...

الجزء الأول :

مبارك هذا شاب فيه نفس ( يعني فيه حالة نفسيه ) ، أبوه ما خلاّ مستشفى إلا وودا ولده له .. وما ترك دكتور إلاّ وعرض ولده عليه .. ولا طبيب شعبي إلاّ وراح له .. بس ما فيه فايده ..
في مرّة من المرات جاء لبيت أبو مبارك واحد اسمه ( أبو علي ) وهذا من خويا أبو مبارك القديمين.. وخويَّه هذا من زمان ما شافه .. وبعد ما دخل أبو علي في المجلس وجاب أبو مبارك القهوه .. وهم جالسين يتقهوون ..
أبو مبارك : الله يحييك يا أبو علي هذي والله الساعة المباركة إللي شفناك فيها .. وينك يا أخوي من زمانك ما شفناك .. إنقطعت أخبارك مرّه ولا عاد لك حس أبد ..
أبو علي : والله يا أبو مبارك مشاغل هالدنيا .. إللي ما لها أول ولا تالي .. الله يعين عليها ..
وهم قاعدين يسولفون ..دخل عليهم مبارك علشان يسلّم على أبو علي ..
أبو مبارك : هذا ولدي مبارك ..يا أبو علي ..
أبو علي : ما شاء الله .. يالله إصلحه ..جعله أخير من أبوه ..
أبو مبارك : مبارك .. إدخل يا وليدي شف وش يبون أهلك ..
دخل مبارك للبيت .. لاحظ أبو علي إن مبارك عليه قلّ صح ..
أبو علي : يا أبو مبارك .. خير وش في الولد عسى ما شر ؟!! .. كنَّه تعيبان شوي ..
أبو مبارك : والله يا أبو علي .. هالولد مريض شوي .. فيه نفس ..
أبو علي : طيِّب عالجه ؟
أبو مبارك : والله يا أبو علي .. ما خلِّيت دكتور إلا ورحت له وما فيه مستشفى إلاّ وله فيه ملف ..
أبو علي : أنت قريت عليه .. جبت له عزايم وقرايه ؟
أبو مبارك : مير قوارير العزايم في البيت واجده وأكثر ما كثَّر الله هي ..
أبو علي : شف يا أبو مبارك .. أنا عندي لك شور ..
أبو مبارك : عطناه .. شورك وهداية ألله .
أبو علي : فيه عندنا في حارتنا شايبٍ يقرأ .. وتراه مجرَّب ..
أبو مبارك : يا أبو علي .. الشفا من الله .. وهذا لا هوب مقدّم ولا مأخر ..
أبو علي : ما يخالف إنت إعمل بالأسباب والباقي على الله .. أقول لك هذا الرجّال يقرأ في قوارير الموية .. وهو ما ياخذ على القراية شي .. بس أنت جب له قارورة الموية وهو يقرأ فيها.
أبو مبارك : ما يخالف .. على الأقل ( نبري الحسوفة ) و هي إن ما نفعت ما هيب ضارة إن شاء الله .
أبو علي : خلاص إنت مرّ علي باكر عقب الأخير " يعني عقب العشاء " .. وعسى الله ينفع به ..
وقام أبو علي يوصّف لأبو مبارك بيته .. وإتفقوا إن أبو مبارك يمرّ على أبو علي ويروحون لهاالرجَّال علشان يقرا في القارورة إللي بيشتريها أبو مبارك ..
صلَّى أبو مبارك العشاء في المسجد إللي في حارة أبو علي وطبعاً بعد ما إشترى قارورة مويه كبيره ..وشاف أبو علي يكلّم الرجَّال إللي يقرا ..
أبومبارك : السلام عليكم ..
ردّو عليه السلام ..
أبو علي : هذا يا شيخ أبو الولد .. وكودك تقرا له عسى الله ينفع بقرايتك ..
أخذ الشيخ قارورة الموية من أبو مبارك وواعده بكرة علشان ياخذ القارورة .
الشيخ وهو قاعد في بيته يقرأ في قارورة الموية حقت أبو مبارك .. قاموا بزارينه الصغار يلعبون و يتراكضون و يصكّون الأبواب بقوه قام ها الشايب ( وهو معصّب ) يدعي عليهم ويقول ..
الله لا يعافيكم ( تف .. وينفث في القارورة ) .. جعلكم للجني إللي يصقّع فيكم ( تف .. وينفث ) جعلكم للوجع إللي مايهجع ( تف .. وينفث في القارورة ) .. جعلكم للكسر إللي ما يجبر ( تف .. وينفث ) وجعلكم … وجعلكم ( إلى آخره من أدعية الشيبان ).
طبعاً هالشايب من الزعل ما أنتبه للقارورة إللي في يديه أو أنه قاعد يقرأ ..
من بكره راح أبو مبارك للشيخ علشان ياخذ القارورة ..
الشايب : خذ يا وليدي هالقارورة .. وخلّ ولدك يشرب منها وقبل ما ينوم صبّوا نصف ها لقارورة في طشت وخلّوه يطرطش فيه و عسى الله ينفع بها ..
أبو مبارك : جزاك الله خير يا شيخ .. وما قصّرت ..
أخذ أبو مبارك القارورة وراح للبيت ..
ويوم جا اليل ..قام أبو مبارك وشرَّب ولده من الموية المقري فيها وصب نصف القارورة في طشت مثل ما قاله الشيخ ..وقام مبارك يطرطش فيه .. و يصب على جسمه منها ..

وبعد ثلاثة أيام ظهر مفعول العزيمة ..
مبارك وهو نايم قاعد يصايح ..صحا أبوه من النوم ودخل على مبارك في غرفته ..
أبو مبارك : خير .. خير يا وليدي وش فيك ؟
مبارك : والله مدري يبه .. كنّي شفت ناس واجد .. يبون يا خذونّي ..
مبارك شاف وجه أبوه وتخيَّل إنه شبح .. صاح مبارك و إنحاش من الغرفة وأبوه يلاحقة من غرفة لغرفة .. و طلع مبارك من البيت وقاموا أهل الحارة من النوم على إزعاج أبو مبارك وهو يلاحق ولده مبارك قام أهل الحارة يلاحقون مبارك مع أبو مبارك إلين مسكوه وربّطوه .. وقالوا له إن إللي في ولدك جني ولازم تودّيه لواحدٍ يطلّع الجن ..

وقام أبو مبارك ودّا ولده لواحدٍ يطلّع الجن ..
الشيخ : خير وش في الولد ؟
أبو مبارك : أبد يا شيخ بس إنه البارح قام من النوم يصايح و مدري وش فيه ..
قام الشيخ ودخل هو ومبارك في غرفة وسدح مبارك وقعد يطقَّه إلين تكلم الجني إللي فيه ..
الشيخ : من أنت .. وورا ما تظهر من الرجّال ؟
الجني ( بصوت مبارك ) : أنا ما أقدر أطلع من الرجَّال الحين ..
الشيخ : إلاّ بتظهر ولاّ أبحرقك ..
الجني : أنا ما يظهّرني إلا إللي دخَّلني فيه ..
الشيخ : ومنهو إللي قال لك تدخل فيه ؟
الجني : أنا دخلت فيه بقراية شايبٍ .. و ما أطلع منه إلا بقرايه ثانية من الشايب .. وغير كذا ما عندي ولو تسوّي إللي تسوّيه ..
طلع الشيخ من الغرفة وراح لأبو مبارك ..
الشيخ :إنت قاري على ولدك عند أحد ؟!! أو إشتريت عزيمة أو شي زي كذا ؟
أبو مبارك : إيه ياشيخ .. هذا شايبٍ مذكور لي إنه يقرا في عزايم ..
الشيخ : طيّب .. إذا تبي ولدك يطيب لازم تجيب لي عزيمةٍ ثانية مقريٍ فيها من نفس الشايب إللي قرا لك في العزيمة الأوله ..
أبو مبارك : هــيّن .. العزيمة أمرها سهل .. الحين أروح للرجّال وأخلِّيه يقرا لي مرةٍ ثانية .. بس يا شيخ تهقى إن الولد بيطيب .
الشيخ : قل إن شا الله .. الحين رح جب العزيمة والله ييسر الأمر .. وخلّ الولد هنا إلين تجي بس لا تتأخر ..

راح أبو مبارك للشايب و رنّ الجرس .. وطلع عليه ولد صغيِّر ..
أبو مبارك : السلام عليكم .. أبوك فيه يا ولد ؟
الولد : إيه فيه .. من أقول له ؟
أبو مبارك : قل له إللي جاك أمس ..
دخل الولد ينادي أبوه .. وطلع له واحد بس مهوب الشايب إللي شافه أمس ..
راعي البيت : هلا أبوي .. خير آمر ..
أبو مبارك : مسٍّيك بالخير يا لأخو .. بغيب الشايب الله لا يهينك .
راعي البيت : أي شايب الله يحفظك ؟!!!
أبو مبارك : الشايب إللي جيته أمس علشان يقرا لي في قارورة المويه ..
راعي البيت : إيــــــــه .. قصدك " أبو فهد " ..
أبو مبارك : والله مدري هو أبو فهد ولاّ غيره .. بس هو موجود ؟
راعي البيت : هذا الله يسلّمك .. باعني البيت و شدّ .. وهذانا قاعدين نأثث البيت ..
أبو مبارك : أفا .. وين شدّ له ؟
راعي البيت : والله ما ادري و أنا أخوك .. الظاهر إنه راح لديرته ..
أبو مبارك ( متعجّب ) : أي ديره ..وما لقى يبيع بيته إلاّ هالحين .. هو وش ديرته ؟ ..
راعي البيت : والله ما أدري ..
أبو مبارك : طيب .. الله يعطيك العافية ..
راعي البيت : طيب يا الأخو .. إقلط تقهو ..
أبو مبارك : ما نيب في حال قهوه الحين .. خلّني أروح أدوّر على هالشايب ..

راح أبو مبارك لخويه ( أبو علي ) .. لقى أبو علي عند الباب قاعد يصلّح سيارته ..
أبو مبارك : السلام عليكم يا أبو علي ..
أبو علي : هلا والله .. وعليكم السلام ورحمة الله وبركاته ..
أبو مبارك : أقول يا أبو علي .. تذكر الشايب إللي خذنا منه العزيمة ؟.
أبو علي : منهو ..
أبو مبارك : هذا إللي قلت لي عنه إنه مجرَّب ..
أبو علي : إيه .. إيه .. أبو فهد .. وش فيه ؟
أبو مبارك : أنا رحت له في بيته وقالوا لي إنه باع البيت .. ما تدري وين راح ؟
أبو علي : خير وش تبي به ؟
أبو مبارك : والله يا أبو علي مدري وش أقول لك .. ولدي مبارك من عقب هاك العزيمة و حالته متبدّله ..
أبو علي : هاه ما قلت لك إنه مجرَّب .. وإن ولدك بيطيب ..
أبو مبارك : أي مجرّب وأي يطيب .. والولد دخل فيه جني كلَّه بسبت هالشايب وهالقراية الله لا يعيدها من قراية ..
أبو علي : بسم الله علينا .. جنّي ؟!!!! ..
أبو مبارك : إيه جني .. وأبي هالشايب علشان يقرا عليه كوده يطلّع الجني منه .
أبو علي : والله يا أبو مبارك لا تدخّلني في هالأمور .. أمور الجن هذي ما أحبّها ..
أبو مبارك : ما يخالف .. بس أنت قل لي وين ألقى ها الشايب فيه الحين ..
أبو علي : تلقاه في بيته .. وين بتلقاه فيه بعد ..
أبو مبارك : أنا رحت له في بيته وقالوا لي إنه باعه .. ويقولون إنه راح لديرته .. وين ديرته هاذي؟
أبو علي : ديرته ( حفر العتش ) ..
أبو مبارك : طيب وش اسم ها لشايب .
أبو علي : اسمه مشخال المشخال ..
ولأن أبو علي يخاف من الجن مرررررره قال لأبو مبارك : يلَّه مع السلامة أنا مشغول الحين ..

ورجع أبو مبارك لولده مبارك في بيت الشيخ إللي بيطلّع الجني منه .. ووصل لبيت الشيخ .. وطقّ الباب .. طلع عليه الشيخ .. وسلَّم على أبو مبارك وحبّ راس أبو مبارك ( قبَّل راسه ) .. إستغرب أبو مبارك ..
أبو مبارك : خير يا شيخ .. وش فيك ؟
الشيخ : أبد يا يبه ما فيني شي ..
أبو مبارك ( مستغرب ) : هاه .. يبه .. وش يبه هذي ؟!!!!!
طلع له ولده مبارك ..
مبارك : أبشّرك الولد الحين ما فيه إلاّ العافية .. وتقدر تاخذ ولدك ..
الشيخ : يلَّه يبه .. نمشي ؟
أبو مبارك : لحظة أي نمشي .. أنا .. وشلون .. وين .. هالحين وش القصَّه وش السالفة ؟!!!!!!!!!!
أبو مبارك ما يدري إن الشيخ إللي يطلّع الجن فيه جني .. والشيخ وهو قاعد يطلّع الجني إللي في مبارك ..طلع الجني من مبارك ودخل في الشيخ والجني إللي في الشيخ طلع ودخل في مبارك ..
أبو مبارك توهَّق .. وما يدري وش السالفة ..
الشيخ ( إللي هو مبارك ): خير يا يبه .. عسى ما فيك شي ؟
مبارك ( إللي هو الشيخ ): أبوك يا مبارك منصدم عقب ما شافك طيب .. يلَّه يا أبو مبارك تيسروا أنت وولدك والله يحفظكم ..
راح أبو مبارك وولده مبارك ( إللي هو الشيخ ) للبيت وهو ماهوب مصدّق إللي صار..وطول الطريق و مبارك ( إللي هوالشيخ ) ما يناديه إلا ( يبه ) ..و يوم وصلوا للبيت قام مبارك ( إللي هو الشيخ ) بيدخل للبيت ..
أبو مبارك : هيه.. أنت .. وين تبي تدخل ..
مبارك ( إللي هو الشيخ ) : أبي أدخل البيت يا يبه ..
أبو مبارك : لا تقول يبه مره ثانية .. أنا إللي أقول لك يبه مهوب أنت .. أنت أكبر مني .. أقول خلّك في الملحق ..
مبارك ( إللي هو الشيخ ) : الملحق ؟!!! ليه ؟
أبو مبارك : أي ليه .. أنت بعقلك تبيني أدخّلك جوّا البيت ..
مبارك ( إللي هو الشيخ ) : ليه يا يبه .. أنا ما نيب ولدك ؟!!!
أبو مبارك متنرفز : أنت صاحي .. تراني إلى هالحين وأنا ماسك أعصابي ..
مبارك ( إللي هو الشيخ ) : خلاص.. خلاص .. كل شي إلاّ زعلك يا يبه ..
أبو مبارك ( معصّب ): قلت لك لا تقول ( يبه ) ثاني مرَّة ولاّ والله لأصكّك على علباك ..

إحتار أبو مبارك في ها لأمر وصار يضرب أخماس في أسداس ما يدري وش يسوّي هل يدوّر على هالشايب ( أبو فهد ) .. ولاّ يعالج ولده مبارك ( الصدقي ) .. أو يداري هالشيخ إللي صار فجأة أبوه ..

للقصة بقية ..

هههههههههههههه
اما صار الشيخ مبارك ههههههه
رهيبه والله
كمل كمل البااقي ,,,

الجزء الثاني :

عزَّم أبو مبارك إنه يروح لحفر العتش علشان يدوّر على ( أبو فهد ) وطبعاً معه مبارك ( إللي هو الشيخ ) لأنه ما يقدر يخلِّيه في البيت لحاله .. وتوّهم طالعين من الرياض .. صحا الشيخ ( إللي هو مبارك ) ..
الشيخ ( إللي هو مبارك ) : هاه .. وش إللي جابني هنا ؟!! ومن أنت ؟!!
وما صدٌّق أبو مبارك خبر على طول رجع للرياض .. وتوَّه داخل للرياض .. رجع الشيخ لحالته يعني صار مبارك ..
الشيخ ( إللي هو مبارك ) : ليش يا يبه رجعت .. ؟
و صار كل ما طلع من الرياض يرجع الشيخ و مبارك لحالتهم الطبيعية وإن دخل للرياض إنتكست حالتهم ويصير مبارك هو الشيخ .. والشيخ هو مبارك .. و في الأخير .. قرر أبو مبارك إنه يرجع للرياض وياخذ ولده مبارك ( الصدقي ) ويسكن برَّا الرياض .. مادام إن هذي هي الطريقة الوحيدة علشان يرجع وليده مثل أول.. و قام وإشترى بيت في المزاحمية ..
وفعلاً .. رجع أبو مبارك وأخذ ولده مبارك ( الصدقي ) وهو على حالته .. إلين طلعوا من الرياض .. رجع مبارك لحالته الطبيعية ..
وسكن أبو مبارك ومبارك في المزاحمية .. وبعد ثلاثة أسابيع .. عرف أبو مبارك إن أبو جيرانهم هو (أبو فهد )إللي يدوّر عليه أبو مبارك و عرف إنَّه شيَّب وخرَّف و إنتهى أمره .. راح أبو مبارك لأبو فهد وهو قاعد يتشمَّس عقب العصر ..
أبو مبارك : مسيك بالخير يا أبو فهد ؟
أبو فهد : خير من أنت ولدٍ له ؟
أبو مبارك : أنا أبو مبارك ..
أبو فهد : الله يبارك في عميِّرك .. من أنت ولدٍ له ؟
أبو مبارك : أنا أبو مبارك .. جيناك أنا وأبو علي يوم إنك في الرياض علشان تقرا لنا في قارورة موية صحة .. تذكرني ؟
أبو فهد : وشّو .. هااااه .. من أنت ولدٍ له ؟
أبو مبارك : الظاهر إن إللي فيك من دعاوي الناس إللي تقرا لهم ..
أبو فهد : سمّ .. من أنت ولدٍ له ؟
أبو مبارك : عاد أقول لك .. الولد ما فيه إلاّ العافية .. ولا عاد عمرك تقرا لأحد في عزايم ، أنت تفهم ؟..
أبو فهد : هاه .. من أنت ولدٍ له ؟

قام أبو مبارك من عند أبو فهد وهو يتحيسب عليه : حسبي الله عليك من شايب

راح أبو مبارك للدوام ... ويوم رجع الظهر وتوه داخل لبيته .. ويشوف باب المجلس مفتوح
ويدخل أبو مبارك للمجلس ويشوف أبو فهد جالس مع مبارك ومبارك جالس يقهويه وهم مبسوطين مع بعض ..
مبارك : المهم انت يا بو فهد وشلون الجيران اللي نخبرهم هاك الحين .. وش صار عليهم
ابو فهد : والله يا مبارك اني ما اعلم عنهم شي كلن راح في طريق ولا عاد سمعنا عنهم شي

دخل ابو مبارك وسلم عليهم وهو مستغرب من هالصداقه الحميمه اللي بين مبارك وأبو فهد مع إن مبارك ما كان يطلع أبداً برا البيت من يوم ما سكنو في المزاحميه .. و ما شافو بعض وهم في الرياض
ابو مبارك ( بدون نفس ) : حياك الله يا بو فهد .. اشوفك انت ومبارك خويا وش الطاري ؟؟
مبارك : الله يسلمك ابو فهد هذا صديق قديم من قبل ما تجي أنت للدنيا
ابو مبارك مستغرب : نعم ؟؟!!!!!
ابو فهد : اييييييييييه يا مبارك ذكرتاني باللذي مضى
مبارك : إلا على طاري اللذي مضى على قولتك .. وشلون القلبان ( جمع قليب ) اللي انردمت سنة السبله ..

ويستمر مبارك وأبو فهد في سرد الذكرايات الماضيه بينهم .. وأبو مبارك مستغرب من ولده مبارك اللي يعرف أدق تفاصيل الزمان الماضي مع إنه ما عاش فيها ولا حتى ابو مبارك سولف مع مبارك فيها .. وكان مبارك يذكر أسماء أشخاص معروفين في ذاك الزمن ... ابو مبارك يحاول إنه يجيب عامل مشترك يربط بين ولده وبين هالشايب .. قعد يفكر وشلون ولدي مبارك اللي كان انه مريض عنده هالمعلومات الدقيقه عن الماضي اللي ابو مبارك نفسه عاش فيه وما يعرف المعلومات اللي يعرفها ولده مبارك
ابو مبارك حس إنه في عالم ثاني و بدأ يشك إن هاللي يصير قدامه علم مو حلم
ابو مبارك كان جاي للبيت وهو يبغا يرتاح بعد تعب الدوام لكن لقى في البيت تعب اعظم من تعب الدوام .
يحاول أبو مبارك يدخل معهم في الحديث علشان يثبت لنفسه إنه في علم مو حلم
أبو مبارك : ماشالله عليك يا مبارك تعرف هالعلوم كلها وما تسولف لي
مبارك ( بتنهيده ) : إيييييييييييييه وشلون اسولف لك وانت ما بعد جيت للدنيا هاك الحين .. وكنت في بطن أمك
ابو مبارك يناظر في ولده مستغرب : الحين منهو ابو الثاني ؟ كم عمرك وكم عمري خير إن شالله وش هالحتسي انت وياه
ابو فهد : اقول مبارك .. ما عليك منه الحين نبي نروح انا وياك لأبو جاسر انت عارف إنه مريض من خمس سنين وطايحن في فراشه ما يقدر لا يقوم ولا يجلس وعياله ينقوله من مكان لمكان
قام مبارك وابو فهد بيروحون لأبو جاسر ..
ابو مبارك : خير خير إن شالله اشوفها طالت وتشمخت ..
ويلتفت لأبو فهد : أنت يا هالشايب العايب يا كثير المصايب .. من عرفتك و انا ما شفت خير
ابو فهد : أفاااا
مبارك ( بصوت عالي ) : وش فيك انت ما تستحي ؟؟ احترم عمك ابو فهد او عالأقل احترم شيباتي
ابو مبارك : وش شيباته الله يخلف !! ما بعد ظهر لك شنب علشان يطلع لك شيبات وبعدين اشوف لسانك طال .. أقول بس قم يا شايب الشيطان وأقلب وجهك ولا عاد أشوف رقعة وجهك في هالبيت وإن شفتك في هالحاره لأتوطا في بطنك
ويلتفت على ولده مبارك : أنت ادخل البيت وخل هالشايب علي
مبارك ( بصوت عالي ويهز بيديه ): أفاا يا ذا العلم وش أنت تقول يالسلوقي
ابو مبارك : خير ؟؟ وش هالحتسي ؟ انا سلوقي يا للي ما تستحي على وجهك ؟!!!
ابو فهد : ماعليه يا مبارك خله توه صغير لا تحط عقلك بعقله
ابو مبارك ( قفلت معه ) : اسمع انت وياه .. انقلعو في اللي ما يحفظكم .. وان شفتك يا مبارك مقبل على باب البيت بتشوف علم ما يسرك .

طلع مبارك وأبو فهد من البيت .. وجلس أبو مبارك لوحده في المنزل يفكر في مصير إبنه الوحيد

للقصة بقية

والله مدري وش اقول وش هالقصة الخيالية وهي فعلا خيالية
اتوقع انها حلم
بإنتضار الجزء القادم

كمل كمل كمل

قلبت رآسي هالقصه
بأنتظار تكملتهآ عشآن يتعدل رآسي هههههههههههه

الجزء الثالث :

أبو مبارك جالس في البيت ضايق صدره وخايف على ولده مبارك وحاس بتأنيب الضمير بطرد مبارك من البيت غصب عنه لأن مبارك رفع صوته عليه و تكلم عليه .

مبارك وأبو فهد جالسين في المشراق .. مبارك ممد رجليه و معه عصا يتركا عليها في الممشى
ابو فهد : إلا قلي الحين وش بتسوي يوم طردك هالهيس الأربد من البيت
مبارك : والله أني ما اعلم يا بو فهد .. عيال هالوقت ما يشوفون لأبوهم ولا أمهم قدر
أبو فهد : إي والله أنك صادق هالزمن الواحد يتمنى إنه غاذي كلب ولا يغذي ولد .. الكلب تلقاه حولك وحواليك وما يخليك .. صدق من قال إن الكلاب أوفى من بعض من لبس الثياب .

أبو مبارك يكلم أبو علي بالجوال :
ابو مبارك : يا بو علي الله يرحم والديك فكني من هالورطه اللي نشبتني فيها
ابو علي : يا بن الحلال هونها وتهون و انت عارف عيال هاليومين من تطلع له شعرتن في وجهه إلا ويصدق إنه رجال
ابو مبارك : السالفه مهيب سالفة شعر ولا رجوله .. السالفه اكبر
ابو علي : وشلون ؟؟!!
ابو مبارك : انا الحين متصل عليك علشان تعلمني وشلون مهوب تسألني
ابو علي : طيب ازهله انا اشوف لك واحدن يقرأ في قواريــ .......
ابو مبارك بخووف وصراخ : لااااااااا الله يرحم لي والديك ... فكنا من العزايم والقرايه و مدري وش باقي خرابيطك
ابو علي : استغفر الله يا بو مبارك .. تقول عن القرآن خرابيط ؟؟
ابو مبارك : القرآن مو خرابيط بس اللي يقرأ القرآن لازم إنه يعرف وش اللي له وش اللي عليه اصلاً هاك الرجال اللي قالو لي انه يطلع جن صار دجال و الله العالم إنه ساحر .. سحر وليدي ولعب في حسبته حسبي الله عليك وعليه
أبو علي : يا بو مبارك ترا الموضوع ما ياصل للدعى وانا اخوك
ابو مبارك ( بعصبيه ) : اجل وش تاصل له يا وجه النكبه ؟؟ ولدي انهبل وصار يخرف وحالته مثل أول وأكثر وتقول ما تاصل !!
ابو علي : انا بجي للمزاحميه وأشوف ابو فهد وهو بيعرفني لأنه جار وبشوف وش السالفه
ابو مبارك : إيه تكفى يا بو علي أبي اعرف وش اللي قاعد يصير .. والله يابو علي ان اللي صار اغرب من الخيال ..
ابو علي : طيب ما يخالف يا بو مبارك ان شالله اجي باتسر وما يكون إلا خير
ابو مبارك : على خير أن شالله ... فمان الله
ابو علي : فمان الكريم

وتنتهي المحادثه اللي بين ابو مبارك وابو علي ..

يدخل مبارك للبيت وأبو مبارك توه حاط الجوال على الطاوله بعد ما خلص مكالمته مع ابو علي ويسلم مبارك : السلام عليكم
ابو مبارك ( مستانس شوي لأن مبارك رجع ) : وعليكم السلام .. أنا ما قلت لك لا عاد تدخل البيت ؟!
مبارك : إيه ما يخالف إذا أنا مت أورثني هاك الحين
ابو مبارك ( مطير عيونه )
مبارك : لا تقعد تطير عيونك .. تبي تارثني بالحيا انت ؟!! نعنبو ابليسك لا تصيبك عقوبه بعقوقك لأبوك
ابو مبارك ( بياخذه على قد عقله ) : أقول خلاص بس رح ادخل غرفتك وباتسر يصير خير
مبارك ( بغضب ): ليه ما جيت تحب راس ابوك ؟؟
ابو مبارك ( بتنهد وتأفف ) : أوووووووووووف إنا لله وإنا إليه راجعون .. من اللي مسلطك علي ؟!!
مبارك ( يهز راسه ) : ماش انت ما تربيت والظاهر أني بألين ظهرك بالخيزرانه اللي انت خابر
ابو مبارك ( في نفسه ) يقول : وش خيزرانته بعد !! ابحب راسه وأعطيه على قد عقله
قام ابو مبارك يحب راس ولده مبارك : وهذي حبة راس يا بوي والعذر والسموحه
مبارك : بعدي والله .. هذا خبري فيك رجال وتعرف قدر ابوك
ابو مبارك : إيه مايخالف بس انت رح لغرفتك وما يكون إلا خير
مبارك : وش فيك مطولن لسانك علي عند ابو فهد ؟؟
ابو مبارك ( يبغا الفكه ) : اسف يا يبه انا غلطان واذا تبي اروح الحين احب راس ابو فهد وأستسمح منه
مبارك : الله يصلحك يا وليدي .. وش انا ابي منك ؟؟ والله ما ابي منك ريال ولا ابيك تصرف علي ..بس ابيك تتعلم المرجله وتحترم إللي اكبر منك
ابو مبارك وده ينقلع مبارك عنه : طيب خلاص الله يرحم والديك رح ارتح الحين .. انت رجال كبير في السن وفيك الرماتيز وما تستحمل الوقفه
مبارك : إي و الله انك صادق .. ابروح اتمغط في الغرفه .. وبيجي ابو فهد .. قلطه في المجلس وجب له القهوه
ابو مبارك ( بعصبيه ) : وش يجيب هالشايب بعد !!
مبارك : خير !! اشوفك للحين ما استادبت ولا غديت رجال
ابو مبارك : طيب خلاص خلاص ابقلطه وبصب له القهوه وأهمز رجليه بعد
مبارك : لا وش تهمز رجليه جعل يهمزك ابليس .. تعال همز رجليني انا

ابو مبارك ومبارك في الغرفه .. ومبارك منسدح على الفراش وأبوه قاعد يهمز رجلينه .
مبارك : أهمز شوي شوي جعل يهمزك الشيطان
ابو مبارك يتأفف و يستمر في التهميز

سمعو الباب يطق
مبارك : قم يا مبارك شف من اللي عند الباب .. هذا اكيد انه ابو فهد

يروح ابو مبارك يفتح الباب .. بعد ما فتح الباب كان ابو فهد عند الباب ويبتسم
ابو فهد : ابوك فيه يا ولد
ابو مبارك ( بعصبيه ) : ولد في عينك يا شايب الشيطان
ابو فهد : الشرهه مهيب عليك يا قليل الأدب الشرهه على الشايب اللي داخل اللي ما رباك

مبارك من داخل البيت بصوت عالي : من اللي عند الباب ؟؟

ابو مبارك : هذا ابو فهد

يجي مبارك ويقلّط أبو فهد في المجلس ..ويجلس الثلاثه في المجلس
مبارك لأبوه : قم يا ولد جب القهوه

ابو مبارك يناظر لأبو فهد وده يتوطا في بطنه ويقوم وهو يتأفف ويطلع من المجلس بيجيب القهوه

ابو فهد ( بصوت واطي ) : وش صار عليك ؟!! تبي تروح ؟
مبارك : والله مدري يا بو فهد.. انت خابر الولد بلحاله في البيت وما اقدر أسافر وأخليه
ابو فهد : ولدك رجال ويقدر يجلس لحاله ومهوب ماكله الذيب .. انت وسع صدرك وخلنا نسافر لهالديره الطيبه ونشوف الدنيا
مبارك : تهقا تسذا ؟
أبو فهد : تسيف أهقا وأهقا بعد

يدخل مبارك ومعه القهوه ويحطها على الطاوله ويروح يجلس .
مبارك: وراك جلست جعلك للحروال .. قم صب القهوه جعل يديك للكسر

قام ابو مبارك يصب القهوه وهو يلعن اليوم اللي عرف فيه ابو فهد ويلعن البقاله اللي اشترى منها قارورة الصحه وقاعد يلعن في الطيب في أصل ابو علي لأنه و سبب هالبلاوي

ابو مبارك صب فنجال .. ومده لأبو فهد
أبو فهد : عط أبوك اول
مد ابو مبارك الفنجال لمبارك
مبارك : عط عمك عمت عيونك بلا
رجع بالفنجال لأبو فهد
ابو فهد : اذا صرت في مجلس وتصب قهوه أول ما تبدى إبد بأبوك قهوه وبعدين اللي عنده .. عط ابوك
يرجع الفنجال لمبارك
مبارك: الضيف في حكم المضيف وانا اقولك تقهو يا بو فهد
ابو فهد : ابداً ما اشرب قهوتن قبلك يالصاحب

قفلت مع ابو مبارك : اسمعو انت وياه تراني صبرت عليكم .. اما واحد فيكم ياخذ الفنجال ولا ترا بكب الفنجال والدله عليك انت وياه
اخذ ابو فهد الفنجال .. وقام ابو مبارك وصب فنجال ثاني واعطاه مبارك

ابو فهد : إلا وش رايك بس ناخذ ولدك معنا بدال ما تخليه لحاله ؟!!
مبارك : لا وش نبي فيه إلا نخليه ينطق هنا ويذاكر وراه مدرسه ومذاكره

ابو مبارك : على وين العزم ان شالله ؟!!
مبارك يصرّف الموضوع : اقول هاك ريال ورح اشتر ببسيه ومالك بهالأمور
مبارك يدور في جيوبه على فلوس مالقى
مبارك : خلاص رح لكومار راعي البقاله اللي قدامنا وقل له يعطيك ويقيدها في النوته مثل كل مره
ابو مبارك ( مستغرب ) : كل مره ؟!!
مبارك : انت رح له وبيعطيك ان شالله يالله عاد رح وانا ابوك لا توقف فوق راسي كنك جني
ابو فهد : رح الله يصلحك واسمع كلام ابوك

طلع ابو مبارك وجلس عند باب المجلس يتصنت عليهم يبغا يسمعهم وش يقولون ..

ابو فهد : المهم .. هاه وش قلتا تبي تروح ولا اشوف غيرك بس
مبارك معصب : راحت روحك بلا .. على طول لقيت لك خوي بدالي
ابو فهد : وش اسوي فيك عجزت فيك اقولك خلنا نروح وانت متعذر لي بهالبزر اللي عندك

ابو مبارك يسمع كلام ابو فهد ويقول في نفسه : انا بزر يا شيبة عرعر ؟!! هين اوريك

مبارك : لا تقول بزر .. تراه رجال الله يصلحه

ابو مبارك يسمع كلام مبارك ويقول في نفسه : كفوووو وليدي ما خاب ظني فيك

مبارك : وهالديره وشلون ينراح لها ؟؟
ابو فهد : ينراح لها مع طريق الشرقيه .. وبعدين نطلع جسر مدري وش يقاله .. وكلها 25 كيلو إلا وحنا في وسط الديره

ابو مبارك يسمع كلامهم ويقول في نفسه : اخس يااهالشايب تبي تخرب أبوي قصدي ولدي وتخليه يدشر معك للبحرين يالعربيد .. هين أن قاله الله لأكسر رجليك من عتبة هالدار ان شالله

أبو مبارك جالس في البيت ... يرن الجوال :
ابو مبارك : هلااا والله أبو علي .. وينك ياخي ؟!! قسم بالله غثوني هالشياب اللي عندي
ابو علي : أي شياب ؟!!
ابو مبارك : قصدي ابو فهد الشايب و ولدي مبارك
ابو علي ( يضحك ) : وخليت ولدك شايب ؟؟
ابو مبارك : بلاك والله ما شفت اللي انا شفته منه .. نعنبو بليسه تقول كنه ابوي صدق
ابو علي : المهم انا الحين في المزاحميه وما ادل البيت ...وين بيتك فيه ؟؟
ابو مبارك : انت وينك فيه
ابو علي : انا عند مدخل المزاحميه
ابو مبارك : خلاص خلك هناك وانا شوي وجايك مع السلامه
ابو علي : مع السلامه بس لا تتأخر علي تكفى ترا موتري مافيه مكيف وانت عارف هالشموس والقوايل تعمل عمايل
ابو مبارك : أقول انثبر مكانك إلين اجي ولا يكثر

يلبس ابو مبارك ملابسه وياخذ مفاتيح سيارته وبيطلع يجيب ابو علي
ويقابله ولده مبارك
مبارك : وش فيك مخروش وين بتروح له ؟
ابو مبارك : ابد الله يسلمك ابي اروح اجيب واحد من خوياي جاي من الرياض
مبارك : وهو ورا ما يجي جعله للحروال
ابو مبارك : اقولك جاي من الرياض ما يدل
مبارك : الخويا ما يفيدونك ما تفيدك إلا دراستك
ابو مبارك : يعني ؟؟؟
مبارك : يعني انطق فيذا وقابل دروسك ابرك من ملاحق خوياك هالسملّق
أبو مبارك ( معصب ) : مالسملّق إلا أنت و هالشايب ابو فهد الله لا يبارك فيك ولا فيه

ويطلع ابو مبارك من البيت و مبارك يصايح عليه : تعال يا ولد يا العاصي يالهيس الأربد هين أوريك يا وجه العنز خلك ترجع بس

للقصة بقية ..

متآآبعه
بأنتظآر البقيه

ههههههههههههههههههههههههههههههه
لحستَ مخنآ انت
وقصمنْ وجعنيّ رآأآسي ضيعت بينْ مباركَ وأبو مباركَ
وهالشيخَ الغبيّ يبي يكحلهآ عمآها
ابوكَ يالدعوة الزينة شيخَ ويدعيّ على عيآأآااله هههههههههههههههههههه
مير الله يعافيكَ نبهتنآ ودكَ الواحد يجلس عند الشيخ وهو يقرى على الموية
متابعة لك

ههههههههههههههه
قسسسسسسسم رهيبه ,, صراحه توحفه كلامهم هع خطير