قصيده بالفكس آر

09 / 12 / 2004, 33 : 12 PM

راكب اللي لا مشى الخط الطويل=لو مشى يومين ماجاب الملل
أسمحولي باصفه وصفٍ قليل=عقب وصفي ياعسى دربه سهل
أقصد الفكس آر ماغيره بديل=نعنبوا من صممه لين أكتمل
أمدحه وان مامدحت أخر موديل=ويش أبمدح موترٍ غيره أجل
وارد اليابان ماجاله مثيل=أقطمٍ فالسوق مامثله نزل
أبيضٍ لونه مثل زبدة صميل=وارثمٍ خشمه مثل خشم الفحل
لون زيقه لمعة السيف الصقيل=ولمع برقٍ من خيالٍ منهمل
والعلامه لاسرى مثناة ليل=في جبينه كنها كوكب زحل
والاشاره لونها جمرٍ كليل=ايتلالا مثل منتوج النحل
والخطوط بشاشته صفة بصيل=تزهـر أرقامه مثل ورد النفل
والازره داخل الكشن الجميل=دايريه حجمها كبر الهلل
ويتهزا مثل نقاض الجديل=ومنوته مثناة خطٍ لنسحل
ويتنهض لبرمه فالقاع ويل=وان بغيته يعتلي راس الجبل
كن تشيله عن عزاز الارض شيل=وفيه من قدام دفرنس الدبل
أسـودٍ كنه حصاةٍ من حجيل=للنفوذ مصممينه والوحل
ماورد مثله مواتر مستحيل=وان رضى راع السفاري وان زعل
الجيوب أوصافها فرّاس خيل=من خويه جيب ماجاه الزّمل
أفترد عبد اللطيف الهن وكيل=وعامل اليابان وانصح فالعمل
فوقه اللي لامشى الغدرا دليل=ويتحمل للشقا مثل الجمل
في لزومي عن طريقه مايميل=ولانخيته ماتمشى بالمهل
حوّله مع حافة الضلع المهيل=لين عنه طويق قدام أنعزل
ماسمح له ياعسى جاله يسيل=لو سمح له زيد سواقه وصل
ولا تساوى مر 00 مراتٍ يعيل=ولاتعدى من ورى شقرا انعدل
ثم تنهض مابقى لو كان ميل=داخل الطبلون والخط انّحل
وشد حيله مابقى فالحال حيل=لين ضاق الكون جا كبر الدّحل
والهوا عن رفرفه جا له شخيل=راسي(ن) ومرسيه عرض العجل
المراكز ماتعرض له سبيل=خابرينه عن هدفهم مستقل
ثم تنصا للأصيل أبن الأصيل=لاوصلته اسفطه قدم المحل
تاجد اللي داخل المجلس ثقيل=ولاتكلم ماتلفظ بالزلل
الكرم تلقىاوله بنٍ وهيل=والسوالف والحجاج المسفهل
والشبب ومعزبك ذباح حيل=تفعله يمناه لاجاها الشلل
قل لبو ريان كسّاب الجميل=ويش رايك ندرج اسمك فالسجل
غنوا الشعار ومرير الحبيل=تيحة الفرصه لرجالٍ يحل
واستلم ماقيل واجني بالحصيل=واركب المبروك وارجع لي عجل

[blink]مختارات عهود[/blink]