يالله انك تجمعني مع امي نوره بجنه الفردوس والمسلمين اجمعين

04 / 10 / 2009, 30 : 02 PM

ليت المنايا شاورتني بالاحباب
وليت الصبر ملكي بوقت المنايا
وليت الملك لا جاء ياقف على الباب
ويستاذن ويسمح بكتب الوصايا
راضين باللي كاتبه رب الارباب
راضين بالقسمه وكل العطايا
يا وجد حالي وجد من عضه الناب
ناب سنين مثل ناب الحيايا
والا وجود اللي مقطعه مخلاب
قطع لحم جسمي وقطع حشايا
حسبي عليك الله يا جرح ما طاب
يا جرح ما ترحم كثير الشقايا
هليت دمع صافي فوق الاهداب
مثل المطر يومه يغطي سمايا
ياموت وش علمك على الناس طلاب
يا موت وش علمك على هالسوايا
يا موت خذت العم .... ثم خذت الاصحاب
ثم تاخذ امي .... يا كبر هالبلايا
شيبتني يا مووت وانا بعد شاب
وامرضتني يا موت مالك دوايا
خذت الحبيبه بيننا اخذ نهاب
خذت الحبيبه وبان خافي غاليا
اخر مشاهدها وهي تحت محراب
فوق النعش يا ليت ماهي النهايا
واعلن صلاة الميت وقلبي انصاب
وقفت حاير ... والولي هورجايا
وكبرت الاولى هلت العين سكاب
والثانيه ... والثالثه هي دعايا
والرابعه .. سلمت والدمع ماتاب
يذرف وحزني بالضلوع الحنايا
ثمن خذوها للقبر لحد وتراب
هذي النهايه والا هذي البدايا
المال ما ينعف ولا تنفع انساب
ما ينفع الا صافيات النوايا
ياليت لي نظره ولو من وراء حجاب
في يوم يعرض فيه كل البرايا
في يمينها مكتوب .. في يميني كتاب
وفي جنة الفردووس زين الحكايا
وعساك من حور بها الزين جذاب
عمرك صغير وشيخة بالصبايا
فرقاك يمه متعب قلبي اتعاب
فرقاك يمه زاد فيني عنايا
يمه فداك من البشر كل الارقاب
يمه فداك الروح واللي ورايا
يمه ترى نومي مع الناس ما طاب
يمه اشوفك بين كل الزوايا
يمه عصاك ومفرشك صارو اجناب
ودولابك ومشطك وحتى المرايا
والكحل والحنا غدن بيننا اغراب
وسجادتك تشكي وتسمع شكايا
وشافت حبيبك بين صادق وكذاب
وعزيتها يالله تقبل عزايا
ودعيت يا جعل الدعاء يوافق ابواب
تغفر له الزله وكل الخطايا
وتجزيها جنات ويسر بالحساب
وترويها من نهر يروي الضمايا
تمت وصلوا عد ما لوح شهاب
على النبي المبتعث بالهدايا
الشاعر/أحمد الثنيان
__________________
لو لم تكن الحياة أليمه لما ولدناونحن نبكي**