يمشي على وجهين بـلسان مكّار = علم(ن) ينقص به والآخر يزيده

من درر القصيد تشخص حال البعض في مجتمعنا نرجو لهم الهداية

بعض العرب لامن هرج هرجه اكبار
وليـا تكلـم قلـت وش ذا الوليـده
وليا بخصته لينه أنجس مـن الفـار
الحقد فـي قلبـه ونفسـه زهيـده
يمشي على وجهين بلسـان مكّـار
علم(ن) ينقص به والآخـر يزيـده
عنده علوم اطوال ويدينـه اقصـار
ويفرح ليا من حصّـل اللـي يريـده
ويصور اللي باقي(ن) مابعـد صـار
وكثر التَمدّح مالي(ن) بـه رصيـده
الطِيّب راح يمين وهو دربه ايسـار
متسلـح(ن) بعقـال ولّا جـريـده
وليا كذب له كذبة(ن) مالهـا عيـار
قام ايتخطـف مخـرج(ن) يستفيـده
وسط المجالس عنده لسـان ثرثـار
يالله عسى الثعبان الأسـود يصيـده
الطِيب مالـه عنـد الأنـذال مقـدار
وأهـل القلـوب الميتـات البليـده
يالله عسى الأنذال بقصف الأعمـار
وأهـل النمامـه والعلـوم النكيـده
من شان مايحصل على العالم أضرار
اللـي قريِّـب دارهـم والبعـيـده
والله يساعد كاسب الطِيـب والكـار
وأهـل النوايـا الطيّبـات الحميـده
اللي تعـز الضيـف وتقـدر الجـار
وقـت المعانـد بالمواقـف عنيـده
اللي يطبون الخطر وقـت الأخطـار
أهـل العلـوم الطيبـات المجـيـده
ترا الـردي غـدار والوقـت غـدار
وتـرا الليالـي لينـات وشـديـده
الله يسترنـا مـن الفقـر والعـار
وأجعل لنـا يالله حيـاة(ن) سعيـده
وأستر علينا ياولـي وأنـت ستَّـار
وأجعل وفاة النفس عنـدك شهيـده
والناس صارت تالي الوقـت شعَّـار
والفرق يطلع في معانـي القصيـده
وصلاة ربي عـدّ همَّـال الأمطـار
على نبـي(ن) نعتقـد بـه عقيـده

الشاعـــر ...:::
:::.... مبارك فايز البخيت المحمدي السبيعي ....:::

عيني عليك بارده يالمدرس ،اليوم انت متألق في سماء الابداع .
ماشاء الله عليك .

وش هذا الابداع يالمدرس
الله لا يضرك ومشكور
الله يعطيك العافيه

اخوي نسيم الإبداع أنت مصدره وكلماتك شهادة اعتز بها

اخوي سويد شكرا على الدعاء الجميل واسعدني تألقك في سماء المنتدى