سوق الاســـــــــــهم . كيف الحال ؟

كنا قبل 3 سنين صافين الريش وش حليلنا .. وقاعدين نصف في هالريش مثل الحر .. وشوي شوي بدا ينتف هالريش على يد هوامير الاسهم

وحكومتنا الرشيده ..


واليوم وبعد مرور تلك السنوات صرنا منتوفين خالصين ولا بقى فينا الا عظام الجنحان والله يستر عليهن بعد ..

كان يوم اسود ومنيل يوم دخلناه هالسوق ..

ومن ال22 الف نقطه جاء سوقنا على راسه والحين نترقب دخوله نطاق ال 3000 نقطه ..

مقدر الـــوم الحكومه لان اللي يبيع مواطن ولانقدر نقول ياحكومه اشتري الاسهم بسعر غالي عشان ينبسط الاخ ( الجبان الخواف ) اللي مساهم في

شركه نتائجها جيده ومستقبلها واعد وحاطن رجله ومنحاش من السوق اتباعا لمنهج ( مع الخيل ياشقرا ) ..

شركات مثل سابك والاتصالات وغيرها نتائج اكثر من ممتازه ومستقبل كبير وفوق هذا اسهمها تنزل ( هذا اكبر دليل على محدوديه تفكير بعض

هاللي مسمين انفسهم مساهمين بسوق الاسهم .. ) .. والعيب ماهوب باللي يرشون من المضاربين قبل لايكون في صغار المساهمين ..

ودام جبنا طاري الدراهم

اتذكـــــــــــر كنت يوم اعلان الميزانيه العام الماضي اتابع قناة الاخباريه وأتابع ردود فعل ( المواطن ) عن نتائج الميزانية ..!!

ومن تعابير وجيههم الظاهر انهم ماهم راضين عنها

او يمكن ماتكفي احتياجاتهم .

ثم بعدها غيرت القناه وحطيت على LBC

بس حسب ما أتضح لي من حديث الشارع اللبناني

إن عندهم حفله على شرف هالميزانيه والفائض ..

والله يوفقهم ويبارك لهم فيها ..

مدري وش فينا بصراحه ان زانت الامور وصار فيه قرارات حلوه .. قلنا من الملك .. وان جت قرارات عوجا مدري وش تبي قلنا من البطانه ..

كله الا ارتفاع الاسعار يقولي احد الاصدقاء المتزوجين ان كل شي مولع يقول بدل ماقضي لبيتي ب 600 صار يالله يكفيني 1500..

وخذ من هالاسعار ..

قشطة المراعي صارت 3.5 ريال..

حبة المظبي 22 ريال

الكفرات ارتفعت 30 بالميه..

الأدوية 25 بالمية

تخيل يا خادم الحرمين جبن كرافت والمراعي السايل.. ارتفع.. طيب وش تسوي الناس لبزارينها المشكله يقدرون الكرافت السايل مع الصامولي ..

الببسي صار 20.5

حتى وانت بكرامه والقراء الحفايض .. ارتفعت..

والأيجارات أرتفعت..

الحمدلله على النعمه أمن وآمان

الله لا يغير علينا..

حتى .. رز ابو كاس ارتفع..

لا وازيدك من الشعر بيت..رزمة الكراث والبصل صارت بريالين..

وشكل الدور الجاي على الشعيرية الباكستانية ..

ثم عاد بيحرجوني الناس

ويحطوني امام الأمر الواقع اللي مايقبل المقاطعة ..

الرز وقلنا معليش

واللبن قلنا مافيه مشكلة نقاطع معكم ..

والمكرونه ونعديها ..

لكن الباكستانية هذي وش عذرنا منكم

إذا ارتفعت وقالت الناس ا قاطعوها وماقاطعناها

شفت شلون حنا بنعمه..

ماناقص الا الهواء طار عمرك .. شوفوا لكم فيه حل والا ركبوا على صدورنا عدادات ..

المهم مانبي ياطويل العمر لازيادة رواتب ولا عاد نبي سوق الاسهم يرجع زي ماكان .. نبيكم بس تثبتون الاسعار لاعاد تترفع ..

خاصه سعر القشطه ( مراعاة لصديقي ابو فهد ) وتراه يستاهل بس ابلشني ..

يقول

من يوم دخل علينا

كتاب نخبة الأطباق

وقواطي القشطة سدح عند الباب

وجيرانه يحسبونه مروج ( الله يشفي ) المؤلفه ويسامحها

غـــــلاء الأسعار

مشكلة عالمية

أم عقوبة دنيوية


أخي شواق شكراً على الموضوع المتميز كالعادة

تســـــــــــلم اخوي شواق على الموضوع الرائع
هذا سوق اسمه (( ســوق الحسايـف )) إذا ارتفع مادخلنا قلنا ياحساااافه مادخلنا وإذا نزل قلنا ياحساااااااافه رحت فلوسنا ههههههههه وهذي حالتنا معه
الله يعدله وإن شاء الله الامور بتزين بعد العيد كما سمعنا
تقبل مروري يالغالي اخوك / ذوق الرياض