ديـــوان الـشـاعـر ( عـزام بن عـبـدالله الخــريـف )

صباحٌ تجمّل لروعته الزهر
و مساءٌ تغزل لسديمه الشعر
\
/




\
/

لشاعرٌ استطاع أن يسلب الذائقة بروعة قصيده


هنا الديوان الشعري



للشاعر الكبير بشعره
الصغير بعمره

شاعر تمير الاول
عزام بن عبدالله الخريف
(السنافي)

فقد انجبت لنا مدينة تمير

بيوم 14/4 /1397هـ هذا الشاعر

الذي امتع اسماعنا بشعره واطرب قلوبنا بإحساسه..

فعندما يشدو شاعرنا بأشعاره

نرى تناغم عجيب بين

الشعر

والصوت

والإحساس

وهنا تظهر لنا لوحه من الابداع

لا يتقنها الا الكبار..

فقد ارسى شاعرنا بالساحه الشعريه بقواعد متينه

وصافح الاعلام بحله جميله..

شاعر اسعد الليل بترانيم إحساسه واخجل الجبال

بعلوه وشموخه ..

شاعر احتضنه الشعر

فلا عجب من ذالك

إذا علمنا ان

والده شاعر

وجده شاعر

ومع ذالك لم يكتفي

شاعرنا بعنصر الوراثه

فقد أثرى حفيظته بالبحث والدراسه ليحصل على شهادة
البكالوريوس في المكتبات والمعلومات

من جامعة الامام محمد بن

سعودالاسلاميه..

وقد افرج الشاعر عن ابداعه

وسمح لموهبته بالظهور ومعانقة النور عندما اتم سن

السادسه عشر..

فهنا اقف عن

الكلام

لانه وبكل اختصار

عجزت

ان اوفي الشاعر حقه

لان الكلمات التي قمت بكتابتها

خجلت من الظهور

فكان

النصيب الاكبر

منهاتم حذفها لعدم وصولها

لسمو شاعرنا..




فعذراً..





ولكي
لا تلوموني
وتعرفون مقدار العجز
الذي واجهته عند الكتابه
عن هذا الشاعرالرائع
استعرض لكم
قصائد الشاعر
لكي
تبحروا في معانيها..

قصيدة
أشهر من نار على علم
تجلى احساس الفراق ومعاناة الحب
في اقدم واشهر قصائد الشاعر
قصيدة روح روحي

يا روح روحي فداك العمـر وسنينـي
لـكــن فـرقــاك تـكـفـى لا تطـريـهـا

انت الذي من جميع الناس مشقينـي
والحاجه اللـي تبـي قلـي واسويهـا

ان كـان يـا داعــج الاعـيـان تغليـنـي
الروح شفها وش اللي صايرٍ فيهـا

ياما على شـان شوفـك تفـرك يدينـي
ويا ما على شانك الرجلين أعنيهـا

كـلـي جــروحٍ ولا غـيــرك يـداويـنـي
وأن كـان خليتنـي منـهـو يداويـهـا

عـلـى غـلاكـم وشـوفـك لا توصيـنـي
وألا انت نفسك عليه مـا توصيهـا

منـيـب ناسـيـك لـكـن أنــت ناسـيـنـي
وشلون عشرة سنين العمر ناسيها

لا من ذكرتك يهـل الدمـع مـن عينـي
واخاف من هرجة العذال وأخفيهـا

اللـي جـرالـي مــن اسبـابـك يكفيـنـي
عـزالله ان المحـبـه مــات راعيـهـا

\
/
\

قصيده
حب و انتماء
لاول ارض احتضنت الشاعر
\
/
\

ياناس خلوني على ما طرالي
خلوني اكتب لي ولو بعض الابيات


ابا اتغزّل في حبيب ٍ صفا لي
بنت ٍ عطاها الله من الزين شارات


بنت ٍ تقول الزين فيني لحالي
وعشاقها حطوا مع النقد شيكات


كلا ً يبيها بس ماله مجالي
تقصر خطاهم عن بعيد المسافات


هذي تمير وغيرها مابقا لي
اللي غلاها ما يبي صك واثبات


تمير ياديرة عمامي وخوالي
دار الرجال اهل الشرف والمروات


أفعالهم للطيب باول وتالي
هم عزوتي لا صار فالوقت ميلات


يبين فعل الطيبين الرجالي
في حزة ٍ يشمت بها كل شمات


ربعي لهم قدرا ً مع الناس عالي
ربعي لهم في واجب الضيف عادات


هم فزعة اللي باغتته الليالي
هم نصرة المضيوم في كل حزات


اهل الكرم واهل الفعول الجزالي
يشهد على ماقلت وقت لهم فات


ويشهد عليه مسوطرات الدلالي
وياما لهم في ساحة العز وقفات


عسى السحاب اللي نشى بالخيالي
يسقي ديار اهل الفعول المسمات


وان كان عمري يالاجاويد طالي
بكتب لها كل القصايد والابيات


وان مت حطوني في قبرا ً هيالي
وسط الخويش وفوق قبري علامات


عشان من مره ترحّم وقالي
الله يرحم شاعرا ً مابعد مات

هنامقطوعة
شعرية رائعة

\
/



ليــة يانـــور عيـــني ماترد الســلام
المحبة تراك اخلفت قانونها




انت وصلك حلال ان كان غيرك حرام
اكذب ان قلت لك فرقاك ياهونها




كاــن عقلي اختلف لا تلحقوني مـلام
علموها تروف بحال مجنونها




لا تواجـــهت انــا ويــاه يرخي الثـام
الحقوني تراني مت في عيونها




خدها مثل برق لا شعق في ظلام
والثنايا تهول الي يشوفونها




افطنوا لي تراني عفت حلو المنام
والعيون العباير حرَقت نونها




لعنـبوها بلتـني في دروب الغـرام
اشهد ان السنافي ظايع بدونها



لاطرت في خيالي نحت نوح الحمام
قمت اغني بيوت الشعر بلحونها

قصيده رائعة
اعجز عن مجاراتها



\
/
الناس اجناس

صحيح اللي يقول الناس في هذا الزمان اجنـاس

على كثر البشر أحذر يغرك طول شاربهــا




وأنا توي على الدنيا ولكني عرفت النـــــــــــاس
من الشيبان أخذت العلم والدنيا ومصايبهـــا




وأنا من جيت للدنيا وأنا عايش رفيع الـــــــراس
أموت ولا يطمن هامتي الا مركبهـــــــــــــا




زمانك لو تزين لك لابد الوقت ماينحـــــــــــــــــاس
ولا يدري عن الدنيا ياكود اللي مجربهــــــــا




رفاقت هالزمن والله فلا تاخذبها مقـــــــــــــــياس
رفاقت مصلحة يومين والثالث مخربهــــــــا




ولا تامن رفيقك لو تزين لك بزين البـــــــــــــــاس
ترى ما انعم من الحيه ولا العن من مقاضبها




ولا تقرب هل الشبهه ولا اللي ينصفون الكــاس
ولا اللي مع ردي الخلق علومٍ لك يسربهــــا




ولا تقرب خشاش الخلق تراهم عصبت الخناس
وسحاب الصيف لاتامنه لو كثرة عقاربهـــا




عليك برفقت الطيب ترى لك فيه مبداء وســــــاس
كريمٍ مايحسب للدراهم وش يصير أبهـــــــا




شجاعٍ لانخيته ينتخي ماهو ردي البـــــــــــــاس
علوم المرجله لاجت على بابه يفزبهـــــــــا




حياتك لو تحسبها تقطع دونها الأرمــــــــــــــاس
ولكن الرجاء بالله يصفيلي مشاربهـــــــــــــا

للهما اخذوللهما اعطاء
والحمد الله على كل حال

قصيده دامعه و حزينه
وأوجاع نثرها الشاعر هنا
في رثاء جدتهـ

رحمها الله وغفرلها وأسكنها فسيح جناته
\
/




ودعتك الله بس ما نيب ناسيك
ومالي على رد القضا مقدريه

عسى السحاب يرش قبرك ويسقيك
يمطر عليه المزن كل ضحويه

يمه ترى ما نيب والله مخليك
بدعي لك الله كل صبح وعشيه

عسى الولي من صالي النار ينجيك
عساه يدمح زلتك والخطيه

حطوك في قبرك وعيني تراعيك
حطوك يمه عقب عيد الضحيه

من حر ما اونس قمت اصوت واناديك
لكن يرد القبر يمه عليه

يقول ياللي ترفع الصوت وشفيك
امك ياولد الناس ماهيب حيه

لاتحتري يرجع لك اليوم غاليك
اليوم راحت عند رب البريه

ليت الثرى فوقي قبل ما يغطيك
مثلك ياليته ما تجيها المنيه

أو ليتني في وسط قبرك مخاويك
ياللي عيوني من فراقك شقيه

في جنة الفردوس ربي يجازيك
الواحد المعبود جزل العطيه

مازال للحزنـ هنا بقيهـ
قصيده تخرس كل قلم
خاطبـ فيها الشاعر
جدتهـ عندما زارتهـ بمنامهـ
عذرا منكـ شاعري
لا أستطيع أن أعبر
لكن اقول رحمها اللـه وأسكنها الفردوس
وجمعك بها في جناته
وألهمك الصبر
والى قصيدتهـ
/
\
\









يامل عين ٍ دمعها يرزم ارزام
على الذي راحت ولا ودعتني


اصبر وارد الدمع باطراف الاكمام
نهيت عيني بس ما طاوعتني


عامين مرت كنها خمسة ايام
وأليا نسيتك دمعتي ذكرتني


اشوفها قدام عيني فالاحلام
وأفز من نومي ولا قابلتني


ابكي عليها والمخاليق نيام
واقوم اناديها ولو ما اسمعتني


دمعي على خدي مثل دمع الايتام
الوقت جاير والليالي حدتني


مالي جدا ياكود أسجل بالاقلام
ابيات شعرا ً فالضمير اسهرتني


والياكتبت الشعر ما نيب منلام
سود الليالي هالزمن ليعتني

قصيده تجسدت فيها
معاني العزة
والشموخ
والكبرياء
\
/

لالا تحداني



لا والله ألا ثار فالجو دخان
ثارت وعندي يالنشاما خبرها

ما كل طيرا ً يعجبك طير حوران
ولا كل من ركب الكحيله قدرها

يا اللي تحداني على غير برهان
حنا لها وان طعتني فا ختصرها

لا تحسبني تالي الليل سهران
يوم أن عينك طاولت في سهرها

أن كان عاندت البحر فانت غلطان
تبي تضيع بغبة ً في بحرها

ما أحسب لك حسابا ً ولو كنت زعلان
عد النجوم وعد تحتك حجرها

واللي بنى بيته على غير سيسان
تنهد جدرانه على اللي عمرها

قد قيل لك لا تسمع الناس يافلان
واليوم نفسك ميته في قهرها

من لا يحسب حساب ذربين الايمان
سمعته راحت في الحضيض أعتبرها

لا لا تحداني تراني كحيلان
ومن لا يعرف لحون شعري كسرها

نفسي عزيزه ما أقبل اليوم تنهان
من واحدا ً نفسه بنفسه حقرها

الظاهر ان عقله بدا فيه نقصان
كانه يبي له حاجة ً ما قدرها

جتك البيوت وخاطري ما بعد شان
وان كان شان الله يعينك .. دمرها

هنا
جمال

وحب

واحساس

يسكن
كل
حرف
قصيدهـ شهادتي فيها مجروحة
\
/
\
يالطيف الروح








يا لطيـف الـروح قلبـي فـيـه كـيـه
لا تزيـد الجـرح مـا نيـب متعافـي


أرفق بقـلـب المعـنـى يــا خـويـه
كل ما شفته مـن الهجـران كافـي


حالـتـي مــن سبـتـك والله شقـيـه
وأنت في حالي تجور ولا تخافـي


كـان ذا علمـك فانـا زرت المنيه
ذنبي أني فالمحبة صرت وافي


ليتك تشوفين جرحك يا بنيه
والبلا أن جروح قلبي ما تشافي


أنتي طعونك مثل ضرب برديه
روفي بحالي عسى ربي يكافي


يالغضـي لبّستنـي ثـوب الخطـيـه
ما لبسته مير أظن الثـوب ضافـي


لا جـزا الله خـيـر نـقّـال الوشـيـه
بيـح المكنـون وبيّـن كــل خـافـي


صابـر ٍ فـي حـب ذيـك الغشمريـه
قد شربت المر قدم يكـون صافـي


من يلوم اللي غدت روحه ضحيه
ماشي ٍ درب الهوى رجلي وحافي


لكـن اسمـع يـا حيـاتـي للوصـيـه
لا تزيـد الصـد هـجـران وتجـافـي


عـوّد ورجّـع علـي الــروح حـيـه
لا تـروح وينتهـي عمـر السنافـي

هنا نهايه
نهايه حب
\
/


الصدر ضايق والرجا فيك مقطوع



الصدر ضايق والرجا فيك مقطوع
وانا الذي سجّلت باسمك ضياعي



خليتني تابع وانا كنت متبوع
ونزّلت نفسي لك وانا فارتفاعي


بكتب على قلبي لشرواك ممنوع
غلطه وعدت مالها أي داعي


دور على غيري يجي لك على الطوع
الوصل بدّلته جفا وانقطاعي


لا تنتظر مني مراسيل ورجوع
طويت من مركب حياتك شراعي


ياخاين العشره تراها لك طبوع
الحب مايشرى ولا هو يباعي


توك جديدن فالهوى مالك اسبوع
واظن قلبك يالصغيّر صناعي


قد كان حبك داخل القلب مزروع
واليوم ابكتب لك قصيدة وداعي