والله ماكان الفراق إختياري .. ولاعمري إخترت الوصال ولقيته !!

ليت ربي ماكتب لحظة وداع
ولافراق ولادموع ولاضيـاع





وليت كل الناس خل مع خليل
وكل ماقيل النهاية بين الاحباب الرحيل
قلت احبه حيـــــل

.
.
.

فيه شي بالدنيا مؤلم مثل الفراق!!
باعتقادي مافيه الم بالعالم يوازي الم الفرقا.. تنوعت اشكاله بس عذابه والمه واحد..
حتى يعتقد المفارق انه الوحيد اللي بهالدنيا يتعذب..وان مافيه عذاب اكبر من عذابه..ومافيه هم اكبر من همه..
من عشق بعدي وفارق ياترى !!
للاسف قبلك كثير..واللي هم من بعدك اكثر ..

.
.
.

الفراق نوعين ..فراق دنيا وفراق اخره..
فراق الاخره ..اللي هو الموت ..وهو الاشد والاقسى على الاطلاق..
يعني شعور جدا صعب لما يكون الشخص من اقرب واحب الناس لك..ويجي الموت ويخطفه منك بلمحة بصر.. بدون اي سابق انذار..
تحس بعدها بكره للدنيا والزهد فيها ..وتتمنى لو انك انت تكون مكانه ..وتتمنى .....
استغفر الله ..اللهم لااعتراض





العين يملاهـا حـزن مـوت الاحبـاب
والقلب من جمـر التناهيـد محـروق
الـمـوت حـــق والمـقـاديـر بـكـتـاب
والموت سيف لجل الاعمال مخلوق
اليـوم مجهـم وازرق الدمـع سكـاب
والصـدر كنـه بعـد فـرقـاه مشـقـوق
الصـبـر يــارب المخـالـيـق وهـــاب
لامن نشـف ريـق المحبيـن بحلـوق
دنيـا نجيـهـا لـكـن نسـافـر اغــراب
والوقت سارق لكن العمـر مسـروق

.
.
.

النوع الثاني اللي هو فراق الدنيا..

وهذا اشكاله كثيره ومتعدده لكن مهما تعددت الاشكال تاكدوا ان المراره واحده والموت واحد ...





ماغيـر اصـفـق عـلـى فرقـاكـم كفـوفـي
مـاودي ابعـد وحـظـي عـنـك قاصيـنـي
من شاف عيني يقول الطرف مخطوفي
من كثر ماابكـي وامـش الدمـع بيدينـي

.
.
.

لما اقول فراق..فانا اقصد به الفراق بشكل عام ..سواء فراق حبيب او صديق او اخ اخت ....الخ
يعني شخص تحبه كان بجنبك بيوم من الايام..وبعدها يختفي ويروح..
بتحس بعدها ان هالكون الكبير ضاق عليك..وبتحس بالوحده..وبتبقى لوحدك انت وهمك..

اشتكي لليل حالي..واكتم العبرات واسهر..بعد فرقا راس مالي..لوني الصافي تكدر..
مابقى بالليل نور..هكذا الدنيا تدور..

.
.
.

بعض الناس تعرف مقدار حبك لها..فتتلذذ بتعذيبك..وتجد متعتها بهالشي..
يطلون يوم ويغيبون شهر..والمفروض بكل مره يرجعون فيها نرجع لهم بطريقة مختلفه افضل من اللي قبلها..محملين بالشوق ورامين ورانا كل التعب والهم اللي سببه لنا غيابهم..ومانذكر الا شي واحد..انهم موجودين وبس..حمدلله شي حلو منهم حنوا وعطفوا وذكرونا!!

بصراحه انا هالنوع مااحبه لاني اعتبر اللي يسوي هالشي انسان ناقص..هدفه من هالزوبعه كلها اكتشاف مدى اهميته..ومقدار حب الناس له غير آبه بحجم العذاب اللي ممكن يعقب رحيله..باختصار يستحق بكل جداره لقب اناني مع مرتبة الشرف ..






جابك الله من غياب ٍ ضيّـق صـدور المبانـي
قبل لا الوحشه تزعزع بيتك الصلـب وتبيـده
بيتـك اللـي مـن رحلـت وكـل جدرانـه تعانـي
ماتحـمـل ينتـظـر شهـريـن وعيـونـك بعـيـده
الله العـالـم لــو إنــك جـيـت متـأخـر ثـوانــي
ماتشـوف إلا بقايـا مـن حصـاه ومـن حديـده
من عرفتك وأنت تايه من مواني لـي موانـي
وتـارك ٍ قلبـي مولّـع مـن وقيـده فـي وقـيـده
ضـاعـت سنيـنـي أحــد بهاليـالـي وتحـدانـي
وأنت ماتشبـع غيـاب ولاتخـاف مـن النقيـده
ودي أتحـمـد لــك الله بالسـلامـه , مامـدانـي
كـل ماتوصـل برحلـه ترجـع برحـلـه جـديـده
دام تـدري كـل وجـه ٍ غـيـر وجــه الله فـانـي
ياخي أكسبلك ثواب وخـاف ربـك فـي عبيـده
شف غيابك وش يسوي بالصدور وبالمباني
وأنت تدري كيف كانت صدمت غيابك شديده
والله أنـك لـو وصلـت البيـت متأخـر ثـوانـي
مالقيـت إلا بقايـا مـن حـصـاه ومــن حـديـده

.
.
.

وبعض الناس فراقهم امر لابيدك ولابيدهم..سببه يكون شئ خارج عن السيطره الحسبان..
فيه منهم اللي محكوم عليهم بالفراق طول عمرهم..وهنا يكون الامر اكثر مراره ..لانك تكون فارقتهم وانت في قمة حبك لهم..




تدري انا ماعاد اضن ان لي معك قسمه
وياعزتي للـي القـدر هـو نـده وخصمـه
قـاوم هبـوب العاصـفـه وهـدتـه نسـمـه
نسمـة رقيقـه ظالمـه مابقلبـهـا رحـمـه

.
.
.

ساترتنـي ثيابـي والبـلا يـوم عــدو
شققوا صدر ثوبي واستباحوا ظلام
روحـوا للسلامـه يـوم شـدو ومـدو
وللمواعـد تحيـه وللـمـوادع ســلام



والمشكله ان هالفراق مايزيدهم بعيونك الا غلا وشوق وحب اكثر ..وبالتالي صعب نسيانهم..






يامن عرفني الليل واقف على بابه
لااصرخ واهد الليل ماتحمل غيابه





وفيه اللي محكوم عليهم بالفراق لمده معينه..وعلى الرغم من مرارة هالشي الا انه يعتبر الاهون بين الانواع الثانيه..لانك عارف انه مهما غاب مصيره يجي اليوم اللي بيرجع فيه..وكون انه الاهون هذا مايمنع من بعض العذاب والشوق..يكفي انه يحمل مسمى فراق..





ياكثر من قال لي اصبر يجي باكر
ياعلـهـم العـمـى فـرقـاك ماطيـقـه

.
.
.

ليتك تعرف الشوق لاصار واجد
ليتك تعرف اوجاع كثـر الحنيـن
ماقد شكيـت الحـر والجـو بـارد
ماقد سهرت الليل طول السنيـن

.
.
.

وبعض الناس يفارقون لمجرد الهروب..هروب من مواجهة شئ معين او مشكله معينه ..لأن هذا هو الحل او بالاصح هكذا يعتقد.. ويتركك انت..ومشكلتك..وهم فرقاه تصلحون مع بعض مفضلا الانسحاب(وفخار يكسر بعضه)..
هنا احب اني استعين بكلمة لطلال الله يرحمه:"الهروب من المواجهه ضعف لايليق بمن يثق بالله ثم بنفسه ان يتخذه سبيلا..ولكن قد يحمل الهروب اقسى معنى للمواجهه واشد صلابة منها..هذا فقط عندما يكون الهدف ساميا كأن تتحاشى جرح الاخرين..وهم يأخذونك لهذا الاتجاه جبرا حيث لاتجد بدا من قول كلمة الحق التي قد تلمس جروحا قديمه او تفتح الما جديدا "

فتنة الحرف وشبابه ..لك تعلمت الكتابه..وقلت اسافر..وكانت الدمعه شفق...خوف طفل ماشهق..وقلت اسافر..
وكانت التوبه ذنوب..دامها التوبه هروب..آه يابعض الزوايا بالصدر تكسر حنايا..واثرها كانت مرايه..اتجاهات وحكايه..
ولو بغيتوا تجمعون..شعر واوراق وشجون..ناظروا فيها وشوفوا دفتري بين الظنون..وانشروا كل الكتابه..واشربوا دمع العيون..واذكروني في حروفي لاتقولوا من اكون..وارفقوا بالله عليها..لاتبكون الحنون..لاتقولوا ذاك سافر عاشقك واللي يمون..
غير هذا لو بغيتوا خبروها ماتبون..

.
.
.

واحد اسوأ اسباب قطع العلاقه واكثرها الما هو الخيانه ..فبمجرد اكتشاف الطرف الاخر لهذا الشئ سيفضل الانسحاب والرحيل الى غير رجعه ..





ضاقت وساع الفيافي والوعد متن السفينـه
للطريق اللـي دعانـي بعـد امـان الله وامانـه
لاتنـاديـنـي وصـونــي قـلـبـك الله لايـهـيـنـه
لايراهن في رجوعي لاجـل مايخسـر رهانـه
ليه ماارحل عن غرامك بعد ماذقـت الغبينـه
اذكري لي شي واحـد يستحـق اقعـد عشانـه
ويــن رايــح؟؟ لاي درب مايـرجـع للمديـنـه
ليـه رايـح؟؟لان قلبـك ماتـرك قلبـي وشانـه
كيف ابنسى؟؟ربي اللي ملهم القلب السكينه
مثـل ماعانـه بقربـك لانــوى فـرقـاك عـانـه
اسمحيـلـي مابـقـى فيـنـي مـكـان تطعنـيـنـه
واقبلي من جوف قلبي كل عطفـه وامتنانـه
والله الله فـي عذابـك بتـركـك عيـنـك بعيـنـه
دلـلـيـه ولايـــرده عـــن شـقــاك الا لـسـانـه
والا انا قررت اسافر وامتطي ظهر السفينـه
لان مابه شـي واحـد يستحـق اقعـد عشانـه





هنا فقط ممكن ان يتحول الحب الى عدم مبالاه واحيانا اخرى الى كره وعدم الرغبه في الرجوع الى هذه العلاقه مرة اخرى..






كنت في الهوى سيدي..كنت فرحي وعيدي..
ومدام الحب معك ضايع..مدامك بعت انا بايع..وبقتل حلمي بايدي..وبنســــــاك..

.
.
.

قله اللي وصلني منه يكفيني عمر..كيف يبرى طعن سكين الغدر
قله حلله ربي وباحه...اللي ماعرفت الا جراحه.. هان قلبي واستباحه.. دانني والجرم حبه..
قله وفقه ربي بغيري .. واني رحت في شري وخيري..له مصيره ولي مصيري..لايعلقني بدربه..

.
.
.

وفيه فئه تعلقك فيها وتعيشك بحلم حياتك..حتى تعتقد وقتها انك ملكت العالم وانت معهم..وبعدها يتركونك تكمل حلمك لحالك..وهم يبدون بتجربه جديده (تنويع يمكن )..
طبعا وكيف لا..ناس بدون قلب وماتحس بغيرها تتوقعون نشره عليهم يعني؟!!!
وتتوقعون لو دارت بهم الدنيا ورجعوا بيلقون محلهم موجود ويستقبلهم؟؟!!





مانـيـب لــك جـسـر تـمــره وبـتــروح
وما ارضى تهين النفس لو كنت غالي
طـو الـرحـال وشــد واقــول مسـمـوح
قـلــب طـلـبــك اول يـرفـضــك تــالــي

.
.
.

اخر فئه بتكلم عنها وهم الاغلبيه للاسف..
هم اللي يكونون اقرب من روحك لك..يملى عليك وحدتك..يشاركك بساعات فرحك ويوقف معك بأشد لحظاتك..تحس بمرارة فقدانه غير عن كل البشر..باختصار هو معك كل شي ..
ويجي يوم يتركك..فجأه بدون سابق انذار..ومايكلف حاله حتى لو بسؤال واحد..
وش بيصير له بغيابي وانا اللي اقرب له من عروقه؟

قضى كل الكلام اللي قدر يشـرح لـك الامـي
قضى فيني الشعور وماخلصت اتالم لبعـدك
كذا تجني علـي بغيابـك اللـي تـوه احلامـي
انا شسويت لك حتى تصحيني على فقدك؟!

.
.
.

بس طيفك ماتركني
ظل ساكن وسط جفني
كان وافي
كان يذكر ..وانت جافي!!!
انت وينــــــــــــــــــــــــــــــك؟؟؟
جيتني تشكي الزمن..
وجيتك ابي أدفى
لقيت في قلبي وطن
ولقيت بك منفى..

بتثور وقتها ..وبتسال نفسك وينه؟وليه راح؟وليه غايب؟؟معقوله كل هالفتره لاحس ولاخبر؟!
وتبدا تسال الناس عنه ..وتختلق الاعذار له..
يمكن تعبان..صارت له ظروف اقوى منه..او يمكن صار له شي هالفتره..الله يستر..وتظل تردد الغايب عذره معه..
بعيد عن تصورك انه غايب لمجرد الغياب وانه تركك بدون سبب..يمكن لانك من كثر حبك له تشوفه الملاك اللي مايخطئ..





امانـه يانسيـم الليـل سـلـم لــي عـلـى احبـابـي
ورجع لي خبر منهم ترى عايش على اعصابي

.
.
.

تـعـال ومابقـالـي يــوم بغـيـابـك يصـبـرنـي
اخاف اموت من شوقي وانت مطول بغيابك
تعـال وكـل شـي صـار فـي بـعـدك يذكـرنـي
دروبك ضحكتك طاريك وريح العطر بثيابك

واخر شي يجي اللي يجاوبك على كل سؤالاتك ..(هو طيب ومافيه الا كل خير)..
اسالكم بالله مب ذي هي قمة الالم..
وبعدمايعودك على غيابه ويذيقك الامرين ويكويك بنار فراقه.. تلقاه يرجع وكأن شيئا لم يكن..احيانا بيتاسف واكثر الاحيان لا.. ليه يتاسف وهو يشوف انه ماغلط ؟!!
رجع والمفروض انه يرجع كل شي كما كان ..كذا بكل بساطه..ماكانك قاسيت بغيابه ولاسهرت الليالي على ذكراه..يرجع وهو مايدري ان غيابه سبب لك جرح وفراغ كبير بحياتك..ماكانه احال ايامك ولياليك لسواد حالك..
راجع بكل بساطة العالم والمطلوب منك انك تنسى كل الالم وكل اللي فات..انك تكون جهاز كمبيوتر بضغطة زر تمحي كل همومك والامك اللي شفتها بغيابه ..وماتذكر الا شي واحد..انه الحين معاك,,
بذمتكم وقتها مايتقزم الم هجرانه وهم فراقه مجتمعين امام الم عودته لك؟!!
طيب ليه ترجع وتزيد الهم هم؟ خلني انسى براحتي دام انك انت اللي حكمت من البدايه..
وتتوقع اني بقدر انسى؟!
طيب شلون ابنسى؟! ووش اسوي بدمع عيوني..وسهر الليالي..وعذابي في بعدك؟!!
وتتوقع اني لو رجعت لك برجع مثل ماكنت؟!!

صباح الخير توك تسـأل عنـي اشلونـي
والله وطلع بك وفـا واللـي مضـى باقـي
يقفي وينسى لوعتي والجرح وشجوني
ويقبل ومفروض اني انسى منه احراقي
ماعـاد يعنينـي وفـاك ارحـل بـه بدونـي
بعيد عـن عينـك تعـود وتسكـن اعماقـي
تصبح على خير ياللـي تسـأل وشلونـي
وسلم على طاري الوفى وبلغـه بفراقـي





وتتوقع انه بقى بي باقي يحن لك و يطلبك الرجوع..
مااعتقد..وحتى لو رجعت مااضمن لك الرجوع بنفس مكانتك..

وش الباقي..رحلت ولابقى باقي ..وذاك اللي يسمونه وداع حطم اعماقي..

.
.
.

بعضنا بيسامح ويرجع وبعضنا لا
اعترف طبعا ان المسامحه والعفو عند المقدره هما الاعلى والاسمى
وهي دليل على القوه وليس العكس..
بس وين اللي يتحلى بها ويقدر على هالشي..
لازم نعترف ان الانسان مب معصوم عن الخطأ وطالما انه اعتذر واقنعك بعذره
ساعتها هو يستحق منك انك تقدم له فرصه ثانيه ..
اما لو كان راجع وكأنه ماغلط..راجع و كنه ماغاب من الاساس..
هنا اتوقع ان خطاه اكبر من جميع الاعذار..

.
.
.

مخــــــــــــــرج



والله مــا كـــان الـفــراق اخـتـيـاري
ولا عمري اختـرت الوصـال ولقيتـه
وانا اعشقك عشق المطر للصحاري
مهمـا قسـى وقتـك علـى مـا جفيـتـه
ماكـان بعـدي عـنـك بالـبـال طــاري
اختـرت بعـدي عنـك منـك ورضيتـه
لوكنـت داري بــس لــو كـنـت داري
مااعطيـت لـك قلبـي وحبـك مشيتـه
لو مل مـن صبـري حنيـن انتظـاري
ماقـلـت ابـيـك ولارجـوعـك رجـيـتـه
اذبلـت مــن طبـعـك ورود اعـتـذاري
عطشـان ذوق ولطفـكـم ماارتويـتـه
لـيـت الـزمـن يـقـدر يــرد اعتـبـاري
ويبـري لهـايـب قلـبـي الــي كويـتـه
روح مـراح الليـل .. والليـل سـاري
ولوكـان مهـمـا كــان حـبـك نسيـتـة

.
.
.

ولازال هناك قطرات من مطر ...
سيأتي الصباح .. وتغادر
ربما دون رجعه ... !!

مودتي

//
\\
*
والله إني كنت ألوم اللي
يضيق إن غاب خله ،،
لين جربت المحبه
والفراق وقلت
" تـــــوبــــه" !..
لعنبو جد المفارق
فيه هم وفيه ذله ..!
أثر كل الحب لذه..،
والفراق
(( أكبـــــــر عيــــــــــوبه ))
سحايب
.
.,
لاهنتيـــــــــــــــــ على هالابداعــــــــــــــ
دمتيـــــــــــ متميزهـ

الله *** الله

مــا أروع ما نقـــلت أناملــك السحريه النادرهـ
بالفعل رااااااااااااااااااااااااااااااااااااااائع بمعنى الكلمــه
ولا أزكي نفسي على روعة بهائـك
أستمحيك عذراً إن ذابت حروفي قبل أن أسطرها
فـهي خجلةُ منكِ سيدتــي سحـــايب صيــف

دمــتي بخيــــر وســـلام

اقتباس: المشاركة الأصلية كتبت بواسطة شموخ انثى    // \\ * والله إني كنت ألوم اللي يضيق إن غاب خله ،، لين جربت المحبه والفراق وقلت " تـــــوبــــه" !.. لعنبو جد المفارق فيه هم وفيه ذله ..! أثر كل الحب لذه..، والفراق (( أكبـــــــر عيــــــــــوبه )) سحايب . ., لاهنتيـــــــــــــــــ على هالابداعــــــــــــــ دمتيـــــــــــ متميزهـ

لاندمتي يالغاليه على هالمرور اللي عطرتي به متصفحي المتواضع

دمتي بخير ودام حضورك بــه شموخ

اقتباس: المشاركة الأصلية كتبت بواسطة ذيب النشاما    الله *** الله مــا أروع ما نقـــلت أناملــك السحريه النادرهـ بالفعل رااااااااااااااااااااااااااااااااااااااائع بمعنى الكلمــه ولا أزكي نفسي على روعة بهائـك أستمحيك عذراً إن ذابت حروفي قبل أن أسطرها فـهي خجلةُ منكِ سيدتــي سحـــايب صيــف دمــتي بخيــــر وســـلام

حيـــاك ربي يالـــذيب


وجود أسمــــــــــك في متصفحي يغني عن جميع الحرووووووووف

فــ ادام الله تواصلك الطيب يالطيب

ولاحرمنا الله من عطر حضورك

احترامي وتقديري لك

يسلموووو على الموضوع المميز

تقبلوا تحياتي