العياره ,,,,,أسمك الثاني !

السلام عليكم ورحمة الله وبركاته
مرحبا أخواني الأعضاء
هذا الموضوع حساس شوي ويمكن يعرض معرفي للخطر
لكن بتوكل على الله واللي يصير يصير .

العياره تعرفونها اكيد ومع ذلك بنعرفها لكم ( مدرس على غفله )
العياره هي عباره عن لقب او كنيه اخرى غير الاسم الصريح والأصلي للشخص وقد يكون هذا اللقب فخر وعز لصاحبه او ذم وحقران أنت وشخصيتك وحظك مع انه قليل تلقى ناس يفتخرون بعيارتهم فاغلب العيارات اللي نسمعها ما تشرف راعيها .

في القرى والمدن الصغيره تكثر العياره وذلك بسبب تقارب الناس ومعرفة بعضهم البعض عن قرب , وخصوصا وقت الاولين كانوا عيارين بشكل غير طبيعي ويمكن ظروف المعيشه الصعبه سبب في ذلك .

والعياره في العادة مرتبطه بموقف معين او صفه معينه او حتى عادة موجودة في الشخص الي له عياره .
وهي ليست أختياريه يختارها او يحددها الواحد بنفسه , كان سمعنا ناس عيارتهم الذيابه او القوانيص او النمور عشان كذا الواحد يرضى بعيارته غصب عنه .

والعياره اخواني الكرام في مجتمعنا هذا منتشره وبكثره وشي عادي وطبيعي عندنا وخذنا عليها , لان فيه بعض العيارات ( مدري جمع الكلمة صحيح ولا صححو لي يا اهل اللغه ) فيه عيارات بالوراثه يعني موجودة في زمن جدانهم و ابائهم وتستمر في اجيال العائله الى ما لا نهايه .
والعياره موجوده في البيوت بين الاخوان واكيد كل واحد منا له عياره يعيرونه بها في البيت ولا في المدرسه .

ميزه العياره او فائدة العياره للشخص أنها طريق سريع وسهل للوصول اليه ومعرفته لان نادراً ان تجد تشابه فيها عكس الاسامي التشابه فيها وارد وكبير , عشان كذا الواحد اذا سأل عن أي شخص معين ويبي يختصر الوقت والبحث قال يا رجال ( الــ ؟؟؟؟ أسرع ) جاب عيارته ! ثم على طول يجيب خبره .

العياره ممكن تكون اسم أجنبي او شخصية كرتونيه او صفه او اسم حيوان او سياره او او كل شي جايز حتى المأكولات والمشروبات يعير بها !
ولا تقتصر على الرجال دون النساء فهناك الكثير من النساء لهن عيارات وخصوصاً العجايز لان وقتهم الحواجز معدومه وكثير احتكاكهن مع بعض اما في حصاد او حش ..الخ , وغالبية الناس يزعلون اذا عيرتهم خصوصا اذا كانت عيارتهم قوية وراكبه عليهم 100%
كثير ما نسمع في المجالس قوله ( عزالله اللي سماهم (عيارتهم) ما كذب ) .

وفيه ناس تعودو على عيارتهم وصارت عادي عندهم ولو تناديه بعيارته قالك : سم امر وش تبي ؟
لدرجه انك لو تناديه باسمه قال غريبه وش جايك ؟ اكيد تبي شي ؟ !!!


ختام الموضوع طلب بسيط لمن له عياره ان يوضح لنا وللاخوة موقفه منها وهل يضايقه هالشي ام لا ؟؟
( سؤال محرج صح )

لكم مني أطيب تحية ,,


------------------------------

موضوع قادم ,,,, ( أقرب تسب ,,,,أبعد تحب )

عاد والله يابعض الديار خصوصا في سدير تنشب لك العياره اكثر من اسمك وتلقاها في ذريتك اللي وراك كلها ..
ومحاكيك له اكثر من عياره .. وهي كلها من جنب القده الا الثانيه اظن فيها مني كثير
الاولى كانت السوري <<<< والله مدري وش تبي هالعياره ( تراها تعبر عن مضمون مو شكل ولها سالفه هالعياره والله يذكر سببها بالخير ويذكر اول ابتدائي بالخير ويذكر ذاك البيت اللي تقطعت رجولنا وحنا نرم من قدامه سردادي مردادي كل عصريه ) ..
اما الثانيه فههههههههههههههههههههههه والله ماودي اقولها لان بعض الناس يبي يمسكها علينا ( وهي قد راحت رحمة الله عليها والكل ناسيها )
عاد انت بعد ياخوي مالقيت نقول عياراتنا الا بمنتدى تميــــر والله لتشوف مشرفنا الله يقوم ولده بالسلامه حاطن تحت كل اسم عياره راعيه ,,
اخبر يوم كنا بثانويه تمير ( نص زملائنا نناديهم بعياراتهم ) خاصه انه كان معي زميل ماشاء الله عليه عيارته وراثيه اظنها من الجد الخامس ..
عموما العياره طرفه ملازمه للشخص في طفولته ومراهقته قد يكرهها في تلك الفتره ولكن يتذكرها بعدما يكبر ويرسم ابتسامه كبيره على وجهه حين يتذكرها ( مثل مانا اتذكر عياراتي متشقق هالحين ) خاصه ان بعضهن ارتبطن بموقف معين ..
احد الشباب اذكر كنا نعيره ( المعشعش ) لان لاجلسنا بمكان مستحيل يتحرك منه لين نقوم ..
والثاني عيارته عبسي واظنه فيه من عبسي نفس الكشره والشوشه وبايعها بملح مثله مثل عبسي بالضبط ..
وبعض العيارات دراجه ومستعمله كثيرا ( مثل الكوري ) فلاتلقى عائله الا فيه واحدن عيارته الكوري ,,
اما العيارات اللي ترفع الضغط ( هي انك تقول كلمه ما في مكان ما في موقف ما ) ويمسكونها عليك وتصير عياره لك ..

وعليكم السلام ورحمة الله وبركاته ...

دائماً مواضيعك تلامس وتقرص حياتنا اليومية التي نعيشها في مدينتنا الغالية ..

العيارة : موضوع حساس وقد يجر إلى فضائح وتطليع أشياء قديمة ...
كانت العيارة قديماً عقدة تعقد الشخص وتلقاه ما يجلس مع فلان عشانه يعرف عيارته وهو أكبر منه ولا يقدر يطقه أو يقول له شيء ...

بعض الأسماء غريبة جداً يعني تلقى واحد اسمه مثلاً محمد يتغير اسمه إلى متعب "أشوى أن فيه بطاقة أحوال كان تغير اسمه" ...

وأتوقع من أسباب انتشار وباء العييايّر "شكل جمعها كذا" تشابه الأسماء في العائلة الواحدة ... فالواحد لا زم يميز بشيء عن ولد عمه يعني لو كان اسمه "محمد الفلان" وهو الأكثر بيننا لازم يطلع له اسم رديف عشان يميزه ....

الحل الوحيد تميز اسم ولدك وإن حصل تختار له عيارة حلوة تتنقاها أنت بنفسك ..

أذكر فيه عيارات تضيق صدورنا "ولا أدري ليه" الواحد إذا قالوا اسم أمه يضيق صدره ...

وأفضل شيء لتغير العيارة .. مثلاً لو واحد قالك وعيرك يا بلتوث رد عليه أتماتيك بلتوث في عينك ..


.

موضوع غااااايه في الرووووعه مع العياااارات

والعياره في وقتنا الحالي مطلوووبه لتعدد الاسماء وخاصه عندنا في تمير

اقتباس: ميزه العياره او فائدة العياره للشخص أنها طريق سريع وسهل للوصول اليه ومعرفته لان نادراً ان تجد تشابه فيها عكس الاسامي التشابه فيها وارد وكبير , عشان كذا الواحد اذا سأل عن أي شخص معين ويبي يختصر الوقت والبحث قال يا رجال ( الــ ؟؟؟؟ أسرع ) جاب عيارته ! ثم على طول يجيب خبره

اذكر واحد من اهل الرياض جاي لتمير ويبي له واحد من الديره

ويسئلني عن بيت ( فلان الفلان )

قلت له ( فلان الفلان ) فيه عشره في تمير بهاذا الاسم وش يشتغل

قال عسكري

الحين طاح بعضهم من القائمه انا ويه انا ويه قلت له تعرف عيارته لقب شي

قال لا قلت اجل ما اقدر اخدمك تبي نطقق بيوت الناس ونشوف منهو الي تبي

قال لا قلت اجل هذا الي عندي والرجال ما اعرفه

يوم بغيت امشي قالي تعال عيارتة ( ..... ) قلت كان علمتني من اول

هذا بيتهم في اللفه

وهذي من فوائد العياره او اللقب

ههههههههههههههههههههههههههه

بصراحه شدني رد المتحـــــــــــد

يعنـــــــــي ماعرفت الرجال الا بعيارته

شكل كل واحد ضايف عيارته ببطاقة الاحوال ...

//

بلوتوث


طرح رائع اخوي وتشكر عليه

وبنسبه لنا يامعشر النساء مالنا عياره مثلكم الحمد الله والشكر


وهـــذا احســـن خصله فينـــــا


اكرر شكري لك يالطيب


احترامي

االعياره فيها الكثير من المعاني والذكريات
انا حصل لي موقف هنا في المنتدى بسبب عياره بس الله فكني ما كنت ادري وش السالفه وتم تصفيه القلوب بين بعض الاعضاء

عيارتي مصدر فخري بالنسبة لي فقد وصلت الى الرياض ويعرفها الكثير ولا تسبب لي اي احراج والكثير يسميني بها

ودمتم سالمين

وعليكم السلام ورحمة الله وبركاته

Bluetooth

بالبدائهــ اشكركـ اخيـ العزيز على الطرح الجريئ والمرح في نفس الوقتـ


بصراحهـ ماظنتيـ فيهـ عيارهـ فخر والا ليهـ سموها عيارهـ


اذكر زمانـــ اذا احد عيرنيــ اطقها صيحهـ


وتصير حرب داحس والغبرا فيـ بيتنا


وربعنا ما يصبرونـ الا لين يعيرونـ

تحكهم السنتهم

وتعال شفـ العياراتـ للواحد على قفى من يشيل ليتهم يرحمونهـ


على عياره وحدهـ الا يطلعون له درزن عياراتـ


واذا تبون اعلمكم عيارتي علموني عيارتكم قبل


واخاف اقول عيارتنا وازعل ناس هنا عاد ابلش بهم يقال ناس حساسهـ


اما عن السؤال

اقتباس: ختام الموضوع طلب بسيط لمن له عياره ان يوضح لنا وللاخوة موقفه منها وهل يضايقه هالشي ام لا ؟؟

يضايقنيـ يومنيـ صغيرهـ

والا يوم كبرتـ اضحكـ اذا احد قالها ليـ

وآآآخر كلاميـــــــــــــــــــ


يازين ايام العياراتـــــــــــــــــ ويازين اهلها


احتراميـ لكـ

..,

وعليكم السلام ورحمة الله وبركاته

اشكرك اخي بلتوث على هذا الطرح الرائع(العياره)

واسمح لي ا ضافه بعض الشي

العيارة": اسمك المخبأ للحاجة: قد تذكر به حياً وميتاً (( وَلا تَنَابَزُوا بِالأَلْقَابِ بِئْسَ الاِسْمُ الْفُسُوقُ بَعْدَ الإِيمَانِ ))

قد تذكر به حياً وميتاً

"العيارة": اسمك المخبأ للحاجة

ربما تكون أحد طرق توثيق الصداقة أن يأتيك سؤال متخف معناه "وش عيارتك ؟!" وإن تشجعت وأجبت فهذا يعني أن الصداقة أصبحت رابطة حياة وموت.. أما إن اخترت أن (تسكت) فالعلاقة لم تصل إلى الحد الذي تطمئن فيه للاعتراف!

عند (الأولين) كانت الذاكرة والشارع يحفظان لقبك - الوصف المحسن (للعيارة) - أكثر من اسمك الحقيقي.. شئت أم أبيت سيُنطق بها قبل أن تعترض أو حتى تبتسم.. هذا إن أردت أن تُعرف!

لدرجة أن بعضهم بات يُعرّف نفسه ب (عيارته) ليقصر على نفسه عناء تحمل هرم ذاكرة المقابِل!

المشكلة أننا جئنا وحُمّلنا ذاكرة الأجيال وتطبيقاتها.. ومنذ لحظاتنا الأولى تم التنبؤ بسلوكنا وملامحنا وحتى ألقابنا!

الفرق هو أننا في الغالب لا نسمح بتداولها وبخجلنا لا يمكن أن نلتفت لمن ينادي بها تحت زعم (حتى لا تثبت)!

العيارة وهي اللقب الذي يطلق عليك بسبب صفة أو سلوك تتميز به، وفي بعض المناطق تنطق (المعيارة)، منها الخفيف المضحك، ومنها المقذع المؤذي، وأحياناً تجيء على هيئة هجاء يشبه المدح!.. كل هذا طبعاً تحدده نفسية المُعيِّر والمُعيرُّ ومدى تقبله
بالتالي إما أن يُلقب الشخص بلقب جميل وإيجابي أو نُعرض عن هذا.. لماذا نورث لأبنائنا ما ورثناه خطأً من أجيال سابقة؟!"

باختصار إن كنت لاتريد أن تسمع مايؤذيك كن أنت أول من يبدأاخي بلتوث
وتقبل تحياتي

موضوعك يعايش واقعنا القروي

العيارة اسرع لنا نعرف الواحد وخاصه اذا تشابهت الاسماء علينا

في هالديره ما لنا الا العياره والتي تتوارث مع الاجيال

موضوع اجتماعي وفكاهي في نفس الوقت

شكرا لك

اقتباس: المشاركة الأصلية كتبت بواسطة شواق    عاد والله يابعض الديار خصوصا في سدير تنشب لك العياره اكثر من اسمك وتلقاها في ذريتك اللي وراك كلها .. ومحاكيك له اكثر من عياره .. وهي كلها من جنب القده الا الثانيه اظن فيها مني كثير الاولى كانت السوري <<<< والله مدري وش تبي هالعياره ( تراها تعبر عن مضمون مو شكل ولها سالفه هالعياره والله يذكر سببها بالخير ويذكر اول ابتدائي بالخير ويذكر ذاك البيت اللي تقطعت رجولنا وحنا نرم من قدامه سردادي مردادي كل عصريه ) .. اما الثانيه فههههههههههههههههههههههه والله ماودي اقولها لان بعض الناس يبي يمسكها علينا ( وهي قد راحت رحمة الله عليها والكل ناسيها ) عاد انت بعد ياخوي مالقيت نقول عياراتنا الا بمنتدى تميــــر والله لتشوف مشرفنا الله يقوم ولده بالسلامه حاطن تحت كل اسم عياره راعيه ,, اخبر يوم كنا بثانويه تمير ( نص زملائنا نناديهم بعياراتهم ) خاصه انه كان معي زميل ماشاء الله عليه عيارته وراثيه اظنها من الجد الخامس .. عموما العياره طرفه ملازمه للشخص في طفولته ومراهقته قد يكرهها في تلك الفتره ولكن يتذكرها بعدما يكبر ويرسم ابتسامه كبيره على وجهه حين يتذكرها ( مثل مانا اتذكر عياراتي متشقق هالحين ) خاصه ان بعضهن ارتبطن بموقف معين .. احد الشباب اذكر كنا نعيره ( المعشعش ) لان لاجلسنا بمكان مستحيل يتحرك منه لين نقوم .. والثاني عيارته عبسي واظنه فيه من عبسي نفس الكشره والشوشه وبايعها بملح مثله مثل عبسي بالضبط .. وبعض العيارات دراجه ومستعمله كثيرا ( مثل الكوري ) فلاتلقى عائله الا فيه واحدن عيارته الكوري ,, اما العيارات اللي ترفع الضغط ( هي انك تقول كلمه ما في مكان ما في موقف ما ) ويمسكونها عليك وتصير عياره لك ..

هلا بشواق مرورك شرف كبير لي
تبي الصراحه معليش ضحكت ضحك يوم قلت عيارتك السوري
تخيلت شكلك اصفر وشعرك احمر شوي
تسلم يديك على ها المرور الرااائع اثريت الموضوع بردك الكريم
واوافقك في الراي في جميع ما قلته
تحياتي لك ولا تحرمنا حضورك المميز