ماهي الظاهرة التي تتمنى زوالها من مجتمعك << أرجو التفاعل

السلامـ عليكمـ ورحمهـ الله وبركاتهـ



اليوم جايبه لكم موضوع بخصوص ظواهر المجتمع التي تتمنون زوالها بنظركم ..

لقد انتشرت في مجتمعاتنا الكثير والكثير من العادات والظواهر

وتكاد كل يوم تظهر لنا ظاهرة جديدة تدعونا إلى الأنضمام لها

.. صغارا كنا أم كبارا ..

وكل واحد\ه فينا بالتأكيد له ولها تعليقات أو ملاحظات على أحد تلك الظواهر

أو يتمنى زوالها ..

أو عدم وجودها أصلا في مجتمعه..

والسؤال: ماهي تلك الظاهرة اللي تتمنى زوالها من مجتمعك؟-
-
وكل عضو يطرح رأيه في الظاهرة التي كتبت من قبَل العضو الذي قبله ثم يكتب لنا من عنده ظاهرة اخرى يتمنى زوالها..



اتمنى منكم التفاعل مع الموضوع..

والله يعطيكم العافيه..

مشكوره ياقوت على هالموضوع الرايق وليتك والله طرحتيه بالامس على الجو الحلو البارح

جو البارح كان كل شي فيه حلو ..

جلسه مكشوفه على طقطقه المطر ..

لكن اليوم للأسف مافيه إلا طقطقة سنوني ومتلحف بعشرين فروه ..

وتلخبط جوي ومعاد له طعم ولا لون ولا صوت ..

جانا برد قام يرفسنا رفس

الظواهر اللي قاهرتني هي جرأه بعض البنات يعني بالسابق البنت تلقينها بالسوق ساكته وهاجده ويمكن لو احدن يقولها شي طقتها ( بكاء ) قدام الله وخلقه هالحين شي يروع تلقينها شله بنات وانواع التحرش وعساك تسلم بعد .. من شوي كنت بمجمع الظهران .. وحسبت مافيه احد عشان الاختبارات
الا اثاري فيه امة لا اله الا الله .. وهالبنات مافيه الا شلل وعبي مخصره وحركات .. المهم جاني مطوع من الهيئه قال وش عندك قاعد .. قل قاعد بعد وش تبيني اسوي ان قمت امشي قلت تطارد وان قعدت ماجاز لك قعادي .. وش اسوي اطير يعني .. قال : لا متكشخ وقاعد ومرسم اكيد عندك شي ..

قلت يابن الحلال : يعني ابهذل عمري عشان اصير انسان عادي بنظرك رح شف هالبنات اللي كل شوي ماره وحده وانواع الكلام والتحرش .. ياعمري يالثوب البني .. احلى يالشماغ ياعمري يالجزمه والحركات .. ولا اشوفك كلمتهن ولا قلت شي وجايني انا يالضعيف وحاط حرتك فيني .. بعضهن تجلس على نفس الكرسي او الكرسي المقابل ومسويات حالهن يسولفن مع بعض والكلام موجه لك ..

وبالاخير العين عليك يالرجال وهن لاحسيب ولارقيب

موضوع رائع منك اختي قوووووووت وتسلم يمينك على هذا الطرح الراقي والهادف

وبنسبه لظاهره اللي ذكرها الاخ شواااااااااق فهـي ظاهر منتشره بشكل عجيب والله يهدي هالنوعيه من البنات وعلى ماظن سبب انتشار هالظاهره هو اهمال الاهل واعطاء كامــــل الحــريه الــبناتــهم

:
:

امــا بنســـبه لـــي الظــاهره الــلي اتمــنى زوالها هــي ظــــاهــرة ان البنت ماتاخذ الا ولد عمها وان ماخذت ولد عمها لازم تاخذ شخص من قبيلتها وممنوع عليها انا تفكر مجرد تفكير انها تطلع من نطاق القبيله وبصراحه احس الشي ذا ظلم الولد ياخذ من اي قبيله اوعائله تعجبه والبنت حدها ولد عمها وان رفضته عيال قبيلتها وان صار اهلها متفتحين وتمت موافقتهم على اي عريس مــ تقدم لها من قبيله ثانيه قومو الدنيا وقعدوها وبنهايه يتم الزواج على هالصرعات وتتزوج البنت وصدرها ضايق انها اخذت شخص مااحد راضي عنه وينظرون لها نظره ثانيه فــ متى تزول هذه العقول وتوضع بدالها عقول متفتحه لا تنظر الى الشخص من هو ومن قبيلته او عائلته بل تنظر الى دينه وخلقه ....

:
:

دمتم بود

مشكوره اختي على الموضوع الرائع
بالنسبه لي الظواهر كثيره وش اعد وش اخلى
عندك مثلا/
ظاهرة المعاكسات وقلت الحياء عند البنات وظاهرة التدخين وظاهرة الاستغلال في البضائع
وغيرها كثيييييييييير.........
مااقول الا اللهم اصلح واهدي المسلمين.........

طرح جميلـ أختى الغاليهـ
ماعدمناكـ

.
"

من أبشع الظواهر التى اتمنى ازالتها
هى الظاهرهـ
السائدهـ وهى التباهى بالأنسسسسسسسسسسسسسابـ وعلوا قبائل على قبائل فالسائد عدم تزويج
الغير قبيلي من القبيلي

لماذا؟ ومالفرق؟
اينـ هم من كلام الله ورسولهـ
(( إن أكرمكم عند الله أتقاكم ))
( لا فرق بين عربي ولا اعجمي إلا بالتقوى )


لاأحد يملكـ أجابهـ أنما هو عرفـ سائد لاأقل ولاأكثر من ذلكـ

هل سنجد اسبابـ لبقى هذهـ الظاهرهـ او لابد ان تتلاشى.

الظواهر اللي تقولون قابله للنقاش والا بس للقراءة ودي باجابة علشان ما تتعب نفس برد او موضوع ويحذف ومادام جاء طاري لا فرق بين ............

الطرح أخى يقوول

والسؤال: ماهي تلك الظاهرة اللي تتمنى زوالها من مجتمعك؟-
-
وكل عضو يطرح رأيه في الظاهرة التي كتبت من قبَل العضو الذي قبله ثم يكتب لنا من عنده ظاهرة اخرى يتمنى زوالها..

شموخ

الظاهرة اللي تقولين عليها عندي عليها خلاف من جهتين

الاول ان الرسول صلى الله عليه وسلم يقول (( تخيرو لنطفكم فان الرق دساس ))
ويقول عليه الصلاة والسلام (( تنكح المراة لاربع ................... وذكر لحسبها "))

والشيخ بن باز رحمه الله لا يرى ذلك صحيح لانه من فساد المجتمع وانه يثير العداوة والبغضاء


الظاهرة التي اتمنى زوالها من المنتدى التفرقة بين الاعضاء في المعاملة واحترام العقول الصغيره

بدون السخريه على ردودهم او موضوعاتهم فالانسان يتعلم من اخطاءه

عــــــــــــــــــــــــــــــدنـــــا

انا بنظري اخوي الجنوبي ان الظاهره اللي تتكلم عنها هي بيد العضو نفسه فهو بإمكانه ان يفرض وجوده ويفرض احترامه على الكل ولا يحتاج وسيط او لأي شخص يفرضه للغير لانه فارض نفسه بنفسه وبقلمه وباخلاقه وباسلوبه الراقي ووجوده المحترم ...

اما بخصوص التفرقه بين الاعضـــاء فإنا ماشوف إي تفرقه تـــذكر ... ولكن نظره عن نظره تختلف يمكن انت تشوف شي احنا مانشوفه ...

اما الظاهره اللي اتمنى زوالها ظاهرة سوء الظن وان الشخص يبني ظنون وشكوك تدور حول شخص ولايوجد لها من الصحه اي شيئ متناسين قوله تعالى (( ياأيها الذين آمنوا أجتنبوا كثيرا من الظن ان بعض الظن أثم ولا تجسسوا ولا يغتب بعضكم بعضا أيحب أحدكم أن يأكل لحم أخيه ميتا فكرهتموه وأتقوا الله ان الله تواب رحيم ) سورة الحجرات آية 12

من كل قلبي اتمنى زوال هذه الظاهره .....

الظواهر كثيره وخاصه في المنتدى وساذكر بعض منها :

اولا : المدير العام يجب ان ياخذ راي االاعضاء ولا يكون متعصب ويعدل بين الاعضاء والمشرفين .

ثانيا : اسماء الاعضاء ان تكون اسماء الاعضاء محترمه لانك في منتدى مدينه تمير وليس اي منتدى اخر .

لي عوده مره ثانية