الـشـوق

السلام عليكم ورحمة الله وبركاته


وبيدي هذي القصيده المتواضعه والبسيطه

والتي أرجو أن تنال على إعجابكم وحسن ذائـقتكم

إذا لك شف في شوفي تراني *** على شوفتك صحيـت الامانـي

زرعت الشوق كلـه بأنتظـارك *** واخذت الانتظار وجيت اعانـي

نسيت النـاس لكـن مانسيتـك *** عجزت انساك حتى لو ثواني

غيابك صعب؟والأصعب وجودك *** وانا فالحالتين أتعب وأعاني

حبيبـي لا تواخذني ولكن *** أبيك تحط نفسك في مكاني

إذا جيتك وانا مشتاق تقفي *** تجاهلني وكـنـك ماتراني

واذا صديت عنك وقلت ابرحل *** وقف قلبك على الباب ودعاني

ولو سويت نفسي مااشوفك *** يميل القلب صوبك ويحداني

تراني يابنت اصعب حكايـه *** كتبني الوقت لكن ماقرانـي

مضى عمري وتقدر تعتبرني *** غريب وفي زمن ماهو زماني

زماني راح مع نصفي ونصفي *** نسى نفسه مع الوقت ونساني

أسافر حزن والصحبه ثلاثه *** انا والصبر وسهيل اليمانـي

واذا مريـت لبـلاد الطفـولـه *** فتحت الصدر للحزن وطوانـي

هنا دمعه جرت من عين جاهـل *** هنـا لاقيـت همـي ولقانـي

هنا باعتنـي الديـره واهلهـا *** هنا ضحيـت لفـلان وجفانـي

هنا حاولت اصيـح ولاسمعنـي *** سوى بعض الشوارع والمواني

أنـا ياسيـدي دقـه قديـمـه *** بغيت اخذ من الوقت وخذانـي

على الأنقاض واقف دون حيله *** اشوفك وجهتي بيـن الموانـي

تعال وطـف بيدينـك حنينـي *** تملكني وانا اشعل لـك حنانـي

تعال وضمني يـا تـاج قلبـي *** دخيلـك لا تخلينـي عشـانـي

انا شاعـر عيونـك ياحبيبـي *** مع التحريف في بعض المعانـي

ومانيـل المطالـب بالتمنـي *** ولكـن شوفتـك كـل الآمانـي

محبة صـادق النيه قصايـد *** ومحبة ساقـط النيـه أغانـي

قسـم بالله لو موتـي بيـدك *** وأموت الفيـن مـره ماكفانـي

وإذا باقي من الطلقـات طلقـه *** دخيلك حطهـا بيـن المحاني


وســـلامتكم

زمن

لله درك على هذه الذائقه الشعريه

دمت ودام ذوقك واختيارك بهذا الجمال

احترامي

اقتباس: المشاركة الأصلية كتبت بواسطة سحايب صيف    زمن لله درك على هذه الذائقه الشعريه دمت ودام ذوقك واختيارك بهذا الجمال احترامي

الله يسلمك ياسحايب صيف وتشرفت بمرورك


العطر