يوميات مواطن سعودي بالقاهره

دارت احداث هذه القصه في صيف العام 1419هـ

كنا ثلاثه ومتفقين على الرحله من قبل 4 شهور ( واذا تبون الصحيح التخطيط الفعلي بدا من ايام الثانويه ( النيه من الصغر ماهي بطيبه الناس تخطط لمستقبلها وللجامعه وحنا نخطط للدشره )

المهم خططنا وجمعنا واتفقنا وحجزنا وجاء موعد السفر

رحنا للمطار ( مطار الملك خالد ) مواصلين مانمنا ( تقول كن مصر تبي تطير ياكافي )

انا يامحاكيكم داق البنطلون ومتزكرت انا وواحد ثاني اما الثالث لابسله شووووووووووووووورت ( تقول بيتمشى على كورنيش الخبر )

سحبنا بطاقات الصعود للطائره ( البوردنق ) وجلسنا على الكراسي اللي قدام البوابه بيني وبينكم انا كل تفكيري شلون هالمسافه من الرياض للقاهره ماراح اقدر ادخن فيها وخوياي يتقهوون كل هذا وحنا قدام البوابه والعالم كل مالها تدخل للطياره الا حنا المهم يوم بقى عشر دقايق على الاقلاع يوم جينا نتسحب ( حقين الخطوط بيني وبينكم مبين حاقدين علينا لانهم يشوفونا لنا ساعه ومادخلنا للطياره ) المهم يوم جينا نعطيهم البوردنق وحنا على ممشانا يوم قال واحد تعالوا تعالوا وين رايحين
<<<<<<<<<<<<<<<<<<<<< طرت علي الافلام المصريه يوم باخر لحظه يوقفون المجرم ( سم الله علي )

ونجيه قلنا سم قال : انت يابو شورت ماتطلع ممنوع

ونساله ليه يالطيب : قال ممنوع وتعليمات صارمه بها الخصوص

ومن هنا ومن هناك قال البس لك بنطلون طويل بسرعه كان معك غيار بها الشنطه اللي معك وأضاف ( انت متجهز من هنا ) قالها بخبث

ويروح خوينا لدوره المياه ( الحين باقي اقل من خمس دقايق على الاقلاع ( وانا من زوووووووود اللقافه قلت خل اروح معه يمدي اشرب لي زقاره )

المهم وبسرعه الا جايين قال وين خلص قفلت الرحله

واحد من خويانا طاح منصرع من الصدمه وحب خشوووووووووووم وطلايب لين كلموا الكابتن قال دخلوهم وندخل والعالم تطالعنا ( كل الطياره درت عن سالفتنا ) لحد هنا معليش مو مشكله

المشكله اننا مخلينا باخر ثلاث مقاعد بالطياره ( يعني مقصوده )

ونقلع بحفظ الله ورعايته يوم اعتدلت الطياره بالجو والمضيفين والمضيفات كلهم محضرين عندنا يسالون عن سالفتنا ( بعضهم سامع السالفه غلط ويحسبها اكبر من شورت وتتن )

زبدة الكلام ان مضيفين الطياره خلوا شغلهم وجم يتكون عندنا مانقص الا الكابتن لو جاء كان كملت

ووصلنا لمطار القاهره وعلى بال ماختمنا جوازاتنا واستلمنا عفشنا وطلعنا من الزحمه وكل واحد يطلع له زقاره الا يوم قدحت قدامنا يجي 250 ولاعه لو اشوي عليها بعير انجضته

وحمد لله على السلامه يابيه وحمد لله على السلامه يابيه وتكسي ياباشا ( عاد ياويل اللي مايقولي ياباشا وانا هناك )

ونجمع عندنا كم سواق يوم اتفقنا على سواق معين قلنا تعال شوووووووووووف حنا نبي ( فندق الماريوت ) بس لنا شرط قال : اشرط ياباشا قلنا شرطنا انك من هنا للفندق ان وصلنا ماضربتش كلكس ( يعني بوري او هرن حسب فهمكم ) فلك 100 دولار وان ضربت فلك 5 جنيه ماشي
قال مااااااااااااااااااااااشي يا بااااااااااااااااشااااااااااا

حركنا من المطار ونسولف ونسولف مع السواق نبيه يغفل شووووووووووي مافيه فايده ( الرجال متنح ) لو تقصفه دبابه من وراء مالتفت لها ويوم يئسنا وباءت جميع محاولاتنا بالفشل واوشكنا على الوصول لدرجه صرنا نشوف بوابة الفندق والله يجيب لنا ذاك البيجو اللي يمشي الطبلون ( العداد حده 100 طبعا ) ويطلع من يمين سواقنا ضغط على البووووووووووووووووووووري مافكه الا عند بوابه الفندق ( دليل ادانه ) وننزل وحسافه ياحنفي فوت على نفسك الفرصه وخسرت 100 دولار تدرون وش يقول
يقول والله العظيم كنت ناوي اضرب كلكس لما نوصل عشان ماخسركمش دنتوا ضيوفنا منورين والله ( قلت بقلبي هين والله لو ماجاب الله راعي هالبيجو في نحرك كان الميه دولار بجيبك الحين )

المهم دخلنا الفندق وسكنا لاننا مسوين حجز مسبق وعلى طوووووول يطمر بحلقي واحدن معنا يمووووووووووووت بشي اسمه فطور من برا ( معه مرض مزمن من كثر مايرسلونه اهله قبل يجيب خبز كل صبح )

طيب من يروح من يروح قالوا رح انت ( يعني انا ) اصغر القوم خادمهم ( الله يرحم من قال هالكلمه ويسامحه )

واطلع من الفندق الا على بعد شارعين فيه مخبز قلت خل اروحله
والله واجيه يوم وصلت الا السرى واصل يجي كيلو على هالصبح

<<<<<<<<<<<<<<<<<< مافرق رجالهم من حرمتهم الا بالصدور ( تخبرون مامن شوارب ) والله ويشوفني ذاك الواحد شكله صبي المعلم حق المخبز مدري شدراه اني خليجي ويله وسعوووووووووووووووا للباشا وسعوووووووووووا للباشا مادريت الا انا بوجه الخبار قال عايز بكاااااااااااااااااااااااااااااااااام

احسبه زي عندنا قلت بثلاثه جنيه مادريت الا اللي معطيني صفيحه عليها يجي 200 خبزه انا طارت بوهتي ( يعني تفاجات )
والله واقوم واخذ منها يجي خمس خبزات واقول الباقي اللهم انه صدقتن عن والدي
وانا بس نزلته وقلت اخذوه ماعاد اشوووووووووووووووووووف الا صفق النعال واثرني انا يالباشا اللي مرتز من اليوم تحته لاعاده الله من مخبز وارجع للفندق منبعج مافيه مكان الا فيه رضه انحشرت تحت هالمدرعات ورحت فيها

زبدة الكلام انه راح يومين مادريت الا محمد ولد ام محمد ( ممرضه مصريه كانت بالسعوديه صديقه للوالده )
المهم انه جاي يعزم لعرسه مدري شدراه اني بالقاهره ( اتضح لي بعدين ان امي قايله لامه اني بمصر )

ويجي يوم العرس ( واضرب نفسي بالشيطان الرجيم ) يعني اكشخ واروح لمكان الفرح وكان بفندق الظاهر نجمه ونص والحضور يجي لهم الفين وكان بالوجه المصعد وقفت عنده وفتحو امتلى الاول والثاني ركبت فيه الا يوم دخل علي يجي ثمان مدرعات اقل وحده وزنها طن ويحشرن فيني لين قربت عيوني تطلع والمصيبه ان بعضهن ( يعني من كثر الوسع الحين ) مطلعه علبة المكياج وتمكيج وضرب بكوعها بخشة اخوكم
يوم خلصت مكياج الا خشمي قد انطعج
ويفتح المصعد وتقول طالع لي من جحر وادخل الصاله الا ام محمد بوجهي وتقعد تمطق فيني ( يعني تبوس فيني ) لين قلت ان الله حق

وتجيني ام العرووووووووووووس وتسلم الزبده ان خالة العروووووووووس يعني بتوصي فيني الحين فيه حريم من نوعيه اللي كانوا بالمصعد حقات النقووووووووووووط والتحيات والهشك بشك وتوصي علي وحده اسمها نبويه وليلي ليل انا ونبويه والله لايعيدها من توصيه حتى الاكل صارت تلقمني واعتقد كل لقمه من يدين نبويه تشبع لها عشره من نوعيتي

وارجع للفندق ومنها يومين وحنا بالسعوديه

صراحه مابغيت اطوووووووووووووووووول عليكم والا السوالف كثيره اقتطفت لكم منها هالشي البسيط والا لو ابمسك فيكم خط ماخلصت

هههههههههههههههه

حلوووووووووووه سوااااااااااااالفك ياشووووووووواق

لا تقطعنا الله يعافيك وتقبل مروررررري

جايك ان شاء الله بالسوالف يالمستشار ..

بس مشكلة القاهره ماعاد تصلح ( ماتدخلك في زاويه الا تشوف واحدن من ربعك )

حلوووووووووووه صدق عاد القاهر وشخليت يا شواااااااق

تسلم يمينك ودام عزك للمنتدى



دمت بود

لا لا لا مش مسدئ <<<<< يقالك مصري هالحين

ابو حمد موجود ياهلا والله وغلا ..

يابو حمد ربعنا ماخلو مكان تخبر الناس من اول في القاهره او الاسكندريه هالحين قمت اشوفهم حتى في المنصوره ودمياط .. ولاتهون شرم الشيخ ..