قصيدة في مزاين عتيبة الهيلا

جعل الــــخيال اللــي مـــــــزونه مساديـد =اللــــي بروقه من جنوب وشمـــالي
من بكــــر وســوم الحيـــــا والرواعــــيد =قامـــــت تسوقـه لين هل الخيـــالي
و ســــــكر هــــــواه وجـــا الوبلة تراديد =وتخــــالطت فيه الشعب والسـهالي
واخـــذ ثمــــــان أيـــام من غــير تهويــد =سيله يحـــــدر نايفات العــــــــوالي
رحمــــة من المعبــود محيــي المهــاميـد =غيث يغيـــــث ديـارنا والمـــــــفالي
يسقـــــي ديـــار مذبحيـــــن المفــــاريــد =عـــتيبة الهيــــلا بعــــاد الـمـــدالي
أهــــل المعانـــي والفخر والأذاويــــــــد =أذوادهم من قــبل دور الهــلالــــي
مــــاهي ورايــــــث من حلال الأضاديد =بالســيف أخذناها ماهـو بالريالـــي
وضـــــحٍ علـى ماقيــــل مثل البغاديـــــد =خوات ابو وأوصـــافهنه تــلالـــــي
والا مـجاهيـــمٍ تـــفــــقـــــــــــد تفاقــــيد =ســـــودٍ مثل قطعــة سواد الليــالي
والا شعــــــل خــوات ماهـــن تفـــاريــد =مثل الذهب ومــعمقات الســـــلالي
والا صـــــــــــفر نور وحــلا يالأجـاويد =غــاية مرام مقصــــــــرين الجدالي
ألبل عطــــــايا الله ســــفن الجــراهيـــــد =غبوقـــة الخطار وايضـــــا العيالي
أوصافهــــن تقــــصا المدى دايـــــم بعيد =أُعـجب بها الخالق عزيز الجلالــي
ترعــــا بظــــــل مخضـــبين البـــوالـــيد =عـــــتيبة اللي يلحقــــــون التوالـــي
ومزبــــان من زادت عليه اللواهيـــــــــد =يبشر بعزٍ مالوصفه مثـــــــالــــــي
وعــــز الخوي والجــار والضيف وتزيد =كسابـــــة البيضــا من اول وتــالـي
أهلٍ النخــــــــاوي والفعـــــــايل شواهيد =رجالهم اليا نخي مايبـــــــــــالـــــي
يشـــوش كســــاب الثــــــنا والمحامــــيد =من شوشته تقول صابه هبــــــــالي
وينــــدى نداهم يــــــوم قل المواجــــــيد =عتيبة الهيلا كـــرام السبـــــالـــــــي
ولـــولا الدخــــن ماولعـــن المــواقيـــــد =وكلٍ ورى حــــقه مثل مايقــــــالي
ولا اهفي حقـــوق اهل الفخر والمعاويـد =حقوق القبايل كاسبين المعالــــــــي
واليوم بحــــــــــكم اللي حكم بالبواريـــد =والسيف وعوصٍ درهمـن للنفالــي
وليم بها شـــــــمولٍ شتـــــــات ومباديــد =عبد العزيز اللي حكم بالعــدالــــــي
اللـــــي بذل للحـــــق كــــل المجــــاهيد =وحكم بشـــرع الله وزال الضلالــي
عســـاه بالــفردوس يـــــوم المخــــاليــد =ويارب جعلــه مايشوف النكـالــــي
ويـــــدوم عــــز اللي على العز صـنديد =اللـــي بعهده بيرق العز عــــــــالي
ملــــيكنا اللي نال كــــــل التمــــــــاجيد =عبـــدالله اللي يــرتكي للــثقـــــالــي
عز الوطن و مواطنه دون تحــــــــــديد =غالي وشعبه مثل مغلاه غــــــالـــي
واخـــــوان عبــدالله عضود السواعيـــد =اخوان نوره والفعايل جــــــــزالــي
طيب وكــــــــرم ويحللون المعاقيـــــــد =ومزبان من يضـــيق فيه المجالـــي
وتمـــــــت وصــــــلوا عد ماتثمر الغيد =وعداد ماهلت مزون الخــــــيالــــي

الشاعر/ سعد سعود بن مغلي الحزيمي العتيبي.

اولا حياكـ

اخوي

الهــيلا

ثانيا.

احب اهنئــكم على نجاح مزايين الهــيلا

والقصيــدة جميــلة


وصح لسان قايــلها

الله يحييك اخوي نجم تمير واشكرك على الترحيب والتهنئة

ونعم فيكم يا عتيبه

والقبايل كلها فيها حقها من الطيب ..

والحق يقال أن ملتقى عتيبه الهيلا قد

حاز على إعجاب الكثيرين واصبحت سمعته واسعه ..

ومن حصل شي يستاهله ..

صح لسان الشاعر سعد العتيبي

وقصيده جزله لا عدمناك ..

واسمح لي بتنسيقها ..

صح السانك والسان الشاعر / سعد العتيبي

واعتيبه تستاهل

مشكور على تفضلك بالمرور اخوي السنافي وبيض الله وجهك على تنسيق القصيد بس اذا مافيه مانع ودنا نعرف كيف طريقة التنسيق لا هنت

مشكور اخوي الشمالي على مرورك الكريم ولا هنت يالغالي

أخي الغالي

@ الهيــلا @

وفقك الله لما يحب ويرضى ولما فيه الخير والصلاح على هذا الجهد والعطاء المتواصل

كما أسأل الله أن يجزاك عنا خير الجزاااااء
......