أبد .. ما جيت ابارك لك ولكن جيت باوصّيك

أبد .. ما جيت ابارك لك ولكن جيت باوصّيك000على الله ناوي ٍ تدخل بهـا الليلـه .. مُعذّبْتـي

ترى لولا الظروف اللي عطتْك وحدّت محاكيك000قسم بالله ما تدخل عليهـا لـو علـى رْقبْتـي

ولكنّ النصيب اقوى ولا ادري ويش اسوّي فيك000نعم .. صارت معزّبتك .. ولا صارت معزّبْتي

كذا شاءت بنا الأقدار تحرمني لجـل تعطيـك000كذا لازم عشان تفوز إنت .. أخسر بتجربْتـي

تراها غاليه جـداً .. وتكفـى .. والله يخليـك000تدللهـا .. تدلعهـا .. تنسّيـهـا مصاحبْـتـي

أنا من كثر ما اغليها أحس اني بديـت اغليـك000ولا تسـأل بأيّـة حـق ولا ّ وش مناسبْـتـي

لإنك لو بتسألني بتسمع شـيء مـا يرضيـك000لذا ياخـوي لا تسـأل ولا تسمـع لأجوبْتـي

أبيك تحطها في داخل عيونـك وبيـن ايديـك000وهي دلوعه اعتـادت علـى كثـرة مداعبْتـي

فداعبها شوي شـوي حتـى تشتهـي طاريـك000وشاغبها إلين تقـول لـك: بطّـل مشاغبْتـي

واذا هي مالها خلقك..ولا تضحك ولا تسلّيـك000تحمّلها وإسألهـا: يـا عمـري ليـه عصّبْتـي

وبالك اسمع انّك يوم تضربها وهـي تشكيـك000ما يحتاج اورّي لك بفـن الضـرب موهبْتـي

صحيح انك بتملكهـا ومعـك العقـد بالتمليـك000وانا عارف حدود الله ومـن حقـك معاقبْتـي

ولكن قلّها المجنـون وصّانـي وهـو يعنيـك000يقول انّـه بينتظـرك ولـو شيّـب وشيّبْتـي

وانا مجنونها اللي ما نساها وانت مـا يمديـك000تغطّي ذكرياتي في هواها.. وربْـع تجربْتـي

أحس اني تماديت بكلامي.. والغضب حاديـك000ولو انّك في مكاني ما تفكّـر فـي محاسبْتـي

كفاك اني تركت الليله اشغالي عشـان اجيـك000دخلت القاعه برجلي ولا ادري ويش عاقبْتـي

وانا ما جيت اخرّب عرسك الليلـه ولا أذّيـك000أنا جيتك عشان اخاطبـك واسمـع مخاطبْتـي

توصّى..وانتبه..واحرص عليهـا والله يهنّيـك000ترى كل الكلام اللي طلَع من ضيقـيَ وكبْتـي

ولكن ما قدرت انّي أقوله وانـت مـا يخفيـك000أخاف انّـي إذا قلتـه تقـوم وتقطـع رْقبْتـي



الشاعر / محمد الشهري

الأميري دام تميزك وإبداعك ياغالي
قصيدة جميلة صح لسان ناظمها محمد الشهري
لك الشكر القدير لتفاعلك في ساحتك همس القوافي

الضامي اسعدني تواجدك في منقولي ولا غرابه فأنت شاعر عذب وتعرف القصيد الجزل من

الركيك لك ودي واحترامي

والله مشكله كبيره وهذا الحب ومايسوي

ويمكن تكون هالقصيده دافع لمن يتسرع في الطلاق بالتريث وعدم الاستعجال

لان ابليس مامات ....

دام تواصلك العذب يالاميري

أخوي الأميري ...
أبد .. ما جيت ابارك لك ولكن جيت باوصّيك ..
لاتحرمنا من طلتك الحلوه .. ومن سحر ابداعك .... فوجودك بيننا له طعم خاص !!!
عموما انا مالي في الشعر ومتاهاته ...
لكن اللي ابغى اقوله سلمت يداك على هالنقل الرائع ... دمت بخير !!

قصيدة جميلة ورائعة

اختيار مميز من أخ متميز جدا
بالتوفيق

قصيدة في قمة الروووووووووووووعة لكن عندي ملاحظة على البيت التالي :

اقتباس: المشاركة الأصلية كتبت بواسطة الأميري    كذا شاءت بنا الأقدار تحرمني لجـل تعطيـك000كذا لازم عشان تفوز إنت .. أخسر بتجربْتـي

فالأقدار لا تشاء وإنما المشيئة بيد الله
وتقبل أسفي واعتذاري وإنما التذكير واجب كل مسلم