المال نقص عند بعض الرجاجيل

القصيده:



المال نقص عند بعض الرجاجيل =لا ودعه بالبنك وأهمل زكاته
وراعيه ما ينفق طماع وبخيل =كلمة هلا ما قالها في حياته
ما يعرف أسعار العويدي ولا الهيل =ولا حقوق الجار مع واجباته
ما شب ناره في نهار ولا ليل =دايم بوسط البيت ويا بناته
يعرف دجاج يصلته وسط برميل = غطاه فوق الجمر بمتبلاته
حتيش لو زادت عليه المحاصيل = محروم والمحروم فعله شماته
مشغول بين الناس بالقال والقيل = يلعب به الهاجوس لو في صلاته
ما هوب راعي راي بالحيل حلحيل= لو تكربه بالهرج حمية حصاته
ولا غثته بقعاء وشاف الغرابيل =محسوب كنه وحدة من خواته
يستاهله من يذبح الحشو والحيل = للضيف ما كلٍ يسوي سواته
متسلسل من لابة تعسف الخيل = أفعال جدانه قبل سابقاته
ومجهز للقنص طير ودربيل = مع موتر فيه الدبل بكفراته
يطرد ورى طيره بوسط الغراميل =لا صاد له صيد نزل قال هاته
والى ضواه الليل حط المعاميل = ركب عشاه ودلته مع تلاته
والجسم صاحي ما يبيله تحاليل = ومراجعة دكتور ومعالجاته
وزهر النبات مشكل الأرض تشكيل=فيه الخزاما بزهرها مجملاته
نور القمر يكفيه متعلل الليل =مع واحد كل المراجل صفاته
في وسط عرق باسفله ناقع السيل = في خبة فيها الضبا وارداته
وعلى الفرايض دايم حرص بالحيل =ما يوم عن فرض تأخر وفاته
حافظ كلام الله يرتله ترتيل =يطلب رضى المعبود ويا حسناته
والفجر إلى صلاه سبح بتهليل = وقرص الجمر سواه وسط جمراته
ياخذ ويعطي حق ما يعرف الميل =جنب عن الطماع ومغالطاته
ومن جاه في موضوع يلقى التساهيل = ما يطلع إلا حاجته منه جاته
تمت بذكر مكمل الدين تكميل = رب يغفر الذنب مع سيئاته


لشاعر حمد المغامس ( الوردى )

صح لسانك يالهبوب

تسلم على اختيارك هذي الكلمات الجميلة والمعبره في نفس الوقت

تحياتي لك

ويارب ما يحرمنا من قلمك


سلام

هلا اخوى هادى وانت الى تسلم على حضورك الكريم

صح لسانك ياوري بيك تسلم ويسلم لسانك ،،،، والف شكر لك ياهبوب الشمال
من جد مواضيع مميزه وحلوه ويعطيك العافيه على الأختيار الحلو ياهبوب المنتدى.

تحياتي لكم ،،،،

مرحبا يالهبوب
ويسلم الوردي

راعى الراية

تسلم على حضورك الكريم

المدرس
الف شكر على مرورك الكريم