ديوان الشاعر / تركي بن علي الفيصل (ابوخالد)

بسم الله الرحمن الرحيم

هذا الديوان للشاعر / تركي بن علي الفيصل

أحد شعراء تمير المميزين وله عدة دواوين

وسوف يقوم بالاشراف على هذا الديوان وتحديثه العضو المتميز الرحال999

وأمل من جميع الاخوان الزوار عدم كتابة ردود والاستمتاع بالقراءه فقط

وسوف تحذف جميع الردود ...

شاكر للجميع

بسم الله الرحمن الرحيم
(((المقدمه)))
الشاعر / تركي علي الفيصل - من الشعراء المميزين ومنتدى تمير قام بوضع
دواوين خاصه لكل شاعر وهو إذ يقدم ذلك إنما يسعى لحفظ جهود شعرائه وجعله
في متناول القارئ وهو يقدر للشاعر مايبذله من جهد وتفان ٍ في هذا المجال
((السيرة الذاتية))
الاسم : تركي بن علي الفيصل .
الكنية : أبو خالــــد .
ولد في مدينة الرياض عام 1398 هـ .
درس الابتدائية في مدرسة خبيب بن عدي لتحفيظ القرآن الكريم ، ثم انتقل إلى مدرسة عمران بن حصين الابتدائية ، ثم درس المتوسطة في مدرسة ابن رجب الحنبلي ، بعد ذلك درس المرحلة الثانوية بمدرسة الإمام الشاطبي – رحمه الله -
بدأ بكتابة الشعر ونظمه في سن الحادي عشرة من عمره .
متنوع في شعره فلديه قصائد في النصح والإرشاد والغزل والمدح والقصائد المكشاتية وله قصائد في الرد والمحاورات مع زملائه .
له ديوان شعري خاص به .
شارك في عدد من الحفلات والمناسبات الخاصة .
"""""""""""""""""
"""""""""
مع تحيات : الرحال999
ودمتم سالمين

القصيدة الأولى

غنت طيور الجـو ومعهـا تغنيـت=قامـت تبادلنـي لحـونٍ حسينـة
وكتبت معها الشعر وأبديت وأطريت=هـمٍ شغلنـي يـوم طـول كنينـه
حمست من بن الهراري وصبيـت=فنجال كيفٍ يقعـد الـراس زينـه
فتحت باب الشعر وأعلنت وابديـت=بيوت كانت في ضميـري سجينـه
وجبت القلم ياصاحبـي واستعديـت=وابدعتلـي أبـيـات درٍ ثميـنـة
أمس العصر في راس مرقاب عديت=قصدي أريح خاطري مـن ونينـة
لو بالتمني يابـو فيصـل تمنيـت=أعيش وسط البر وأنسـى المدينـة
مير الأسف مافادني قـول ياليـت=حيث إن روحي في المدينة رهينـة
كثر المشاغل والشقاء وخدمة البيت=تجبرني أجلس في حيـاتٍ مشينـه
حبيت شوف البـر حبيـت حبيـت=لانه يزيـل همـوم فينـي سكينـه
يعجبني شوف الروض لامن تمشيت=شوف الطبيعة طب روحي الحزينـة
كتبت بيت الشعر بيتٍ علـى بيـت=من خاطري نضمت قـافٍ رزينـة

الشاعر : تركي الفيصل

القصيدة الثانية

يادحيم روحي على الصمان ولهانه=في رقةٍ يابو فايز في الخلاء الخالي
أشوف عشب الخزامى زانت الوانه=رزقٍ رزقنا عظيم الشان والوالي
البر يجلي هموم القلب وأحزانه=انا أشهد إنه دواء قلبي وغربالي
الخير جانا وسالت كل شعبانه=من مزنةٍ سيلت والسيل همالي
والارض صارت من الأمطار مليانه=والعشب زهر وصار الوان وأشكالي
والكل نفسه بشوف الروض شفقانه=يمشي ويضحك وكلٍ دالهٍ سالي
والبل ترعى وتسرح بين فيضانه=عقب الربيع أصبحت تمشي وتختالي
ودعت ربعي ومنزالي على شانه=ومسكت خطٍ حوته رمال وجبالي
سكنت وسط الخلاء والنفس فرحانه=في قفرةٍ ماوطتها رجل رجالي
وحمست كيفٍ يِشوق الراس فنجانه=ودقيتها وسط نجرٍ يذهل إذهالي
وحطيت أنا بهارها وأحكمت ميزانه=وصبيتها وسط صفرٍ تبري الحالي
ياليتني ساكنٍ مابين ريضانه=وأنسى المدينة وأعيش العمر رحالي
كتبت بيت الشعر وأبدعت قيفانه=ونظمت لك يالسنافي بيوتٍ إجزالي

لشاعر تركي الفيصل (( ابو خالد ))

القصيدة الثالثة

فلسطين الجريحة

لاوالله اللي شاب راسي وانا صغير=عمري عشر يابوي وأدبل عددهـا
لاشك أنا محتار ماني علـى خيـر=حالي عليله مـن يـدور سعدهـا
شارون يقتل ويضحك على الغيـر=وحنا على حـال تزايـد عقدهـا
قام يتلاعب فـي خيانـة وتنكيـر=للمسلمين جيوش غـدرة حشدهـا
كم شايبٍ ينهان مـن دون توقيـر=وكم طفلةٍ ماتـت بداخـل مهدهـا
عذب عجوز السن لوعة وتفكيـر=تخاوي الهوجـاس غيبـة ولدهـا
صاحت وناحت مالقت غير تكديـر=شافت من الدنيا خساسـة نكدهـا
لاهوب ميت كان ينقال لـه ميـر=هي سنة الله في عبـاده وردهـا
مير البلاء روح ومن دون تخييـر=وعـزاه ياحـالٍ تفـارق بلـدهـا
ثمٍ تعذب شاف شيـن المناضيـر=كـلٍ يذلـه فـي همـومٍ سردهـا
حطوه في سجنٍ كثيـر المخاطيـر=حتى عيونه طولت فـي سهدهـا
يابن العرب جاهد بحكمة وتدبيـر=أرفع شعار الحق حـق أعتمدهـا

لشاعر / تركي الفيصل (( ابوخالد))

القصيدة الرابعة

درب المحبه

مسكين من مثلي غداء اليوم محتار=أنا أشهد أن سـود الليالـي طونـه
اسهر طوال الليـل والدمـع نثـار=وأتابـع الونـات وأجــر ونــه
من فارق الخلان كنـه علـى نـار=غـدر الليالـي فـي حياتـه بلنـه
أمس العصر مرتاح مع سيد الأ نوار=كني مع الخلان فـي وسـط جنـه
واليوم أنا مهموم والحـال فخطـار=من شاف حالي ياهوى البـال حنـه
قالو هلي وشفيك حالك بـه أكـدار=قلت اللذي قد صارلي اليـوم منـه
يازين أبرسلك سلامـي بالأشعـار=وأفهم معاني البيـت قولـه وفنـه
باكتب معانيها على أسلوب الأسرار=وأرجو قصيدي وسط قلبـك تكنـه
شف عاذلي يازين يبغي لك العـار=قصده يفرق عشرتي حسب ضنـه

لشاعر/ ابوخــــالد

القصيدة الخامسة

قالو جديدك قلـت هـذا جديـدي=أكتب لكم بعض النصايح والاذكار
سحاب شعري هل مزنه قصيـدي=على صفايح بيض هليت الأشعار
نصيحـةٍ منـي عساهـا تفيـدي=ومنهُ تبعها فاز مع سيد الأبـرار
أذكر الـه الكـون رب العبيـدي=الواحد المعبـود عـلام الأسـرار
وعلى النبي ماجاء مثيله شهيدي=أتبع صفاته في علومه والاخبـار
وجعل صلاتك في خشوع ٍركيـدي=هذا العهد مابيـن مسلـم وكفـار
خلك مع أهلك في خصولك حميدي=ورفق عليهم من صواديف الأقدار
وخلك مع العربان رايك سديـدي=تراء الدلع مافيه حشمه ومقـدار
وقت الشدايد خل عزمك حديـدي=لايكسرك خايب ولو صار ماصار
وأحذر جلس الشر شر ونكيـدي=في عشرته جتك النكايد والأخطار
والجار له حشمه ولـوه بعيـدي=تراء النبي وصى على سابع الجار
هذي نصيحه من سلكها سعيـدي=وياالله عساها للمسلميـن تذكـار

الشاعر : تركي الفيصل

القصيدة السادسة
قصيدة { البراري }

يرف قلبي لانظرت البراري = والبر أحبه وأرغبه وأتمناه
يرتاح بالي لين شفت الصحاري = وشوف الخزامى زين شوفت رعاياه
ياخال هات الجيب جيب السفاري = حيث السفاري يعجب الناس ممشاه
نمشي لدار الجود والعز داري = تمير دار الجود والعز والجاه
لاضاق صدري حل في القلب طاري =أروح يم البر والهم بانساه
وأجلس بوسط الروض وأشب ناري = وأرتاح من جو النكد والمعاناة
جو المدينة صاب راسي عواري = جو المدينة ياهلي مارغبناه
لو هو بكيفي ياسعد وأختياري =لانسى البلد وأنسى دروبه وطرياه

لشاعر / ابو خـــــــــــــــــالد

القصيدة السابعة

قالوا لي غير جو في وسط لبنـان=ولا بوسـط الشـام ولا صـلالـة
ترتاح من كثر البلاوي والاحـزان=من زارهن بالحيـل يرتـاح بالـه
قلت الديار اللي بها الزين سكـان=هي غايتي لوكنت في خـس حالـه
لاشفت سيد البيض مدعوج الأعيان=عز الله إني صرت سالـي ودالـه
أكتب له الأبيات وأطرب باللأحـان=وأبني بيوت الشعر لجـل الغزالـة
والله فلا يوجـد حليـه بالأكـوان=سبحان من سواه وأبـدع جمالـه
الـرأس لـلأرداف والخـد فتـان=جميع كل البيـض ماجـت مثالـه
وعينه كما عين الصقر طير شيهان=والله لـو يطلـب حياتـي فدالـه
والخشم سلت سيف والساق مليان=من شافها يذكـر عزيـز الجلالـه

الشاعر : ابوخالد

((مــــــــــــاش))

بعض العرب تحسبه كفوٍ وهو ماش=وعـلـى دروب المرجـلـة مـايـدومـي
لــو المـراجـل بالـدراهـم وبـالـكـاش=والله فــلا يـشـرى ردي الـعـزومـي
تحسـبـه فـزيــعٍ وثـاريــه مـهـنـاش=محسوب ضمن رخوم ناسٍ رخومـي
لاجاء لزوم الوقت في خاش خرباش=ماينفعـك وقـت الشـقـاء واللـزومـي
والنذل وإن جـا لـه مكانـه وهوبـاش=لابــد مــن يــومٍ تـشـيـن العـلـومـي
لامـن طلبتـه طلبـتٍ صــد وإنـحـاش=أنـا أشهـد إنـه مايـعـرف السلـومـي
تحسبه من طلبتك منصـاب برعـاش=خطـرٍ علـى حـالـه يجـيـه الغمـومـي
خايب وطبعه شين وإنسان غشـاش=عايش على الحيلة وطبعـه ضلومـي
لـو ينعـرض ببـلاش مـاراح ببـلاش=ولاحدٍ يبـي يشريـه ولاحـدٍ يسومـي
مـن رافـق الأنـذال لاشــك مـاعـاش=كــل الـعـرب فيـمـا يـسـوي تلـومـي
ويـن الــذي يـفـداه لاشٍ ولــد لاش=رجل على الشـدات يجلـي الهمومـي
يقول عين الحاف وعينٍ لك إفـراش=حــرٍ قـطـامٍ مـــن رجـــالٍ قـرومــي
عــدٍ غـزيـر مــرويٍ كــل عـطــاش=فـي بحـر صافـيـن النـوايـا يعـومـي

الشاعر: تركي الفيصل ابوخالد