( حكاوي رمضانية ) ذكريات الزمن الجميل مع [ أم حمد ]

السلآم عليكم ورحمة الله وبركآته كل عآم والجميع بخير نعود اليكم مجددآ عبر موضوع حكآوي رمضانيه لنستمتع بحكآوي أبائنا وأجدادنا ولآ يحلو الحديث آلآمعهم لأجدادنا وأبائنا الكثير من الحكايات والمواقف في رمضان فسوالفهم لها طعمها الخاص . والجلوس معهم يذكرك بماضي جميل قلوب بيضاء . ونفس طيبة . وضحكـة لاتفارق المحيا فهم الخير والبركة .. أحببنا هنا في حكاوي رمضانيه أن نلتقي بمجموعة من كبآر السن من آبآء وآمهآت نحاورهم ونتذكر معهم رمضان مابين الماضي والحاضر وحكاويهم معه .. ومعنآ اليوم أم حمد وكآن لنآ معهآ حكآوي جميله عن زمن مضى زمن الطيبة والبساطة والضحكة الحلوة والنفس الطيبة مواقفها وحكاويهآ كان لهآ طعم آخر البطآقه اللشخصيه ام حمد وعندي 8 عيال كيف تستقبلون إعلان دخول شهر رمضان المبارك . وش كانت مشاعركم بالحاره إذا وصلكم الخبر ؟ طبعا في ذاك الوقت ماكان عندنا غير الراديو عند نهايه شعبان نجلس نترقب الخبر من الراديو مشاعرنا عندما نسمع بقدوم رمضان نفرح جدا له ونبارك لبعض كم كان عمرك أول مره صمت وكم يوم صمت في أول رمضان تصومه ؟ كان عمري اول ماصمت 7سنين كنت اصوم احيانا لين الظهر وبعض الاحيان اسوي نفسي صايمه اليوم كله وانا اشرب بدون ماتدري امي لين خلص الشهر كيف كان سحوركم وفطوركم وإيش كانت أشهر المأكولات عندكم ، وهل كنتم تجتمعون على الفطور بالحارة أو بالبيت ؟ سحورنا مرقوق ولا قرصان او جريش وقهوه وتمر هذا سحورنا والفطور لقيمات بر او صبيب وقهوه وتمر وتوت وشوربه جريش والحمدلله وفطورنا في بيتنا انحن والعائله ماكان عندنا جيران وش أشهر المواقف اللي حصلت لك في شهر رمضان ولازالت عالقة بذهنك للحين ؟ اشهر المواقف اللي حصلت لي كان اول يوم من رمضان انحن ماصمنا في هذا اليوم ماسمعنا بالخبر الا وقت الظهر بعد ماتغدينا وشبعنا مسكنا وكملنا باقي اليوم هذا موقف ماانساه وين كنت تصلي التراويح ؟ ومنهم أشهر الأئمة اللي كنت تصلي معهم وهل تتذكر أحد من الجماعة ؟ نصلي التراويح مع العائله مكان عندنا مساجد بحكم عيشتنا في مزرعه برا الرياض هل فيه فرق بين رمضان على أيامكم ورمضان الحين ؟ اكيد فيه فرق وكبير بين رمضان الحين ورمضان زمان اول من حيث الاكل والشرب والجمعه كل شي له طعم خاص اللي فقدته في رمضان زمان جمعه الاهل مع بعض وعلى سفره وحده وسواليف وضحك الحين الكل لاهي مع نفسه ومع جوالاتهم و كلن يسولف لحاله وياكل لوحده كيف آستعدادكم للعشر الأواخر من رمضان ؟ كيف نستعد للعشر الا واخر نفس بدايه رمضان صلاه وعباده ونتسمع القران ونصلي القيام كيف كان يجيكم خبر العيد ؟ وعيدكم منول كيف كنتم تستعدون له وتقضونه ؟. خبر العيد نسمعه من الراديو كنا نشتري الملابس في منتصف رمضان ونخيطها انحن وليله العيد اللي يبي يحني اديه ولا شعره يحني وفي صباحيه العيد نلبس الثياب ونتعيد وبعدين نروح نعيد باقي الاهل أول عمره لك في رمضان متى كانت ؟ وكيف كان السفر لمكة لأداء العمرة ؟ انا ماحصل لي عمره في رمضان وش رايك بالتغيرات اللي صارت ليومي الخميس والجمعه والله ذا التغييرات حاستنا معد نعرف للاسبوع نظامهم الاول ازين ليت يرجعون له بس شكله مهوب حاصل هل سمعت بمنتديات تمير ؟ وش رايك فيك ؟ اسمع بمنتدى تمير من عيالي كل نهارهم ناشبين فيه ولا ماعرفه معد يشوفون من كثر مايبققون عيونهم فيه قصيده عن رمضان او اي قصيده من اختيارك قصيده عن رمضان ماعندي بس فيه قصيده احب اسمعهاا وهي بيوت الطين لا شفتـه تذكرنـي زمـانٍ دار زمانٍ رغم ما به مـن قسـاوة ماحـدٍ سبـه وهذا بيتنا واطلالـه اللـي عـودت تذكـار وذاك الروشن وهـذا مكـان الزيـر والقبـه وصفّة جدتي مـا باقـي الا بابهـا واجـدار وصوت الباب يصفر كلما هب الهـوى هبّـه وهذا ما بقى من صفة امي والغمـى منهـار غماها من جذوع الاثل واحلى من غمى الصبّه وهذا كان مطبخنا وهـذا هـو مشـب النـار قبل لا نعرف الغـاز وقبـل لا تطلـع الدبّـهعن الماضي لو كان عندك لغز وتحبين يشاركونك الاعضاء بحله عندي لغز قديم ويش الثلاث اللي ايحفظن الاسرار الاسم واحد والشبه بين الاثنيين متفارقات وفيهن اصغار وكبار عند الفقير وعند راعي الملايين

الله يمتعهآ بالصحه والعافيه ... ويطول عمرهآ ع الطاعه

اقتباس: سحورنا مرقوق ولا قرصان او جريش وقهوه وتمر

ماشآء الله اكلآتهم صحيه يجي رمضآن ويروح ماآكلنآ هـ الاكلآت
الله يتم عليهآ وعلى الجميع شهر رمضان المبآرك بصحة وعآفية ويجعلنآ فيه من المقبولين ومن عتقآئه من النآر .
كل الشكر لمن ساعد وارسل حكاوي أم حمد ..

يحليلك ياام حمد تسرقين في نهار رمضان ومحد يدري ههههههههههههه
ربي يعطيك طولة العمر
استمتعت بسواليفك
وحل اللغز الجيب واحد فوق وثنين على جنب ان شاء الله صح

الله يعفو ويتسامح ..

الظاهر كل العالم ماكلين وشاربين سرقة في نهار رمضان ... يبي من يراقب الجيل التالي .. ويحط كاميرات ..

يالله لك الحمد على نعمة الأمن والأمان والتطور والتقدم .. هالحين علم رمضان يجي قبل لا تغاب الشمس ..

شكراً لك أم حمد والله يعطيك الصحة والعافية وأن يعيد علينا رمضان أعواماً عديدة ويتقبل منا صالح الأعمال ..

شكراً لك أختي الراقية على تقديم الحلقة .. وعلى تواصلك مع من أعد وجمع الاجابات من أم حمد ..

ما شاء الله .

الله يعطيك الصحة والعافية يا أم حمد ,, ومشكورين على اللقاء الجميل ,, والله يتقبل منا ومنكم صالح الأعمال ,,

اقتباس: المشاركة الأصلية كتبت بواسطة نبرة فرح    يحليلك ياام حمد تسرقين في نهار رمضان ومحد يدري ههههههههههههه ربي يعطيك طولة العمر استمتعت بسواليفك وحل اللغز الجيب واحد فوق وثنين على جنب ان شاء الله صح

يازين سواليف اول توسع الصدر
حياك الله مرح منوره بحضورك
وبنشوف بالاخير حل اللغز ..

اقتباس: المشاركة الأصلية كتبت بواسطة المهند    الله يعفو ويتسامح .. الظاهر كل العالم ماكلين وشاربين سرقة في نهار رمضان ... يبي من يراقب الجيل التالي .. ويحط كاميرات .. يالله لك الحمد على نعمة الأمن والأمان والتطور والتقدم .. هالحين علم رمضان يجي قبل لا تغاب الشمس .. شكراً لك أم حمد والله يعطيك الصحة والعافية وأن يعيد علينا رمضان أعواماً عديدة ويتقبل منا صالح الأعمال .. شكراً لك أختي الراقية على تقديم الحلقة .. وعلى تواصلك مع من أعد وجمع الاجابات من أم حمد ..

لابد كل واحد فينا حاصل له مثل ماحصل لام حمد الله يعفو عنا ان شاء الله
الجيل الحيين مايمديهم يشربوون لانهم كل الوقت نايمين الله يصلح الحال
شكرا لك اخي المهند ع حضورك وتواجدك الكريم

اقتباس: المشاركة الأصلية كتبت بواسطة مشاهد    ما شاء الله . الله يعطيك الصحة والعافية يا أم حمد ,, ومشكورين على اللقاء الجميل ,, والله يتقبل منا ومنكم صالح الأعمال ,,

الله يعافيك ويخليك
كل الشكر لك ولحضورك الكريم

لقاااء ممتع وجمييل
الله يطول بعمرها يارب ويخلي لهاا عيالهاا
ياحلوهم وياحلو ايامهم
شكرا الراقييه على موضوك الرائع
يعطيك العافييه

لقاء جميل ورااائع مع ام حمد الله يطول بعمرهاااااااااااا
ويخليها لعييلها..

اقتباس: وش أشهر المواقف اللي حصلت لك في شهر رمضان ولازالت عالقة بذهنك للحين ؟ اشهر المواقف اللي حصلت لي كان اول يوم من رمضان انحن ماصمنا في هذا اليوم ماسمعنا بالخبر الا وقت الظهر بعد ماتغدينا وشبعنا مسكنا وكملنا باقي اليوم هذا موقف ماانساه

والله ان هالموقف ماااينسي بس ودي اعرف هل يصلح الصياااام ام عليكم غره ..

وشكرا يالرااقيه ماقصرتي..