تبقى الأسود اسود لو تربط بقيد

16 / 05 / 2013, 07 : 09 AM

الشمس بانت وانكشف زيد وعبيد
لولا التجارب ماكشفت الحقيقه

اشوف كلن صار عنتر وابو زيد
المال سيف الوقت يلمع بريقه

دنياي ماهي صادقه بالمواعيد
الصبر ينفذ والحمل من يطيقه

بعض العدود يتعبن المواريد
يصدر الظميان مابل ريقه

صدقت ماقالوه قبلي صناديد
كل على شكله يجي مع فريقه

أيقنت صدقان الرخا مابهم فيد
بالضيق كل قام يجحد رفيقه

قطاعة الارحام شر على البيد
كم فرقوا بين الشقيق وشقيقه

ياكثر سوالفهم بعرض الاجاويد
مايتركون الاجودي في طريقه

سود القلوب مكثرين الهرابيد
ناس تولع بالمقفي حريقه

أهل النمايم يحسبون الردى جيد
مليون نية عندهم في دقيقه

من شرهم مايسلم قريب وبعيد
اضعاف الانفس ناقضين الوثيقه

في كل مجلس تاخذ الهرج وتعيد
ورى الطماعه والمصالح شفيقه

مال القراده عن خشوم المقاريد
ريع الندامه يعرفه من يويقه

بعض العرب في شوفته فرحه وعيد
وبعض العرب في شوفه الفين ضيقه

ألذيب الاشهب مانقص قدره يزيد
لو كان شفته في شبوك الحديقه

تبقى الأسود اسود لو تربط بقيد
ولا الكلاب كلاب لو هي طليقه

هذا الصحيح ومن زعل يضرب الحيد
عميت عيون اللي يعكس الحقيقه

قلته وانا محمد مرار وتراديد
اموت مابيح السدود العميقه