ديـــوان الـشـاعـر ( عـزام بن عـبـدالله الخــريـف )

قصيده تظهر فيها
معاني
الحب
و
العشق
\
/
\
ألايا مل قلبن.. زاد من طــول البــطا عــوقــه
سبايب من سكن فاقصاه وصار اليوم عاشقها


تولع في هواها لين صارت تمشي في عروقه
مشـابي في دروبه .. لين بانت لي حقـايقــها


يقول اللـي بلاني به ..علـى زينه ومنــطــوقـه
عيونن..كل ماناظــر قلــوب الناس .. يخرقــها


عليها ضحكتن تذبح ..وزين اوصــاف مع موقــه
عليها غــرتن شقــرا .. والا ياطـــول عاتـقــها


وصارت تلعب بقلبي.. يجيب الشعر بطــروقــه
وانا اللـي قلت له ياقـلب .. تكفى لا تصــدقها


ليامن جاب له بيتين ..قالت هذي مســروقــه
تقول بيــوتك اللي قلت يامجنون .. ســارقــها


يقول القلب ..انا اللـي قلتها ماهيب مبيـوقــه
تقـول سمـعـتها قبلك .. وياخــذها يشـقـقـــها


نصحته بس قلبي ياعرب .. قربته مشــقوقــه
صحيح ان القـلوب الخضـر .. حب البيــض يحـرقـها

قصيدة قاسية
وتنبع من قلب أحب
وذاق مرارة الهجر والبعد
\
/
\
/
رح الله لا يردك



رح الله لا يردك يامعودني على فرقاك
لي الله وانت دور لك بدالي واحدآ ثاني



على شانك صنعت المعجزات ولاحصل لقياك
ولكن انت علمني وش مسوي على شاني




رح الله لايهينك شف بدالي واحدآ شرواك
انا مليت من حبك كفاني منك ماجاني




ضميت ومالقيت اشرب ولا انت اسقيتني من ماك
انا وش لي بحبآ من سببه اصبحت ضمياني




انا ماكان في بالي ولا يطري عليّ انساك
ألين اصبحت يالمزيون تسمع هرج عدواني




ترى ما احدآ صبر مثلي عليك ولا على بلواك
طلبتك طلبتآ كانك تعرف العلم تنساني




وانا ما اطرد ورى المقفي لوانه مثل غصن الراك
ترى عيبآ عليّ أتبعه حتى لو تمناني




ترى ماغرني زينك ولكن الغرور اعماك
تحسب اني على شوفك ليا من غبت شفقاني




صغير وعن طريق الحب واهل الحب وش دراك
تعلمك الحياة ان كنت جاهل بعض الاحياني

هنا
محاورهـ رائعه
بين عزام
و
السياره
\
/
\
وش جاك مني جعل ربي يجازيك
تبيعني من دون ذنب وخطيّه

انا اللي الشرهه علي يوم اخاويك
في خوتك ما شفت غير الرديّه

لا تحسب اني يوم انا اشريك باغيك
لكن شريتك وابتلينا بليّه

دايم على هاك المشاوير اداريك
اخاف تطفي يالعراوي عليّه

نسيت سجات الهوى في مساريك
الله واكبر صرت انا لك ضحيّه

يومك تبي شوفة وليفك واوديك
تكدّني واليوم فيه وفيّه

فضحتني والله ولاني مخليك
عز الله انك ماتعرف الحميّه

لا وحسافه ياقصيدآ كتب فيك
يستاهله موتر عزومه قويّه

خل الصغيره في المكاشيت تغنيك
لا صار كل واحد يحمل طليّه

اخطيت في حقك ولا نيب ناسيك
ومني ليا شفتك ابا اضرب تحيّه

قصيدهـ
تجلت فيها قوة الشاعر
لفظا
و
معنى

\

/

\
ياللي تهدد تبي فرقاي وش ردك
مهوب انا اللي على الفرقا تهددني



ان كان ماجاء على بالك ولا ودك
ثمّن كلامك ولا تغلط تعاندني


ماتشفع عيونك الخدرات في صدك
عندي كرامه وتبطي لو توددني


لكني ابنشدك وش الذي حدك
وانت انشد ان كان في خاطرك تنشدني


اشوف دمعآ تحدر من على خدك
هذي ديون الهوى واليوم سددني


يازين فصّل لك ثيابآ على قدك
والحب كلمه عليها لا تشهدني


لا تحسبني معك والا ترى ضدك
خطاك يومك بغيت انك تقلدني


واظن ياصاحبي جاك الذي سدك
ماعاد تقدر على الفرقا تهددني

قصيده الصمت فيها ابلغ من الكلام

\
/
\

سامحيني دام جاء وقتالرحيل
وأنسي اللي راح من لوم وعتب

أدري أن قلبك من الفرقا عليل
ما جرى يازين في اللوح أنكتب

خابر(ن) دمعتك عندي ما تسيل
ويوم رحتي هل دمعك وانسكب

أفترقنا والزمن عمره طويل
يا عسى ربي يخلف ألنا التعب

حالف ان قلبي لغيرك ما يميل
وبقطع عروقه ليا مال وكذب

أنتالاول مالك بقلبي بديل
صرت شاعر وأنت يازين السبب

ياحبيبي لعنبوا هاك الجديل
كانه أبلشني ووراني العجب

أسهر عيوني ولا شفت الحصيل
لاذكرتك قمت أنتف في الشنب

بنتظر يمكن تردين الجميل
وان طلبتيني فانا تحت الطلب

لحظات من القهر و الانتظار والشوق
هنا عبر الشاعر
عن معاناتهـ
\
/
\
/

قالوا تنوم وقلت نومي على الكوع
مانيب انا والنوم والله ربوعي



قالوا علامك قلت ذا خامس اسبوع
ماجت مراسيل الوليف القطوعي



قالوا تصبر قلت صبري على الجوع
اهون ولا اصبر دون زين الطبوعي



ابو جديلآ فوق الامتان مجدوع
قلبي خذه من بين حدب الضلوعي



مايدري ان الوصل في الدين مشروع
ولا يدري ان البعد كمل دموعي



الله يعين اللي من الشوف ممنوع
من عقب ما فتّح بقلبي فروعي



ياصاحبي قلبي معك راح مبيوع
والحال والله لو تشوفه يروعي



اما اسقني من ريقك العذب قرطوع
وألا علي صلوا بليا ركوعي

هنا
يحاكي الشاعر نفسه تارة
وتارة يحاكي الواقع
\
/
\


قصيده دورة الأيـــــــــام





ألا ياويل حالي كان شانت دورة الايام
أنا مالي جدى ياكود ابشكي لله الوالي


أبقرا سورة التوبه وابقرا سورة الانعام
عسى الله مايواخذنا على هفوات الانذالي


ألا وش حيلتي مادام حارت مني الاقدام
عجزت ألقى الطريق اللي مشوه الناس ..عزالي


صحيح ان الحياة دروس لكن الوعد قدام
أدرّجها ولكن ربي اللي يعلم بحالي


متى تصفي لنا الدنيا بدل ماتحكم الاعدام
متى قلبي يبي يرتاح من همي وغربالي


رفيقي مالقيت ألا رسوما ً خطها الرسام
رفيقي مالقيته وان بغيته ما تهيالي


ترى ماراح من عمري حسبت انه خسارة عام
ألا يالعنبوا وقتا ً يغيّر بعض الازوالي


وألا ياعزتي لي كان ماتصفي لي الايام
انا وان ضقت مالي غير ابشكي لله الوالي

هنا
غموض
وابداعـ حتى الثماله

\
/
\
/

لــــــــيـــــلــــة الــــبـــارح


لا يا عذولي لا تحسب أني على العهد القديم
والسالفه يوم ٍ طرت لا تحسب أن ما اوحيتها



عديتها لك بس أشوف انك تغيشم يالغشيم
ماهيب في صالحك والله بس أنا عديتها



طيب ووفاء مني على شان المعرفه يالنديم
وألا ترى بعض السوالف لو أبي ما أخفيتها



ياليلة البارح سهرتك والشتاء عندي جحيم
والجادل اللي تلتفت لي في حشايه بيتها



أدري تبيني بس أنا أشوف السما والجو غيم
وألا لو الدعوى عليّه في الصدر ضميتها



تصبح وتمسي في خيالي وأذكر الحب اليتيم
ياليتها تبقى على عهد المحبه ليتها



واللي تشوفه من جفا ماهوب والله العظيم
ألا غلا لكن أنا بغيتها وأخطيتها



حقك عليّه والزعل ما هوب من طبع الكريم
يالغالي اللي من غلاك الروح لك مديتها

قصيده رائعه
بها اجمل معاني
الحب
و

الوفاء

و
انتظار الحبيب
اللي
جفا
جفا
جفا


\
/

وين أنت ياللي باني ٍ فالحشا بيت
راح وترك بيـن المعاليق بيته



خليتني لا نيب حي ٍولاميت
أرخصت لك روحي وش اللي بغيته



ما قد خبرت وقلت شي ٍ وعييت
قلبي وش مسـوي بصـدك نويته



لامن ذكرتك هل دمعـي وصديت
وأقـول ليتك تذكر اللي نسيته



أنا الذي من حر فرقاك ونيت
بعدك وهجرانك ترى ما قويته



لامن ذكرتك في حلا النوم فزيت
بالله من صدك وش اللي جنيته



أنت الذي في وسط قلبي تمركيت
وأنت الـذي بسهوم عينك رميته



واليوم فـي دنياك يالترف سجيت
ما شلت هم اللي بصدك كويته



منك الجفا يازين ما قد تحريت
واللي عذلني عنك ياما عصيته



من بد خلق الله ترى ما تمنيت
ألا أنت ياللي عرق قلبي وطيته



لكن تراها أيام وتقول ياليت
من بعدها ما ينفع اللي حكيته

هنا
كبرياء
شاعر
لا يرضى الخياانه

\
/
الصدر ضايق والرجا فيك مقطوع
وأنا الذي سجلت باسمك ضياعي


خليتني تابع وأنا كنت متبوع
ونزّلت نفسي لك وأنا فارتفاعي


شفتك وحبيتك وانا مالي اسبوع
غلطه وعدت مالها أي داعي


بكتب على قلبي لشرواك ممنوع
طويت من مركب حياتك شراعي


قد كان حبك داخل القلب مزروع
واليوم أبكتب لك قصيدة وداعي


لا تنتظر مني مراسيل ورجوع
الوصل بدلته جفا وأنقطاعي


لاتحسب أن الجسم لا صار مربوع
بجيك واعلن لك ولاء وانصياعي


الوصل أبعد عنك من حبة الكوع
رح لا تجي وفجوج ربي وساعي


لا تحسب اني منقطع مالي ربوع
ربعي تميم أهل الفخر والمساعي