مابقا ف العمر خير ولا بقا للشعر معنا

مابقا ف العمر خير ولا بقا للشعر معنا
......ومـابقــا عندي كـلام ولا بقى شـي تـقوله
انتهى ذاك الزمان اللي بلا موعد جمعنا
......وابتدى الدرب الطويل وتاهت الاقدام حوله
وانهدم حـلم كبير وقالت الاوهـام ضعنا
......واشتهى القلب الجريح معانق ايام الطفوله
وضاق صدر(ن)كان لاضاقت بنا الدنيا وسعنا
......وشح عود(ن)كان ينحر لا لفى الطرقي ذلوله
والله انك يوم بعت احلى سنين العمربعنا
......من يعاف الوصل عفت الوصل منه وعفت زوله
لا تحسب انا ليا قفيت بفراقـك جـزعنـا
......وانحنينا للوصـال المـر وارضـتنا حلوله
مارضى بالهون عبد(ن)رابي من صغر معنا
......كيف ابا ارضابه واناعمه ولي ربع وحموله
لو عصاناالوقت قلنا هيه يامجنون طعنا
......تدري انك ماتطول اللي على الدنيا نطوله
ابعدي يا بنت وانسي وقت في حبك طمعنا
......واتبـعي كـل الدروب اللي توصـلك بسهوله
واتركيني مـع بقايا حبك وماضي ولـعنا
......اتلــمس ذكـريات فيـه مــرتني عـــجوله
ويش اقول ان قال جرح الحب يامحمدرجعنا
......وويش عذري من خفوقي كل ما احبابه طروله
الوكـاد اني تعبت ومـا بقا للشعر معنا
......والوكــاد انك قضـيت ولابـقا شـي تـقوله
الشاعر / محمد العتيبي

......من يعاف الوصل عفت الوصل منه وعفت زوله
لا تحسب انا ليا قفيت بفراقـك جـزعنـا
......وانحنينا للوصـال المـر وارضـتنا حلوله
مارضى بالهون عبد(ن)رابي من صغر معنا
......كيف ابا ارضابه واناعمه ولي ربع وحموله
قصيدة جزلة وقوووية
وتعجبني النوعية من هذة القصائد
صح لسان شاعرها ولسانك يالسنافي
وتسلم يمينك علي نقلها
دمت بخير

يـعطيـك العـافيـه يالسنافي عـلى الـنقـل الـرائـع والمميز

ودائمن الجزل ماينقل الاجزل يابوعبدالله الله لايهينك

وصح السان الشاعر / محمد العتيبي

تحياتي الشمالي

صح لسانك يالسنافي ع النقل الرائع

قصيده جزله لاعدمناك طال عمرك

تقبل مروري

يـعطيـك العـافيـه يالسنافي عـلى الـنقـل الـرائـع والمميز
وما قصرت