من وحي الخيال 7

ماشاء الله عليك..
قصه مشوقه واتخيل احداثها واضحك على حال الجوال..
بانتظار البقيه..

عااد واقووولكم يا جماعة الخير ...

من يوم شراني ذاك الشاب من شهر وأنا عايش في عذاب وجحيم ما بين ( نوير ) و ( سوويره )

أمهم موصيه أخوهم سامي يشتري لهم جوااال بينهم ومقسسمة الوقت بينهم ( الجوال بالليل مع سويره .. وبالنهار مع نوير )

من قرادة حظي صرت أنا ذاك الجوال اللي داعية عليه جدته مرتييين وطحت بين :

نوير : مخلصة الثانوويه وما كملت دراستها وجالسه بالبيت ،، شخصيتها شخصية إنتهازيييه وقلق .. دايماً تلعب على أختها وأصير اغلب الوقت معها ... هاريتني هري بمقاطع أغاني راغب علامه وعبادي الجوهر والمكالمات .. ما أرتاح منها إلا اذا خلص الرصييد .. و إذا بغت تكلم بالجواال تلصق خشتها بالماايك حتى إن ( المايك حقي ) أحياناً يقولها : هييه أنتي وخرري براطمك عني خليني أتنفسسس ..
سويره : تدرس في الثانوي آخر سنه .. مسكينه على نياتها ما تحب تكلم بالجوال بس تحب تسمع أناشيد وكل المقاطع اللي تنزلها أو تستقبلها بالبلوتوث من صديقاتها وبنات خالاتها وعماتها كلها أنااشيد وأذكار و أشعار يعني رومانسسسيه بعكس أختها التمسااحه نوير ..

المهم صار وضعي مع هالبنتين يومياً كالتااالي :

سويره قبل ما تناام تحب تحط السماعااات وتشغل الإستوديوو حقي و تقلب في المقاطع والأناااشيد ألييين يغطها النووم وأنا يحوووول اقعد طول الليل بطاريتي تطنطن إلييين أنهك وأتعب وأطفى أبغا أرتااح شوووووي وأغمض ..

تووني أغمض عيوووووني إلا و هالتمسااحه نووووير تقووم أختها للمدرسه : هيييه سووويره قوومي للمدرسه

وتلقطني من اذن اختها وتنغز الشاااحن فيني وأنا أبقق عيوووني وهي حمراا من قلّ النوووم .. والتفت عليها وعيووني ما اقدر افتحها واقولها : جعل ينغززتس بلييس يا سحيله أم الخلاااقين ..

وتقعد تقلب فيني وتحوووس مريررتي مكالمات و رسائل وسائط و مسجاات أغلبها ( كول مي ) إليييييين ترجع سويره من المدرسه الظهر ويجي دوورها

في مره من المراات ..

سويره قالت لأختها : ودي أخذ الجوال معي المدرسه بكره أوريه صديقتي هنادي عشان تصدق إني شاريته
نوير مكششره : خيير خييير تاااخذييينه وأنا أجلس الصبح لحاالي وش اسوووي .. بعدين الجواال أصلاً ممنوع في المدرسسه ...
قامت سويره تترجى نوير : تكفييين يا نووير المررره ذي بس الله يخليييتس والله إذا رجعت من المدرسه خليييه معتس أسبووع كااامل
اختها نوير تفكرررر شووي ثم قاالت : أكيييد تخلينه معي إسبووع كااامل ؟؟
سويره : إييه يا نوير قسسسم بالله في صلااة أمي وأبوووي << يا قدمها ذي القروويه خخخخخ

بصرااحه أنا أنبسسسطت مرره قلت بكون الصبااح في المدرسه مع سوويره وأكيييد بألقى لي وقت أرتاح فيه وآخذ لي غطه قبل ما أطيح الظهر في يد نوير ..

آآآآآآآآآآآآآآآآه بس ليت نوير ما وافقت أن سويره تاخذني معها المدرسسسه .

قسم بالله بيتهم كووووم و المدرسسسه كوووم ثاااااني

*****

أخذتني سوويره معها المدرسه ولااافه علي كيسه ومغطيتني بجريده ولافزتني في أسفل الساافليين داخل شنطتها عشان ما أحد يكششفني كني قطعة مخدرااات ...

يوووووووووم جت الفسسسسسحه :

سمعت سوويره تنادي صديقتها هنااادي في الفصل لحالهم وتسكر باب الفصل و تسوي كل إحتياطااتها الامنيييه

وتووها بتطلعني من الشنطه إلا وتدخل علييهم ( شهرزاد آدم .. أدفرر سوداانيه في فصلهم ) ويووم شافتني شهرزااد في يد سويره بغى يغمى عليها ..

وقامت تصاايح وطلعت من الفصل تصااارخ : أبلا مونيييره .. أبلاا مونيييره .. الحقي عليّا حيصوروووني

الكاميرا حقتي أنهبلت المسسكيينه صدقت إنها صورت ،، قامت الكاميرا تصيح و تقول : قسسم بالله ما صوورتها

وأنا أقعد أهديييها واقولها : ما عليك منها يا آنسه كاميرا خليك واثقه من نفسسسك

ما دريت إلا والمدرسه كلها في كامل إستنفارها و أعلنوا حالة الطواريء في المدرسه ..

جت أبلا منيرره عند شهرزااد وهي تصييح وابلا منيرره تهدي فييها و جت مديرة المدرسه والوكيله و الفرّاشششه ..

أنا رفعت يدي في وضع الإستسلااام قسسسم بالله خلاااص حسيت إنهم لاقين أسامه بن لادن مهوب جواااال

قمت أتلفت أدور على سووويره لقيتها جالسسه في الزاووويه تصييح وتضرب خدودها وتقول : يا ويلي من نوير يا ويلي من نووير ..

قسسم بالله قهررتني مااالت عليك وعلى نوووير ،، هذا اللي هاامك بس يا بقررره ؟؟

المديره أخذتني .. وقامت تقلبني في يديها وتقلب براطمها كنها شايفه ضاطور ..

وتناظر سويره وعيونها تقدح شرااار : سووويره ،، وش ذاا اللي جايبته معك المدرسه ؟؟ ما تدرين إنه ممنوووع خاصة ابو كاميرا ؟؟

سويره حاطه يدها على وجهها ودمووعها أربع اربع ...

المديره ماسكتني بيدها بقووه وخانقتني وعيووني طلعت من قووة الخنق وهي تقول لسويره : بكرره جيبي ولي أمرك ،، والجوال بيكون عندي إلين تجي ولية أمررك فاهمه ...

وتطلع المديررره من الفصل و تروح مكتبها والمدرسات والوكيله والفراشات كلهم صافيين سراا وراها

وأنا بتطلع رووحي من قوة ضغطها علي .. وصلت المكتب وفتحت الدرج و نطلتني فيييييه نطله حسيت ظلووعي كلها تكسسررت الله يكسرر يدها ...

وأنا في الدررررررج جاالس أسمع لمشاكل الأبلاات إذا أجتمعوا في غرفة المديره .. هذي مطلقه وهذي معرس عليها زوجها .. وهذي خايفه من الزواااج لأنها تسمع بمشاكل المدرسات مع أزواجهم بسبب الراتب .... الخ

للقصة بقية في غرفة المدرسات

انتظر البااقي ,,,

هههههههههه
ياهي حالتك حاله مابين سويره واختها نوير..
رحمتك يالجوال..
بانتظار البقيه..

وانا في الدرج شميت ريحة سندوتشاات طالبينها المدرسات من كودو عشان يفطرون وسمعت هذا الحوار :
المديره : وين أبلا عزيزه وراها غايبه اليوم ؟
أبلا رحاب : أبلا عزيزه الحين بالمستشفى تولد الله يهوّن عليها
أبلا سميه : أعانها الله على تربيته ،، والله ولدي مصعب اليووم عجزت عنه يقوم يصلي الفجر
المديره : نعنبو بليسك يا أبلا سمييه ترا ولدك مصعب عمره خمس سنين توووه على الصلاة
أبلا سميه : وأمروهم بالصلاة لسبع وأضربوهم عليها لعشر .
أبلا رحاب : ما قلنا شي يا أبلا سميه بس تووه صغير ما بعد وصل عمره سبع اصلاً ..
أبلا سميه : أبووه ناطله بحلقي و رايح لحرمته الثانيه جعله الطاعوون هو وياهاا
المديره تضحك : ما فيه أحد مرتااح إلا أبلا عواطف لا ولد ولا تلد
ابلا عواطف : والله اني من جيت لهالمدرسه وأنا متعقده من الزواااج من مشاكلكم اللي اسمعها كل يوم ..

شوي إلا نوير تتصل على أختها سويره من تلفون البيت تتطمن علي خخخخ

والأبلات والمديره يسمعوون جرس جوال ...

ابلا رحااب : من ذا جواله اللي يرن ؟
المديره : إييييييييه هذا جوال وحده من الطالبات جايبته معها وأخذته منها وقلت لها تجيب ولية أمرها بكره

قامت المديره وطلعتني من الدرج .. وشافت الرقم و ردت ...
المديره معصبه : نععععععععععم
نوير أنصدمت وقامت تتلعثم : الوو .. شسسسمه ذااك ... وشو من أنتي ؟
المديره : ما تستحون تعطون بنتكم جوال بكاميرا تصور بنات خلق الله
نوير عصبت : إسمعي .. البنت هذي هي عندكم عليكم فيها لكم اللحم ولنا العظم بس إن جا جوالي شي قسماً بررب البيت لأتوطاااك
المديره أنصدمت : من أنتي ؟؟ أنتي أمها ؟؟
نوير : إييه أنا أمها و الجوال اللي في يدك تراه اغلى من بنتي أياااني وأيااك يجيه شي فااهمه ..

وتصك نوير الخط ..و المديره بلعت ريقها من الخووف

ناظرت المدرسات وقالت : إذا هذي الأم اجل ما على البنت شرهه
المدرسات يسألون المديره : وش السااالفه ..
المديره تسأل المدرسات : الحين هالجواال بكم يا بنات ؟

ابلا رحاب أخذتني وقامت تقلب فيني و أنا أطاالع في وجهها .. هالوجه مو غريب علي وتذكرت إنها الحرررمه اللي تطلقت في المحل ..
جت ابلا عواطف وتاخذني من يد ابلا رحاب وقالت : خلينا نشووف وش عندها مقاااطع ان كان فيه شي زين برسله ببلوتوث لجوالي

قامت أبلا عواطف تقلب في الإستديو والمقاطع وهي مستغرربه وقالت للمديره : من ذا جواله ؟؟
المديره : هذا جايبته سويره اللي بصف ثالثه رابع ... ليش ؟؟
قامت ابلا عواطف تضحك وقالت : ما عرفت لهالبنت هي مطووعه ولا وش سالفتها ..
قامت المديره ولقطتني منها وتفتش في الإستديوا ..

ولأني صاير ( قطّه ) بين سويره ونوير ..

اختلطت أغاني نوير مع مقاطع سويره وصار بهالشكل :

دقة عود لعبادي الجوهر.mp3
تلاوه خاشعة للسديس.mp3
الصوت الحنون راغب علامه.mp3
إنشودة طيور الجنه.mp3
دقه رومانسسية.mp3
الرقية الشرعيه.mp3
الطقاقه موضي الشمراني.mp3

*********

المهم مالكم في الطويله ...

طبعاً عدى الموضوع على خير .. وسويره عطوها تعهد بعدم إحضار الجوال للمدرسه ..

و أم ( سويره ونوير ) زعلت عليهم وأخذتني منهم و قالت لولدها : رح بع هالجواال الله لا يباارك فيييييه جاب لنا المشااكل

ودي أسطررررها ... وش دخلني أنا ؟؟؟ البلا في بناتك هالزاحفااات قسم بالله جابو لي الكلاام

وراح ولدها ساامي وبااعني برخص التراااااب

بصرااحه حزّ في خاطري إني صرت ( مستعمل )

و رجعت إلى كاونتر العرض كـ ( جهاز مستعمل بدون ضمان )

إلين إشترااااني واااااحد وكانت نهايتي المؤلمة معه

للقصة بقية قريباً إن شاء الله

مآشآء الله على خيالك
وقسم بموت من الضحك على هالجوال من يد في يد ههههههههه
ولآ طاح الا في يد الحرمه اللي كنهم عصافير الكناري هي وزوجها وتطلقت بسببك
ياحلو هالقصص اللي توسع الصدر اشوا من الجن حقين تميريه !!
متابعه لك وبشوق

الدائرة المستقيمة ..
أنت خالص ..
لعبت في ذا الجوال لعب ..
نبي لنا خيال ثاني إذا خلصت من خيال الحريم ..
ومالنا يالرجاجيل إلا أنك تصير مفتاح ..

يالله نبي نشوف وش آخرتها ..

مشاءالله عليك ..

صراحه مبدع .. حبكه رائعه للقصه ..

اثاري الجولات تعاني ..

احسن شيء دعوة جدتك تراها صادقه ..

بإنتظار البقيه ..

في انتظار الباااقي

ررروووعه00ررروووعه00يا الدائره

استمتعت بقراءتها 000ورحمت ها لجواااال من يد ليدههههههههههههه

شكرا لك وبانتظار ما تبقى بشوق

تحيااااااااااااااااتي