همك كبير وسر الايام خافي

نصبح ونمسي والخواطر مجاريح
تالي زمان صار فيه اختلافي

سادالظلام وغاب نور المصابيح
واصبح سنا نور المصابيح طافي

قامت بروقك يالمزون المراويح
تكشف لنا ليل دروبه خوافي

مزن سكب دم النفوس المذابيح
لين انحدر سيل من الدم صافي

هبت عواصيف الزمان اللوافيح
واهتزت اجبال السنين العجافي

مصايب مثل الخرز في المسابيح
اللي تخالف في الخيوط الرهافي

انفلت السبحة وجاتك مدابيح
هاذي مقابيل وهاذي مقافي

ياللي تجر الصوت وتون وتصيح
همك كبير وسر الايام خافي

ماتدري ان وقتك يدينه ملاويح
وان ساق رجله ماتمل الوقافي

شفنا السلاطين الدهاة الطحاطيح
ضحية الفلم الحزين الخرافي

تلعب على كر الهواء في المراجيح
منا ومنا بالحبال الصخافي

اصدورنا تشبه قدور مفاويح
وادروبنا تشبه فجوج الفيافي

لكن طريق الباخره خالف الريح
والوقت يغلبه الجفا والتجافي

اهدافنا ماهيب ركلات ترجيح
شوطين اساسيه وشوطين اضافي

نمسك زمام اللعب ونقوم ونطيح
ونطبق افنون اللعب باحترافي

لكن للفوز الحقيقي مفاتيح
ضاعت تحت ضغط الفريق المكافي

راحت رموز المجد دار المفاليح
مخاطر تحرق قدم كل حافي

من مات مات ومن حيا دمه يسيح
فراشه الارض وسماه اللحافي

الى متى والوضع يحتاج تصليح
والى متى والوقت قاسي وجافي

بعض الغلط ماعاد يحتاج تصحيح
اقولها واللي على البال كافي

ياهل الفرايض والرتب والتراويح
مصايب الدنيــا ثقال اخفافــــــي

واما ارتفع صوت الدعا والتسابيح
تبقى الحياة ابميلة وانحرافي

واليوم ياربي عليك التساميح
ونعيش مستورين والخير ضافي
زمن

اقتباس: المشاركة الأصلية كتبت بواسطة زمن    واما ارتفع صوت الدعا والتسابيح تبقى الحياة ابميلة وانحرافي واليوم ياربي عليك التساميح ونعيش مستورين والخير ضافي زمن

الله الله يا زمن كلمات طيبه من شاعر طيب ..

فعلا َ الدعاء والتسبيح هما الحل الوحيد ...

بس أركد علينا شوي يازمن في المواضيع خلنا نلحق نتصفح ..

مشكوراخوي ابوعبدالله

على الطله الحلوه

بااااااااااي

الى متى والوضع يحتاج تصليح
والى متى والوقت قاسي وجافي

بعض الغلط ماعاد يحتاج تصحيح
اقولها واللي على البال كافي

ياهل الفرايض والرتب والتراويح
مصايب الدنيــا ثقال اخفافــــــي

مشكور يازمن قصيدة اكثر من رئعة سلمت يمينك