السوق زحمة والاوادم ذهينة

هذه القصيدة جميلة لاحد الشعراء اخترتها لكم ونعتذر على الإطالة

العين عن حلو الكرا موقها تاب=ماتذوق حلو النوم ياذايقينة
باسباب لانه ماش شي بلا اسباب=هاك الغزال اللي ذبحني بزينه
مرّ يتخطى ويتلفلف بالاسياب=وطير عن القلب المشقّى يقينة
من نظرته وقّع على القلب مضراب=اشد وقع من الرماح السنينة
يسرق نظر عينة حذر مدري إعجاب=ونا معه قلبي تقطّع وتينة
عرّض ومن تعريضتة خافقي ذاب=وقمت اتبعه ماغير عيني بعينه
واقفا عجل من نظرتي فيه مرتاب=ويحط ضول الناس بيني وبينه
وصديت عنه وخاطري منه ماطاب=كني ماني يمّه وانا اقول وينه
من خوف يفطن لي وننشب بالانشاب=السوق زحمة والاوادم ذهينة
وخت عنه اشوي مقفي والاعصاب=متوتّرة مافكّرت بتهوينه
ولدّيت ليننّه يسعّر بالاطياب=عند الهنود اللي لغتهم رطينة
وارسلت يمّه نظرة احباب لاحباب=النظرة اللي ماتركتلي غبينة
واقبل يبا يحطني عنه مجناب=وشكّيت في ممشاه على هوينه
وناظرت فيه وضحّك الناب للنّاب=ومن ضحكته حلّت علي السكينة
وموّه على اهل السوق واشّر بالاهداب=إشارةً تبغى قلوباً فطينة
منهافهمت انه يبا يعود لو غاب=وان الامر معاد هو في يدينة
وعقب غلاق اسبوع مر ومعه جاب=اصغيّراً متجوّداً في يمينة
اصغيراً بالزين للعقل نهّاب=يقول اخوي ومقصده فاهمينة
قصده يقول ان كان عندك استيعاب=علي من هاذا ملامح وعينة
واخذت انا وياّه مزح وتعجّاب=مزحه رزين وكل كلمة رزينة
في موقعاً عنه المخاليق غيّاب=إلا ملايكة العمل حاضرينة
بيني وبينة ماحصل غير الآداب=آداب سلماً كلنا وارثينة
منه إحترام شعور عربين الانساب=ومنه احترام الرجل عقله ودينه
وبغا الوكاد وقلت هايم ومنصاب=حبك ذبحني نعنبو والدينة
قال استبيحك عذر واقول لعّاب=وش ذالغرام اللي غدابك بحينة
وحلفت له واقسمت في رب الارباب=منجي من الطوفان راع السفينة
إني معه صادق ولانيب كذّاب=والكاذب الله لايطوّل سنينة
قال انت صادق بس سابقك خطّاب=واهلي في تال الشهر موعدينة
كم له وهو ماغير ذهّاب وايّاب=لاهم بمعطينة ولا رافضينة
وان كانها تمت على يدين كتّاب=وتم القران وروّحو كاتبينه
انا تراي ابا اعتبرك من الاقراب=وعلى النقى تبقى صلتنا متينة
وودّع وصارت كلمته تقل مشهاب=واركت على كبدي عراقي مزينة
وبقيت في وضعاً تحير ابه الاطباب=ايّست منه وحالة الياس شينة
واخذت وقت احسّب ايامه حساب=وقلبي على شوفه تزايد حنينة
احيان اقول انشد عنه بعض الاصحاب=وتجيك بالعلم الموكّد جهينة
واحيان اقول اصبر على جور الاتعاب=ورزق الفتى واجله كتب في جبينة
وسكت ماودي عليه افتح ابواب=للهرج من ناساً مهم راحمينة
وصبرت مير الصبر طوّل ولاتاب=ومن طال صبره يالله إنك تعينة
ويوم ان راسي من طويل الصبر شاب=قررت عنه اسال حدى مجاورينة
وسالت عنه وقال راحو به اجناب=من قريته شد وسكن بالمدينة
قلت ايه مادام اهله عندنا يجاب=أمّا بعيد الفطر ولا بحتينه
قال اهله معه رحلو قلت ياشاب=يعني لازايركم ولازايرينة
قال ايه بس انسه والايام هرّاب=تطول وتنسيّ ظنيناً ظنينه
قبلي وقبلك خلّـت احباباً احزاب=وكم فرّقت بين الخدين وخدينة
ماعاد في شوفه طلايب وطلاّب=ترى معاد الا يدرّج جنينه
وش تطلبه واحباله بكف قضّاب=احذر لاينصب لك زمانك كمينة
قلت الرجال مفتّلة روس الاشناب=لاقسى الظروف حسابهم حاسبينة
واقفيت من عنده على الغلب غلاّب=اكن غيظ القلب واجحد ونينة
واعلنت ياسي وانطوت صفحة كتاب=من البداية للنهاية حزينة

وسكت ماودي عليـه افتـح ابـواب
للهرج مـن ناسـاً مهـم راحميـنـة
وصبرت مير الصبر طوّل ولاتـاب
ومن طال صبـره يالله إنـك تعينـة
ويوم ان راسي من طويل الصبر شاب
قررت عنه اسال حـدى مجاورينـة

كم أنت رائع

حقا أتحفتنا

الحطيئة فعلاً انت مكسب للمنتدي نرجوا المواصله على نفس هذا الحماس
شاكر لك تفاعلك معنا
حياك اخوي

رائع
رائع
رائع
تسلم وسلمت اناملك على هذا الذوق
لك تقديري واحترامي
مهنا العتيبي
الموج