(((قصائد أعجبتني)))

اعتراف يستنبت عشب الأجوبة لينسدل كستارة ضوء تنير طرقات الشعر الغارق في عذوبته المختلفة... هنا تتظاهر أصوات المشاعر للإبداع فقط ... وتتشكل على أنامل مبدعها لينزفها كشعر صارخ في تميزه نحتضنه في قلوبنا ... الشاعر حمد الحبابي ورائعة تفوق الجمال...

اشتقت لك وأنا معك... وشلون تبغى أودعك=لا والله إلا ما كتب ربي يا محبوبي وداع
أقعد معي... وأصغ أستماعك لي وأنا باسمعك=أحلى قصيدة قلتها في وصفك... أصغ الاستماع
لولاك ما قلت القصيد وكيف أنا ما دلعك=يا ملهم الشاعر وسيد الشعر يازين الطباع
طمعتني بمعانق أحلامي وجيت أطمعك=بمعانق الحلم الكبير وحب مايمه نزاع
ولعتني فيك... وتولعت... وقدرت اولعك=لين الغلا اصبح كل يومٍ ياحبيبي فرتفاع
جرعتني كاس المراره مير أنا باجرعك=كاس من إحساس ٍ يعشق المر لي حد النخاع
أبطيت يا باب الهوى مقفول قبل آشرعك=ومن يومها وأنا اعتبر... ما فات من عمري ضياع

علي بن اسماعيل شاعر عذب... يهمس في قلوبنا حباً... شجناً... شفافاً كالندى... وهذه القصيدة رائعة جديدة من ذلك الهمس لقلوبنا فقط...

فالمكان اللي جمعنا والزمان اللي غرام=يا كتاب العشق سجل... كل تفاصيل الحنين
سمّني عاشق لريمٍ والسكن بأرض الهيام=والعمل نقش القصايد في قلوب العاشقين
والعمر يا دوب طفلٍ... توّ ما كمّلت عام=ما نحسب فيني عمرٍ من قبل أنتي تجين
يوم ميلادك غلاتي باحملك فوق الغمام=باشعل نجوم المساري نجمتينٍ... نجمتين
بس أنا وانتي معايا يختبص فيني الكلام=يكفي إني لا ذكرتك أفقدوني الحاضرين
يا حياتي يا ترى في علم أنا ولا فمنام=آآآه منك... أسألك وأنتي بعينك تضحكين
عاد هذا وتوني... ماشفت وش تحت اللثام=أنتي نظره والقبر... مسكين منهو تناظرين
لا تسلي الرمش هونك سل رهاف الحسام=الفعل فعل الرهايف وأحسب أنه رمش عين
خلني بآقول كلمة خلها مسك الختام=كل عامٍ ياحياتي ... وأنتي قلبي تسكنين

حين يكتب الشعراء القصيدة تتماوج الألوان في خيالهم المتهادي بين النور والطيف ولهذا يمتلك الشاعر مالا يعد ولا يحصى من الألوان التي يمكن أن ينسج منها قصيدته...
والشيخ عبد الله بن عبد الرحمن آل ثاني يتحفنا بهذا الألق المشتعل حتى يكاد يجعلنا نحس بلحظة تساقط الدمعة من الجفن الجميل... لأنه أول الخلان وأعرفهم بمعنى الهوى...

تفوح دلال حبك ويتناثر في خفوقي هيل=وأنا خابر فناجيل الغلا تسقيك من ذاتي
تخيل... لو كتمت بداخلي سرٍ يهد الحيل=وأخاف أنّي إذا قلته يكون أكبر معاناتي
تخيل... لا اختنق صوتي تحت وقف الحكي تأجيل=أنا وشلون أفسر صرختي... لا ضاقت شفاتي
جنوني من عذابك... والمواجع... والسهر... والليل=يجردني كم اطراف المكان ولوعة آهاتي
إذا مات الطموح وما بقى في عالمي قنديل=أبتأمل... أبتأمل ولو ماتت طموحاتي
تعلّقني على جدار الزمن... والجرح سيف وخيل=غلاك السيف في صدري... وخيلك جرح زلاتي
عجزت ألقى بديلٍ لك يساعدني على التمثيل=وأصدق كذبتي إنّي كرهتك... وأنت غاياتي
تفوح دلال حبك ويتناثر في خفوقي هيل=وإذا ضاقت بك الدنيا... تعال أسقيك من ذاتي

عبد الله فلاح الهاجري.... بدون مقدمات

مثل ما تغفي الغيمة على صدر السما وتنام=تعالي وانثري ليلك على صدري وضمّيني
تعالي لا عدمتك يابلح صنعا وتين الشام=ولا قمت آتنثر لك غلا... تكفين لمّيني
تعالي وأسأليني... كيف حالك بعد غيبة عام=وأمانه... لا عرفتي وش جوابي لا تلوميني
وحشتيني!! وجيتك يابعد عمري وَلَه وهيام=ومن اللي قال لك يانور عيني ما تهميني
أفا والله على غيرك!! غيابك لو يطول أيام=لقيتي كل من حولي... بمجنونك يسمّيني
تبين أفلّ رزنامة ضلوعي وأكشف الأرقام=وأبين لك عدد طعنات رمشك يوم يدميني
أو أسكت وآتجمل لو غدت كل الضلوع أقسام=على شان الغلا اللي عن جميع الغيد معميني
بعيني كن ما غيرك مَرَه من صلب سام وحام=يا نورٍ لا نقص بدر الشهر... يزهمك... تمّيني
أنا لك باصمٍ بالعشر وأنتي باصمه بابهام=وأنا لي طلبةٍ وحده... ومنها لا تحرميني
مثل ما تغفي الغيمة على صدر السما وتنام=تعالي... وأنسي الدنيا على شاني وضمّيني

عندما نقول أحمد بن ظاهر المهيري ... تمطر سماء الشعر حنين الصدق والشوق... حنيناً يبعث للأرض اخضرارها... هنا مجالسة أخرى لشعر لا يليق به إلا الضوء... ضوء الذهن.. وذهن لم يعتد سوى الضوء... هنا قراءة للضوء...

صحيح أن الذهب صمتك... ولكن الكلام ألماس=وبين الصمت والكلمة تبعثر خافقي لمّه
دخيل عيونك اللي ظلّلت برموشها النعاس=تقول اللي تقوله بسّ أريدك تنطق الكلمه
إذا ما هو على شانك... على شاني رقيق إحساس=على شان العيون اللي تمنّت طيفك تضمّه
أخاف إن الزّمن لو طال صمتك يلفظ الأنفاس=وأخاف أن الفؤاد اللي سكنته ينحبس دمّه
حبيبي ضاقت الدنيا بعيني واعتراها الياس=لبس ثوب الحزن كل الوجود وضاق به حجمه
وأنا مثل الغريق اللي تبلّل والعروق يباس=حياتي بين صدّك والرضا ما تقبل القسمه
وش الدنيا بدونك لا عدمتك غير همّ وباس=قبل لا يعرفك خلكّ... نسى فيها حروف اسمه
ويوم الله جمعنا والتقى بقلوبنا الإحساس=توطّنت الخلايا والجسد والروح والهمّه
على صوتك... رقص طير الهوى بالصبح والاغلاس=ومن وصفك شرب وحي القصيد... وطاب لي نظمه
هنيّاً للقلم لي بك كتب والحبر والقرطاس=لقى حتى أكبر عيوبك يسمّيه الحسن عمّه
وما تبغي فؤادي ينكسر غيره عليك أخماس=ألا... إلا... وأغار من العطر لو أعجبك شمّه
تجوّل بين ريضان المشاعر مثلما النسناس=حلالك كل شيء إلا... عذاب العاشق وهمّه

حامد زيد بكثير من الحب استقبلنا مشاعره... وبكثير من الحب قرأنا حروفه... طيوفه...شجونه... فنونه... إقرأوه... لتجدوا الكثير الكثير... من هذا المدهش دائماً

على ذاك الطريق اللي يسمونه غرام أحباب=وطت رجلي على دروبه ولا أدري وش نوى فيني
تبعته لآخر دروبه ألين إن القمر قد غاب=تعب قلبي ولا تعبت مسافاتٍ توديني
لقيت الليله الجردا هدب ظل وسما وأعشاب=بعد ذاك الظلام اللي يتوهني عناويني
صدفتك معجبه فيني وياليت الغرام أعجاب=وتراك إنتي الهنوف اللي هقيتك تستحقيني
عطيتك عشق من قلبي وسلمت لغلاك أرقاب=وغيرك يحترق قلبه ولا يقدر يحاكيني
أنا قبلك صدفت عيون ولكن ويش جاب لجاب=ترى كل العيون اللي لقتني ما تكفيني
رماني حظي العاثر عليك وجيت لك طلاب=ولا أنتي اللي عشقتيني... ولا أنتي اللي عتقتيني
تعالي وارحمي ذاك الخفوق المولع المرتاب=مهو لجلي عشان الله يجازيكِ ويجازيني
تعلي في سما عشقي... ولو عشقي خراب اصحاب=وصوني بالهوى نفسك قبل منتي تصونيني
وشيليني على متنك خفوقٍ باريِ منصاب=ومن فوق الغرام العذب شيليني وحطيني
وإلى منك هقيتيني شجاعٍ ما يطيق يهاب=أنا لك بالهوى والله مثل منتي هقيتيني
أنا ما امشي ورا غيرك ولو انه يطق الباب=وترى عيبٍ على أطعن... ولو كثرت سكاكيني
وأن أشتد الغرام أترك خفوقي بين ناب وناب=لفرقا تكسر ضلوعي... ولا عشقٍ يوطيني
أنا رجلٍ ولي غيره وإذا شفت الهوى كذاب=تثور بقلبي الفزعة ولا تهدا شياطيني
سؤالك لو يزعزع في كياني... ماقبلت عتاب=أجي لك وأسألك نفس السؤال اللي سألتيني
عن العشق القديم أبواب تقفيها كثير أبواب=بعد ذاك الحبيب اللي خدعني وأنخدع فيني
أبي عشق تحسب له كل نظرات العيون حساب=وأبي قلبٍ على قلبي... وأبي دينٍ على ديني
وأبي نظرة عطا توفي... ولا تخلف بدون أسباب=وأبي منك قبل منتي تصديني توديني
وأبي درب على العذال صعب متعبٍ غلاب=وأبي نفس الطريق الصعب يبعدهم ويدنيني
ترى لو للقلوب عيون ولدموع العيون أهداب=حشا ما تنزل الدمعة لغيرك لو تركتيني
أنا أول من عرف قدرك وأنا توّي صغير وشاب=وأبي منك مدام أنك عرفتيني تحبيني
مادام إني لقيتك في طريق أسمه غرام أحباب=دخيل الله وبعد الله دخيلك لا تخليني
مادام إن كل من يحيى على وجه التراب تراب=عسى تنساني الذكرى مدام إنك ذكرتيني

أرجع بلا قلب صوبك؟ مااااايصير!
وأنت تبغى فارس وتيغى جواد
علي بن حمري... مهما قيل وسيقال... يعتبر عملة نادرة بين شعراء جيله من حيث الحضور المنبري... وقوة القصيدة... وبساطة الأسلوب... هو شاهد على نفسه... وعلى شعره وتجربته... لذلك تجده دائماً في المقدمة بشعره العذب وبأسلوبه السارق للألباب... وسيظل على بن حمري رمز من رموز شعرنا الشعبي...

قال لا تنسى وعدنا... قلت خير=كان ما نستني اهبوب البراد
خايفٍ لاجيت في سودة عسير=وظمني غيمٍ وتحفتني بلاد
وشفت زولٍ همت به وأنا صغير=جعل أبوه النار وأمّه للرماد
ولعةٍ ما هيب ولعه من سعير=غير عن كل القداما والجداد
أرجع بلا قلب صوبك مايصير=وأنت تبغي فارس وتبغي جواد
أن نويت آصلك... وأرفق وأستخير=وأحضنك واحط لدلالك قناد
لاك تسألني تقول أني غرير=ليه غبت؟ وين كنت؟ وهاك عاد
قمت أخبص كني إنسانٍ ضرير=ذاكرة عقلي وقلبي في جهاد
وأنت تدري عند تقرير المصير=ما يعرف البحر كثر السندباد
أحترم شعورك الحلو المثير=وأنت لازم تحترم فيني المراد
لا تعرضها على السلك الحرير=مسألة دنيا... وفتوى... واجتهاد
حاول أنك تفهم أن القلب غير=" فالهوى " لا ظن له ولا اعتقاد
وأنا باصارحك... حتى لو تطير!!=دامني جالس معك على انفراد
أنت في عيني بعد ربي كبير=بس مالك شبر واحد بالفؤاد

قادم بهمس... جابر اليامي... خطوة جديدة وجريئة للشعر... هذه الأنامل الدافقة من الموسيقى الشعرية...

خذيت في ليلة ظماي من الحسن روعة كلام=ومن الوفا... كل الوفا من حسنها سمتها
في ليلةٍ صارت شقاي... ولعت فيني هيام=بنتٍ بقت في خافقي ترعى وأنا لبيتها
من البداية قلت أنا... لبيه ونسيت السلام=ومن الوله كل الحروف الظاميه... غنيتها
يوم نطقت بعض الحروف العمر زاد ألفين عام=وضاعت علومي كلها والنفس ما حسيتها
وان صورت معنى المحبة فالوفاء طبع الغرام=تبقى على طول الزمن في خافقي حطيتها
تسكن وتشرب من عروقي والخفوق لها مقام=وإن أقبلت لبيتها... وإن روحت عزيتها
تظفي على كل الجمال ودنيتي كانت ظلام=استشرقت كل الدروب اللي لها وديتها
يوم العذارى تقتدي من طبعها كل أحترام=ومصارحة الإنسان في وجهة نظر... حبيتها
تلبس ثياب الصمت دام العشق بثياب المنام=وتدلل المشتاق دام الحب يبقى بيتها
وإن طولت في غيبة الحرمان جاوبت الحمام=والحزن بانت غيمته... في عبرةٍ كنيتها
كل السوالف لو تغيب بدونها تصبح حرام=وأحلى السوالف صدقها... من طيبها حبيتها
عاشت على طبع الوفا ماغيرت حسن الكلام=وأنا على صدق الوفا... بنت العرب سميتها

أحلق في فضا صدرك أشكل بالعروق طيور=تعيش بقلبك ترتل لكل الناس أشعاري
أماوج بين ضحكات الغرير وآهة المأسور=بودي ينحقن دم الفراق وينعدم ثاري
أحاول والزمن أعمى يحسد اللي عيونه عور=نعيش بديدن الستر الثقيل وجسمنا عاري
عجزت وكل ماحاول أداوي آهتي بسطور=يضيع الشعر وشفاهي تخاف وتبعد الطاري
عجزت وكل ما نوّر بقلبي من حنينك نور=يزيد العتم وتضيّع عيوني جرة الساري
حبيبي يا بعد كل الزمان اللي يلف يدور=وبعد الأرض وعناد الشعور وقسوة اصراري
أعيشك والخيال اللي أضمه بالضلوع يجور=يخليها من اللوعة تضم الصخر وتداري
أعيشك والشفاه اللي تصدر للعبوس سرور=تضم من البكا نبعٍ غرير وبالألم جاري
يسيل ويروي عروقٍ تموت من الظما وتبور=يسيل ويحكي لجرحك... ياجرحي آخر أخباري
وشف كم مرّه عشت الليل... كم مرّه بدون شعور=وكم مرّه غلقت الباب لعينك عفت زواري
نزعت من الوجع ريش الحمام ورقة العصفور=غديت من الصقور اللي تحوم وعزمها ضاري
وصرت من القسا مثل الضعيف اللي يلج يثور=ما يملك غير صرخات اللسان وفضح اسراري
هذا وقع الغرام اللي يحطم بالحنايا دور=يشقق باطن الخافق وجرحه طيب وباري
يخليني من اللوعة أعاصر بالشهور عصور=أحاول أحتمل وأوقف... بوجه الآه ما انهاري
أجادل في السنين اللي كما المقياس والديجور=ما ترحمني ولا تقبل بعسر الوضع أعذاري
تخليني من اللوعة أشكل بالعروق طيور=ألونها وترسل لك على الجنحان أشعاري

ناصر القحطاني... شاعر الأندلس.... شاعر الذاهبة... شاعر أكبر من المقدمات..

تدرين ياحلوه متى العاشق يحس بمهزله=لا جاه شيٍ مثل شيٍ قام يحداني حدي
ما أقسى من دموع اليتيم إلى ذكر ضحكة هله=ولا يهد من الفراق إلا الفراق السرمدي
يالورده اللي في شرايين الحشا متغلغله=ياروحي اللي لو تبرت مني أختل جسدي
كونت لك عالم غرام مادخله البلبله=إلا هديرٍ ينتهي بين الضلوع ويبتدي
حتى أقرب اصحابي من اللوعة سهيت وقلت له=يالأجودي كف العذل ما في العواذيل أجودي
أنا اللي أستاهل عناقيد العنب يا مدللـه=ليتك دريتي كيف عيني تذكرك في مرقدي
يا أدنى من الغيم إن تغطرس وأطول من السنبله=يا اقرب كثير من الحكي... وأبعد شوي من الجدي
إن جيت رحتي مقفيه... وإن رحت جيتي مقبله=كم مت.. وليا قلتي أحبك تجدد مولدي
دنياي أنا لو تجتمع لذاتها في مكحله=والله ما أشهر لأي عينٍ غير عينك مرودي
يا ذابحتني كل شي... إلا الجفا ما اتحمله=ياكبر كذبة عزتي لو قلت أببعد وابعدي
قلبي لو أغديتيه بالصحراء بليا بوصله=ما تاخذين إلا وهو لأقصى ضلوعك مهتدي
وإن خاب ضني وآخر المشوار جاء مثل اوله=بغمض عيوني وبحلم واقهر الحظ الردي
بأحلامنا حتى آخر المريخ نقدر نوصله=الله... لو نطلع بساط الريح وايدك في يدي
تخيلي روضٍ من أقصاه اجمل الورد احمله=وأهديه ليدين وضفاير شيخة الورد الندي
تخيلي نهرٍ بالأحجار نتمثنى جدوله=نبقى على جاله جلوس شوي... وشوي نعدي
تخيلي بيتٍ دفاه من المواجع والوله=ضحك وسواليف وسهر... ومزوح مبساط أحمدي
تخيلي عشقٍ عجزت أستوعبه واتخيله=كانه على هالحال ما عز الله أبشر بسعدي
يا سيدة عشقي وأنا راعيه راعي الأوله=ما هي كثيرة لو تقولين... أنت والله سيدي
ترى الله اللي حط لك ذاك الغلا والمنزله=وإلا الهوى لا ورث أبوي... ولا ذخرته لولدي
حبيبتي... ما يقهر الرجال في مستقبله=إلا الهوى اللي مرةٍ يقبل ومرات يغدي
حتى الوفا لا زاد عن حده يعوّد مهزله=ياليتني خنتك... ولا اللي قام يحداني حدي