لحدن يحاكيني

لحدن ٍيحاكيني ترى الخاطر أقصاه
والدمع يا قلب العنا مايطيبك

حتى لو أبكي وش ورى دمعي و ماه
ويلي على أدري ويش قلبي يبي بك

تطري علي والقلب ماجاه كفّاه
غايب لكن غيبتك ماتغيبك

خذيت تلفوني القديم أتقرّاه
ألين فاحت شاشته ريح طيبك

رقمك مسجاتك وصوتك و طرياه
كن الطيوف اقبال عيني أتجيبك

لأبوك يالتلفون ماتسمع الآآآه
في ذمتي أنك صدق ضيعتني بك

متعومس الخاطر وياقلب ويلاه
ماقد ذبحني إلا سكوتك و طيبك

وإلا أنت يا لاهي ولا أدري وش ألهاه
طف ِبوصالك مابقى من لهيبك

ياحبك لقطع المواصيل حباه
قطعت قلبي منك لا قطع صيبك

وسويت في اللي سواتك ماسواه
وأتحملك مهما جرى و أرتضي بك


يا ذابحي ياصبر ذا القلب صبراه
ذبحته بكفك وهو ملتجي بك

بتروح..؟ روح و دربك الله يرعاه
لو أبغى أجيبك أعرف وشلون أجيبك

در في ثرى الدنيا و مثلي ما تلقاه
تبطي عظم ماشفت زولٍ يذيبك

حظ الهوا اللي أتعيش به بس حظاه
لأنه الوحيد الي قدر يختلي بك

أدرى عليك من الهوا و أتحاشاه
وأروف بك و أهيم بك و أعتني بك

لأنك سحاوي و السحى يكسر اجباه
وشلون ماتبغى الهوا يستحي بك

عيبي أحبك لو غرامك معاناه
وأنت الغياب اللي بلا عذر عيبك

أضيق من جفواك و أجرها آآآه
أخاف من غدر الزمان يغدي بك

لو أنك تدري خاطري عقبك أيش جاه
يمكن تنوح الليل و أتطر جيبك

أشره على الحب اللي عطيتك إياه
ملعون حظ ٍ حط ْحبي نصيبك

هملتني بين الأمل و المحاتاه
مدري عدوك صرت وإلا حبيبك ؟

هملتني بين الأمل و المحاتاه
مدري عدوك صرت وإلا حبيبك ؟


ابيات جميله جدااا ، كعادتكم اختيار مميز
الله يسعدك ويوفقك

كلمات رائعه
تسلم على الانتقاء المميز

رقمك مسجاتك وصوتك و طرياه
.................كن الطيوف اقبال عيني أتجيبك

أبياتِ فيها من الذكرى والعتب الكثير .. رآئع دايماً بـ أختياراتك أخي النادر.. سلمتَ لنا ..!
لاهنتّ ،

لو أنك تدري خاطري عقبك أيش جاه
يمكن تنوح الليل و أتطر جيبك

ابيآت رائعه بروعة اختيارك
تسسلم آخي النادر ع الانتقاء والاختيار الجمييل ..

والله جاية من القلب هالقصيدة ؛ و على قولة ابو ملوح ؛ لو جالسة بصدر شاعرها كان انفجر

اختيار عميق اخوي النادر ؛ و دائما مميز باختياراتك

تحياتي