ياصاح أنا قلبي همومه تجزيه ,,, ولا عادني يا صاح للصبـر قـاوي

يووووه يالسعودي

تردد هذه الكلمه على السن بعض النساء يوميا .. للحين مادري وش سبب هالكلمه ولا ادري وش اسباب تصور الكثيرات ان غير السعودي هو ملك الرومانسيه والعطاء الزوجي والرجل اللي ممكن يكون حلم لكل متزوجه .. ماحاول ادافع او ارقع لشباب بلدي ولكن مانشوفه من واقع هو اللي يدافع عنهم .. ( وان كان فيه شواذ عن هالقاعده فهم شواذ لاينبغي تعميمهم على المجتمع ) .. هالواقع هو اللي يقول ان الرجل السعودي ( لبى والله معاليقه ) اكثر الرجال سخاء وعطاء ولايرضي بأي حال من الأحوال ان يكون عاله على زوجته ( والدليل ان نظره مجتمعنا للرجال اللي يعتمدون على زوجاتهم او يسلبونهن رواتبهن هي نظره دونيه لان المتعارف عليه في مجتمعنا هو العكس ) ويمكن يكون للزوجه راتب ووظيفه ولكن عند شراءها أي شي لبيتها او لابناءها يقوم زوجها باعطاءها ماصرفت ( لان بقناعته هو المسئول عن بيته بالمقام الاول ) ..

وبالرغم من هالشي لم نسلم من الذم والسخط الدائم ..

كانت الامثله قديما أيام عز حسين فهمي ومصطفي فهمي .. وحولوا بعدها على اللبناني ومن سنتين صار تركي ولاندري كان ام بـي سـي عندها نيه دبلجة مسلسلات هنديه ويصير الرجل الحلم هندي وتصير الوجهه بالصيف بومباي ولا مدراس بدل اسطنبول وكعاده مواطنينا الاعزاء بالطيران بالعجه لان بصراحه عقب مكاين السنجر معاد استبعد شي ( وعلى طاري الام بي سي احب اوجه لهم رساله من خلال الموضوع ... حطيتوا دعايه نانا قلنا ماعليه ودابر املا قلنا تهون ولكن ان وقت الاعلانات زاد عن وقت المسلسل هذي مالكم حق فيها ..

نرجع لمحور حديثنا .. لن ازيد في امتداح الرجل السعودي حاليهم الله من غير مدح وماهم بحاجه المدح بس ودي اضيف انهم قبل أي ميزه اخرى يتحلون فيها .. فيه مخافه الله سبحانه في نظرتهم لحياتهم الزوجيه واعرف الكثير ممن قد لايحمل تلك الرومانسيه الجياشه ولكنه يخاف الله في زوجته وبيته فلايعاملها الا بالحسنى ولا تسمع منه أي أساءه ... نكمل حديثنا وننتـقل للجانب الاخر تلك الفئه المتذمره لحياتها ووضعها وزوجها ... تربط الكثيرات من النساء بحكم سيطره العاطفه على العقل وانتفاء العقل احياناً حياتهن الزوجيه ويقارننها بما قد يشاهدنه في مسلسل او فيلم او يقرأنه في روايه .. مانقوله هنا ان المسلسل مدته ايام .. والروايه تكتب وقد تقرأ بيوم والفيلم مدته ساعه ونص ولا ساعتين اما الحياه الزوجيه فهي عمر .. والانسان بعمره يمر بحلو ومر وفرح وحزن وانتعاشه وانتكاسه .. والحياه الزوجيه مثلها ليست كلها عسل في عسل مثل مايتصور البعض فهي تمر بحظات مختلفه فيها الزين والشين والحكيم فقط والعقلاء من يستطيعون مقاومه هذه التغيرات وتجاوزها .. للسير بحياتهم الزوجيه لبر الأمان ..
بعضهن لو عمرها كله ماشافت الا الخير وتزعل لها بيوم ولا يقصر بشي قالت ماعمري شفت منك خير .. وجحدت وقامت تذكره ( تذكر يوم اقولك ودني لاهلي ولا وديتني وتذكر يوم اقولك ابهدي بنت اختي سواره ذهب ولا عطيتني ) وتلقونه له من المواقف الطيبه معها اكبر من هاللي تقوله كله .. بس وش نقول حريم

والثانيه جايه من بيت اهلها وكانهم مرسلينها للجبهه ماناقص الا جهاز لاسلكي معها وتلبس لبس الجيش وتجي زحف ومع امها وكل تصرف ولا كلمه تطلع من اهل زوجها تنقلها بالحرف لأمها ( وعاده تنقل بصيغه غير محايده ) .. ولاوقفت عند هنا وبس يمكن تنقل هذا كله للزميلات والصديقات ..

( الكلام اعلاه ماهوب معمم ولكن يشكل غالبيه وفيه من هم مختلفين عما ذكرت سواء بالجانب الايجابي او السلبي عشان مايجي من يطمر لي ويقول انت تعمم ) ..

لان من يشوف هاللي يتحسرن يقول ابد طاقتن تسبدها والاجنبي ميت عليها بس بحكم العادات والتقاليد ماتقدر تسوي شي .. ابد من بغت الزواج بغير السعودي محدن ماسكها ولها منا من يعين ويعاون وفوق منها الدعاء بس لاتنسى تاخذ بجامات معها من لانســنـزا لاتروح تفشلنا ببجامات القطن .. الوحده من تشوف لها عيون خضر ولا زرق راحت ملح ماتدري ان حتى القطاوه عيونها خضر . .

كم واحد شاف السعادة بما فيه ,,, واليوم من كثـر الغرابيـل ثـاوي
والحلم لا من زاد يطمع براعيه ,,, يطمع على العاقل ردي الهقـاوي

وبدت المدرسه

بدا العام الدراسي وبدا معه النزف الاستراتيجي لجيوب الاباء .. وبدا معه تذمر المعلمات وعلى طاري تذمر المعلمات ماتلاحظون كثرة تشكيهن من انظمه الوزاره وتعاميمها وكثرة الشكوى من العمل وارهاق العمل اتوقع هالطبع ملازم للمرأه سواء كانت عامله او غير عامله .. انا اتمنى ان اكون وزير التربيه والتعليم لمده ساعتين فقط ساعه وتسعه وخمسين دقيقه بسوي فيها اجتماع مع جميع المعلمات والموجهات والمشرفات والدقيقه الباقيه عشان اصدر قرار ما حول ماسمعت وشاهدت .. وغالبا اتوقع القرار بيكون فصلهن جميعا .. كنت بالامس بإسواق المزرعه لشراء بعض الاغراض ويحطني ربي بذاك الممر اللي كان من سوء حظي ان اغلب احتياجاتي فيه وبنفس الوقت تقابل فيه ثلاث معلمات ووكيلة مدرسه ( ولحد يقول شلون عرفت انها وكيله فلدي حدس بمثل هالامور خاصه لاصار التنوره مغبره من تحت ) أول موضوع ناقشنه في هالاجتماع الطياري هو ( انهم ليه ماأجلو الدراسه ) تقول احداهن : وش ضرهم لو أجلوها لبعد الضحيه <<<<< بذمتك

وتجيك الثانيه ترد : والله يابنت الحلال مافيه من يقدر كرف وحاله هالتدريس ليتهم يحسون بس >>>> الاخت تداوم بمفاعل نووي ماهوب بمدرسه

وتتحفنا الثالثه بقولها : ياختي كلن حاسدنا على هالاجازه كأنه محد ياخذ اجازات الا المعلمات مايدرون عن هالمعاناه اللي نشوفها كل يوم من هالتدريس >>> مغصوبه على التدريس جاي الوزير والوكلاء لبيتها يحرمون ويطلقون ويترجونها تدرس ..

اما عاد الابداع صراحه كان من الوكيله الله لايضرها على هالمخ والحمد للمولى عز وجل ان مافيه غيرها ولا كان رحنا فيها ردت عليهن قائله ثمان وعشرين سنه لي بالتدريس ماشفت تعميم جانا زي العالم والناس <<< المره الجايه ان شاء الله بيرسلون لك التعاميم مع السواق عشان تقولين رايك فيها قبل يصدرونها ..

دار الكثير من النقاش في هالخمس دقايق وتخلله بعض الحش ببعض زمايلهن ( لاسمعت حريم يقولن الله ربنا وربها اعرف ان السالفه فيها تقطيع لكائنه حيه ماهيب موجوده معهن ) .. لحد هنا نقول ماعليه وبكيفهم ولكن ان يقولن ( مالقاها الا الموظفين متكين في هالمكاتب وفي المكيفات وشرب شاهي ولا تعب ولا شي )

هنا نقول معليش .. هالموظف المسكين اول شي ماتجيه هالوظيفه الا بعد جهاد ومشاوير وروحات وجيات وجاهيات ومافيه الا سدح ملفات علاقيه خضر بكل مكان .. ولما يجي التعيين ويحط على مرتبه ويبدا بالتفكير بمستقبله والزواج ويدفع اللي وراه ودونه ويتحمل اقساط ومصاريف عشان هالشي يمكن يدخل ولده المتوسط وهو مازال على نفس المرتبه وان كان يبي الترقيه فلازم تكون شهاده الدورات معبيه ملفه ( طبعا في قاموس المعلمين والمعلمات مافيه شي اسمه دوره لان الترقيه وتحسين المستوى يجي وهم متسدحين والدوره اللي ممكن تاخذها المعلمه من خلال خبرتها العمليه هي في اعداد ترامس القهوه كل صبح وتوزيع جدول الفطور على المعلمات ) نجي بعدها للاجازات فالموظف حده بالسنه 35 يوم يمكن ياخذها ويمكن مايعطونه اياها اما لان ظروف العمل ماتسمح ولا لان زملاءك كلهم طالعين اجازات .. اما المعلمين والمعلمات فغير الاجازه الاسطوريه السنويه ( الثلاث شهور ) فيه اجازات الاعياد ومنتصف العام واجازه الربيع ولا يقوولون ليه ماتمدد لبعد الحج بعد

واهم من هذا وذاك مقابله جمهور المواطنين من مراجعين فهذا لحاله جهاد على الاقل في مدرستك عارف من عندك والوجيه وحده ولكن لاصرت في دائره حكوميه وكل يوم يمر عليك مئات المراجعين واشكال والوان وصاحي ومهبول <<< هذولا اللي تحسبهم الاخت في مكاتب وعلى مكيفات مدري وش سر هالكلمه عندنا الظاهر يبون الموظفين يحطون مكاتبهم على ارصفه الشوارع .. ولا يحطونهم بالنفود
كان الله في عونكم ياموظفين وماقول الا ( ياحظ مزنه بالجنه )

يفحطون

يفحطون يبون العالميه ولاهم واصلينها الله يرحمك يا بو خالد ما قلت الا الصدق ..
وبعد وفاتك بـ 6 سنوات ما زالوا يفحطون وكل سنه يجددون الكفرات ..

آخــــر كــــــلام

نبي .. نطفي قمرنا ..

لو يعذبنا السهر .. والخوف ..
نبي ننثر قهرنا .. يا حبايبنا ..
على مد النظر .. والشوف ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..
سامحينا يالمحبة .. لو جرحنا وانجرحنا ..
سامحينا لو نسينا .. في الهوى ضحكة فرحنا ..
وآه يالنصل الحرير ..
ياهوى القلب الضرير..
يالجروح اللي مضت .. واللي بتصير ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..

هلا وغلا بشواق

من طول الغيبات جاب الغنايم

وأنت جاي وناويها حرب

موضوع مضغوط وضاغط :)

ياليتك تكتبت كل موضوع مستقل عن الآخر


المهم نبدأ النقاش ... النقطة الأولى نعنونها بالشاب السعودي والرومانسية المزعومه

أو البنت السعودية والرومانسية المفقودة

وسؤال بسيط لماذا تلجأ البنت للمسلسلات أو لكاظم الساهر أو للتركي أبو عيون زرق؟!!

لأنها لم تجد ما تبحث عنه حواليها !!

الشاب السعودي يحسب له الكرم والسخاء في كل شي إلا في عواطفه بستثناء ماهو مستورد

وقد يواجه الشاب نفس المشكله مع البنت السعوديه !!!

إذا الشي هذا مفقود لدى الطرفين

أو موجود ولكن المشكلة في طريقة إبرازه أما خوفاً أو خجلاً أو جهلا

يقابله زخم هائل من المشاعر والرومانسية " لو كانت مزيفة نوعا ما " تصلنا عن طريق إعلامنا المتميز

في نقل مثل هذه الاشياء .. فتكون مصدر جذب للشباب والفتيات على حد سواء

وبحكم رقة المرأه تكون أكثر تأثرا ... فتبحث في حياتها عن مثل ذلك فلا تجد

فتلجأ لأحلام اليقظه ومتابعة كل ما هو جديد في عالم ملىء بالرومانسية

ابتدأ من مهند ومسلسلاته وانتهاء بمزايين الدراما السوريه ... مع المرور على بالي حبيبي و أليسا

وكل عام وانت بخير

ولي عوده للجزء الثاني

متابع لمدونتك خخخخخخخخخخخخخخخخخخخخ

اقتباس: المشاركة الأصلية كتبت بواسطة المتميزة 26    النقطة الأولى نعنونها بالشاب السعودي والرومانسية المزعومه أو البنت السعودية والرومانسية المفقودة وسؤال بسيط لماذا تلجأ البنت للمسلسلات أو لكاظم الساهر أو للتركي أبو عيون زرق؟!! لأنها لم تجد ما تبحث عنه حواليها !!

هلا بك يالمتميزه
ظلمتي حظك بالنقطه الاولى يعني افترض ان البنت السعوديه هي اللي تفيض منها الرومنسيه ولا لقت من يعبرها .. التقصير حاصل اكيد ولكن ليس من طرف واحد بل المسئوليه مشتركه فيه

نظره بسيطه بس على قناة بدايه ( ومكتوب طبعا ً تحت ارقام الرسائل من كل الدول العربيه ) وش سر ان الرسايل يكاد يكون 99% منها من السعوديه هل هي فضاوه ولا وش السالفه ؟
اعتقد المشكله طيران بالعجه لا أكثر فنحن مجتمع داعسين ورا كل جديد وعادة مايؤخذ الجديد من الوجه السلبي له .

اقتباس: المشاركة الأصلية كتبت بواسطة شر التماسيح    متابع لمدونتك خخخخخخخخخخخخخخخخخخخخ

يحييك ربي اخوي وأشكر لك طلتك

القلم الجريء
القلم الجميل
القلم المميز
القلم الساخر
شواق
مرحباً بك ومرحباً بعودتك مجدداً
موضوعٌ يحوي الكثيرمن الدورس الحياتية
وقدتحاملتَ فيه كثيراً على شقيقتنا المرأة
وكأنك غفلتَ أنها في الآوانة الأخيرة بدأت
تستعيد بعض حقوقها المسلوبة وتنافس الرجل
وماأستغربه عزيزي عدم تداخلهن في
الموضوع دفاعاً عن أنفسهن وتجلية موقفهن
سوى مداخلة أختنا القديرة [ المتميزة]
لاأقول ذلك تأليباًأو إثارةً وإنما لنقرأ رأياًونستفيد علما
دمت ودام قلمك متدفقاً معطاء
ولك تقديري

اقتباس: المشاركة الأصلية كتبت بواسطة المرهف    القلم الجريء القلم الجميل القلم المميز القلم الساخر شواق مرحباً بك ومرحباً بعودتك مجدداً موضوعٌ يحوي الكثيرمن الدورس الحياتية وقدتحاملتَ فيه كثيراً على شقيقتنا المرأة وكأنك غفلتَ أنها في الآوانة الأخيرة بدأت تستعيد بعض حقوقها المسلوبة وتنافس الرجل وماأستغربه عزيزي عدم تداخلهن في الموضوع دفاعاً عن أنفسهن وتجلية موقفهن سوى مداخلة أختنا القديرة [ المتميزة] لاأقول ذلك تأليباًأو إثارةً وإنما لنقرأ رأياًونستفيد علما دمت ودام قلمك متدفقاً معطاء ولك تقديري

شرفتني بمرورك الكريم وردُك وترحيبك
اخي الحبيب المرهف
لم نسلم منهّن قبل استعادة بعض تلك الحقوق والمنافسه فكيف سيكون حالنا بعدها
رحماك ربي

أولآ : جزاك الله خير على طرح هذا الموضوع
ثانيآ : ماراح ارد على اول نقطة في الموضوع لانها تمثل فئه معينة من المجتمع

ولاتوجد في قاموس حياتي مثل هذة الافكار

ثالثآ: راح ارد على النقطة الثانيه ...

لماذا هذا التحامل على مربية الاجيال اصابع اليد ليست متشابهه وبالتالي ليس كل الذي في مهنة التعليم

نسخة طبق الاصل من الاخر السئ والحسن موجود بكل الوظائف مو بس في التعليم

ام اعداد القهوه والفطور الصباحي اسمحلي اقولك ان هذة الاشياء لاتؤثر على سير التعليم

وفي النهايه الوظيفةامانه في ايدينا ويجب علينا ان نقوم بواجبنا على اكمل وجهه

اقتباس: المشاركة الأصلية كتبت بواسطة روح الورد    أولآ : جزاك الله خير على طرح هذا الموضوع ثانيآ : ماراح ارد على اول نقطة في الموضوع لانها تمثل فئه معينة من المجتمع ولاتوجد في قاموس حياتي مثل هذة الافكار ثالثآ: راح ارد على النقطة الثانيه ... لماذا هذا التحامل على مربية الاجيال اصابع اليد ليست متشابهه وبالتالي ليس كل الذي في مهنة التعليم نسخة طبق الاصل من الاخر السئ والحسن موجود بكل الوظائف مو بس في التعليم ام اعداد القهوه والفطور الصباحي اسمحلي اقولك ان هذة الاشياء لاتؤثر على سير التعليم وفي النهايه الوظيفةامانه في ايدينا ويجب علينا ان نقوم بواجبنا على اكمل وجهه

الاخت روح الورد
الوظيفه بالتأكيد امانه واياً كان موقعها ولكن جوهر الموضوع او بالاصح المسار الثاني منه هو الظلم الواقع على الموظفين ( وظيفياً ) من قبل الانظمه مقارنه بالمعلمين وحتى العسكريين فالموظف قد يلبث على مرتبته اكثر من عشر سنوات دون اي ترقيه ولابد من دورات وحتى لو توافرت احيانا تدخل في موال السرى والاحقيه ، وهذا مالانشاهده في كادر المعلمين والمعلمات
ربما الطرح يوهم القارئ انه انتقاد للمدرسات بشكل حاد ولكن هو قالب ليس اكثر لايصال الفكره .. وان كان التدريس اختلت موازينه ولم يعد بتلك الجوده التي كانت في الماضي ..

شاكر لك اختي مرورك ومداخلتك

النقطة الاول -اصابع اليد ليست سوواء
وشكرااا