يوووووه دبحنا الحر ....شغلو المكيف من الي طفاه

السلام عليكم ورحمه الله وبركاته



شفتوا العنوان ... هاذي عباره دايما نقولها صح ولا ...!!




ودي افضفض بشيء حابسته داخل صدري

واتمنى اخواتي كلامي يلامس شغاف قلوبكن او باالاصح قلوبنا الغافله ...!!



وكرماً لا أمرا تقرون موضوعي لاخر حرف >> الي ماعندها وقت ترجعله متى مافضت





احيانا تجيني لحظات اكره الدنيا واستحقرها وفعلا ايقن يقين تام انها لاتساوي جناح باعوضه ..

وان كل ذنب نقترفه او سيئه نكتسبها تكون سببها حب الدنيا والجري وراء ملذاتها ...




الناس ملهوفه على الحياه بشكل من طلعات وروحات ولبس وجمعات وزوج وخطيب وصديقات ونوم واكل وعمل وجمع ماال ...




باختصار ........ يجرون ورى الدنيا والعمر يجري بهم .




اعرف انها فطرة في الانسان وشيء طبيعي كل هاالامور ..




وان الانسان جبل على حب الشهوات والملذات.. بس حنا ماخلقنا لكل هذا ..!!



خلقنا لشيء عظيم شيء البعض منا غافل عنه ..خلقنا للعباده.. والتزود من هذه الدنيا للآخره ( وماخلقت الجن والانس الا ليعبدون )





بعض الناس نظرتهم قاصره على الدنيا ولاينظرون لابعد من ذالك...



يرون الحياة. العمل. المتعة واللذة. بناء الحضارة. أو الصراع من أجل الأحسن ! فقط ..



طيب تمتعتوا باالحياه واشبعتوا انفسكم الطماعه... هل فكرتم باالموت والي بعد الموت ..؟؟




فكرتوا في المرض يمكن يداهم اي واحد في اي لحظه .. !!




طبعا الانسان ضعيف جدا اذا حس باالمرض عاف الدنيا ومافيها وصار ينظر للدنيا من ثقب ابره ..




تصير ضيقه بعينه تضيق به الارض بما رحبت وعن تجربه والله ..




طيب وش تعرفين عن القبر وضمته وظلمته ....... بقولك هاالمعلومه بس عن ضمة القبر





روت عائشة رضي الله عنها ان الرسول عليه الصلاة والسلام قال :




(ان للقبر لضمة لو كان احد منها ناجياً لكان سعد بن معاذ )



وقال الرسول عليه الصلاة والسلام لام سعد: (الا يرقأ دمعك ويذهب حزنك ان ابنك اول من ضحك الله له واهتز له العرش )




هذا سعد اول من ضحك له الله واهتز له العرش ماسلم من ضمة القبر فما حالنا نحن الضعفاء ..يارب ترحمنا ياكريم
..



وفيه مواقف دايما تذكرني باالقبر والحساب ونارجهنم ..!!




ـ احيانا اذا طفى الكهرب لثواني لدقائق لنفترض ساعات



تجينا حالات استنفار الي يشغل شمعات والي يشغل انوار الجوالات والي يشغل فانوس >> خخخخ ياقدمك




لانهم مايطيقون الجلوس في الظلمه مستوحشين المكان مع انه البيت كبييير وواسع وفيه حوش وفيه وفيه بس مو طايقين الظلمه ..... !!



طيب وين نروح من ظلمة القبر وضيقه .. القبر مافيه نور نهائي ووسعه مايجي مترين والله العالم كم بنجلس فيه من دهر ..




ـ نقطه ثانيه دايما اسمع او اقرآ مستحيييل اجلس او انام بدون مكيف في عز الحر هذا ..؟



ومستحيل اطلع مشوار مع الحر هذا .. لاااا ياربي مااتحمل والله ..



طيب وش حالنا مع حر جهنم ..؟ حر الشمس وهي تدنوا من رووس العباد يوم القيامه ..




حر الدنيا وشدته من فيح جهنم ويدل على عظمة الله وشدة بطشه وغضبه على عباده ...



قال الله تعالى ( وقالوا لا تنفروا في الحر قل نار جهنم أشد حرا لو كانوا يفقهون )




ـ امر آخر .. احيان اذا جيت اسوي لي كوب شاي او اي شيء.. تلسع النار يدي او اصبعي لسعه على الطاير




بس تعالوا شوفوني احس وكآن جسمي كله محترق حالة استنفار ايضا احط عليها ثلج او شوية معجون اسنان الين يهدآ الالم شوي ..




او احيان باالغلط افك صنبور المار الحار ويحرق يدي واسحبها بسرعه من شدة الالم وهي بس ثواني..



طيب لسعتنا النار والماء الحار ثواني بس او اقل ولم نحتمل ..!



ماحالنا مع نار جهنم ..!!




ياااااااربي رحمتك يااااارب





قال النبي صلى الله عليه وسلم


(ان ناركم هذه جزء من سبعين جزءاً من نار جهنم)...



اما طاقة احتمالها .. قال تعالى ((يَوْمَ نَقُولُ لِجَهَنَّمَ هَلْ امْتَلَأْتِ وَتَقُولُ هَلْ مِنْ مَزِيد)..

اشياء واشياء غافلين عنها -

افتتنا بالدنيا وانشغلنا بشهواتها والامر المخيف الذي قرره الله تعالى في كتابه ان الكثرة الكاثرة من الخلق غافلة،

قال تعالى ((وَلَكِنَّ أَكْثَرَ النَّاسِ لا يَعْلَمُونَ يَعْلَمُونَ ظَاهِرًا مِنْ الْحَيَاةِ الدُّنْيَا وَهُمْ عَنْ الآخِرَةِ هُمْ غَافِلُونَ)).
اي ان قلوبهم باارادتهم توجهت إلى الدنيا وشهواتها.. فعملت لها وغفلت عن الآخرة ...

فلا تشتاق إلى الجنة ولا تخشى النار، وهذا علامة الشقاء وعنوان الغفلة.,,!!



متى نصحى ونستحقر هذه الدنيا ونتزود للآخره فان خير الزاد التقوى ..


متى نقلع عن الذنوب التي اثقلت كاهلنا .. وجلبت لنا الهموم والكرب .. !!



متى نسيطر على انفسنا الاماره باالسوء ونكبح جماحها ..ونقيدها ..



متى نآخذ من الدنيا مايشبعنا ويكفينا دون الطمع والجشع في ملذاتها وحمل ذنوب نحن في غنى عنها ..


متى تصحى ضمائرنا وقلوبنا الغافله متى ........!!


قمت الصباح وسويت لي كوب شاهي وكنت متضايقه نوعا ما .. وطلع معي هذا الكلام كأني ارتحت شوي يوم طلعته

متآكده ان يجيكم نفس تفكيري هذا بس مشكلتنا نكابر ونشغل انفسنا باي شيء اذا جانا هاالتفكير علشان ننساه ومانتمعن فيه ..!

لانه يتعبنا او لانه شيء اكبر من طاقة تفكيرنا او شيء مخيف بمجرد مانفكر فيه.. او ...الخ


ابليس لعنة الله عليه محيط بنا من كل جانب .. يتربص لنا مايبغانا نحاسب انفسنا ونوبخها ..اعوذ بالله منه ..



على العموم اخواتي اوصيكن ونفسي بذكر الله مادمتي قائمه او قاعده .. اجعلي لسانك رطب بذكر الله ..

والاستغفار ثم الاستغفار ثم الاستغفار


قال تعالى: "فقلت استغفروا ربكم إنه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا"

واوصيكن باالابتعاد عن الذنوب .. جاهدن انفسكن فجهاد النفس يعتبر من افضل انواع الجهاد في سبيل الله ..

التزمن باالطاعات ومايقرب الى الله من قول او عمل .. ابتعدن عما يغضب الله من قول او عمل ..

وملاحظه شيء وشيء مهم بعد ...

ان الوحده فينا اذا صلت الفروض في اوقاتها ودعت واستغفرت اكتفت بذالك..!

وهكذا عايشه حياتها على هاالنمط ..!! وكآنها مسويه انجاز.. او .. كآن ماعندها ذنوب تحتاج تكفير ...!!

طيب وين التزود باالاعمال الاخرى من السنن والنوافل ..؟؟


وين قيام الليل حتى لو ركعتين .... !!

وين صلاة الضحى اذا كنتي صاحيه بس جالسه على النت ماعندك شيء ....

وين السنن الرواتب وقد وعد الله من التزم بها وصلاها ان يبني له بيت في الجنه..

قوله صلى الله عليه وسلم (من صلى في اليوم والليلة اثني عشر ركعة تطوعاً بنى الله له بيتاً فى الجنة)


وين قراءة القرآن ..؟ لو حتى نصف جزء في اليوم ( خمس صفحات على الاقل ) ...

وين صيام الاثنين والخميس..؟ على الاقل اسبوع صيام فيه . واسبوع راحه ...

وين الصدقه لو كل اسبوع تطلعين لك مبلغ بسيط لو ريال كل يوم


وتجمعين في حصاله مبلغ محترم وتعطينه عائله محتاجه ( لا تحقرن من المعروف شيئا ) والصدقه حتى ولو بشق تمره ..!!


وشوي شوي الين تعودين نفسك على النوافل والمداومه عليها ... وتتزودين منها اكثر واكثر


نقطه اخيره للتذكير فقط .. !!

والله ثم والله اننا في نعمه لم نقدر ثمنها ولم نشكر الله حق شكره

نعم الله علينا لاتعد ولاتحصى من امن وامان وصحه وعافيه وراحه من اكل وشرب ومسكن ومال و.. الخ

اذا جعنا اكلنا .. واذا ظمينا شربنا .. واذا تعبنا نمنا ... واذا جاء مناسبه اشترينا الي نبغاه ونفسنا فيه ..

اهلنا وحبايبنا حوالينا ماعندنا حروب ولا ويلات .. الخ

ومع هذا مقصرين في جنب الله مقصرين في شكر الله ......!! ( ولئن شكرتم لازيدنكم )


والله الذي لااله الا هو اني احيانا وانا جالسه اكل اتذكر الفقراء المساكين فتقف اللقمه في حلقي واشعر بغصه ..

نحن نىآكل مانشتهيه ونجلس امام انواع الاصناف مالذ وطاب منها .. وهناك من يتضور من الجوع لايجدون مايسد رمقهم

واحمد لله اني اشعر بذالك الشعور ...! لانه يعتبر تنبيه لي لكي استشعر وادرك عظم ماانا فيه من نعمه فاابادر بشكر الله وحمده ..!!



اخواتي الغاليات

هذا الكلام والله موجهته لنفسي قبل مااوجه لكن اخواتي ..

فوالله ماانزه نفسي فعلي من الذنوب ماالله به عليم ..وظلمت نفسي كثيرا فان لم يشملني الله بعفوه ويرحمني ويغفر لي لاكونن من الخاسرين ..


انتهى كلامي ..

ولكن لن ينتهي تفكيري بحالنا ومصيرنا وهذه الدنيا الحقيره التي آغرتنا ...!!


اللهم قنا شر انفسنا وتبنا علينا ... ولاتجعلنا من الغافلين يارب..

كلامي مو مرتب لكني قلت لكم فضفضه .. واتمنى تقبلون فضفضتي المتواضعه ..

مشكوررره اختي تمير خير والله احنا محتاجين مثل كذا علشان نتذكر لأن الدنيا تلهينا وفضفضتك مثل العسل
الله يعطيك العافيه

اللهم قنا شر انفسنا وتبنا علينا ... ولاتجعلنا من الغافلين يارب..
اللهم آمينْ
بارك ِ الله فيك ِ على هالطرحِ الهآدفْ القيمُ
والله المستعآن ْ
تقديريّ لكِ

نصائح وتذكير
جزآك الله خير الجزآء وجعله في ميزآن حسناتك
والله يقوي أيماننا وصبرنآ وأن لايجعل الدنيا اكبر همنآ
بارك الله فيك

سبحان الله وبحمده

موضوع يحاكي حالنا

جزاك الله خير ولاحرمك الأجر
احترامي

جزاك الله خير
الله يعطيك الف عافية
ودي لكـ