نفسك لا تظلمها ولا تظلم الناس

29 / 08 / 2015, 15 : 11 AM

نفسك لا تظلمها ولا تظلم الناس
واليا نطقت..! الناس لا تبتليها

مثل ما فيك احساس للعالم احساس
والناس مثلك، مثل ما فيك فيها

اليا اشتريت اشتر ذهب والماس
والحاجه اللي ماش، لا تشتريها

لا يضيع عمرك وانت تجمع لك نحاس
حوادث الأيام لا تزدريها

ولا تقول الراي لصرت محتاس
والكلمة اليا كفيتها لا تحكيها

صمتك على كلمة بلا عقل وقياس
أبرك، ولا انت تقولها وتعميها

حاول تجي مثل الجبل ما انت قرطاس
ما كل هبات الزمن تشتهيها

ناس ليا من طحت لفاظة انفاس
وناس طواري طيحتك تحتريها

خلك حديد إن ثقلوا ضربت الفاس
تراك لخشبت بتروح فيها

والبس من ثياب المعزة لك لباس
وناس ما يفرح قربها، لا تجيها

واليا بنيت ابن العلاقة على ساس
وارض النفوس اللي تبيك وتبيها

يسرك اللي خوته ترفع الراس
ويبور منهو خوته لك عليها