مسجد رسول الله رِوْع سجيده

السلام عليكم ورحمة الله وبركاته
يسعد مساكم والصباح وكل وقت بخير وخيرة

بديت باللي يملك العفو والباس=اللي عبيده ما تحيط بعديده
يحصي بعلمه ليّن الخلق والقاس=جل وتعالى بالصفات المجيده
وصلاة ربي عد ذرات الاطعاس=على النبي اللي علينا فقيده
البارحه ليلي به الفكر محتاس=مسجد رسول الله رِوْع سجيده
الله وكبر والكفر مِلة انجاس=راحوا مع الارهاب صاروا وقيده
يامدعي بالدين محصولك افلاس=اسلامنا بالطهر يرفع رصيده
اسلامنا يسمو على كل مقياس=اسلامنا بالوسط ميزه فريده
اسلامنا ماهوب ترويع ياجاس=اسلامنا بالامن أمه سعيده
اسلامنا ينفي مع ابليس خناس=اسلامنا والغدر ماهو عضيده
اسلامنا غلظ على الدم ياناس=اسلامنا للعاق كثف وعيده
اسلامنا ما يرتضي الأم بعماس=والداعشي بالصدر يطعن حديده
صدر الرضاعه يوم مطعومه لحاس=تبت يدينه تب منهو قعيده
الله وكبر ليتها حلم ونعاس=الله وكبر حكمة(ن) له وِكِييده
وحنا على الطاعه بالاسباب حراس=ننظم صفوف(ن) بالتكاتف شديدة
نعري بها اللي كاسى(ن) زيفه لباس=اما يصير بقيد ولا طريده
نلطم بها العايل وننصفه بالفاس=واليا تحرك عرق نقطع وريده
صغارنا واللي كما حسبة الراس=طاعت ولي الامر واللي يريده
نقضي على الخوان ملعون الانفاس=اللي لحق الاسلام ريحة صديده
اللي خدم الاعداء وفي الذل غطاس=اما يثوب الخبل ولا نبيده
هذا الوطن ياخوك مكنون الالماس=البيت والمسجد وصافي العقيده
هذا الوطن ياخوك مشقيه دساس=يرجي زوال الامن يصنع مكيده
هذا الوطن ياخوك يحسده بخاس=يبغي عساها الجوع عقب الرغيده
هذا الوطن ياخوك مشقية بلاس=جاهل غرير وشاف نفسه وليده
مير الدعاء والشكر ياطِيب الاجناس=والحافظ الله تختصر هالقصيده

ودمتم سالمين

مير الدعاء والشكر ياطِيب الاجناس
...............والـحـافــظ الله تـخـتـصــر هـالـقـصـيـده
ونعم بالله
الله يحفظ مملكتنا من كل مكروه ويجعل كيد الاعداء في نحورهم
صح لسانك ياشاعرنا ع الآبيات الرآئعه
وشكري وتقديري لشخصك الكريم ..

اقتباس: المشاركة الأصلية كتبت بواسطة الراقيه    مير الدعاء والشكر ياطِيب الاجناس ...............والـحـافــظ الله تـخـتـصــر هـالـقـصـيـده ونعم بالله الله يحفظ مملكتنا من كل مكروه ويجعل كيد الاعداء في نحورهم صح لسانك ياشاعرنا ع الآبيات الرآئعه وشكري وتقديري لشخصك الكريم ..

اللهم آمين اللهم آمين اللهم أمين
صحت حياتك اختي الفاضلة ومشرفتنا القديره - الراقية
شرفتي هالمتصفح الله يشرف مقدارك - والشكر موصل لشخصك الكريم - وياااهلا
دمت بخير

صح لسآنك أخي
أبيات جميلة .. لآهنت .