ورقة المقاضي ..

ورقة المقاضي ..


ياعااااااااالم قسماً راحت حياتي اوراق صغيرة .. جيوبي مليانة .. كل ظهرية وبعد صلاة العشا طيب يازوجتي العزيزة فيه شي اسمه دمج .. رئاسة تعليم البنات بكبرها دمجوها .. ماتدمجين انتي ورقة مقاضي الظهر مع ورقة مقاضي الليل ونفتك من هالقلق اليومي .. المشكلة وشي . المشكلة اني اقرا طلبات مالها داعي بس مجبور اجيبها . دراق / طماط/ بقسماط/ برغل / وآخرتها ما نلقى على السفرة إلا كبسة وان سوينا نفوسنا كنديين حطينا فجل هههههههههههههه طيب هالبقسماط والصولجان وبقية الاسامي الصعبة لمين طبعاً لخواتك، اذا جو يوم الربوع وانا ياغافل لك الله طقني الجوع مع ابوشايع وابوعبدالله وان سوينا فيها فجور وكااااااش ارسلنا حنيف يجيب بروستد وتهاوشنا على الثوم ههههههههه والمدام مع خواتها يتنعمون من خيري ومن تعبي ومْطامري في البقالة مع ورقة المقاضي



مره سويت فيها ذكي وبعد ماقضيت لزوجتي يوم الربوع قلت بروح للشباب .. واطب على المدام بدري واحصل خواتها عندها وتوهم حاطين العشا ... يلعن ام الكااااارثه .. اخيرا شفت ورقة المقاضي صدق .. لقيتهم حاطين سفرة بدايتها في المقلط ونهايتها عند ساكو إلى درجة انهن حاطين سيكل جنب السفرة علشان اذا وحدة بغت صحن من طرف السفرة يمديها تجيبه .. وألقى لوحة مكتوب عليها (السلطة 60 كلم) ههههههههه قسسسسم بالله مافيه شي ماهو على السفرة ماناقص إلا بطل بلاك .. الى درجة اني رحمت الامير سلطان يوم شفت سفرتنا ههههههههههههههه



المشكلة ان زوجتى تعاملني على اني أبلة تدبير وعندي خبرة وانا والله ما افرق بين الملوخية والكزبرة تقوم تكتب لي مرة في الورقه كيلو كنافة كذابة هههههههههههه قسم تروعت وش هالكنافة الكذابة , انا اعرف الصادقة يوم اعرف الكذابة .. واروح البقالة مالقيتها اتصلت بصديق قال رح لمحل حلويات .. واروح وانسى اسمها واقول لراعي المحل عطني كنافه نصابة هههههههههههه ناظرني بأحتقار وعطاني اشكل بدل مايعطيني كنافة .. في الاخير رحت عنده وقلت ياااخي معليش انانسيت اسمها بس انها كنافة ماهيب مضبوطة يعني كنافة كافرة وبتروح النار ضحك قال قصدك كنافة كذابة.. قلت ايييييييييه هذي بنت الكلب ابي منها كيلو .. زحمة وكنافة كذابة وآخرتها قطعة خبز لاعبين علينا وحاطين عليها شيرة هههههههههه ..



وكله كوم ويوم خذت اختي في المدرسة طريقة عمل المكرونة بالبشاميل سرى يومنا ماغير ناكلها الى درجة ان ابوي اضافها في دفتر العايلة لانها صارت جزء من العايلة ووحدة مننا



الله يحفظ الوالدة .. ورقة المقاضي حقتها ماتتغير علشان كذا مانرميها انا حاطها في المفضلة لانها هي نفس الطلبات كل يوم بصل/ طماط/ رز/دجاج/خبز/ واذا بغت تسوي نفسها كيوت استبدلت البصل بثوم واذا ملينا وبغت تجدد فيها حطت الرز قبل البصل والخبز قبل الطماط والله اني عشت عمري كله وانا نفسي اكل شي جديد وخاصةً ذا اللي يقولوه اومليت الى درجة اني سكنت في فندق مره علشان لقيت في القائمة اومليت مادريت انه بيض الله يلعنهم



المشكلة ماعندهم رحمه .. درجة الحرارة في عز الصيف الف وانت تطامر من محل الى محل وبمعية سموك ورقة المقاضي لو تجيب السوبرماركت كله وتنسى شي بسيط قامت القيامة ولازم ترجع وانت اصلاً شرير ولا عمرنا شفنا منك شي يابخييييييييييييل .. وياعيني على استخدام التقنية .. ورقة المقاضي صارت من العصر الحجري الحين تجيك المقاضي مسج على الجوال والله اني ابغا اصيح اذا قريت رسايل جوالي ورسايل جوال اخوياي العزوبية .. كل رسايلهم (عندما تشرق شمس يوم جديد اذكرك ..) (كفاني ان جنح الليل يغشاني ويغشاك ..) (الله على الجمس لولا وراد الستين) << رسالة داخله بالغلط خويته ابوها شريطي ههههههههههههه.. وانا تعال شوف رسايلي (حليب سريلاك ..) (ارجع بدري نبي مويه ) (وانت جاي جب اعواد اسنان) اعواد اسنان في نص الليل الله من الاعذار بس



وماقطع قلبي ونكد علي حياتي الا اذا طلبوا تسالي .. تجيب برنقلز قالوا نبي جحا .. تجيب بنكهة الكاتشب قالوا نبي بالخل والليمون .. تجيب رقاق الوردة قالوا نبي رقاق غوار . تجيب صلصة قالوا نبي ماجي .. بس خل عنك والله صار عندي خبرة ولاخبرة رابحة وانا والله من اول كنت احسب البندورة هي البطاطس ههههههههه



مناسبة هالموضوع اني رحت أمس بعد صلاة الجمعة ومعي كالعادة رفيقة دربي ورقة المقاضي طولها حوالي 7.12 متر ويوم دخلت السوبرماركت والقا زحمة وانا اللي تصعب علي نفسي واتمرد واشق ورقة المقاضي وارسل للمدام رساله اقولها اني تمردت وقطعت الورقة ... جزاها الله خير تفهمت الموضوع بشكل حضاري وهذا انا اكتب لكم الموضوع من مقهى ههههههههههههههههههه(انطردت من البيت)


والله الموفق

طريقة عمل المكرونة بالبشاميل سرى يومنا ماغير ناكلها الى درجة ان ابوي اضافها في دفتر العايلة لانها صارت جزء من العايلة


هههههههههههههههه ماشالله اجل عندكم اخت اسمها معكرونه

خيالك واسع وسرد طريف اشكرك اخي على المشاركه السرد الجميل

خخخخخخخخخخخخخ

الله يعينك ياحبيبي عاد وش نقول

اخواني الافاضل (الجنوبي 2000 ، الغالية)

لكم مني جزيل الشكر والتقدير عاى المرور
تحياتي