هين هين يالضبان

الله ان تحييهم من مبطي عن التقارير ,,عقب هالعجاج الي جانا,,

قلنا اليوم نطلع ونغير جو شوي ونغير من الروتين

الموضوع يختلف عن نصه وتراي لي كم سنه ما كلت الضب !!

وأن شاء الله سيكون هناك موضوع مستقل لــ الضبان..

كانت طلعه خفيفه في الصباح قبل الظهر بقليل والتمتع بملاحقه الضبان

والاستمتاع بطردهن دون ان نمسك بهن !!

من اعلى شعيب الشوكي والتوقف في غدير ثريثان ,,,

اترككم مع الصور..

اول ضب شفناه كان حذر جدا وجالس فوق بيته كني اسمعه يقول وش يبون هذولاء النشبات



<<< تركناه >>> اصلاَ مالنا به لزوم



هذا واحد ثاني قلت الحقه اشوف وش عنده




بس على طوووول وقف وسفط على اليمين

قلت لخويي لو نبيه ما وقف لنا من اساس ..



ويوم وصلنا للغدير ما شاء الله مليان دخيخلات >>تمنيت الساكتون والله..



التوقف وشب النار لتجهيزالشاهي والغداء..



من دون هالبريق --->الشاهي ماله طعم ابدددد



جتني فكره اليوم وشكلها فكره زينه ..



اكبسها في صحن القصدير المقوى ,,,
ومنها نفتك من غسيل القدر والصحن.. هع





طبعا نخليها ربع ساعه على نار هادئه..



يا زين الشاهي اذا جاء على ناروخص في هالبريق..



وش تتوقعون هنا !!!

هذي ثلاجه الببسي والماء والشمغ اصليه --> تصدقون مازالات محتفظه بالبروده الين العصر ما تغير شي ابد..



وش رايكم بها الكبسه عاد



سؤال محيرني ودايم افكر فيه !!

شفتوا اليمونه دايم اذا جبتها معي انساها ما احطها

واذا حطيتها قدامي نسيت اقطعها واذا قطعتها ما كلتها!!

وما انتبه لها الا في آخر الأكل..



<<<اووووب مشكله نلاقيك بعدين



بعد الغداء يا زين الجحيحه وخص اذا جت حمراء وحاليه

كل واحد ياخذ له وحده لا يستحي





الي انا مستغربه السنه هذي ما شفت ولا بغروث تتتوقعون وش السبب





جانب آخر من الغدير...



التوجه بعدها الي روضه المحتجبه وربيعها يبدوا في نهايته..



توقفنا بها وشربنا شاهي العصر,,,



ومن ثم التوجه الى الفيضه,,



لقينا في الطريق هالعرجون الله يعينه ويصبره على حر هالشموس!!



وين راعي الهبيد يا بلااااااااش والله..



توقفنا عند احد الاصداقاء وشربنا عنده حليب الخلفات الطاااازج





الله يبارك له فيها وينعم الله عليه...

الى هنا انتهينا وان شاء الله موعدكم الاسبوع القادم اذا حنا من الحيين

في تقرير آخر ان تيسرت الامور..

تحياتي لكم..

من قآآل بنستحي انا بخذ الصحن كله
ماآشاءالله شكلها تجنن ...
رحله ممتعه خصوصاً مع ملاحقة الضبان مغامره بالنسبه لكم هع
الله يونسسكم ويسعدكم دووم يآآرب..
ومشكور على روعة تقآريرك
تستآآهل آطلق تقييم ونجووم :)

مشكور ابو حمد

مالك حق تشوف هالزين وتصدد عنه

ما شاء الله

طلعه حلوووووه بس خربتوها يوم تركتو هالزين



ليتكم كلتوه ابرك لكم والله يا عليه مرقه بعد

لكن خيرها بغيرها

موضوع راااائع وطلعه ارووووع

كل الشكر لك يا ابو حمد على هذا الطرح

والله يعافيك

مآشآء الله عليكم حر وملآحقة ضبآن الله يعينكم ويعين الضبآن عليكم ..
مآشآء الله شكل الكبسه تشهي وطريقه جديده بالطبخ ..



عليكم بالعآفيه وتسلم يدينك على التقرير المميز ..

اقتباس: المشاركة الأصلية كتبت بواسطة لميس    من قآآل بنستحي انا بخذ الصحن كله ماآشاءالله شكلها تجنن ... رحله ممتعه خصوصاً مع ملاحقة الضبان مغامره بالنسبه لكم هع الله يونسسكم ويسعدكم دووم يآآرب.. ومشكور على روعة تقآريرك تستآآهل آطلق تقييم ونجووم :)

هههه شكلي بحط الضب فوق الصحن

<<< ما عندنا الا حلالك يا لميس بس خلي لنا لو شوي عاد ..

لحق الضبان حلو وجميل وفيه ضحك وهواش اذا كثرت المجموعه وهذا الي محليها..

وشكرا شكرا على القييم ولكل بالمثل

ويا هلا فيك ومنوره الموضوع..

اقتباس: المشاركة الأصلية كتبت بواسطة سدير نت    مشكور ابو حمد مالك حق تشوف هالزين وتصدد عنه

النفس عافته يا سدير نت خلاص من حبكم يا زين عزلنا...

ويا هلا فيك ..

اقتباس: المشاركة الأصلية كتبت بواسطة أبـوحـمـد    هههه شكلي بحط الضب فوق الصحن <<< ما عندنا الا حلالك يا لميس بس خلي لنا لو شوي عاد .. لحق الضبان حلو وجميل وفيه ضحك وهواش اذا كثرت المجموعه وهذا الي محليها.. وشكرا شكرا على القييم ولكل بالمثل ويا هلا فيك ومنوره الموضوع..

عاآآدي مافيه مشكله عارفه انك ماتبغاني اكله كله
بس عنااد بكلهم ومراح اخليلكم شيء

اقتباس: المشاركة الأصلية كتبت بواسطة المتحـ2007ـد    ما شاء الله طلعه حلوووووه بس خربتوها يوم تركتو هالزين ليتكم كلتوه ابرك لكم والله يا عليه مرقه بعد لكن خيرها بغيرها موضوع راااائع وطلعه ارووووع كل الشكر لك يا ابو حمد على هذا الطرح والله يعافيك

الزين بين في رسومه يا علي والشين شين الله يعين المبتلي يالمتحد..

بيجيك يوم وتترك هالشيون ,,

بس مدري متى !!

الين يجيك موقف قوي مع الضبان,,

والي مزين خويي انه ما يداني ريحته ولا يبي قربه ..

ويا هلا فيك ومنورنا بحضورك..

اقتباس: المشاركة الأصلية كتبت بواسطة الراقيه    مآشآء الله عليكم حر وملآحقة ضبآن الله يعينكم ويعين الضبآن عليكم .. مآشآء الله شكل الكبسه تشهي وطريقه جديده بالطبخ .. عليكم بالعآفيه وتسلم يدينك على التقرير المميز ..

لقيت الحر في الديره’’’ الواحد يطلع بس يشوف البراد كيف صاير..

وهذا طريقه حلوه للعجازين هههه

الله يعافيك ويا هلا فيك يالراقيه..