نسائم نسيم

ابومنيرة ،ترى الدعوى بساط احمدي اللي في خاطرك قوله .هنا حرية مطلقة تحت الحماية .

امواج المحيطات تتلاطم، المركب قديم ،الركاب خوف وذعر،في ليل دامس،السماء امطار وبرق ورعد ،
الجميع يبحث عن النجاة.
يا الله متى ينتهي هذا الكرب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
نسسسسسسسسسيم

المرقب اللي صاحبي قد وطابه
................. حق علي الى من جيته لعديه
والله لعدي فيه واروح ترابه
...........من حشمة اللي عقب العام راقيه

إن مت حطولي كفن من ثيابه
.................. وخلوا لطيف الروح فوقي يساويه

أظني أسلم باللحد من عذابه
............... وأروح بسمل الثوب من ريح راعيه

وإليا حضر قبري ولمس جنابه
............. حتى ولو قفى هاك اليوم أبرجيـــه

والموجب إنه خابرن وين أنابه
............. ماعاد ينشد عني أحدن يغـــــــــويه
هذي تعد من روائع الغزل فيها الاطلال والذكريات والتمنى والترجي.مساكين اهل الهوا حالتهم حاله .
يجي واحد ماله في الامور هذي سنع وينتقدهم وهذا خطا،هذي تعتبر بلاوي والسالم يحمد الله.

السلام عليكم ..

صباح الخير .. و الحب يا نسيم ..
..
..

حتى ولو قفى هاك اليوم أبرجيـــه


..

اوجعت قلبي يا نسيم ..

عصي الدمع صباح الخير،،،،،،،،،
شف وش يقول الشاعر لانه خابر ان فيه ناس فيهم حسد وشر الله يكفينا شرهم
والموجب إنه خابرن وين أنابه
............. ماعاد ينشد عني أحدن يغـــــــــويه

بسم الله على قلبك ياعصي الدمع.
انت لك سوابق ياعصي الدمع والا تسمع مثل الناس؟

..
الله يكفينا شر كل .. حاسد ..

لي .. سابقه وحده .. و الشوف ما هو بمثل السمع ..

..
سؤال يا نسيم .. ابيك تجاوب بكل صدق .. شي تتمناه الحين ؟ الحين ؟ ..
و مدونتك و محد له حق يتدخل في .. خصوصياتك و امنياتك ..
.
على طاري الامنية .. متى يوم ميلادك .. علمنا نحط لك حفلة ..

اقتباس: المشاركة الأصلية كتبت بواسطة عصي الدمع    .. الله يكفينا شر كل .. حاسد .. لي .. سابقه وحده .. و الشوف ما هو بمثل السمع .. .. سؤال يا نسيم .. ابيك تجاوب بكل صدق .. شي تتمناه الحين ؟ الحين ؟ .. و مدونتك و محد له حق يتدخل في .. خصوصياتك و امنياتك .. . على طاري الامنية .. متى يوم ميلادك .. علمنا نحط لك حفلة ..

بس البين انك تجاوزت هالسابقة بروح عالية وايقنت ان لكل شخص نصيب وان الاقدار ليست تحت تصرفنا نصرفها كيف نشاء.
والله ياخي الاماني كثيرة ليس لها سقف محدد يعني انا اكذب لو قلت لك اني يعني يعني سالم من غثاء بعض الانفس اللي تبلاك وتورطك وتدهورك وتروح ترقد وحنا يطلع الصبح في رجا كلمة تعال ياعصي الدمع.
شف حنا في المنتدى والحمدلله ماتقدر تقول هذا مكاني ولي فيه حرية طرح او فكر او سالفة اطلاقاً ماتدري الا جايك واحد يقول انا شايف عصي الدمع ونسيم يسولفون!!!!!وش عندهم؟
ثم تروح في دوامة سكر المدونة انتم تسولفون وقلبتوها سوالف ومن هالكلام اللي يضيق الصدر.
تاريخ ميلادي صراحة محرج ياعصي الدمع لاني شفت بعض الاعضاء كبر عيالي اي والله .فأنت منتب مزوجني، وانا خلاص معد لي نظر في العروس، يكفي اللي عندي من الغثا والصجه.
تحياتي لك ياعصي الدمع

اقتباس: شف حنا في المنتدى والحمدلله ماتقدر تقول هذا مكاني ولي فيه حرية طرح او فكر او سالفة اطلاقاً ماتدري الا جايك واحد يقول انا شايف عصي الدمع ونسيم يسولفون!!!!!وش عندهم؟

من جد وش عندكم

اقتباس: المشاركة الأصلية كتبت بواسطة المتميزة 26    من جد وش عندكم

ابد سلامتك .سوالف وتقطيع وقت .وعصي الدمع الله يخليه سوالفه زينه و قلبه مشبي متخرق كنه بيت نمله وانا قد مضالي ما مضالي .يعني الدعوى وقوف على الاطلال .مشاكل الحياة ،التعامل مع الاخرين حسب ادراكهم ،الناس ماتخلي كل وادي ومجراه.
عصي الدمع عنده اجازة وفاضي ومسير ويحبني وانا والله احبه.وانتي خابره الله لايقطع رجا من ترجاه ومن سار على الدرب وصل يالمتميزة ولابد ان يستجيب القدر، وتلين القلوب، او تحس .يعني حنا هوينين يكفنا الكلمة الزينه نقعد اسبوع وحنا في سكرتها.وحنا في رجا كلمة تعال، على قول الشاعر/
وياوجودي كل مااغفيت ثم مال الظلال
،،،،،،،،،،،،،،،،،،،،، لاغفت عيني ولاذقت شيٍ مشتهيه
وجد من قفّى وهو في رجا كلمة تعال
،،،،،،،،،،،،،،،،،والتفت من عقب مااقفى ولحدن لدّ فيه
فرصة سعيد يالمتميزه