خارجية..داخلية ..خارجية ..داخلية.. وبعدين دعوه للنقاش ؟؟؟

اقتباس: المشاركة الأصلية كتبت بواسطة طير شلوى    اجل بقطع الشك باليقين دامك رايح لهم ومجرب، وشورك وهدايه الله ،

الا خاوني ياطير شلوى .انت توك ولد نشيط نبي نخليك تسوق لان حنا معد فينا شده سواقه اي والله والشوف بعد لك عليه .

تم
وخوتك تنشرى يانسيم .

اقتباس: المشاركة الأصلية كتبت بواسطة طير شلوى    تم وخوتك تنشرى يانسيم .

صامل والا حكي .ماهوب تم وبس.تراي ابمشي

اقتباس: المشاركة الأصلية كتبت بواسطة ملامح صادقه    مشكوره اختي على هذا الموضوع انا بصراحه مع السياحه الداخليه لان الواحد يكون مرتاح نفسيا في بلده ولايخاف من اي شي صح ان الغلا موجود فيها بس الواحد مايرتاح الا في بلده مهم كان "اما عن السياحه الخارجيه احسن مافيها الخضره والامطار والبراد فقط لاغير ولايحس الواحد براحه الا ان كان معه احد" صراحة هذا راي يعطيك العافيه

يسعد مساك يالغلا كلامك صحيح في الداخل افضل
لكن كل شي غالي والخدمات لك عليهااا
بس مثل ماقلتي مايرتاح الواحد الا في بلده
شاكره لك طيب تواجدك وروعة اطلالتك

اقتباس: المشاركة الأصلية كتبت بواسطة ابوحلا11    قوت القلوب العلم عند الحريم وعند اختها ورجلها وين يروحون امش وياحض اللى حرمته مدرسه بصراحه فله الرواتب دبل وكل سنه فى ديره وياعزتيل اللى عياله واجد كنه حارس مدرسه يقعدبها حده بريده والزلفى والشحمه

يعني تمشي وراء الحريم وانت مغمض
وليش المدرسه بتصرف على زوجها يمكن مره تسويها
لكن كل سنه تبيها تسافرهي وزوجها من راتبها حرام عليك ياابوحلا
والي عياله واجد وربي منعم عليه ليش مايسفرهم ويوسع صدورهم
شاكره لك مداخلتك ومرورك

اقتباس: المشاركة الأصلية كتبت بواسطة عصي الدمع    السلام عليكم .. كلام .. ابو حلا .. صحيح .. و يمدحون مطل الزلفي .. المسألة ليست وين نروح ؟ .. او وش المكان اللي بنرتاح فيه ؟؟ .. او هو غالي ما ينفع ؟ .. او يخالف ما نعتقد انه عندنا التزام و عند غيرنا مخالفة للدين و للعادات و التقاليد السؤال .. وش الفائدة من .. السياحة .. ؟؟ .. اذا بنسافر و طبوعنا و حركاتنا ( الوجعانه ) .. معنا .. و نفس الشله و نفس السالفه .. الواحد يسافر عشان يرتاح .. و يروق و يغير جو .. موب يغتث زود و يتحسر .. ذكرت واحدا تواعدنا نروح للشرقية ... و الا الرجال معه .. دسوس و بطانيات .. و كاتم .. ( كتمني ) .. قلت له يا انا يا قشك .. بعد طول نقاش .. اقتنع على زعله .. يا اخي رايحين نبلش بمواعينك و قرقعة و نوم مع القارص .. رحنا .. فندق .. 5 نجوم .. فطور اشكال و انواع .. و مفتوح .. و الغدا على ما تشتهي .. و العشا ان بغيته على البحر ويوصلك .. و الاسواق حواليك تخترش .. و على قولته .. لو ما جا .. تكرمون الا الحمام و الدش .. و الصوابين خذ و خل من كل نوع .. بتقولي سياحة داخلية و جوله في ربوع بلادي .. كلها واحد .. اهم شي انك .. تريح نفسك و مخك .. و تسلم من تقطيع البصل و مقلقل اللحم .. و المطامر .. ولا واحد يجرجر حريمه و بزارينه و كل واحدا ماسك عزبته مع جهه .. رايحين يطبخون له .. يا اخي خلهم يرتاحون منك لو اسبوع .. السياحة الخارجية .. لها اهلها و مزاجها ..

كلامك في محله ياعصي الدمع
اهم شيء في السفرالراحه والرفقه الي توسع الصدر
شكرآ على مرورك ومداخلتك

اقتباس: المشاركة الأصلية كتبت بواسطة نسيم    صامل والا حكي .ماهوب تم وبس.تراي ابمشي

كانكـ تبيها حكي فهي حكي وكانك تبيها صمله فتراها صمله ،

اقتباس: المشاركة الأصلية كتبت بواسطة طير شلوى    يقولون مد رجليك على قد لحافكـ ، داخليه لذوي الدخل المحدود وخارجيه لذوي الدخل المرتفع ، واما كلام اخوي عصي الدمع فمن وجه نظري ان الحركه زينه والطبخ والنفخ زين ابرك من هالمطاعم وعلى قولته فندق خمس نجوم ، وفي الاول والاخير كلن ينام على الجنب الي يرحيه ، و سددوا وقاربوا يعني لاافراط ولاتفريط من هالناحيه ، تسلمين قوت على الطرح .

انا اتفق معك في كلامك من جهة الداخليه لذوي الدخل المحدود والخارجيه لذوي الدخل المرتفع
لكن سالفة الطبخ مااعجبتني الا اذا كانو الرجال هم الي يطبخون ويخلون هالحريم ترتاح شوي
شاكره لك ياطير شلوى مرورك ووجهة نظرك

اقتباس: المشاركة الأصلية كتبت بواسطة نسيم    طير شلوى، ذوي الدخل المحدود المفروض هم اللي يسافرون للخارج مثل سوريا لانه رخيصة وزينه.اما ابها اللهم عافنا كنها اروبا من غلاها والمشكلة انها شينه الى من جيت من ابها يجي وجهك اسود من التعوب كنك رايح لمغزا

معك حق في كلامك يانسيم صار السفر الى الخارج ارخص احيانآ من الداخل
مبالغه في الصرفيات على الفاضي
اشكر لك مرورك ومداخلتك

ترا مهوب لازم سياحه ولاهيب واجب كل سنه نقمز لكل ديره كن حنا مشافيح ماقد شافوا خير اثقلوا خلو السياحه تسيح
عنز بدو وطاحت في مريس