لا تلومووووووووووني في حبه .. قصه رووووووووعه

الجزء الرابع


المهم حطت دهن عود وظهرت بتسلم على ابوها وامها واخوانها...ظهرت للصاله ولقت ابوها وسارت اتسلم عليه..
عنوده : امباركن عيدك بويه...( وحبته على خشمه وراسه)

بو بطي: وانتي من العايدين والسالمين بنتي عيل وين خواتج زقريهن بسرعه بسلم عليهن وبعايدهن قبل اسير اسلم على عربانا..

عنوده : والله يا بويه..........( وقطع كلامه دخول اخوها بطي وياه ولد عمها سعيد وانصدمت وربعت حجرتها ..وهيه متلومه ..الله يغربل هالحاله شو يايبنه هاذا من صباح الله خير جان يسلم على هله قبل ايينا...اكيد الحين بطي بييني وبيحتشر عليه.. وهيه اترمس نفسها حدر عليها بطي..

بطي: انتي ليش يايه الصاله وانتي بلا لحاف جان لبستي شيلتج؟؟؟ وبعدين ليش فاجه شعرج شو هالمذهب الماصخ؟؟؟
عنوده اول شي سارت اتسلم على اخوها وحبته: امباركن عيدك الغالي..اسمحلي والله حبيبي ما ادري انك بتييب حد من عيال عمي وياك...ما احيد حد من عيال عمي ايي يعايدنا من صباح الله خير ...

بطي شوي انفردت اسارير ويهه من رد اخته: وانتي من عوادته..المهم لبسي شيتج ولفي شعرج وزقري اخواتج وتعالن سلمن على ولد عمكن.. تراه سعيد يترياكن..

سارت عنوده وزقرت اخواتها وتلحفن عدل وسلمن على سعيد بس سعيد طول الوقت عينه كانت على العنود..اول مره سعيد يشوف العنود عقب مارد من فرنسا ...والحين عقب غربه دامت سنين وسنين رد سعيد وكانت اول مره يشوف العنود من بعد يوم كانوا صغار..
عنوده سلمت على سعيد وبسرعه ردت داخل من شافت عيونه زايغه جيه..تمت اتقول في خاطرها اللله يستر من سعيدان ...
دشت فطيم عليها: هاه عنود شفتي سعود شقا كان يطالعج؟؟ يا عيني سحرتيه ...انشالله بس يخطبج وتعرسين ويستوي عندنا عرس...الله بكون فرحانه ...بحتل غرفتج عقب ما تعرسين..

عنوده وهي متضيجه: اتهبين هبيتي انتي وسعيدان انشالله ياخذج انتي ..لو على قص ارقبتيه ما خذته يالله انجلعي عني ..

فطيم: بسم الله الرحمن الرحيم ..شو قلت انا.. حرام عليج اليوم العيد استانسي وفرفشي مب اتمين مبوزمه جنج غادية جليب الدو..

عنوده: جليب الدو في عينج ..خذيه انتي انا ما اباه ..قصوري بعد اخذه هالشيفه...

فطيم: والله اني اباه لو هو يباني بس نظراته كلها صوبج..والا انا اصلا اتمناه..

عنوده ارتاحت اشوي: زين غناتي لو انتي تبينه تقدرين تخلينه يلتفت صوبج وتستميلينه..يالله راوينا شطارتج وفكيني منه...

فطيم: ما طلبتي حبوبه من عيوني بسوي اللي ما يستوي..لازم اخليه يحس بوجودي...انزين اخبرج خلينا انسير بنوايج على الرياييل وبنشوفهم من خبق الباب...قومي فديتج..

عنوده: الله يغربل عدوج اكيد حد بيزخنا ..لو يلسنا نوايج..

فطيم:لا انشالله اصلا ما حد في البيت الرياييل ساروا كلهم ايسلمون..وامايه واسما في الميلس يقربن باللي ايي يعايدنا...

عنوده: يالله عيل ويهنا...

سارن عنوده وفطيم ايوايجن من فتحة الباب علشان ايشوفن اللي ساير واللي ياي من شباب شعبيتهم...ويتهن شويخ من وراهن بتزيغهن...

شويخ وهي تمشي بشوي شوي: بوووووووووووووووو...

فزن البنات وردت عنوده على ورى ولطمت فطيم على ويهها وهي ما تدري...
تمت شويخ تضحك عليهن وهن يدعن عليها ..



فطيم: الله يعدمج عنبوج زاد فلختيبنا ..الله يخسج يا هادمة اللذات ..خلينا نطمش ع الغزلان..

شويخ: زين جان زقرتني..

عنوده : اطمشن ارواحكن انا بسير ارمس اربيعتي...
سارت العنود ومسكت تلفونها واتصلت لعذيجه..تبا تعايدها. اتصلت وما حد رد عليها في البدايه وعقب شلت التلفون الخدامه ..

العنود: الو السلام عليكم..

الخدامه: واليكم سلاما ماما..

استغربت العنود وقالت يمنك مغلطه : اقول هاذا تلفون مال عذيجه ؟

الخدامه: هي ماماه صبر شوي انا بيزقر حقها هي في داخل مجلس الحين..

بينما كانت الخدامه ترمس العنود دش عبدالله بيغير ثيابه علشان بيسيرون هوه وخوانه يسلمون ع الشيوخ..وشاف الخدامه ميوده تلفون اخته وتخبرها: امينه.منو تكلمين؟؟

الخدامه: هاذا فريند مال ماما عذيجه..

عبدالله : هاتي التلفون بشوف..

العنود تسمع الرمسه بين الخدامه وريال ما تعرفه بس اول انسان يا في بالها انه يكون عبدالله..

عبدالله شل التلفون عن الخدامه: الوو..

العنود وهي مرتبكه: الو...السلام عليكم...

عبدالله حس ان هالصوت يحرك في شحون.: هلا اختي وعليكم السلام..

العنود: والله اخوي بغيت عذيجه..

عبدالله تم ساكت وو يسمع حس العنود..اكيد هاي العنود ما حد غيرها له هالنبره غيرها نبرتها كانت شجيه

العنود: الووو...

عبدالله انتبه للعنود انها ترمسه وقالها: اسمحيلي اختي ..والله عذيجه الحين في الميلس ويا بنات خالها واخواها بخلها تتصلج..منو اقولها؟؟

العنود: ما عليه انا بتصللها بعدين...سلم عليها وبارك الها بالعيد...

عبدالله ما يعرف اشياه: اقول........

العنود: نعم..
عبدالله ما يعرف اشياه: اقول........

العنود: نعم..

عبدالله وبكل رقه :انتي العنود صح؟؟

العنود صخت واحمر ويهها:.........

عبدالله: خيلج ما تسكتين وجاوبيني..

العنود: سلم على اختك..وفي امان..

قاطعها عبدالله بل اتكمل: العنود لا تحرميني منج ..اليوم عيد ...حرام عليج والله اني متعذب لا تسوين فيني جذيه..

العنود: ...............

عبدالله: انزين رمسي ..حتى مباركن عيدك ما قلتيلي..

العنود...م...بااا..رك...ان...عيدك...((العنود كانت ميته من المستحى وبسرعه سكرت التلفون في ويهه))

عبدالله برايج مادام سكرتي في ويهي والله عاذرنج ادري انج حشيم عن طبع المدانيس..فديت الرب اللي خلقها..ويلس ايدور رقمها في تلفون اخته وحصله ..وسيفه عنده في الموبايل ..هوه واعد عمره وحلف يمين ما يتصل الها ...ولا يطرش الها مسجات ولا شي...هوه يباها على سنة الله ورسوله..سار صوب اخته وزقرها من برع الميلس...

عبدالله: عذيجه..............عذيجه..

عذيجه ظهرت من الميلس : هاه الغالي امر فديت روحك...

عبدالله وهوه فرحان: غناتي ربيعتج اتصلتلج اندوج تلفونج اتصليلها...بسرعه تراها اترياج..

عذيجه وهي مستغربه: وانته شدراك؟؟؟ ما احيدك اتجييك تلفوني ...

عبدالله: لا والله هي اتصلت والبشكاره ردت عليها..وانا يوم شفت امينه ترمس في التلفون اتحسبتها تتصل لاهلها والا لحد ثاني بس يوم خذت التلفون ظهرت ربيعتج صدق..

عذيجه خلني بجييك منو متصل...ويوم طالعت وين المكالمات المستلمه لقت ان العنود اتصلتلها...: فديتها هاذي العنود..عبدالله هاذي العنود..تعال تعال بنسير نتصلبها...

يودت عبدالله وعبدالله كان قلبه يدق بقو..اخاف لا العنود تخبر عذيجه..والله ما ابا العنود اطيح من عين اختي لانها هي الوحيده القادره انها توفق من بينا..

قمر حساس

حياك والقلب وياك

تراني تعبت وانا اقراء , باقى شي كمليه او خلاص

على العموم يعطيك الف عافيه على الى قريته وبس

سلمت يداك

ابوة العنود

**الجزء الخامس**


دشت الصاله واتصلت لعنوده وعنوده كانت يالسه جدام تلفونها واول ما رن موبايلها اتنافضت قالت ما برد يمكن عبدالله ..لا لا يمكن هوه خبر اخته اني انا متصله ..وهي يت تتصللي ..اخافه خبرها اني رمسته ..يا ويلي يا سواد ويهي جدامها..لا لا عبدالله ما احس انه راعي هالسوالف..
ردت العنود على اتصال عذيجه..

عذيجه تبا تسبق العنود: مباركن عيدج وكل عام وانتي بخير.......ههههههههههه غلبتج

العنود: مرحبا الساع اكبار ....مرحبا الساع ملايين ولا يسدن وانتي من عوادته الغاليه ..غلبتيني هالمره بس المره الياييه انا اللي بغلبج...

عذيجه: مرحبتين فيج والله...حي هالصوت الغاوي..والله صوتج خطير بعد...

عنوده: هههههههههههه عن المجامله لا خطير ولا شي...خلي عنج لا تسويلي مسكه باليس...اتريا العيديه تراني ..

عذيجه: من عيوني والله الغاليه واحلى عيديه بعد...

عبدالله عدالها يهمس لها...:خليني بسمع شويه..فديتج..

عذيجه تأشر له بيديها على انه يصبر..بس عبدالله تم يتحرقص جنه على نار ... مره يغير يلسته ومره يحط اذنه على سماعة موبايل عذيجه ومره اير اخته علشان يسمع عدل صوتها يعني اللي يشوفه ايقول جنه ياهل ...بس اخته عذيجه ضربته على راسه وقالت بصوت عالي علشان تسمعه للعنود: عبدالله يلس عاد شوفيك...حشى اول مره اشوفك عندي يالله فارج...

العنود: عذيجه اذا مشغوله بخليج ...

عذيجه: لا والله ما تسكرين مب مشغوله بس هاليني عندي مب مخلني في حالي..

عبدالله من الصوب الثاني : الله واكبر عليج انا مب مخلنج في حالج؟؟؟ خلاص ماشي سيره دبي يوم الجمعه..سيري خلي أي واحد من خوانج يوديج...

عذيجه: غناتي العنود انا انشالله بييج دبي بسلم عليج وبعايدج وبييب لج عيديه..

العنود وهي مب مصدقه: لا والله صدق بتين دبي ...رمسي صدق ..والله جان ييتي دبي رفجه عليج تزورينا ..والله بترياج خلي اخوج اييبج..

عذيجه وهي تضحك ومستانسه مب مصدقه ان عنوده خذت رمستها على محمل الج: لا فديتج اسولف وياج بس وإلا احنا ما يخلونا هلنا بعد تراها الكلمه المعتاده عندنا بعد((منقـــــــــــود))..

عنوده:هههههههههههه حتى انتو ..واحنا الحال نفس الشي...عيل كيف بنتلاقى ...
عذيجه: اقول عنوده صبري شوي بظهر هالصخل برع...
عبدالله: يالسباله انا صخل وتقولين جدامها بعد...وهو يحط ايده عند لحيته ماعليه يالزطيه اللي يعاطيج ويه...
عذيجه:ههههههههههههه يالله يالله فارج ولا ما ........

عبدالله ايأشر الها تسكت عشان ما تحس عنوده بشي..
ظهر عبدالله وسار يبدل اثيابه عشان يطلع...عذيجه عقب ما طلع سكرت الباب وردت اتكلم عنوده وتمن سوالف تقريبا نص ساعه وعقب سكرت عنوده عنها علشان بنات عمها ين بيسلمن عليها...

خلص العيد وردن الجامعه علشان ايكملن دراستهن ويستعدن لامتحانات منتصف الفصل والعلاقه بين العنود وعذيجه تقوى يوم ورى يوم.. في يوم من الايام عذيجه اعترفت لعنوده ان اخوها عبدالله متخبل عليها من اول ما شافها وانه يفكر فيها لين الحين ...وانه يباها على سنة الله ورسوله بس كانت هناك مشكلة صغيره وهي كيف عنوده بتقنع اهلها وكيف عبدالله بيقنع اهله وامه بانه ما يبا حد من هله ...

..وطبعا عنوده ما تخبي شي على مريوم اقرب الناس الها وكانت مريوم هي دوا المعتاق بالنسبه للعنود ..كاتمة اسرارها.

.وعقب ما خلصن اخر امتحان لهن اتصلن لعويش وتخبرنها وين هي ،، كانن مقررات يسيرن يتحوطن اشوي في مركز صحارى ويتغدن هناك..وطبعا الكل بيتوادع لانه الجامعه بتبند...

عويش : هلا مريوم شو فيج؟؟؟
مريوم: عويش يالله بنسير صحارى بنتغدى هناك اليوم اخر يوم ..

عويش : من عيوني بس وين عنوده؟؟انا مب سايره اذا عنوده ما سارت...

مريوم: ويا ويهج يعني انا ما اسدج...المهم عنوده بتي ويانا لانها هي اللي طلبت مني هالشي...
عويش : لا ما تسديني ........هههههه خلاص عاد ميمي لا تزعلين ....والله انج ع العين وع الراس..انزين اخبركن انتن وين؟؟؟
مريوم: احنا في bulding N

عويش : خلاص تعالن عند البوابه A انا بترياكن في سيارتيه..

مريوم: اوكيه يالله باي بنتنقب ويايينج...

عويش: اوكي باي

مريوم وهي متشققه من الفرح: يالله يالله بتودينا عويشات قومي بنسير الحمام ...

عنوده: حشا يا مريوم اللي يقول جنج من زمان ما طلعتي..

مريوم: يالله لا تتخبرين الصراحه مر عليه العيد والعرب كله تينا ولا رمنا نظهر من البيت...وانتي ما احيدج تظهرين ؟؟؟يالله بنسير خلينا نستانس..ونجحل اعيونا بشوفة الغزلان.......

عنوده : تبين الصراحه انا والله بعد في خاطريه الحواطه ...

مريوم: يالله عيل تراها عويش تتريانا في سيارتها...انقفضي ما فينا تسير عنا...ادريبها ما عندها طقّــــــــــــه...

عنوده: اصبري بجحل اعيوناتي تدرين بي ما اداني اسير جلحا ملحا...

اتجحلت عنوده وظهرن بسرعه واتذكرن ايحطن شنطهن مالة الكمبيوتر في اللوكر...وسيده ع البوابه وطلعن ...ركبت عنوده جدام ومريوم ورى العنود...

عويش: ليش ابطيتن حظراتكن؟؟؟ الدريول مالكن انا ؟؟؟ يالله حبيباتي قرقعن مخابيكن...وحده تمزرلي السياره بترول واباه التانكي فوووول...والثانيه عليها الغدا تسمعن..؟؟؟؟

عنوده وهي مبطله عيونها: حشى مذله تراج عتيش؟؟؟ يالله والا تراني بدعي عليج بريال عور واصلع وما يسر الخانه....

عويش : اهبي هبيتي والله ...عوذ بالله منج يالساحره انتي ...يعني ما بتدفعن؟؟؟

مريوم : بندفع بس ع البترول والا الغدا الصراحه انا عني مب شاله الا خمس واربعين في بوكي...

عنوده: ما يهمج يا مريوم وانتي يا بنت حسن تراه كله عليه...

مريوم : لا البترول انا بدفعه والغدا انتي دفعيه عنوده..اوكيه
عويش: توكن حريم وتعيبني... هيه جيه اباكن...

عنوده: زين سوقي انتي واتقفي تراني جدام اخاف اكون الضحيه..

عويش: شو تتحريني دريول جوله؟؟؟ والله ان سواقتي فنانه ...
مريوم: اخبرج عويش سوقي ولا ترمسين...

يلست عنوده ادور شرايط ولقت شريط منوعات ...وحطته في المسجل ..وفي هاذيج اللحظه زودت عويش على السرعه... ارتبشت من الاغنيه وكانن حاطات اغنية(( حافظ عليك ويعل ربي يخليك...اتميز لعدلك..ولا تحيد عنها..عديم من مثلك..ومن هو شراويك..يامن تعلى بالشوامخ سكنها))

عنوده ومريوم مرتبشات ...وعويش اتدق بيديها على السكان مال السياره...وكان الجو رهيب والدنيا ممطوره والرعود اتذن.. وخطفت عدالهن سيارة رنج من اليداد اسود وعليه عاكس..وكان فيها شلة شباب ومنزلين درايشهم ويسايرون عدالهم ...وعلى طول عويش طولت على صوت الاغنيه مرتبشه ومتخبله عليهم... وزادت من السرعه وهم يبارونهن...ويوم يقتربون منهن عويش اتزيد من سرعة السياره وهم بعد ويسوون حركات ...
والعنود امبونها متحرطمه على عويش وحركاتها بس بعدين طوفت وقالت يالله الا اليوم ..وهاي اخر ايامنا في الدراسه وعقب اجازة الربيع يالله خلنا نرفه عن نفوسنا شوي.. ومريوم من ورى مرتبشه...شوي الا وينطر بهن تاير السياره ويالله يالله لين ما قدرت عويش تتحكم فيها..وعنود ومريوم شالنهن الخوف شل ..ومريوم اتقول بتنجلب بنا السياره...!!! يالله تسلمنا..
العنود من الصدمه تمت اتباغم...والحمدالله سيطرت عويش على السياره ووقفت...بس الشباب ما دروبهن ..ووقفت وراهن سيارة ..وياهن الريال يربع...
وفجت عويش الباب..وحولت وهيه تتنافظ...

خالد: سلاماات اختي سلااامات..ما تشوفن شر ...عسى بس ما حد صابه شي...

عويش: لا والله يا خويه ما حد صابه شي..والله يسلمك اسمحلي تراني من الخوف قمت اخبص بالرمسه..

خالد: ما عليج اختي الحمدالله قدرتي اتسيطرين على السياره...خلني ببدللكن التاير...

عويش: بس انا ما عندي سبير...

خالد: ولا يهمج انا عندي في دبة السياره...

عويش: مشكور اخوي بنعبل عليك..

خالد: افا اختي اذا احنا عيال البلاد ما نخدم بلادنا وهلها عيل منو بنخدم؟؟؟

عويش: طال عمرك...يعلك ذخر انشالله وليت الشباب كلهم مثلك..

عنوده نزلت من السياره وهي بعدها خايفه...اما مريوم بعدها تصيح في السياره ...وكانت عاقه النقاب...وفجت عنوده الباب الوراني ويلست وياها..

عنوده: يالله مريوم الحمدالله ما صار شي احمدي ربج انه سلمنا...

مريوم وهي تصيح: اه يا عنود ما تعرفين قد خوفي من الحوادث ما اداني السرعه الله يهديها عويش مصممه تسرع..

عنوده: فديتج لا ترمسين جيه جدام عويش واللي صار مقدر ومكتوب...((قل لن يصيبنا الا ما كتب الله لنا)) ما تامنين بربج..

مريوم: استغفر الله..ولا اله الا الله..شو تسوي عويش برع ؟؟ ومنو هالريال؟؟؟

عنوده: والله مخاوي شما....يبدل النا التاير الخربان...

مريوم: الله ييزيه خير...انا ابا ارد الجامعه مب سايره صحاري عله الخيبه اللي تخيبه من مركز...
وتضحك عنوده من خاطرها على كلام مريوم: هههههههههههههههه تراج اتصيحين الحواطه...يالله بنسير ويالله بنسير...

مريوم: تطنزين عليه يالباهسه...اسميج تتشمتين فيه...

عنوده وهي تحضن مريوم : لا فديتج بس ابغي الطف الجو...ما اباج تحسسين عويش بشي ولا تعاتبينها ادري انها روحها مضيجه من عمرها ...وهيه اكيد تلوم عمرها ع اللي استوى اليوم...

مريوم: لا اطمني من هالناحيه ما بقولها ولا كلمه...

ونزلن من السياره وخالد ايركب التاير...ويعق التاير المنطر...

عويش: مشكور اخوي والله تعبناك ويانا..

خالد: افا يا ختيه...ما يطيع زينج انتن خواتي...واجب عليه اساعدكن..

عويش والبنات شكرنه وادعله بالخير..ركبن السياره وعويش ساكته كانت بترد الجامعه بس عنوده ما خلتها ..

عنوده: عويش ما عليه منج انا قايله بغديكن ليش تبين تردينا الجامعه..؟؟ ما يخصني سيريبنا صحارى يالله...

مريوم وهي غاصبه على عمرها : عويش يالله خلينا نسير ما نبا يخطف الوقت على الفاضي دخيلج..

عويش: يعني بعدكن مصرات...((كانت متلومه منهن)) اسمحلي يا خواتي..

قاطعتها عنوده: انسي عويش...

المهم سارن مركز صحارى وتغدن ودشن ايشوفن فيلم هندي يديد في السينما..ردن الجامعه تقريبا الساعه 4 وكل وحده ودعت الثانيه على امل انهن يتلاقن الكورس الياي... ردت عنوده ويا خواتها البيت..واول ما وصلت ودشت حجرتها حطت راسها ورقدت.

الجزء السادس


ابتدت اجازتهن وطبعا في هاي الاجازه قرروا يسيرون العمره..ويتمون هناك اسبوعين وسار بطي ريل اسما يحجز الهم تذاكر...وحجز الهم على طيارة يوم الخميس وبيسيرون في البدايه المدينه...وطبعا بيكون وياهم في هاي الرحله المشؤومه في نظر عنوده سعيد ولد عمها ...واول ما عرفت ان سعيد بيسير وياهم ما بغت اتسير مع العلم ان سعيد كان يسوي المستحيل عشان عنوده تلتفت له ولو بنظره بس عنوده كان قلبها مشغول بحب عبدالله عشان جيه ما تبا سعيد ولا تفكر فيه من الاصل..

قبل السفر باربع ايام وصلها مسج من عند عذيجه(( اطيب من الطيب....واصل الطيب من طيبك...مابك عذاريب...ولا عاش منهو يعيبك)).. قامت العنود واتصلت لعذيجه ..

العنود: الو السلام عليكم..

عذيجه: مرحبا الساع وعليكم السلام...هلا والله هلا بهل دبي...

العنود: هلا بعذيجه..اشحالج الغاليه عساج بخير .؟؟ والله تولهت عليج بس ما رمت اتصلج الا لين ما خلصنا امتحانات قلت اكيد بتكون هيه بعد مشغوله بامتحاناتها...

عذيجه: فديتج والله ..امس كان اخر امتحان لي...والحمدالله الامتحانات هالفصل كانت سهله وايد...بس انشالله هالدكاتره يحطولنا a او b...

العنود: انشالله يا رب الله يسمع منج...وعلومج بعد ما بتسافرون مكان ؟؟؟

عذيجه: قبل لا اخبرج حبيت اقولج في ناس دوم يتخبرون عنج ...

العنود احمر ويهها وما عرفت شو تقول وعلى جذيه تمت ساكته..

عذيجه : عنودتي حبيبتي والله ما اقولج هالكلام الا عشان تحسين بحال اخويه ...

العنود:وهي تتنهد: اااااااااااااااااه يا عذيجه والله اني احبه من خاطري اقول هالكلمه...ولا ابدل في البشر غيره...والله انه يستاهل كل حب الدنيا ...
عذيجه: حاولي تحسسينه بهالشي ما دامج تحبينه خلي الحب ايكون من طرفين.. لازم كل واحد منكم ...

العنود: شوه يا عذيجه...

عذيجه: لا تفهميني غلط عنودتي والله انج اغلى من الغلا نفسه..وما ارضى لج اي شي يمس سمعتج بشي بس انا اقول ما دام اخويه يحبج ويباج على سنة الله ورسوله فليش ما تصارحينه بحبج...

العنود: ما ادري انا بفكر في هالموضوع يوم بسير السعوديه..

وهني عذيجه قاطعت رمسة عنوده: شووووووووووووه تقولين وليش ما خبرتيني حظرتج؟؟؟؟

العنود: والله مسويتلج علشان هالشي بغيت اسلم عليج قبل انسافر..

عذيجه بكل لهفه: ومتى بتسافرون؟؟متى؟؟

العنود وهي مستغربه: يوم الخميس بسم الله الرحمن الرحيم شو ياج عذيجه بلاج؟؟؟

عذيجه: حبيبتي بسكر عنج الحين بس برد اتصلج انشالله جريب..واتاكدي اني بسوي المستحيل علشان اجمعكم..

العنود: انشالله يارب..
سكرت عذيجه عن العنود وردت شلت السماعه علشان تتصل حق اخوها عبدالله...اتصلت وماشل التلفون واتصلت له مره ثانيه ونفس الشي مارد عليها وقالت خلني اسمي باسم الله وبتصل له في المره الاخيره وبشوف ايرد ولا لا ..اخاف يكون ويا ربعه وانا مأذيتنه..بس برايه هالشي اللي بسويه بيكون لصالحه...اتصلت له للمره الاخيره وشل التلفون...
عنوده: غربالله عدوج ما خبرتيني انج بتسافرين ويانا العمره..

عذيجه وهي تضحك شوي شوي: ربج بعد اسرار المهنه...

عنوده: لا والله ليش ما خبرتيني...

عذيجه: بغيت اسويها لج مفاجأه..بس انتي اول خبريني بتسيرون المدينه والا مكه قبل...؟؟

عنوده: المدينه وانتوا؟

عذيجه وهيه مرتاحه من رد العنود: الحمدالله واحنا بعد المدينه...انزين في أي فندق قررتوا تحجزون؟؟؟

عنوده: والله كل ما نسير نحجز في فندق الاندلس اللي مجابل طيبه...وبعد بابه مجابل الحرم مال المدينه...

عذيجه: زين زين الحمدالله خبرتيني عشان اخبر عبدالله...بقوله فندق الاندلس...

عنوده: هيه هب تنسين الاندلس تراه واحد ثاني اسمه درة الاندلس علشان ما تتخالطون...

عذيجه: ما يهمج جدع بو حميد...يعيبج في هالامور..((وتغمز الها))انزين غناتي بخليج وانشالله بنتلاقى يوم بننزل انشالله...تعالي بتخبرج صق انتو بتسيرون المدينه بالطياره؟؟؟

عنوده: هيه وانتو...؟

عذيجه وهيه مبتسمه وفرحانه : واحنا بعد..الله ...ياللله بنتلاقى بعدين فضحه هنيه انتم...

عنوده: زين غناتي ربي يحفظج ..
واول ما سارت عذيجه نط حميد لعنوده...

حميد وهوه عينه على عذيجه: اخبرج عنوده من هاي السولعيه..؟

عنوده اتطالعه باستغراب: وانته شتبا؟؟؟

حميد ايطالع عنوده بزعل ودلع: حرام عليج انا شو بسويبها بس انتي خبريني مني هاي؟؟؟فديتج اتخبريني؟؟

عنوده: اربيعتيه...

حميد: ادري انزين شفتج ترمسينها..بس من وين من شعبيتنا والا من وين؟؟؟ وشو معرسه والا لا؟؟

عنوده: أي شعبيتك انته الثاني ...بويه هاي من دار بو زايد..دار الاصايل...

حميد: والله في ذمتج..وانا اقول هالجمال يستحيل ايكون مثله في دبي...هاويلي عليها..زين بعد خبريني عنها..

عنوده: شو اخبرك ينيت انته...يالله فارج لا ازقرلك ابويه..حشى اسميك غادي شرى حصاة الروز...

حميد : مالت عليج حد ياخذ منج انتي معلومات؟؟يالله جلبي هالويه...

سار حميد عن عنوده وشويخ وبعد شوي يابولهم العشا بس عنوده ما كلت غير الكراميل....وخلت الباقي...فطيم من الصوب الثاني اتشوف عنوده ما كلت اكلها...

فطيم: عنوده؟؟؟جيه ما كلتي؟؟؟

عنوده: ما اشتهي

فطيم: عيل غناتي فديتج هاتي لي صينيتج باكل انا عني ميته يوع...والله عشيهم عشا فقير لا يسمن ولا يغني من جوع..

عنوده ناولتها صينيتها...وماشالله عليها فطيم على طول ما واحت الها خلصت الاكل...بعدين يو ورفعوا الصياني وطلبت العنود الها جاهي حليب...لانه اتعرف انه بيخوز الصداع عن راسها...وطاف الوقت وردن انطفن ليتات الطياره علشان يعلنون ان الطياره وصلت مطار جده الدولي..وان الطياره بتهبط الحين ويطلبون منهم ربط الاحزمه....
في يوم السفر طبعا عبدالله وعايلته يو دبي علشان بيسافرون من مطار دبي الدولي...والرحله بتقلع الساعه 6 اامغرب..علشان جيه يو قبل الوقت بساعتين علشان الشنط...في المطار عبدالله يلتفت يمين ويسار يدور...ويدور ويدور....عاد منو يدور؟؟؟ يدور الحمامه الراعبيه اللي شلت فواده ولا ردته...

من الصوب الثاني عنوده كانت متحنيه هي وخواتها واختها فطيم اتخبرها اذا بتحط جحال
فطيم: عنوده بتحطين جحال في عيونج؟؟

عنوده: هيه بس خفيف احنا بنسير اول المدينه ما بنسير مكه علشان جيه عادي بحط..

فطيم تسمع هرن سيارة اخوها : يالله عنوده انقفظي بياكلولنا فوادنا...

عنوده: زين زين...يالله نطلع..شليتي كل شي؟؟؟ما نسيتي شي؟؟اتذكري ما بنرد..

فطيم: ياهاي اسأله مليون مره سألتيني..خلاص يا ماما ما نسيت شي...انسير يالله..

ظهرن اخر ثنتين من البيت وركبن السياره ويا امهن وابوهن واخوهن وحرمته وعيالهم...وطبعا سعيد في سيارته ويا حميد اخو عنوده...وصلوا المطار الساعه 4وربع...ويوم وصلوا وحولوا يا سعيد بيسلم على عمته وعمه وبطي والكل...واول ماشاف العنود عرفها من عيونها...سلم عليها وهوما نزل عيونه عنها...بس فطيم اتجربت منه شوي وهيه عيونها في عيونه...

فطيم بصوت واطي: سلام عليك ولد عمي ..شو مالنا رب احنا وياهالويه...والا مب مازرين عيونك؟؟

سعيد مرتبك ويضحك ما تعود على حركات فطيم لانه ما يعرفها عدل: وعليكم السلام اسمحيلي غناتي ...

فطيم: لا مابسمحلك شو بتسوي؟؟؟انا اباك ترضيني(( واتجربت منه شوي بعد)) شو رضوتي انا زعلااااااانه...

سعيد وهو مرتبك: ما ادري انتي طلبي وانا بلبيلج اللي تبينه...كله ولا زعلج عاد انتي وايد تتدلعين..

فطيم بدلع: انسير داخل المطار اخاف الطياره اتطير وانته هني متفيزر واونك بتراضيني...

ودخلوا المطار بس لين الحين ما تلافت عنوده ويا عذيجه لانها اصلا عذيجه ما خبرت عنوده انهم بيسيرون حبت اتسويلها مفاجأه ... وطاف الوقت ويا موعد اقلاع الرحله وكانت عايلة عبدالله من اوائل الناس اللي ركبوا الطياره...وكانت مقاعدهم في مقدمة الطياره ..كان هوه عدال الدريشه والكرسي اللي عداله فاضي وامه وخواته كانن في الكراسي اللي في النص بس كانوا في نفس السطر...ويلس عبدالله يتريا وبشوف في الركاب لين ما شاف اخر شي بطي اخو عنوده وعرفه لانه كان شايفنه قبل...وعقب اشوي كمن ريال واخر شي البنات ...شاف عنوده ..شافها كانت قبل اخر بنت...شافها وفز فواده..هيه ما كانت منتبهه له لانها تطالع تحت ...وخطفت عداله وماشافته..وتمت عينه معلقه عليها لين ما خطفت وساروا ويلسوا على كراسيهم...وكانت هيه عدال الدريشه بعد ووياها اختها
شويخ: عنوده والله شفتلج ريال تم يطالعج ..ما خوز عينه عنج..حشا...

عنوده وهي مستغربه: وين شفتيه ؟

شويخ: هنيه في الطياره راكب جدام...بس الصراحه غااااااوي بشكل...اووف هب حلاه عليه...بغيته يصد صوبي بس ما صد للاسف..

عنوده:ههههههههههه عنبوج يانتي ...حاسده الفقير موتة الجمعه...

شويخ: امحق...

عنوده: سكتي الطياره امتزرت ماشالله وايدين اللي بيسافرون عمرة الربيع...يا سلااام والله ربشه...ليتني خبرت حد من ربيعاتي انهن يسافرن ويانا..

شويخ: ويالله عيل ربيعاتج تحت شورج....

عنوده: لا ما قلت جيه بس انسوي شوية ترتوب وياهن...علشان نتلاقى والله حلو جيه..

بعد ما كملوا نص ساعه ...انطفت انوار الطياره والطيار يلس ايقول ارشادات السلامه ويقولهم انهم يربطون احزمة الامان...شوي الا وابتدت الطياره بالمشي على المدرج وابتدت تسرع لين ما ارتفعت وحلقت في الجو..
شويخ: يالله فديت دبي ما حلاها يا عرب

عنوده: محلاج ما غلاج ما اجملج يا داري...

شويخ: استغفر الله سايره اتعمرين حجيه ..استغفري ربج ..

عنوده: استغفر الله العظيم من كل ذنب عظيم..بس فديت داري يا ناس فديت عربي اللي خليتهم هني ...اااااااه
((هني عنوده يلست اتفكر بعبدالله ..اه يا ليتني اعرف رقمه جان طرشتله مسج من غير ما يعرف رقمي...))

وبعد اشوي اضيئت الانوار في الطياره ورمست المضيفه في الميكرفون انه بامكانهم يفتحون الاحزمه...وفي هاي اللحظه عبدالله فز من محله يبا يسير ايشوف عنوده بس متذرع انه بيسير الحمام...سار شوي شوي وهو يتهادى بمشيته في الممر بين الكراسي...وشاف عنوده وهيه ما كانت منبهه له من بعيد..وكانت في هاي اللحظه تفج نقابها ويالسهه تتحجب..واول ماشافها فز قلبه..تم واقف اشويه قبل يوصل عدال كرسيها..في هاييج اللحظه شويخ شافته..

شويخ: عنوده عنوده..شوفي هاذوه الريال اللي كان ايطالعج امساعه..شوفي اشقى مسنتر ايطالعج...

عنوده رفعت راسها وشهقت من الصدمه: تمت اتطالعه مب مصدقه في حلم والا علم..ابتسم الها هو ومشى بيكمل طريجه وهيه نزلت راسها ولما خطف عدالها ريله لا مست ايدها...وهو يمشي...شهقت بصوت خفيف من القشعريره اللي حستها من هاييج اللمسه...

شويخ: ما انتبهت: شواريج فيه والله حلو وغزال...

عنوده وويها محمر: الله يغربل عدوج سكتي يالفشله((سوت عمرها مضيجه))لا تطالعينه ولا ترمسين افرضي اخويه حميد ولا بطي شافنا والا كان هوه يعرف خواني..

شويخ ارتبكت وزاغت: ااااه ..والحزن..الله يغربل العاثر ...صدقج والله ..اخافهم يعرفون بعض..

لمت العنود السالفه..اما عبدالله عقب ما كمل طريجه ودش الحمام يلس ايفكر بالاحاسيس اللي حسهن من هاللمسه الغير مقصوده..حتى انه حس انه ويهه احمر من هالاحاسيس..ونزل ويهه في المغسله ورش ويهه بالماي علشان يهدي عواطفه...بعد شوي طلع وقال بسير ولا برد هنيه مره ثانيه....المهم انه خلاها اتعرف انه موجود هنيه على الطياره...سار ورد يلس على كرسيه وخبر اخته عذيجه انه عنوده ورى اذا تبا اتسير اتسلم عليها...بس كان يأشر الها علشان ما تفهم امه وخواته الباجيات..

شوي ونشت عذيجه وسارت اتدور عنوده.شوي الا عنوده عرفتها ونشت الها..سلمت عليها ويت عدالهن ويلسن ايسولف ..
عذيجه: الو السلام عليكم..

عبدالله : هلا وعليكم السلام ..خير شو فيج ؟؟حصلكم شي؟؟؟

عذيجه:لا الغالي بس بغيت اطلبك طلبه؟؟

عبدالله: وهاي الطلبه ما ترومين تتريين بها لين ما ارد البيت لازم تتصلين لي وانا عند ربعي...

عذيجه: عبدالله سمعني ولا تحشرني..اقولك انا ابا اسافر السعوديه ولازم تي تقنع امايه انسير السعوديه ولازم جريب على طيارة الخميس...فهمت

عبدالله: حووه حووه صبري عنبوه بالعه راديو انتي...وليش يعني لازم انسير السعوديه شو الامر الملح نازل عليج الوحي؟؟؟

عذيجه: اقولك لازم نسافر يعني لازم نسافر...تسمعني ويالله رد البيت الحين علشان نقنع امايه...

عبدالله : ليش عاد..امس رادين من استراليا ما واحالنا الا كمن شهر..

عذيجه: ياربي منك اقولك تعال انته...

عبدالله : اقولج ماشي سفره...ويالله سكري الحين بسير ايلس عند ربعي...

عذيجه: انزين عبيدان هب تيني بعدين وتقولي اتصلي لعنوده تراها بتسافر ...والحين يالله باي...

عبدالله رد عليها بسرعه: عذووج صبري لا تسكرين..قولي والله بتسافر ..وين بتسافر؟؟خبريني شو بلاها؟؟؟عسى ما فيها شي؟؟الله يغربل عدوج طاح قلبي..

عذيجه: عبدالله بلاك مخترش انته؟؟؟اقولك قوم عنوده بيسيرون العمره وانا بغيت اجمعكم رباعه...وجانك ما تبا برايك...

عبدالله: الحين ياي وبقنع العيوز...ترييني زين؟؟

عذيجه: زين بس انته افتح الموضوع بسياسه ويا العيوز اخافها اتقول لا...

عبدالله: ما بتقول دام السالفه فيها العمره هي بتسير بيت الله ..يعني ليش تعترض؟؟

عذيجه: انزين انزين انته لاتبطي...

نص ساعه الا وعبدالله داخل البيت...سار الصاله وسلم على امه ...وحبها على راسها...

عبدالله: سلامي عليج الغاليه...يا غناة عبادي والله..

ام عبدالله: وايه مرحبتين بالغالي ...وايه فديتك متى ييت ما شفت سيارتك جدام واقفه؟؟؟

عبدالله: لا سيده وديتها صوب الكراجات اللي ورى ..

ام عبدالله:فديتك والله علني ما اخلى من ريحتك...

عبدالله حضن امه وحط خشمه عند رقبتها..ويلس ايشمها ...:اااااااااه ياامايه محلاة ريحتج..

ام عبدالله: امر غناتي...بس لا تدلع...

عبدالله رد وحد راسه على ريولها: امايه ابا اسير وياج العمره فديتج ما تردين طلبيه..ابا اسير اعمر...

ام عبدالله وهي مستانسه: وايه فديتك وفديت ابو يابك..انا روحي بغيت اقولك انه في خاطريه اسير بيت الله...

عبدالله وهو فرحان: فديتج حبيبي...

وتدخل عليهم عذيجه : خير شو السالفه جنه عندكم اجتماع مغلق؟((طبعا مسويه عمرها بريئه وما تعرف السالفه))..

ام عبدالله: لا اجتماع مغلق ولا غيره...اخوج يبانا نسير العمره...شو رايج؟؟

عبدالله وهو يغمز لعذيجه: شو رايج؟؟؟

عذيجه مسويه عمرها اونها مندهشه وفرحانه: قولوا والله؟؟؟الله اكيد ابا اسير اليوم قبل باجر..تقولولي سفره واقولكم لا؟؟ معقوووله ..الا انا وحده بتلقوني مرتزه قبلكم في المطار..هههههههههههه

عبدالله: اهبي هبيتي ثرها تباها من الله السفره..انزين لا تخبرين خواتج لين ما احجز..انشالله باجر بطالع جان بنلقا حجز على طيارة الخميس..

ام عبدالله: وين تبا اصبر لين ما تخبر خالتك شيخه جان بتسير ويانا هيه وبناتها..

عبدالله هني ايعفس ويهه: لا اله الا الله انتي لازم كل مره تودينا ويا خالتي شيخه وبناتها؟؟؟

ام عبدالله: يا وليدي كل ما اطريلك خالتك شيخه تغديلي جيه..يا ولديه انا ابالك بنت خالتك منا وفينا ....

عبدالله: امايه فديت خشمج ما ابا حد من هلي موول ..وهالشي أأكدلج اياه ويوم بعرس روحي بختار البنت اللي اباها تكون شريكتي..

ام عبدالله وهيه متضيجه: اتهبي انته ما بتيمعلي غير هاللوث..البنات لحشام واللي من هلك ومنك فيك ما تباهن بتربع للمرغد..

عبدالله: امايه لا اله الا الله ...دخيل والديج لا تفتحين لي هالسالفه..نفسيتي تعبت..

ام عبدالله: شوف عبود جانك ما بتاخذ بنت خالتك مره ما برضى عليك..

عذيجه: امايه فديتج هدي اعصابج وبعدين هاي حياته وهو اللي بيعيش مع البنت..

عبدالله: اايه الحين لا تيبيلي هالطاري خلينا نسافر العمره وبعدين بيصير خير..

ام عبدالله: خلاص عيل ..


بالباجر سار عبدالله بيحجز بس في البدايه لقاه فوول وماشي مقاعد وقالوا له في طياره يوم الاثنين الياي..هو رفض وحاول وياهم علشان يطالعون له حجز على يوم الخميس...وبعدين عقب كمن ساعه يلسها عبدالله في مكتب السفريات وعقب محاب اخشوم لقالهم حجز يوم الخميس على نفس الطياره..وعلى طول سار واكد الحجز واتصل لامه وخواته علشان يتجهزون لانه باجر السفر بيكون...وسار هو يشتري له احرام وشوية اغراض...

الجزء السابع

وصلت الطياره مطار جده وبطي طلب من خواته انهن يترين شويه لين ما ينزلون الناس من الطياره ما يبا على اخواته وحرمته وامه ايزاحمون الناس...شوي وأشر بطي على سعيد وحميد اينشون علشان يسبقونهم وخلا ابوه يتجدمه ويود امه وسار وياها بينزلها وسارن البنات وهن يمشن عنوده كانت تتحسب انه قوم عذووج نزلوا بس ثرهم بعدهم لان عبدالله ما كان يبا اخواته يزاحمون الرياييل بعد والشي الثاني انه كان يبا يشوف عنوده...ولما خطفن اخوات عنوده قال عبدالله لامه وخواته انهن ينزلن وياهن وعنود كانت تمشي اخر وحده وعبدالله نش وراها لان خواته جدام ويا خوات عنوده...في ممر الطياره كان عبدالله ورى عنوده..وكان يمشي وهو قلبه ايدق بسرعه...كان ايشوف ايديها وهي تحطهن على كل كرسي لما تتجدم..وكان في صراع مع نفسه وهو بشوف ايديها البيض المحنايات..كان عبدالله وده ايحط ايده على ايديها ...بس ما قدر وفجأه حط ايده على ايدها..
عنوده في البدايه كانت ميته من المستحى والخوف وهي تدري انه عبدالله وراها وما يفصل بينهم شي في هالطياره...بس يوم حط ايده على ايدها ماتت من الخوف...تم قلبها يدق ابسرعه حتى تنفسها اختلف..وشلت ايدها تبا تستردها بس عبدالله كان يشد على ايدها..اخر شي فج ايدها ..وسارت بسرعه بتطلع من الطياره ونزلت على الدرج...واول ما نزلت كان الجو حلو مهب ومطر خفيف ..وقبضت نقابها عن يطير...ونزلت الدرج شوي شوي..كانت ما تحب تنزل من سلالم الطياره اييها خوف...بس عبدالله سبقها ...علشان يسير عند امه ويساعدها على نزول الدرج....في هاييج الساعه عنود حست باحاسيس غريبه..حست بالوحده وبالغيره من امه...بس الصراحه عجبها تصرفه حتى ولو انها حست بهالاحساس عرفت انه ريال فيه خير لاهله واللي فيه خير لهله شي اكيد انه بيكون فيه خير للناس...نزلوا وركبوا الباص علشان يسيرون صوب المطار ...وفي الباص الناس مزر الدنيا..ودورت عنوده عبدالله بس ما لقتلهم شوف...يمكن ركبوا الباص الثاني...ساربهم الباص لين المطار ودخلوا وحميد وسعيد عندهم الجوازات..وتكفلوا بكل شي وساروا على طول عقب ما خلصوا من التفتيش ياخذون شنطهم..

بو بطي: بناتي تعالن شوفن شنطكن وحطن عليهن لزقه...

فطيم: ابويه اسمها ستيكر مب لزقه...

بو بطي: ماعندي شكر ولا سكر..طالعي شنطتج وخلي خواتج يشوفن شنطهن وين يالله هبابنا نلحق ع الطياره ..

اسما: عنوده لقيتن شنطكن؟

عنوده وهي تلتفت وتدور عبدالله وهله: هي هي...

اسما: يالله عيل..

سعيد يا بيشل الشنطه عن عنوده بس عنوده ما عطته ويه ، تم ايطالعها وهو متكدر من نفسه...ما درى الا بحد يظربه ظربه على جتفه خلته يفز...

فطيم: ويا هالويه وين اللي بيراضيني...حتى شنطتي ما قلت لي بشلها والا تسأل اذا ابا مساعده...

ومثل ما يت فجأه سارت فجأه بلا أي كلام عقب الكلام اللي فرته..تم مستغرب منها...وعقب سار وتبعهم عقب ما شل حميد وياه باقي الشنط وحطوهن في الترولي... سعيد تم يفكر في العنود بس بعد تقتحم افكاره فطيم بتصرفاتها الطفوليه بس لا هو لازم ياخذ عنوده خلاص اول ما يرد من هاي السفره بيطلب من ابوه يخطب له العنود من عند عمه...

عبدالله كان يدور شنطة اخته نوره بس ما لقاها ...وبعدين ظهر انه ناس متلخبطين في الشنطه ما خذينها...وبعدين خذ شنطة اختها وشلوا شنطهم وحطوهن في التورلي وساروا صوب الباص علشان يركبون الطياره الداخليه اللي بتوديهم المدينه...

وصلوا الطياره وركبوا وهالمره كانت الطياره صغيره وكانت خاليه والناس اللي فيها شويه يعني يمكن عشرين واحد بس...سعيد من الضيج اللي فيي قلبه سار ويلس في كرسي بروحه...حميد ما نتبه لسعيد انه مضيج علشان جيه سار ويلس في حيالله كرسي وحط راسه وسدح الكرسي ورقد بسرعه...فطيم الوحيده كانت منتبهه لسعيد وتعرف معاناته لانها نفس معاناتها علشان جيه قررت انها تنسيه عنوده وتخليه ما يفكر غير فيها...نشت من عدال حرمة اخوها وسارت صوبه..

فطيم: ها سعودي ليش حظرتك سرت بعيد عنا والا مب عاجباتنك الكراسي اللي جدام..لا ما اظني جيه..اعتقد الناس اللي يالسين ع الكراسي مب عاجبينك....

سعيد وعلى ويهه ابتسامه: لا فطيم شو هالرمسه...بغيت ارقد و........و تعرفين قلت احسن اسير ورى علشان ارتاح في نومتي..

فطيم يلست عدال الكرسي اللي هوه يالس فيه: هيه ...........سوري ما دريت عيل اخافني غاثتنك....

سعيد: لا والله ما غثيتيني ...افا عليج يا بنت العم...

فطيم جربت راسها منه : اقول سعودي...

سعيد: امري((وهوه مستغرب من تصرفات فطيم اللي تحرجه))..

فطيم: وين رضوتي ؟؟؟؟والا تباني اطالب ابها العمر كله؟؟؟يالله الحين ما يخصني...

سعيد: شو تبين انتي؟؟؟؟ امري وادللي يا بنت العم...

فطيم: ابا ثلاثة اشياء...((ورسمت ابتسامه عريضه على ويهها))...

سعيد اول مره يموت من الضحك جيه: حشا مسوتلي اعلان سيجنل تو...انزين طلبي وكلي سمع وطاعه...

فطيم: اول طلب يا باشا.....اباك تشتريلي اسورة ذهب مني....

سعيد: من عيوني ...يالله طلبات الحريم معروفه الذهب على راس القايمه...انزين والطلب الثاني...

فطيم: لا اطمن الطلب الثاني سهل ..بغيتك تطلعلي بطاقه وتلفون....فديتك سعودي قول زين...

سعيد: حشا ريلج وانا ما ادري يا انسه فطيمات...

فطيم حست بشي من الاحراج بس ما بغت تبين له شي : والله ؟؟ عاد ما لقيت غيرك باخذك انا قلوا الرياييل ..انته ولد عمي واقرب لي من حميدوه وبطيوه...

سعيد: تم بس لازم تشاورين اخوانج اول اذا عادي بيخلونج تستخدمين الموبايل...

فطيم: لا اطمن موافقين بس هم قالوا لي يمعي من مصروفج واشتريلج وانا الصراحه ما اروم احرم عمري من الاكل....



سعيد يلس ايطالع جسم فطيم لاول مره: الله يعين اللي يقول عاد من متنج...شو تاكلين انتي بالله عليج غاديه يابسون...اكيد ديدان في بطنج ياكلن اكلج...

فطيم مسويه عمرها اونها بتصيح بس بدلع : سعوووووووووود...والله ما كلمك حرام عليك زدت كيلو من ايام وانا في سبيل الحصول على كيلو ثاني...

سعيد نقع من الضحك: تدرين فطيم ان روحج حلوه....خفيفة دم...يا حظه اللي بياخذج...

فطيم: وايه مالت على ذاك الطاري....لا تيب لي طاري العرس...العرس ويع راس وحشره وأي ريال في الدنيا بيكون متطلب ويبا عيال..

سعيد: يالله فديت العيال اصلا اموت عليهم انااا ولو امهم حشره بعض الاحيان بس ما نقدر ما نحبهم...

فطيم: هيه والله حتى انا اموت فيهم ولو اني بعض الاحيان اضرب علوه ولد بطيوه اخويه....هههههههههههه

سعيد: انزين فطيمات خانم الطلب الثالث؟؟؟؟يالله بسرعه صدق انج لغب...

فطيم: ما ابا خلاص بسير عنك انا...(( وسوت عمرها بتنش بس سعيد قبضها من ايدها علشان تيلس))..خلني بسير ما احبك انا سعيدان واحد...

سعيد: هههههههههههه يلسي اقولج والله بلبيلج كل طلباتج........اسميج كم اسم زقرتيني لين الحين...

فطيم مسويه عمرها زعلانه: كيفي يالشيبه اقول اللي اقوله ...

سعيد: خلاص فطيم قولي الطلب الثالث...

فطيم: الصراحه اباك تعلمني السواقه.....

سعيد بطل عيونه وحلجه وارتبك: اعلمج....شو؟

فطيم تبربش بعيونها: تعلمني السواقه...شو فيها...

سعيد: لا اسف هالشي ما اقدر له...وما عندي استعداد له...

فطيم: والله لتعلمني ما يخصني انا من الزم على شي لازم يتنفذ...يالله الشيبه حرام عليك...

سعيد: تعالي هني بعدين شو الشيبه والله ان عدتيها مره ثانيه بجلج وزوالج.....

فطيم: كيــــــــــــــــــــــــفي ما تروم تمنعني...

سعيد: يالله منج يالعنيده.....المهم سالفة السواقه شليها من بالج ما ابغي اي رمسة بهالخصوص...

فطيم باصرار عنيد: مستحيــــــــــــــــل..اذا ما بتعلمني انته روحي بشل السياره وبدعم ابها خلق الله.....والله اسويها وقول بعدين فطيم بنت محمد هب قد كلمتها........

سعيد: دخيلج هب تغدين مينونه...

فطيم: اذا ما بتعلمني بسوي اللي قلتلك عليه...
سعيد: خلاص امري لله بعلمج بس بعدين بنرتب وقت يوم بنرد البلاد زين؟؟؟

فطيم: ياااااااااااااي انزين شيبتي.........

سعيد:ايه الحماره شو قلنا.......

فطيم بابتسامه: والله انك شيخي يا ولد عمي...الحين بسير عنك ...

سعيد: وين تبين يلسي؟؟؟

فطيم: وين تبا انته عيبتك السالفه جنها....جان تباني ايلس عطني فلوس((وجدمت ايدها علشان يعطيها فلوس))

سعيد: تبين فلوس؟؟؟ من عيوني ما طالبتي وجدم ايده وظربها ظربه على كفها...

فطيم: والخيبه خيبتك لله...اهب اهب عنبوه ايدك طن حديد...

سعيد: اذكري ربج فطيمات....والله ما حد بياكلني غيرج في هالرحله....

فطيم: حرااااااااااااام عليك انا باكلك؟؟؟انزين انا الصراحه صدق اكل...

سعيد مبطل عيونه :صدق والله انتي تاكلين؟؟؟اهبي هبيتي...

فطيم تأكدله: والله العظيم اني اكل.....................اكل ثلاث وجبا ت يوميا .........هههههههه عيل كيف تباني اعيش يالخديه اذا ما كلت وتغذيت...

سعيد: والله انه عليج علووم

*·~-.¸¸,.-~*

الجزء الثامن
*·~-.¸¸,.-~*


في تمام الساعه التاسعه وخمس واربعين دقيقه وصلوا المدينه المنوره والجو كان رهيب والحمدالله الدنيا ممطوره والبروق والرعود تهز الدنيا...صراحه كان منظر ولا اروع مع انهم ركبوا طيارتين بس وصلوا المدينه وهم بعدهم يحسون بنشاط وحيويه ومع هذا المنظر اللي يشرح النفس...في تصوركم كيف بتكون نفسيتهم؟؟؟

وصلوا فندقهم اللي متعودين كل ما يسيرون يحجزون فيه وهو فندق الاندلس بس لقوا شقتين فاضيات ...والشقه فيها غرفتين وصاله صغيره ومطبخ داخلي..يعني تمشكلوا هنيه ما عرفوا كيف بيحلون الوضع لانهم يبون على الاقل شقه لبو بطي وحرمته وبناته الثلاث وشقه لبطي وحرمته وعياله وعلى الاقل ولو غرفه لحميد وسعيد...فهم الحين ما يعرفون شو يسون وبما ان الفندق ماشالله مافيه ولا شقق فاضيه يعني ماشالله هالموسم الفندق مزدحم...

سعيد: عمي فديت خشمك انته وبطي سكنوا في هالفندق...اما انا وحميد بنسكن في الفندق المجابل...

بو بطي: افا يا ولدي شو هالرمسه ...غناتي ما اباك ترمس بهالرمسه موليه...اول شي احنا يايين رباعه وبنسكن رباعه...عيب علينا نفترق الحين..لا برايه هالفندق بنسكن في غيره بندور فندق ثاني ...

سعيد: يالله يا عمي وجان ما لقينا؟؟

بطي: سعيد شو هالرمسه؟؟ انشالله بنلقا..

سعيد: غناتي والله ما ابا لعمتي وخواتي يتلتهن واحنا ندور النا غرف فاضيه...ما ابا اتعبكم وبعدين انا وحميد ما علينا شر..

بو بطي: لا والله ما يصير ...بنتم رباعه...

فطيم قامت تبا ترز ويهها: هيه ولد العم مالك مفر ...ويالله عن هالرمسه اللي مالها طعم...جدامي اشوف..

حميد: وانتي دومج رزه؟؟؟

فطيم: كيفي يحق لي ...

سعيد وبو بطي وبطي والجميع يضحكون على سوالف فطيم...

المهم ساروا الجميع لفندق درة الاندلس..وهو بعد فندق حلو ونظيف وفخم...والحمدالله لقوا الهم شقق كلهم في نفس الطابق...طبعا بو بطي وحرمته وبناته في قه وبطي وحرمته وعياله في شقه وسعيد وحميد في غرفه رواحهم...

اما عبدالله وعايلته فطبعا ساروا في فندق الاندلس وحجزوا هناك...وطبعا عذيجه وعبدالله على بالهم انه العنود وهلها في هالفندق...ما يدرون انهم غيروا خططهم لا اراديا... وفي الغرفه..:

عبدالله: اقول انا وامايه ترانا في حجره وحده وانتن الثلاث في حجره روحكن مفهوم؟؟

عذيجه وخواتها : يالله يالمحبه انته بتاخذ الحنـــــــــــــــــان عنا...

نوره: لا ما يخصني انا ما اصبر عن امايه ...

عبدالله: عيل وين تبني انشالله ارقد؟ على الارض؟ ولا على روسكن...(( عبدالله قبض اخته نواري اصغر العنقود من البنات وعمرها 13 سنه ولوى عليها وعضها على ايدها ...يبا يمازحها...وهي تبا تشرد عنه بس هوه ما خلاها))

ام عبدالله: عبود فج نواري هب تيلسلها جيه...هاي ضعيفه ما تقهر...

عبدالله صد على نواري ايشوف ويهها: انتي ما تقهرين؟؟؟ يا ويلي عليج ..اشوف هاتي ايدج...

نواري وهي تبتعد عنه وتضحك : لا ادريبك تبا تيود ايدي ...ادريبك بتكسر لي صبوعي...

سلامه: اخبركم عن هالحشره انا ابا اكل ميته يوع..عبدالله فديتك سير ييبلنا عشا...هاتلنا عشا محترم هب شي مب حلو..والله اكل الطياره ما عيبني...

عذيجه: عيل شفتج عبرتيها صينيتهم...شهالخريط اليديد اللي اسمعه...
سلامه: اوهو...والله اولا عشاهم هب من كثره ..حتى الفقير ما يكل جيه... عفاني الله بخلا...

عبدالله: اقول سلوم شو غناتي تبينهم ايبولج على طياره ممزوره ناس ...قوزي؟؟؟؟؟ والله انج ما تحمدين ربج...

سلامه: انزين الحين شو قلت ؟؟ انا ابا اكل عشا..يوعاااااااااااااااااااانه...

عبدالله: رقدي بيوعج...ماشي عشا..

ام عبدالله: وابويه عليك عبوود...سير فديت خشمك هاتلنا عشا...انا ابالي روبه وخبز...

عبدالله نش وسار صوب امه وير البرقع عن خشمها وحبها على خشمها :فديت هالخشم من عيوني.. ..انتي بس تامرين امر الغاليه...

ام عبدالله وبناتها: يسلمن عيونك..

عبدالله:ههههههههههه ها كله عشان اني بييبلكن عشا؟؟؟ اولا انا ما بييب الا حق امايه عشا وبس...ههههه

نوره: امايه شوفي ولدج...

ام عبدالله: بييبلكن فكني من حشرتكن... الا يسولف وياكن هو...

طلع عبدالله اييبلهن عشا من المطعم...

في الجانب الثاني بو بطي وعايلته كلهم مجتمعين في شقة بو بطي..يالسين يتعشون..طبعا الرياييل في غرفة بوبطي.. والحريم في غرفة البنات لانه ماشي صاله الا ممر بين الغرف في هالشقه...يختلف وايد عن الفندق اللي متعودين كل سنه يسكنون فيه بس شو يسوون ...

سعيد وبطي كانوا شاريين عشا محترم من المطعم وكلهم ميتمعين طبعا عقب ماصلوا العشا وتعشوا رباعه...عقب العشا بطي استأذن من ابوه وخوه وولد عمه انه بيسير يرقد لانه يبا ينش حق صلاة الفير...سار بطي صوب حجرة اخواته...

بطي: ماشالله على حسوسكن...فطيم انتي الصراحه حسج مرعب ...ما ادري منين يايبه هالحس المزعج...

ام بطي: غناتي بطيوه تعال ايلس عدالي فديت خشمك...

بطي يلس عدال امه ولوى على امه وهو يطالع اسما: هاه امايه...فديت عمرج اصلا انا ما اصبر عنج...بس بعض الناس ميتين غصه الحين...

اسما: منو قصدك يا استاذ؟؟؟ تقصدني انا اكيد...

بطي وامه وخواته يضحكون: انا ما رمست روحج تعرفين عمرج انج تغارين...واعترفتي وخبرتي عن عمرج...

ام بطي تلوي على وليدها.. يت بنت بطي هند تربع : يدوه قومي عن باباتي...قوي هاذا مالي انا...اقولج قومي...

هند اتير ايد يدتها وكلهم يتضاحكون....شل بطي بنته حبيبته وحطها على راسه : حبيبي ام علوه قومي يالله...

اسما مسويه عمرها زعلانه: وين تبا؟؟ ايلس تو الناس...

بطي: قومي غلايه...فديت هالخشم....

فطيم والعنود: يا عيني ع هالدلع.......

فطيم: يا حظج يا اسموه بخويه....

العنود: والله حظ اخويه باسموه ..فديتها والله اسما...

بطي: اتشاهدن على ويوهكن والله ما حد بياكلنا غيركن....انتن سحر...

ام بطي تضحك: اشهد ان لا اله الا الله..واشهد ان محمدا رسول الله....ربي يحفظكم من كل عين وكل شر...

اسما نشت بتسير ويا ريلها شقتهم...

شويخ: وين تبين ؟؟؟ توج تقولين لريلج ييلس

اسما: بسير غناتي...تعبانه بحط راسي وبرقد عيالي رقدوا شو بيشلهم هاذيلا...(( ويلست توعي علي وخوانه))
يالله علاوي..يالله قوموا فديتكم بنسير شقتنا ...

بطي: خليني انا بشل حمد عنج اسما..

اسما: انته وين تروم تراك شال هنوده...لا برايه انا بشله والا علاوي واخوه يرومون يمشون...

بطي: لا والله هاتي حمد...ما يضرني لو شليت اثنينه...

ساروا شقتهم...

العنود: فديت اخويه وحرمته يا ربي...

ام بطي: فديتهم يا ربي ...علني اشوف حميد بعد معرس وحرمته ويانا شرات اسما...

فطيم: يا ويلي عليج يالعيوز ما قالت علني اشوف بناتي عرايس...تبا الا حرمة ولد...

ام بطي: والله انتن لو بتعرسن ما بتمن لي ...بتسيرن ويا ريا ييلكن...

شوويخ: اخبركن انا ابا ارقد ...فطيم فديتج قصري ع الموجه والا سيري الغرفه الثانيه...

فطيم شلت عمرها وسارت عند ابوها: ابويه غناتي ...بناتك يروغني...((سوت عمرها تصيح))

حميد: يالله لازم بيروغنج...مب حس عليج يا ختيه...

بو بطي: هههههههههه...غناتي فطامي الصراحه حسج عالي قصري عليه فديتج...احنا الا عدالج...

سعيد وهو يضحك: لا حوووووووووول...كلكم حاطين على فطيم...

حميد: هاه المحامي...اتدافع عنها اشوف...قول والله انه حسها مب ازعاج...

سعيد: الصراحه حسها عالي شويه...هه شويه...

فطيم وهيه مسويه عمرها مبرطمه: حرام عليكم...وبعدين حميدوه انته اللي حسك حشره...برايكم ما احبكم انا...

نشت فطيم بتسير ترقد...

بو بطي: بنتي تعالي فديتج ...

فطيم: امر الغالي..عيوني لو تبا..

بوبطي: غناتي لا تزعلين تراها الا سوالف...

فطيم وهي مستغربه: بويه الغالي ومتى تحيدني انا ازعل....والله ما احط في خاطريه...انا قلبي فرفوشي ولا اخلي فيه مكان للزعل...

سعيد وهو يطالع فطيم مستغرب من روحها: ماشالله عليج يا بنت عمي...روحج رياضيه...

فطيم: رياضيه ومسويه عضلات بعد..ههههههههههه...

حميد:هههههههههه الله يعين ريلج اللي بياخذج...اسميه بيتوهق بج....

فطيم وهيه تهمز جتوف ابوها من ورى: فديتني انا والله ...الابيموت دوني ... وين تبا انته...اصلا حظه العود يوم بياخذني..صح سعيد؟؟؟

سعيد : هيه والله حظه العود يوم بياخذج ولد الحلال اللي الله كاتبنه من نصيبج...

حميد: ايه انته...شو بلاك كله ادافع عنها...ولا وبعد يوافقها في كل شي...

فطيم: وانته شو يخصك يالرزه..ولد عمي وما اهون عليه...على فكره ما خبرتك حميد؟؟؟

حميد: شوه؟

فطيم وهي راسمه ابتسامه تعرض صف ضروسها: وكلت سعيد محامي عني........ههههههههه

حميد وهو يطالعها من طرف عينه وفيه ضحكه: فقدتج عاد ...انتي وسعيد تتياوزون...

سعيد:ههههههههههه ...

بو بطي: ههههههههه غربالله عدوج انتي يا فطامي...((وحط ايده على ايده)) كله ولا عصفورتي...

حميد: أي عصفوره الله يهديك..قول دينصوره...

سعيد نقع من الضحك...وفطيم لوت على ظهر ابوها: ابويه شوف هالزطي.. والله برايكم حد ييلس وياكم...يالله تصبحون على خير...

سعيد وبوبطي: وانتي من هل الخير...

حميد: اقول فطيم..احلام تعيسه...ههههههه....يالله سعيد قوم احنا بنرقد بعد...

سعيد: يالله عيل هبابنا انش حق صلاة الفير...

بو بطي: حافظنكم الرب...تصبحون على خير...

سعيد وحميد : وانته من هله ..




دخلت فطيم بترقد ويا العنود ...

العنود: يالله محلاة المدينه يا فطيم...احس يوم اييها برهبه...

فطيم: هي والله نفس احساسي يا عنوده...بس اعتقد انا هالسنه اول مره باخذ من زيارتي للسعوديه ذكريات غيرعن كل سنه...

العنود غيرت وضعيتها على السرير وجابلت اخنها: فطيم؟؟ شو السالفه؟؟

فطيم: شو بعد السالفه ...ماشي يالله ارقدي...ما بروم انش الفير...فديتج خليني ارقد...

العنود: كيفج والله .....

ردت العنود وعدلت وضعيتها عشان ترقد...بس هيهات عنوده ترقد وهي تفكر بعبدالله..تفكر باحداث هاليوم كامل...عبدالله اللي ولا في يوم نسته...رفعت ايديها فوق ودعت ربها(( ياالله يا ربي دامني في ارضك الطاهره ..فديتك يا ربي تجمعني بالغالي وتكتبلي وياه نصيب..)) رقدت العنود عقب طول تفكير وما وعت الا على صوت امها اتدق الباب عليهن حق صلاة الفير...

ام بطي: بناتي قومن يالله نشن وتوضن ...

عنوده نشت ابسرعه امافطيم فطبعا رقادها ثجيل...

ام بطي: فطيم ؟؟ قومي بنتي ...قومي يارج الله تراج بتاخرينا ..نشي يالله...

فطيم: زييييييين...

نشت فطيم عقب مصارع ويا الرقاد...توضوا كلهم وتلبسوا ونزلوا بيسيرون الحرم...ساروا وصلوا الفير وقروا قران وردوا الفندق...وعنوده تلتفت اتدور عبدالله وعايلته...وينهم؟؟

بو بطي: بناتي اتزهبن الساعه 8 بنسير انسلم على قبر النبي صلى الله عليه سلم...ما ابا ولا تاخير...تسمعين فطيم؟

فطيم: زين زين الغالي...

فطيم اول ما وصلو الفندق سيده سارت الحجره وحطت راسها ورقدت...بدون أي تاخير..

المهم اول يوم طاف في زيارة قبر الرسول والروضه المطهرة..وعقب ما خلصوا رد بو بطي وحرمته والشباب الفندق...اما اسما والبنات وعيال اسما سارن يتسوقن...سارن اول مكان مركز طيبه....خذن شوية سامان....وطبعا اكسسوارات وهالشغلات.. العنود كانت شاله بنت اخوها هنوده...وفجأه شافت من بعيد عبدالله ويا امه وخواته...

الجزء التاسع

في مركز طيبه عبدالله ما انتبه الي ان عنوده موجوده في هالمكان الا يوم يت بنفسها اتسلم على عذيجه وطبعا وياها خواتها وحرمة اخواها... وعبدالله طبعا من شافهن سار بعيد عنهن حتى انهن ياخذن راحتهن...

عنوده: السلام عليكم..

عذيجه وامها وخواتها: مرحبا الساع...

عذيجه عرفت امها وخواتها على العنود وهلها ويلسوا ايسولفون...

العنود: عذيجه غناتي اسمحيلي والله ما خبرتنج انه استوى شوية تغييرات غير مقصوده..

عذيجه: خير غناتي ...

العنود: تدرين عسب الفندق اللي خبرتج بنسكن فيه..

عذيجه: هيه صح تعالي ما شفناكم وينكم؟

اسما: سلمج الله الغاليه مالقينا حجز واحنا مشالله وايدين...علشان جيه اضطرينا نغير واذا بتزورينا ترانا في فندق درة الاندلس...

عذيجه: من عيونا والله...

ام عبدالله: لا ما يصير انتو قبل قربوا عندنا....تعالوا بتتغدون ويانا...

العتود: خالتي مشكوره فديتج بس....

عذيجه قاطعتها: لا بس ولا شي الا حالفين ...والله تون وتتغددون عندنا...

ام عبدالله: هيه نعم قربن بناتي...الحمدالله يوم لقينالنا حد من هلنا وعربانا...

العنود: فديتكم والله انشالله مره ثانيه بس اليوم اسمحولنا ما نقدر...

عذيجه: يالله يا عنوده شو هالرمسه؟؟...تعالوا عاد

العنود: مره ثانيه انشالله والله احيد امايه اتسوي الغدى وفضحه علينا نخليها بروحها ...بنسير نساعدها ...

ام عبدالله: يارج الله يا بنتي...صدقج بس رفجه عليكن تنا ترانا هنيه ساكنين...

اسما: من عيونا خالتي انشالله بنيكن باجر والا أي يوم وبعد بنيب غدانا ويانا نذوقكن رمنا...

ام عبدالله: تسلم عيونكن ومرحبابكن الساع...وردن السلام على هلكن...

العنود: يوصل انشالله...يالله نستأذن احنا بنروح...

ام عبدالله وبناتها: موافجات خير...

ردن الفندق وسارن ايساعدن امهن في الغدا...وعقب ساروا ايصلون صلاة الظهر في الحرم...وعقب ردوا الفندق...

على الغدا طبعا الرياييل في حجره والحريم في حجرة ...

اسما: عمتيه لقينا عرب يسلمون عليج...

ام بطي استغربت: واخيبتيه من هم هاييلا العرب...

فطيم: يالله يا امايه عرب حيين الفال وعازمينج على غدى ولا اروع..

ام بطي اطالع بناتها: منو هالعرب اللي عازميني على غدا؟

العنود: هاي ربيعتي عذيجه من بوظبي وامها وخواتها...

ام بطي: والنعم والله بهل بوظبي...زين وين عرفتيها...

العنود وهيه ويهها متغير بس ماحد لاحظ: والله في المطار امبوني ايفتنها وعقب في رمضان ليقتها في السوق وتعارفنا عدل...بس والله يا امايه انهم حشام وذربين المعاني...

ام بطي: زين عيل...متى عزمنكن على الغدى؟

اسما: والله هن بغنا اليوم بس احنا تعذرنا الهن وعزمنا باجر والا أي يوم انشوفه...

ام بطي: زين عيل بعد احنا بنسوي غدى منيه وهبات ريح..ونباكن تسولنا دلة قهوه ريحتها تظرب في الراس...

اسما: من عيوني عموتي...

العنود: ما يهمج امايه انتي بس امري ...

ام بطي: زين والله يوم لقينالنا عرب نتونس ابهم...

خلصوا غدى كلهم وتيمعوا في حجرة وحده وتموا سوالف لين الساعه3 وعقب ساروا الشواب يرقدون وبطي وحرمته ساروا شقتهم...وما تم غير حميد وسعيد والبنات في الغرفه وطبعا العنود بطبعها ما تحب تاخذ وتعطي ويا ولد عمها...وسعيد على العك دوم منجذب الها وهم يالسين عيونه على العنود...ايرمسها وهي اترد بلا نفس...وفطيم من الصوب الثاني احس بالحزن بس ما تبين كله تتظاهر بالفرفشه والسوالف وماحد يدري شو اللي في خاطرها...هيه صح اتعار من اهتمام ولد عمها بختها ...ودوم اتفكر ليش...؟؟؟ ليش هو يهتم في العنود وفيها هيه ما يهتم...اذا كان في الجمال فمشالله الله عليهن كلهن يتوازن في الجمال...طبيعي وحلو...هل هو عشان العنود ما تعطي سعيد سالفه علشان جيه متعلقبها؟؟؟...يمكن ليش لا...فطيم كانت ساكته وتفكر وهي منزله راسها وما تدري انه سعيد كان ايشوفها ويزقرها لانها سارح في افكارها الحزينه....وسعيد من الصوب الثاني اول مره في حياته من عرف فطيم يشوفها متباعده وساكته وهيه اللي متعوده ما تخليه في حااله...شو فيها...


سعيد: فطيم؟؟.......فطيــــــــــــــــــــــــم؟؟....فطا مي...

حميد: حوووووووووووه فطومه...

انتبهت افطيم عليهم اخر شي...وكانت نظراتها هايمه حتى انها حست بالخجل...

فطيم حاولت اترد لطبيعتها الفرفوشيه: نعم يا اخ حميدو؟؟؟؟ شو تبا بلاك حشره....وانته يالشيبه شو مستوي...حشرتنوني قطعتوا عليه حبل افكاري...اسميكم ما تهنون على الواحد...

سعيد: شوياج بنت عمي...عنبوه من متى نزقرج...

فطيم: هاه شوه يايبلي معرس؟؟؟؟؟؟

شويخ والعنود:هههههههههههههههه

العنود: اهبي عنبوه لهالدرجه مستلغثه ع العرس؟؟؟

حميد: يالله يعينك ياللي بتبتلي في اختيه فطيم...

فطيم: ويعينه ليش.....شوه بتيوزه غوريلا؟؟.........شوفوني محلاتني كل الحلا والزين متيمع فيه..العيون مثل عين الوضيحي والا الخشم كالسيف منسل والا الحواجب قوس الهلال وكل الزين ربي ما بخلبه عليه...شي تبون ازيد...؟؟(( طالعت اخووها وعايبت عليه بلسانها)) حره موت في غيضك يالاسود...
حميد: انا اسود؟؟؟ تعالي بنتحاد بالبياض...بنشوف منو ابيض..

سعيد: ولد العم لا تفشل عمرك....تعرف انك مول ماتي عدالها شي....


سعيد اول مره ينتبه لفطيم عدل...الصراحه هيه حلوه وايد ...حتى سوالفها تعيبه...بس ليش باحساس غريب يوم يشوف العنود...بس بعد يفكر بفطيم...وهو الصراحه مستحيل ان الواحد ما يفكر فيها من سوالفها اللي ما تنمل...

فطيم: انزين انزين اقول الشيبه اباك تنفذ لي الاشياء اللي طلبتهن منك في الطياره....؟؟؟؟(( وغمزة له علشان يفهم))...تحيد اظني؟؟؟

شويخ: شو السالفه؟؟؟؟ابا اعرف السالفه خبروني....

فطيم: ليش رازه الفيس انتي بعد...

حميد: يالله منج انتي اكيد بتفقرين الريال....

سعيد: برايها بنت عمي واللي تباه انفذه الها....فطيم اتزهبي عقب الصلاة زين...؟؟

حميد: وين تبا بها..

العنود: قالتلكم سالفه خاصه....ليش ما تفهمون...

سعيد وهو يطالع العنود: والله كلكم اذا بتون مرحبا بكم...بتين العنود ويانا انتي وشويخ؟؟؟

العنود: لا مشكور سعيد...مقرره اسير ويا العنود شويه بناخذ كم غرض....

سعيد: على راحتج...وانتي شويخ؟؟

شزيخ: زين ما اقول لا..

حميد: جني انا اخر واحد؟؟؟؟؟؟؟هاه سعيد ؟؟؟بس والله ماسرت يوم الا ما تخبرتني اول الناس...

سعيد: وفرت...ارتاح محلك...امبوني ما ابا ربعتك يسدن بنات عمي...

حميد: مشكور بو عسكور...قوم يالله خلنا بنسير نتوضأ...االعنود وعي امايه وابويه حق الصلاه...

العنود: انشالله...

سار سعيد وحميد والعنود وعت ابوها وامها حق الصلاه وتوضوا ونزلوا بيسيرون الحرم...وبعدين كلن سار يقضي اشغاله...سعيد وفطيم وشويخ ساروا يتسوقون...واسما وبطي وعيالهم ساروا بعد رواحهم...والعنود استاذنت من ابوها وامها بتسير اتسلم على عذيجه بما انهم وصلوا عدال الفندق اللي تسكنه عذيجه...وهي داشه الفندق....كانوا شلة شباب عند الريسبشن فما عرفت شو تسوي...سارت وقفت عند المصاعد...وكانت متردده تضغط المصعد اييها ولا تتريا لين ايسيرون الشباب؟؟؟ شوي الا والمصعد ينفتح ويظر في ويهها عبدالله ...بس ما شافها لانه كان يتعصم في المصعد وهي شافتها من المنظره اللي في المصعد...شوي وظهر عبدالله...وشافها...تم واقف محله...يبا يسير ولا يروم....

العنود خلني بتخبره في اي طابق ساكنين واي غرفه...

العنود: السلام عليكم...

عبدالله ما صدق ان العنود ترمسه: وعليكم السلام...

العنود وهيه ميته من المستحى: خ...خويه بغيت....بغيت عذيجه...في أي طابق هيه؟؟؟

عبدالله بفرحه: تعالي بوصلج...

العنود: وهيه مستحيه....لا لا ما عليه انته قولي في أي طابق واي غرفه وانا روحي بسير الهم..

عبدالله: تعالي بوديج ...

ركب المصعد وكانت هيه متردده وصعدت وهيه مستحيه...طول الوقت كانت ميته من المستحى وماا تروم اتشل عينها عن ارض المصعد...شويه وفتح المصعد...

عبدالله: وصلنا...تعالي...

العنود كانت مستغربه برود اعصاب عبدالله....بس هو الصراحه كان يغلي من الداخل ويسوي عمره عادي علشان ما تاخذ العنود قكره غلط عنه...مثلا انه شاب متهور او طايش...

وصلها لين باب الغرفه ودق الباب...فتحت له نوره الباب....

نوره: عبودي توك ساير شو بلاك رديت؟؟؟ نسيت شي...؟؟؟

عبدالله: قولي لعذيجه ان ربيعتها هنيه يايه بتسلم عليها...

فجأة انتبهت نوره للعنود....وسارت تزقر عذيجه...عبدالله فج الباب...وصد على العنود..: اتفضلي دشي مرحبا بج...
يت عذيجه وهي لابسه شيله بيضاء...ومن شافت العنود: وايه مرحبتين كبار والله....
العنود سلمت على عذيجه: هلا والله عذيجه...
سار عبدالله ...وزقرت عذيجه اخوها: عبدالله غناتي فديتك عقب ما تخطف على الصراف اباك اتخطف على المحل اللي سرناله مساعه ...هب تنسا اللي وصيتك عليه...

عبدالله : خلاص ما يهمج...

عذيجه: مرحبا والله بالعنود...روحج ييتي؟؟؟

العنود عقب ما فجت نقابها: هيه والله عقب الصلاه شويه تحوطنا هني عند المحلات وين يبيعون السياييد...وقلت لابويه انج ساكنه هني في هالفندق وقالي برايج...واخواتي سارن ويا ولد عمي ...وحرمة اخوي واخوي ساروا رباعه...

عذيجه: مرحبتين الساع والله الحمدالله يوم شرفتينا...

ام عبدالله ظهرت من حجرتها: وايه مرحبتين الساع....((وسلمت على العنود)) مرحبتين غناتي...

عذيجه: امايه هاي العنود...تحيدينها...

ام عبدالله: بلاني ما عرفها عرفتها من حسها...شحالج غناتي؟؟

العنود: بخير فديت روحج...شحالج خالتي..عساج بخير...

ام عبدالله: بخير بنيتي...شحال هلج وخواتج؟؟ وينهن...

عذيجه: امايه خواتها سارن يتسوقن ويا هلهن وهيه وصلها بوها وامها وساروا...

ام عبدالله: يالله بالستر جيه ما قربوا عندنا...

العنود: فديتج بيشترون سامان تعرفين انتي ماشي وقت...انشالله باجر الظهر بني عندكم....

ام عبدالله: مرحبتين والله...((وقاطعها صوت التلفون مسوين بناتها من الامارات...ونشت ترمسهم))

عذيجه: شحالج غناتي ...ماشالله عليج غزال...صدقهم بعض الناس....يوم تخبلوا...

العنود وهي منحرجه: بس عاد عذيجه....والله ويهي احمر...

عذيجه:ههههههههه فديت اللي تحمر اويوهم

سولفوا لين مايا وقت صلاة المغرب رد عبدالله قبل صلاة المغرب شاري سامان...وهم كانوا نازلين بيسيرون صوب الحرم قبل لا يأذن بشوي...

عبدالله تلاقا ويا امه وخواته والعنود عند باب الشقه: السلام عليكم...((وعلى طول سار وحب امه على راسها)) امايه تريوني تحت لا تسيرون...

ام عبدالله : من عيوني الغالي...

عبدالله: تسلم عيونج...نواري يودي هالاكياس ...حطيهن في حجرتكن...

دش عبدالله يتمسح وغير كندورته.....وطلع بسرعه بيلحق على هله بيسير يصلي اوياهم...بس هو الصراحه كان فرحان انه العنود بعدها لين الحين عندهم...معناتها انها بتسير اوياهم تصلي وبترد وياهم...

نزل عبدالله واول ما فتح المصعد شاف امه وكانت عينه تفتر يدور العنود...وبعدين شافها ويا عذيجه يالسات على صوب...وهن اول ماشافنه نشن...ساروا كلهم رباعه...طبعا العنود وعذيجه اخر شي...وعقب افترق عنهن عبدالله على انه يلاقيهن عقب ما يخلصن عند محل الذهب...وصلوا المغرب وخلصوا ...وظهروا وساروا عند محل الذهب ولقوا عبدالله...والعنود استاذنت من عذيجه علشان بترد فندقهم...بتسير عند هلها...

عذيجه: تعالي عندنا...

العنود:لا فديتج اخاف اميه تستهم عليه...

ام عبدالله: عبدالله سير ويا اختك وصلوا العنود...

العنود: لا لا مافي داعي...والله الفندق جريب..هن الا خطوتين...

عبدالله: لا والله ما يصير..الا بنوصلج...

عذيجه: هيه صدق...


الجزء العاشر


عبدالله وعذيجه ساروا يوصلون العنود فندقها واول ما وصلوا...

العنود: قربوا عندنا ...

عبدالله: طال عمرج مشكوره...مره ثانيه انشالله..

عذيجه: هيه صدق مره ثانيه ولا تنسين نترياكم باجر ع الغدى...

العنود: انشالله...بخبرهم...عيل موافجين خير...

عبدالله وعذيجه : في امان الله...

دشت العنود وسارت صوب شقتهم ...ولقت ان هلها بعدهم ما وصلوا...ردت ونزلت تحت بتشوف اذا المفتاح في الرسبشن...بس لقت انهم ما حطوا المفتاح في الرسبشن ... يا ربي الحين شوا يبون يشلون المفتاح وياهم...فجأه اتذكرت انها نست شنطتها في شقة هل عذيجه...يا ربي شو اسوي الحين....برايها الشنطه ما بييبها باجر ترانا بنسير صوبهم...يالفشله ..فيها مفتاح شنطة ثيابي...ياهاي اسلاط...لا هلي موجودين ولا شنطتي عندي...سارت فوق قالت بطالع بطي واسما جانهم موجودين...دقت ولا لقت جواب...شو هالحوسه اليوم...تمت واقفه جدام الباب..وهي خايفه لا يظهر لها حد من هالشباب الطايشين...فجأة سمعت صوت المصعد...وتمت خايفه...شوي الا وشافت عبدالله يمشي جدامها عقب الخوف اللي ياها حست بالراحه...كان يايب شنطتها...اما عبدالله يوم شافها انصدم انه لقاها برع الشقه غريبه شو اللي مخلنها واقفه برع؟؟؟؟؟ الف سؤال وسؤال يدور في راسه...سار يمشي صوبها علشان يعطيها شنطتها اللي نستها عندهم....

عبدالله وهو منزل عينه في الارض: السلام عليكم....

العنود وهي مرتبكه من هالموقف وعيونها في كل مكان الا انها ما قدرت اطالع عبدالله: وعليكم السلام..

عبدالله: ختيه....نسيتي شنطتج ...

العنود وهي مرتبكه: مشكور اخوي عبدالله ...ما كان في داعي انك تتعب عمرك وتيبها ...

عبدالله هني رفع راسه وطاحت عينه في عيون العنود: لا والله لا تعب ولا شي...افا عليج ختيه...(( مد ايده بالشنطه)) انتي اسمحيلنا.........

العنود: مسموح بالحلي خويه ...الا انته اللي اسمحلي عبلت عليك...

وتم كل واحد منهم ما يعرف شو يقول غير هالكلام...كل واحد واقف يطالع في الثاني بخجل...

عبدالله: ختيه اشوفج واقفه برع ...ليش ما تتدخلين...

العنود وهي مستحيه يا ربي الحين شو بقوله؟؟؟....: والله يا خويه الصراحه ما لقيت حد موجود ... كلهم برع..

عبدالله: انزين جان نزلتي اطالعين مفتاح الشقه ؟ تبيني انزل اشوفه لج؟

العنود وهيه مرتبكه اكثر: والله نزلت بس الشواب شلوا المفتاح وياهم...

عبدالله وهو منصدم: ومن هاذيج الساعه وانتي واقفه هني؟؟

العنود: هيه والله شو بسوي غير....دقيت على حجرة اخويه وحرمته ما حد هم بعد...الكل نازل...ما قدرت انزل تحت في اللوبي كلهم شباب...

عبدالله ما عرف شو يسوي ما يبا يخليها روحها وما يبا يتم عندها علشان ما حد يشوفها وياه وتطلع عليها رمسه...الصراحه هو يخاف عليها من النسمه الطايره...شو العمل الحين....

عبدالله : الصراحه ما اروم اخليج هنيه...اخاف حد من هالشباب يتعرض لج...تعالي بنزل تحت في اللوبي...على الاقل ما بتكونين روحج ...

العنود: لا لا خويه ما في داعي اعبل عليك ...انشالله ما اييني شر ...بتم هني اترياهم عل وعسى ايون بسرعه...خلاص لا تهتم مني انته...ومشكور اخويه..

عبدالله: والله ما اخليج بروحج هنيه...اقولج تعالي بنسير تحت بوقف بعيد عنج بشوف اذا حد اتقرب منج او تعرض لج...

وعقب اصرار عبدالله والحاحه نزلت العنود وياه في اللفت..الصراحه هي كانت ميته من المستحى وهيه في اللفت وياه بس الصراحه هوه كان عاطنها ظهره علشان ما تخاف منه او تقول عنه انه يتمادى وياها عقب اللي استوى في الطايره صح انه احيانا يكون متهور بس لا مب هوه من نوع الرياييل اللي يسوم ويهه ع الحريم...

وصلوا اللوبي وخلا عبدالله العنود تظهر قبله ...وسار صوب الكراسي ...

عبدالله: اختي يلسي هنيه وانا بكون في الكراسي اللي مجابلات...

العنود هزت راسه: انشالله...

يلست العنود وين قالها عبدالله تيلس...شوي وشفت من بعيد اخوها وحرمته وعيالهم...

العنود: اخويه عبدالله...مشكور هلي وصلوا...

عبدالله انتبه وين نظراتها: خلاص عيل انا اترخص...دام هلج وصلوا..(( ما بغا يسبب الها أي احراج))..يالله في امان الله..

العنود: مشكور وما تقصر ....ربي يحفظك...(( في خاطرها اتقول يالله علني ما اخلا من هالهايه))...

ظهر عبدالله قبل يوصلون بطي وحرمته وعياله الفندق...بعدين عقب ما دخلوا شافوا العنود يالسه تحت وسألها بطي شو اللي ميلسنها تحت وخبرته بالسالفه بس ما قالت له عن عبدالله... وطلعت وياهم فوق علشان يتمسحون لانه حان وقت صلاة العشا ...

عقب صلاة العشا طبعا ردوا الجميع وكان سعيد ياييب عشا من برع... ويلسوا كلهم يتعشون مع بعض هالمره..وعقب العشا كالعاده سوالف وعلوم وخاصة فطيم اللي ما توقف سوالفها....بس ماشالله عليها ردت من السوق محمله باكياس.....وطبعا سعيد ما قال ولا كلمه بالعكس كان فرحان وايد لانه فطيم حبوبه وتخوز الضيج والهم عن القلب واكثر من هذا ساعدته يشتري لهله هدايا وبعد ساعدته يشتري بعض الهدايا لاصدقائه الخاصين...ماشالله عليها ذوقها لا يعلى عليه وهوه ما توقع انه تكون فطيم ذويقه للهدرجه...كان يفكر انها مستحيل تنتبه لكل هالاشياء الحلوه ...بس هوه لين الحين ما يعرفها عدل كان يفكر انها انسانه بس تحب السوالف واحيانا اول ما قام يسولف وياها من عقب ما ردة من سفره للدراسه برع كان يظن انها انسانه فارغه وما كان عاطنها ويها....كان يحس به دوم رازه الويه...ما كان ايعد الها احساب ...بس لا طلعت غاليه عنده ولكن فوق كل تفكيره في فطيم لازال يفكر ان الانسانه اللي بياخذها وبيتزوجها في النهايه هيه العنود...هوه يحب اصلا العنود...حتى ولو يفكر دايما في فطيم....يدري انه تفكيره في فطيم بيروح وبيختفي مع مرور الايام ..بمجرد انه يتزوج من اختها....هوه بس متاثر بروحها وسوالفها الحلوه...

المهم مرن الايام وطبعا سارن قوم ام بطي وحرمة لدها وبناتها صوب هل عذيجه وتغدوا عندهم وكل منهم طبعا مسوي غداه ...وتعارفوا عدل والحمدالله ترابعوا كلهم ...وقرروا يسيرون مكه رباعه...وطبعا عقب ما قرروا شاورت ام عبدالله ولدها وهو ما اعترض بالعكس...كان مرحب بهالفكره وايد ...ونفس الشي ام بطي شاورت ابو بطي وعياله وكانوا طبعا ما عندهم اعتراض ...حد يلقى له رفيج سفر ويعترض؟؟؟؟؟؟
المهم في اليوم المقرر انهم يتحركون فيه ويسيرون صوب مكه الكل كان متجهز ...وطبعا ساروا مكه وصوها العصر لانهم اتحركوا عقب الغدى على طول ...حبوا يصلون الظهر في المدينه...وعقب الغدى تحركوا يميع عايلة بو بطي...وعايلة عبدالله وامه وخواته...

والساعه 5 ونص تقريبا وصلوا مكه المكرمه...وعلى طول حجزوا في الابراج...هوه فندق ومركز في نفس الوقت يعني يوفرون وقت...مع انهم يدرون ان الحريم ما يجنعون .....ا لمهم كلهم سكنوا في نفس الطابق...وعلى طول ساروا شققهم وردوا وانزلوا علشان يسيرون يطوفون بالبيت العتيق ويخلصون مناسك العمره ...وطبعا يوم كانوا يطوفون عبدالله بامه وخواته ....وبوبطي وحرمته وبناته...وبطي بحرمته ويا عياله وميد وسعيد...

خلصوا تقريبا عقب صلاة العشا...وردوا الشقق وعلى طول يالله يالله تعشوا وكلن رقد بسرعه...

بالباجر نشوا حق صلاة الفجر وطبعا فطيم اللي رقادها ثجيل وايد لعوزتهم...طلعوا عنها ونشت عقب هيه ويالله يالله تسحبت واتوضت وطلعت وهيه عيونها فيها رقاد...ويوم طلعت لقت جدامها حميد وسعيد توهم بينزلون ...وسارت بتنزل وياهم

حميد: هبي هباج الله شو هالعيون المدفنه...تزيغين اللي ما يزيغ...

سعيد: ههههههههههه ...عاد شو هالرمسه حميد....

فطيم: حميدوه اجلب ويهك يالله ...هب فايجتلك توني ناشه من رقادي ومدوخه وبعدني ابا الرقاد...فكني من لغك...

سعيد: دواك حميدوه...ما حد قالك ترز ويهك...

حميد: ما عليه الحبصيه لو انا في البلاد براويج حرام ليودج من ذنياتج واحيسهن لين ما ينقعن....بس احنا الحين هنيه في مكه المكرمه...ما اروم حيله...

سعيد: يالله يالله خلونا نظهر...فطيم خليج ويانا ويوم بتصلين... لا تسيرين بعيد علشان نرد رباعه...

فطيم وابتسامتها شاقه ويهها من تحت نقابها: زين...ما يهمك بو الشباب...ولا اقول اتريوني عدال البوابه اخير...شو رايكم...

حميد: صار... يالله نسير سعود...

ساروا وتسننوا وصلوا...وطلعوا وعند البوابه لقوا بطي وحرمته...وردوا رباعه...فطيم على طول حطت راسها كالعاده...اما العنود وامها واختها شويخ فيلسن في الحرم المكي ساعه يقرن قرآن وطبعا العنود تقري امها ... وعقب خلصن وسارن...بس ما سارن الشقه لا سارن صوب بئر زمزم وتسبحن هناك وشربن ماي زمزم وردن...طبعا الماي بسرعه جف لدرجة انهن ما جنهن اتسبحن ورششن اعنارهن بالماي....وردن الفندق وفي الطريج خطفت العنود على المطعم بتطلب خبز حار وفول ... وهناك بالصدفه بعد لقت عبدالله...

اول ما دشوا .. عبدالله ما كان منتبه الهم كان يرمس راعي المطعم...بس ام بطي عرفته وسلمت عليه...وهو كان مستانس الصراحه ما توقع على باله انهم راقدين عقب البارحه...

عبدالله: مرحبا الساع خالتيه...

ام بطي: مرحبا بويه ...شحالك غناتي؟؟؟ شحال هلك؟؟ ما شفناهم اليوم واحنا سايرين انصلي الفير...

عبدالله وهو مبتسم: والله يا خالتيه انا سرت ابهن يصلن في الطابق الفوقاني...ويمكن انتوا ظهرتوا قبلنا ولا عقبنا ما حد يعلم...تعرفين ماشالله من كثر العالم مالك مجال تشوف ربيعك...

ام بطي: هيه والله يا ولديه...واحنا بعد تونا يايين من الحرم ...صلينا هناك وسرنا صوب بير زمزم...

عبدالله: حيكن والله...انزين الغاليه شو تبون بطلبلكم؟؟؟

العنود هنيه رمست: لا خويه عبدالله مشكور وما تقصر خيرك سابج...بنطلب رواحنا...

عبدالله: لا والله ما يصير الا اطلبن واا بدفع عنبوه ما يرزى كم يعني بدفع...

ام بطي: مشكور الغالي...ما نبا نعبل عليك...وبعدين احنا ماشالله وايدين وبنشتري وايد...

عبدالله: ما يطيع زينج يا خالتيه ...عيل على شوه المخوه...؟؟؟ المهم حتى لو كنت امية نفر ولا زود...انا بدفع يعني بدفع...الحين لبن ولا تستحن...

العنود حست بالفشيله وطلبت خبز وفول....

وعقب ما خلص الطلب وخذ عبدالله طبعا طلبه قبلهن بس ما خلاهن قال بيسير وياهن لين الفندق...وطبعا تم سوالف ويا ام بطي لين ما وصلوا الفندق وطبعا العنود وشويخ صاخات...وركبوا اللفت رباعه.. ..وصلوا لين طابقهم اللي اكنين فيه...وهناك عبدالله تفارق وياهم طبعا كلن سار شقته.......