نسائم نسيم

الاتصال سبب لي مشكلة،
سؤالي لساكني مدينة تمير ،
هل الاتصال يقطع عندكم من الساعة 11ظهرا مثلي؟
انا كل يوم وهذا شغله معي،ودي اعرف اذا كان الجميع مثلي صبرنا,واذا كا غير كذا تصرفنا مع الاتصالات الزفت.

عصر الخميس،
عقب ايام الاسبوع يسبب ربكة نفسية ،ويسبب قلق،الواحد نهاية الاسبوع يرتاح ويقضي شغله ،وحنا نروح نضبب،وفي الشموس من الفجر،!!!
مار اليوم حر ورطوبة وصالي ،وعواصيف.والله مايصبر عليها ولا المجاهدين.
واذا رجعنا تحسفنا ونقول وش مطلعنا؟وذا اصبحنا نسينا،ثم نكرر نفس الخطأ.
ويجون اهل الرياض ويكرفونا كرف يبون البر وحنا نصحاح هماه جاي من الرياض كنه جاي من الديوان الملكي نشيلهم في مواترنا ونطبخ وننفخ .وهم ااذا راحوا للرياض ماينشدون عنا ابد الا يوم الثلاثاء في الليل يقضبونا يوبدونا،وحنا اذا جينا للرياض مانمرهم ابد،لكن نبي نجربهم مثل مايجربونا .
مار انا خابر اذا اتصلت وقلت فلان تراي في الرياض يبي يقول والله انا مع الاهل في السوق!!!!بس اصبر ابجي الساعة 10ليلا!!!بلاه داري اني ماهوب مذن العشاء الا وانا في تمير.
عاد هذا حالنا وش نسوي ؟مستغلينا اهل الرياض.

اصبحنا واصبح الملك لله .
اللهم اهدي ضال المسلمين،اللهم يسري لي امري ،
يازين بعدك عن اللي ماتحبه ،انشهد انه يوم عيد.
يامحلال الفنجال مع سيحة البال ،،،،،،،،،،،في مجلس مافيه نفس ثقيله.

اليوم الجمعة ،،،،،،وحر،
نبي نروح للمسجد ان شاء الله.
بمان الله

ألا أيها الظَّالمُ المستبدُ
،،،،،،،،،،،،، حَبيبُ الظَّلامِ، عَدوُّ الحياهْ

مدونتك رائعه

يوم الجمعة كل السيارات متجهه جنوب !!!!!!!!!!
استغرب حنا نروح للمسجد وهالسيارات طايرة جنوب يم الخط السريع.اقول هذولا ماهمب مصلين والا وين يروحون؟؟؟؟
تقول مواكب وسباق !!!
غريبة!
وش عندهم ياربي ؟كل ذولا مايصلون؟ماهوب معقول ابد!!وحتى فيهم ناس عليهم سمات الخير،ولا يلبسون عقال، بعد راحين ومسرعين وشمغهم تكفخ من الهواء الحار مفتحين القزاز ماشغلوا المكيف.
قلت هين فيها علم!!!
وننشد قالوا يصلون الجمعة في فيحاء العتش (في محطة دنانه).وش فرق فيحاء العتش عن مساجدنا وقريبه،!!!؟؟؟
فيحاء العتش صارت كنها مزار، ولا النجف عن الشيعة!!!!!يعني الربع مواظبين عليها كل جمعة،يعد الايام يبي الجمعة حتى يروح يصلي فيها!
فيه اهداف ،فيه شي مرغبهم في هالمحطة غير الصلاة!
هاه،قلت مالي لا ابروح اشوف وحضر وشوف وش هالميزة غير الصلاة!!
دخلت المسجد الامر طبيعي مثل مساجدنا،بس الغريب ان اشوف الربع جالسين عن البيبان وحول البيبان اسرع لهم في الطلعة،كنهم يحترون الامام يسلم،المهم سلم ولتفت ماشفت الا محلاتهم فاضيه وبرا اسمع مثل الاصوات وزحام ولجه!!وطلعت يوم ناظرت لينهم عند الخضرة!!لهم حركة وقرشه،واصوات مثل النهابه والسرق،اثرهم يشرون خس وكراث وبقدونس،وطماط(طميطمات) لانها رخيصة واقل من المحلات بريال ونصف.
والله ماتسوي يا اخوان ريال ونصف مع هالخط والسرعة والسباق اما جاك حادث ،والا بنشر كفر،والدعوى عوافي ريال ونصف،
اذا جاء الصبح قال شريت باغة وش كبرها ولو انها في المحلات كان بقيمة كذا،يعد نفسه كاسبها وهي كلها طماط وخس وكراث.لا ويهدي منها!!
ايه بصرهم ماعلينا من احد.

الله يقطع بليسك يانسيم
أجل خذك الحميه ورحة معهم للعتش

بس صدق يعني يرحون للعتش عشان الطميطات

وَنَحْنُ أُنَاسٌ، لا تَوَسُّطَ عِنْدَنَا
،،،،،،،،،،،،،،،،، لَنَا الصّدرُ، دُونَ العالَمينَ، أو القَبرُ

اقتباس: المشاركة الأصلية كتبت بواسطة فضاوهـ    مدونتك رائعه

تسلم والله