نسائم نسيم

جيت وانا والله مقصر ولاحصلت الا التعب.
الله لايخيب التعب

فيه لخبطة ،وفيه ارتباك واضح ،،،،،
وعدم ارتياح نفسي، قلق وضغوطات.
المركزيه هي من اسباب فشل العمل،والتأخر والتخلف.
راح ابحث عن حلول تقنع شخصي

المنتديات عالم مستقل له نظام وله مسار.مختلف عن العالم المشاهد والمتحرك في الشارع واللي يعيشه المجتمع مثل قم الصبح واشتر خبز تميس ،وبرلين فول، وبريق غضار مليان شاهي.
وبعدها خذ عشر فرات في الشارع العام ثم تجلس وتنشد منهو ولد فلان ومنهو راعي السيارة الفلانية او اليوم فيه حادث سيارة.والا تنظيم اوراق او ارشيف دائرة حكومية.
المنتديات عكس الواقع المحسوس عبارة عن تبادل معلومات ،ثقافة ، فسحة واظهار المهارات ومحاولة الابداع وتجربة الحياة الجميلة اللي منعك الواقع من اظهارها.
تعتبر حياة اجتماعية في الظل تقابل حياة في النور واقع محسوس ومعروف.
اذا ان الحياة الواقعية انتقلت الى الظل فما فيه داعي للمعرفات من اساسها.
الحل الوحيد اذا كان المسئول يريد مسك العصاء وتنظيم الصفوف ،يجب ان يجبرالاعضاء على الدخول بالبطاقة الشخصية وتنتهي جميع الخلافات ويمشي الوضع على السراط المستقيم واكيد راح يحدث هناك بعض المشاكل لان المجمتعات فيها اسوياء وفيها عكس ذلك.
الشيء الاخر ان لاتستمع للمؤثرات الخارجيه ،تخيل وانت تسير في الطريق الى مكان معين وعند كل صوت تقف وتلتفت متى ستصل؟
الاهداف تدرس ويضع لها خطط زمنيه وتنفذ ،لكن الاهداف العشاوئية او المشي بدون هدف مثل اللي ماخذ عزبته وعاطل ولا عنده شغل وكاشت ويدوج في البر لو يقعد يوم والا اثنين والا شهر ماعنده مشكله ولا عنده تعطيل لانه بدون هدف همل لايعرف اين هو ذاهب .

لاتجعل من نفسك ناقد لان النقد مرض يتطور ويتطور ،الى ان يصبح عندك عداء للاخرين ، ثم تبدء في التقليل منهم واحتقارهم ظنا منك ان كلامك سوف يعيقهم لكي تكون انت، انت، انت المسيطر وفريد زمانك،الناس تمشي وتتقدم وتتطور وتبدع وتظهر وتكوّن علاقات اجتماعية ومستويات علمية ويشار لهم بالبنان ،وانت ايها الناقد المسكين جالس في المشراق او في الظلال مكانك هو، هو.بديت منه وانتهيت عليه .
يجب على كل شخص ان يرسم هدفه ويسير فيه ولا ينظر لحد والتوفيق بيد الله،الاساس القاعدة.القاعدة لكي لاتتعب .

لا تتصنع شخصية ليست لك او ماتركب عليك .لانه في يوم من الايام سوف يطير اللون المقلد (تطير البوية لانها بوية مغشوشه).لان كثير من الاعضاء جرب يكون خفيف دم مانفع،جرب يكون مثقف وقام ياخذ من كل منتدى سطر جميل ويجمعها وينثرها عندنا وبعدها نضحت او انه تعب وقصر لان الدعوى مطوله ماهيب يوم والا يومين،جرب يكون ملتزم وطالب علم وهذا حلال وهذا حرام واخرتها معد ندري وينه معد نشوف له حس،وبعضهم جرب المكاشيت والتصوير والتقارير وحقه منها الخساير وقايم يحرج على كيمرته وباقي عزبته خلص الرجال افلح،
وين راحوا؟واقفين هناك بعيد وساكتين ليه؟يبينا نقول وين فلان؟وش فيك؟تعال ياخي حرام عليك تتركنا.
عيشوا اللي الله عطاكم من قدرة وامكانية وتعيش مبسوط سعيد سعادة ماتتخيلها.

’انك لاتهدي من احببت، ولكن الله يهدي من يشاء’
،،،لارجم ،ولا بحر،،،،ولا اردت ان اقول‘‘‘
ضاق الفضاء من هذا الحصار.
هذي منطقة تسمى متنفس ،او منتزه، لكن وش نقول ؟
حسبي الله على العذال ،،،،،،،،،،،،،،،،،،،،،

وش هالعج؟
جانا امس هوا وعج وغبار في ذيك الديار معد نشوف بعض ،ويوم اصبحنا لين الواحد عليه من التراب والرمل طول متر،وحلالنا سرى يالله نجمعه الصبح.وبرد ،وحالتنا حاله مار الله يردنا .

قصيدة القهوة لعبدالله بن عون ،وتعتبر رائعة

مع هجعة اللي يختفون أول الليـل
.................الغايبـه دايـم يغيـبـون معـهـا
النفـس تاقـت للسمـر والتعاليـل
...................والعين أشوف النوم خالف سنعهـا
وطاب الجلوس بجانب النار ياشعيل
.......................وحط الحطب في ترعت من ترعها
وإليا استوى للجمر فيهـا تحاميـل
.................وأقبـل تواهجهـا وقفـى ولعـهـا
درج على المحماس من غير تعجيل
...................بريـة دوب اليمـانـي قطعـهـا
أول قطاف سفـوح شـم الأكاذيـل
....................اللي جذعهم الوحش مـن فرعهـا
شـم يساقيـه السحـاب بهماليـل
...................لين يتحـدر سيلهـا مـع ترعهـا
وترى لحمستهـا نظـام ودواليـل
......................وشريعة يمشى بأثر مـن شرعهـا
أول بدايتهـا مـدافـع مخالـيـل
....................ومسرى جماميـل بغالـي سلعهـا
وسوقن كما سوق الجمال المحاميل
...................مازال حموى النـار ماقـد لذعهـا
وإليا تطلق من شذاهـا زعاجيـل
....................وبشت عرق واللون الأشقر نشعهـا
فالحال سهلها عـن النـار تسهيـل
.........................حتى لظى المحماس مـا يدّرعهـا
وغير لها يا شعيل مسرى الجماميل
.......................بطراق زلبات(ن) تزايـد فزعهـا
تدريجة الحيران ومطـارد الخيـل
......................هـذي طريقـة حمسهـا واتبعهـا
وعقبه تميلها علـى النجـر تمييـل
........................جذاب روس القوم مـن منتجعهـا
عوايد له من على سالـف الجيـل
.......................ماهـي حديثـه تونـا نبتدعـهـا
ومن يوم تنعمها فـدوك الدعابيـل
........................فوق أصهب اللون الربيب تهزعهـا
وتضبط قياس الماء لها بالمكاييـل
...........................ضبط الخبير لصنعت(ن) مخترعها
ومن يوم تقطع خلها مثل مـا قيـل
..........................ترخي على هدفى السبيل مخذعهـا
مبهارت(ن) تذعر بغالي التشاكيـل
.......................طب العمـس إليـا تيسـر تبعهـا
صفرا كما القنديل حسنـا تعازيـل
..........................من صنعة الرسلان الأول صنعهـا
إليا دارها اللي يعتنـي بالمعاميـل
.......................وفاحت وبالفنجـال الأول ردعهـا
وفيها تساوت خنـة البـن والهيـل
.....................والنفـس دافعهـا عليهـا دفعـهـا
قم صب لي ياشعيل منهـا فناجيـل
.......................على سنـا ضـوء تهـادى ولعهـا
أظنهـا يامـال طـول التماهـيـل
......................تقلع همومـي كـان ربـي قلعهـا
وتفتح لها أبواب بصـدري مقافيـل
.......................وتجمع لي أفكار(ن) تشتت ضيعهـا
وآخذ بها عن ضيقت البال تبديـل
........................وصروف دنيا ما مشت مع سنعهـا
دنيـا تصيـد بالشبـك والمحابيـل
.......................نـاس تسايرهـا ونـاس تخدعهـا
أحد تجي له بالرضـا والتساهيـل
..........................وهو لو تعب في جمعها ما جمعهـا
وأحد ركابـه مقفيـات(ن) مقابيـل
........................ولابـاب ولا نافـذة مـا قرعهـا
وتعطيه قاف إليا طمع بالمواصيـل
......................وينكف معيف وسامح(ن) من طمعها
دنيـا تقـذل سبـق الحـر تقذيـل
.........................وتوهنه في ربعة(ن) مـن ربعهـا
لو قد مضى له من شقاها غرابيـل
......................يوم الحرايب مظلمـات(ن) قطعهـا
يوم الطلوع بها على الهجن والخيل
........................ما قد فهق عن طلعت(ن) ما طلعها
ويوم استقرت وأغدقت بالمحاصيـل
.......................صـارت منافعهـا لمـن لا نفعهـا
عقبانهـا تمسـي قوايـا مواجيـل
........................والمستفيـد غرابهـا مـع مرعهـا
واللي مسـار أمورهـم بالأباطيـل
........................واللي متى ما وافقـت لـه بلعهـا
ومن ذاق در المرزمات الأباهيـل
......................أمـا حلبهـا حلـب وإلا رضعهـا
وحصنيها يرقص على هزت الذيل
......................ولو يجتمع قدمه سبـاع(ن) سبعهـا
ولا عندنا ياشعيل للعـوج تعديـل
........................مازال ممشاها على العـدل أطعهـا
ون شفتها قامت تجانف على الميل
........................بأردى ثمن عند أول السـوم بعهـا
واستثن منها قومت(ن) بآخر الليـل
......................في حزة(ن) كل(ن) يحب يهجعهـا
إليا جاء لثلث الليل الآخر تراتيـل
.......................وقامت ملائكة الرضا قمـت معهـا
في ساعة(ن) تكبيرهـا والتهاليـل
...........................يجنى ثمار عذوقها مـن زرعهـا
وخل اجتماعك بالرجال الحلاحيـل
..........................اللـي خيـار المجتمـع مجتمعهـا
ولا تبدي الشكوى ولو ضامك الشيل
.......................إلا علـى رجـل يحـس بوجعهـا
رجل إليا التفـت عليـك النشابيـل
........................أمـا شبرهـا شبـر وإلا ذرعهـا
واختار مفتاح(ن) للأرياء المقافيـل
.......................روس العلا يرقيـك فـي مرتفعهـا
ومن الزمان اخذ العبر بالرحاحيـل
.......................اللـي منازلهـم تهـاوى بقعـهـا
يافجعتي لاجيت بعـض المداهيـل
.......................ولا شفت فيها عقب حـي رثعهـا
إلارسـوم دارسـات(ن) مساميـل
.......................وخرايب يزمى السـراب بشمعهـا
بلاقع(ن) شهب(ن) تهاوى زهاليـل
......................الظّاهر أن اللـي فجعنـي فجعهـا
من عقب أهلها لو سقتها المخاييـل
.....................مالله نفعهـا وبركتـهـا نزعـهـا
لاجيتها جضيت مـن قلـة الحيـل
.......................ودنياي عندي ضاق بـي متسعهـا
على حلاحيـل تضـد الرجاجيـل
.......................حصـن ماعـاد إلامقالـع شيعهـا

ابيات معبره
لاجيتها جضيت مـن قلـة الحيـل
.......................ودنياي عندي ضاق بـي متسعهـا
على حلاحيـل تضـد الرجاجيـل
.......................حصـن ماعـاد إلامقالـع شيعهـا

ابـطــى جـوابــك لـيــه يـاسـلـوة الـــروح
،،،،،،،،،،،،،،،،،،،،،،،،مـــــاذي بــحــالــه يـاحـلـولاعـدمـنـاك
وأن طعتـنـي مـالـك مــن الـهـجـر مـصـلـوح
،،،،،،،،،،،،،،،،،،،،خـايـف يـطــول الـوقــت والـقـلـب يـنـسـاك
ماشـفـت مـنــك غـيــر لـوعــات وجـــروح
،،،،،،،،،،،،،،،،،،،خـلـه يفـيـدك مــن طـمـع فـيــك وأغـــرا ك
تبغـانـي اكـتـب لــك بخـطـي عـلـى الـلــوح
،،،،،،،،،،،،،،،،،،،،،،،،،انــــك تـعـلـمـت الـخـيـانـه وعـفــنــاك
عيـنـي عـلــى الـخــوان مـاتـعـرف الـنــوح
،،،،،،،،،،،،،،،،،،،،والـقـلـب عـافــك يـــوم غـيــرت مـمـشـاك
عـنـد الجمـيـع اصـبـحـت يـــاذاك مـفـضـوح
،،،،،،،،،،،،،،،،،،مـــرات نـسـمـع واكـثــر أمـــرار شـفـنـاك