نسائم نسيم

الان فيه بعض الشباب وقولها وانا في غاية الاسف من وضعهم المزري يمشي في الشارع ماعليه شماغ وثوبه ضيق وكلامه فيه ميوعه ويغير صوته وينعمه ويكد راسه على قدام!!!!!!!!!!!
وش هالتصرفات؟والمشكلة خلق الله حسن مافيه من مقومات الوسامه شي.
انا مدري هل هذا شعور بالنقص؟
الارتباط وذكر هذا الشي جعلني اربط هذا بهذا ،انا اجزم جزم ان الحرمة ماتناظر هذا واشكاله لانه تخلى عن جنسة وانسلخ من جلده.
خلوكم رجال وعيب والله التميع والنزول الى هذه الدرجة عيب .
انتم رجال مايجب منكم هذا ابد ولا هوب مقبول منكم حنا في وقت عمل وجد وبحث عن الرزق ،شغلكم صافين المواتر في المغاسل والمظاهر،وليتكم تفكون اهلكم شر مصاريفكم.

من نظرة كذا سريعة بديت احس ان المكان بدء يرجع للوراء خمس سنوات ،ايام جميلة فيها روح، فيها تنافس، فيها قوة ،فيها شفافية .
فيها جذب وتفكير لما سوف يحصل وما يكتب.
فيه ارتباط بين الفكر والمكان.
فيه شمس تحرق الظلام ،مر علينا وقت نغمز في الظلام تخيل انك تغمز لشخص في ليل غدرا ماتشوف يدك، اقصد مابعد الخمس السنوات الجميلة يوم كان الاحمر اخضر والاخضر ازرق والازرق اسود والبرتقالي برتقالي ليت فيه اللوان زياده كان اذكرها.
يوم كنا صغار قد كذا .

اليوم ماش الجو مظلم !!!!!!!!!!!!عسى المانع.
فاقد لي واحد غالي ،قمت احك راسي وهوجس،لا يكون لا لا لا ماهوب صحيح،يجي مايبطي ان شاء الله.

ترى مهما اختلفنا مايرضيني غيابك ابد.

للا سف الشديد وبعد تأمل ونظرة بهذه الحياة وجدت اشخاص نظرته سوداء لا يرى الا كل شبهه ونظرة سيئة واقرب شبه لهؤلأ الفيئة مثل نظارة الحداد السوداء لا تشاهد منه الا النار والشرار ولذعات نار تتطاير تصهر الحديد،والنظارة هذي مستحيل تشوف اي شي غير النيران المشتعلة،لكن نظارة التفائل والحب معدومه ماتشوف منه شي اطلاقا.
يجب نزع هذه النظارة السوداء ،اعادة النظر في مستقبل مشرق حول الحياة ،الحياة حلوة .

اليوم الجو بارد،بس في البيوت حر.عسى الله يعجل بالمطر ونشوف الخير.

ابحط لي كم صورة هنا واتكلم معها لان المنظر الجميل يعطيك روح نشوة يوسع صدرك لكن بعض المتخلفين مايهتم بالصور الحائطية يقول صورة ادفع فيها فلوس!!!!!!!!!!!!

ابوحمد تعال تكفى احذف صورة هالقرقاص اللي فوق روعتني كنها عقرب.بسرعه ياصديقي جابت لي قلق و مر.

الدنيا عجلة تسير،مسارها واحد لايتغير ابد مثل المركب يحمل ناس ،وينزل منها ناس وهي تسير لاتقف عند اشخاص ،لاتقف عند زمن معين بيد رب العالمين يسيرها!!!
لكن السؤال اللي يجب ان يطرح نفسه ونقف عنده ونتمعن جيدا،اذا صرنا على هذه العجلة ونحن نعرف اننا محولين منها يعني ترمينا خارجاً ويصعد ناس اخرين؟وش اللي يمنعنا من العمل الطيب لاني انا ،وانت ،وذاك، واللي واقف هناك يناظر فينا من بعيد يحسب ماجايه شي في يوم من الايام نبي نتماسك الايدي مقفين.
سنن الله في خلقه مامن شي تطق السماء !!!!!!!!!!!!!!!!!!!
يبقى شي واحد العمل الطيب،والذكر الطيب .
لكن الانسان عديم الاخلاق واللئيم مايحرك فيه شي هذا الكلام،يجوز فيه ضمائر نائمة لكن مع الوقت تصحي لكن ميت الضمير مافيه طيب ،مافيه حيلة.
صدقوني اني احمل هم ،احمل نية صادقة في التعامل،لا احمل ولا اضمر شي في خاطري او اني نقام على المجتمع اطلاقا لكن المفسرين والمأولين لاحكم لهم في ضمائر البشر ونياتهم.

نسيم
أنت ماشت إلا راعين الثوب الضيق
أجل ماشفت إللي موقف شعره كنه عرف ديك
لا وتلقه لابس سروال ......اللهم لك الحمد والشكر.