يوم في حياة عضو

موقف مزعج

ولكن خير ماسويت....وخيركم وخيركم لأهله

دمت بود

وينك يا جار القمر بإنتضار يومك
لا تطول الغيبه

ابشري طال عمرك
جتني الرساله وانا مستعجل لان وراي مشوار مزعج قلت فرصه نخليه هو اليوم المطلوب
خلوني احدثكم عن اليوم من يوم فتحت عيوني الين هلحين
انه في يوم السبت الموافق 4-11-1430 هـ كنا على موعد انا والاهل والبزوره للذهاب للسوق لشراء ملابس العيد وحاجياته
عندنما رنت الساعة معلنة القيام لصلاة الفجر استيقضت من النوم مخروشا لا ادري وش انا فيه من حزه ولما تكر انني في الفجر وان وراي قومه ووضوء وخروج من البيت للصلاة وانا اسمع صوت الهواء يصوفر والدرايش لها قرقعه جاني الشيطان وقال لي خذ لك غفوة يمديك باقي على الاقامة 20 دقيقة ولولا خوفي من اله كان سحبتها نومه الين تطلع الشمس وترتفع قيد رمح ولاكني تعوذت من ابليس وقلعه الله عني المهم توضيت ولبست ثوبي وكلي زمل وش يايطلع في هالبرد وانا عيشتي وعيشة البرد مانداني بعض
فتحت الباب ولاكن ولله الحمد كان الهواء مهوب على ماسمعت كان دافي نوعا ما
صليت مع الجماعة وعندنا امام الله يجزاه خير صلاته قلبه قلبه هو يسجد وحنا تونا نركع واذا سلم والانا تونا في السجده التالية
رجعت عقب الصلاة قلت افتح المنتدى او ارقد ولاكن تفكيري السليم قادني لاخذ غفوة لان وراي مشوار
استيقضت من النوم عند الساعة السابعة صباحا ولقيت المرة مصلحة القهوة تقهوينا وجبت الخبز وافطرنا وعينا من الله خير
بعدها اعلنا حالة الاستنفار وقومنا البزوره وركبنا السيارة وانطلقنا الى حيث اتجهت بنا وكانت وجهتها الى العاصمة الرياض
وكنا في سعادتةغامرة حيث كان الاولاد ينشدون تاره ويكبرون تارة وسواليف وعلوم زينه وماكدر خاطري غير ازعاجهم وواحد منهم واقف في المرتبه اللي وراي وحاط خشته عند اذني ويسولف وينشد ويكبر وانا اللي افك مزلاج المرتبه وادفه والاه طايرن في قزازة وراء ابلشي وافجر اذني
وصلنا الرياض حول الظهر وقمنا ندور ونبرم الين صلوا الناس وبنتدي الصغيره تقول يبه ياويلك من الله يبي يحطك في النار ( اعوذ بالله من النار ) قلت ليش قالت طلعو من الصلاة وانت ماصليت >> معودتها الابلا الله يجزاها خير
هالكلمة اثرت في بس صرفتها وقلت لها يابنيتي المسافر يجوز له أن يجمع بين صلاتي الظهر مع العصر جمع تقديم او تأخير أيهما شاء ونحن سوف نجمعها مع العصر ان شاء الله
بعد الصلاة فتحت المحلات ورحنا لمطعم بيت الشواية وتغدينا فيه وفلينا الحجاج وانبسطنا وبغينا مانطلع منه
ركبنا السيارة ورحنا نتمشى الين يذن العصر وماسرع الوقت في الرياض يطير طيران
اذن العصر ورحنا لمسجد في شمال الرياض وصلينا فيه الظهر مع العصر جمعا ونصف قصر ( 6 ركعات )
بعدها توجهنا للسوق ودخلنا السوق
وهنا بدأت الأعصاب تشتد وبدأت الانفس تشين وبدأت الخشش تتفخ
لقيتو شي لا
وش رايكم في هذا
لا هذا ما يصلح
هذا قديم
هذا لابسينه العام
هذا شايفينه على الفلان
هذا طويل
هذا قصير
وخذ من هالموواويل
الين طقت انبيراتي
قالت هالسوق مافيه شي قوه لسوقن اخر قلنا يالله امرنا لله
ورحنا لسوق اخر ومن محل في محل ومافيه الا النار الحاميه
وكل شوي متهاوش مع المرة بس ياصبرها >> لو ماصبرت ماحصلت
وياصبري بعد عليها >> وش اسوي عييلي
اذن المغرب ماخلصنا الطلبات رحنا وصلينا ورجعنا بعد الصلاة وازين مالقيت ثوب الاصيل من زمان وانا ادوره ولا لقيته
وهالبزران موجعين راسي كل شوي ساحبني واحد يبه تعال شف واروح معه والقاه شايف له لعبه او كورة او شريط سوني او شي ينوكل يبه اشتره لي
يوم مابقي على اذان العشاء الاعشر دقايق شبيت عليهم اركبو والا رحت عنكم انا جوعاااااان ابي شي آكله تحدر الغداء من كثر المشاوير
طلعنا والنفوس شينه وهي تقول خلنا نقعد بعد العشاء قلت اركبي لايجي علم ثاني يصلح العيد بلا حنا
رجنا محندرين يكلموني وانا ساكت
مرينا البقاله وخمخمت اشياء نقرضها تعبرنا الين ناصل البيت عصيرات وكيك وفطاير حلاة بقر واهم شي عندي واكلتي المفضله من البقالة بطاطس برينجليز الاصلي الاحمر مع حمضيات او ميرندا ياسلام
عقب ما قرمشنا البطاطس كن الخاطر بدا يزين وبدت السوالف وجيناك لاقطينه
وفي الرجعه كالعاده الاولاد يتهاوشون وخذ ياصياح وازعاج ولاكن الحمدلله الحاله مهيب تطول لان النوم مايخليهم في حالهم
وصلنا البيت وصلينا صلاة العشاء وفتحت التلفزيون ولقيت مباراة الهلال وجلست عندها الين خلصت والحمدلله فاز الهلال ثم غيرت القناة ولقيت مباراة الريال وكملت السهرة عليها والحمدلله فاز الريال واثناء المباراة كان العشاء قد جهز وتعشينا وحمدنا الله على عطائه
بعدها توجهت الى مالنا عنه غنى منتدانا الحبيب وبدات اكتب مذكرات رحلتي الميمونه مع زوجتي المصونه واولادها حيث النكهه التي يخالطها الازعاج مثل المطر لاجاء معه عج
والسلام عليكم ورحمة الله وبركاته
وشكرا لاختي احلام ورديه على اختياري

ما شاء الله عليك اخوي جار القمريوم جميل قضيته مع اهلك وابنائك والله يخليهم لك ويحفظهم..
ويقول المثل لاجل عين تكرم مدينه..
وصدقت والله الحريم ما يعجبهم شي والحل الوحيد
لهم انك تجيب لهم بدون ما يرحون معك صدقيني
بيقولون وش زينه وتعرف تختار..
والحمد لله على السلامه..

الله يعظم اجرك ويجعله بميزان حسناتك
وهذا السوق دوخه ووجع راس وتطلع ما حصلت شيء
هذا انا رجولي مورمة من الدوران
والرجال مثلك يصيح وينادي من يصيح
خلها على الله ونتحملكم مقدرين تعبكم معنا
استمتعنا معك جار القمر وحمدا لله على سلامتك
والله يخلي لك عيالك
خاصة اللي تحثك على الصلاة
وكالعادة ما رشحت احد بعدك انا بدوري ارشح
قوت القلوب

ياخوي حرام عليك كان نمت بالرياض وكملت المدام التسوق

ترى السوق يبي بال رايق ولانكد وانت مستعجل تقول وراك الجنة

على العموم ماقصرت ويعطيك عااااافية

يعطيك العافيه جار القمر
ذكرتنا بالسوق الله يعينا على دوخته
ياحظكم انتهيت من السوق عقبالي ان شاء الله هههههههههههههه
مشكوره احلآم على ابداعك وتميزك بالموضوع
وبانتظار قوت القلوب

يوم متعب وشاق الله يعينك بس كل هذا من اجل العيال وامهم الله يخليهم لك
وجعل وناستكم دوووم

احمد ربك اللي خلصت عساي منظلك انا بروح بكره الله يعيني .

اقتباس: المشاركة الأصلية كتبت بواسطة أبـوحـمـد    ما شاء الله عليك اخوي جار القمريوم جميل قضيته مع اهلك وابنائك والله يخليهم لك ويحفظهم.. ويقول المثل لاجل عين تكرم مدينه.. وصدقت والله الحريم ما يعجبهم شي والحل الوحيد لهم انك تجيب لهم بدون ما يرحون معك صدقيني بيقولون وش زينه وتعرف تختار.. والحمد لله على السلامه..

ايه ياابوحمد جميل !!! جميل لوني رايح بهم للبر او الشاطي اما السوق نروح مستانسين ونرجع متهاوشين
اما قولت جب لهم كبها من راسك مرة جب لهم بدون محد يقول لي يعني مسوي مهداوي يوم لبس الولد بدلته طلع نصف بطنه كنه هالي يرقصن في التلفزيون
احسن حل عطهم فلوس وذبهم في السوق ورح وسع صدرك لك ساعتين او ثلاث ثم تعال وركبهم وكن شي ماصار
شكرا لمرورك