حلم شمحوط

علي يحب الكمبيوتر .. ويحب المحادثة عبر الإنترنت ، ودائماً يدخل التشات .. والماسنجر هو وصديقة ( خويلد ) ويدخلون و يسولفون مع من هبّ ودبّ .. وبعض الأحيان يلعب عليهم إللي يسولف معهم في الماسنجر أو التشات ويقول لهم : أنا بنت ..... وما يصدّقون خبر و كل واحد منهم يعطيها - أو يعطيه - رقم بيتهم .. ويقول : عساني أشبّكها .
( علي ) أو ( عليَّان ) مثل ما يناديه أبوه .. شاب ما شاء الله عليه .. مرجوج و مطفوق .. بيزوّجَه أبوه يمكن يعقل ويثقل شوي .. بس ما عندك أحد .. أما خويلد فهو شرحه ..
باقي على الزواج إسبوع .. وهو قاعد على الماسنجر أو التشات مع خويلد.. ومسمّي نفسه ( شمحوط ) .. قاعد يسولف مع إللي يسولفون في التشات والماسنجر .. قعد يعزم كل من دخل معه في المحادثة على زواجه ..
و دائما يدخل بإسم (الشمحوط) يكتب ويقول :-
تراني ابعرس الإسبوع الجاي و كلكم معزومين في قصر ألف ليلة وليلة يوم الخميس الجاي .. ولازم تجون كلكم .. تكفون قولوا تم ..
وصار كل ما دخل في محادثة عبر الإنترنت عزم إللي يسولف معه .. وهو متوقّع إن محدٍ جاي وما خذها سواليف تشات .. وطبعاً إنتشر خبر زواج ( شمحوط ) في الرياض إنه في قصر ألف ليلة وليلة وإنه يوم الخميس الجاي ....
وخلال هالإسبوع ….. قاموا أهل الرياض كلهم يستعدون لحضور هالزواج .. إللي يفصّل ثوب جديد .. وإللي إشترى شماغ .. وإللي قاعد يحتري هالعرس على نار .. وصاروا يتعازمون فيما بينهم على عرس الشمحوط .
وقبل العرس بيومين كان عليان وخويلد يسولفون ..
خويلد : أقول يا الشمحوط .. لو يجي للعرس كل إللي عزمتهم ..
عليان : لا محدٍ جاي للعرس .. الحين أهل الرياض ما يحضرون عزايم وعروس جماعتهم علشان يجون لعرس واحد ما يعرفونه ..
خويلد : تصدّق .. فيه أربعطش واحد عزمتهم وكلّهم قالوا تم و بيجون..
عليان : أنت قل طيِّب .. ولا إبن أمه بيجي .. وبتشوف .. أنا أعرف الناس ..
وفي يوم الخميس .. عقب العشاء .. بدء أهل الرياض يتوافدون على ( قصر ألف ليلة وليله ) .. منهم إللي يبغى يتعشّى ببلاش .. و منهم إللي جوه ضيوف وما عنده فلوس يعزمهم …. يعزمهم على عرس الشمحوط إلين صار طريق الدائري الموصل إلى قصر ألف ليلة وليله زحمة وكل هالزحمة هم ضيوف شمحوط ، لأنه هو وخويَّه خويلد الله لا يهينهم قاعدين يعزمون خلق الله عبر التشات أو الماسنجر.
وكان عليَّان لابس البشت وجالس في صدر المجلس كنَّه رجّال مع أبوه وخويلد عند بوابة القصر ..
جاهم واحد مشخّص ومتزكرت .. وهو عند الباب ..
الضيف : بالله بغيت المعرس الشمحوط ؟
إللي عند الباب ما يدري من هو شمحوط هذا .. سمعه خويلد .. وجا لها الضيف ..
خويلد : هلا والله ... حياك الله إقلط .. من أنت ؟
الضيف : أنا إللي سولفت مع الشمحوط في التشات .. أنا الزاحف 2000 ..ما عرفتني ..
خويلد : حياك الله والله .. والله إن عليان بيستانس مرررررره .. إقلط .. إقلط
الضيف : من هو عليان هذا ؟!!
خويلد : هو شمحوط ..
وقلط الضيف ( الزاحف 2000 ) وراح يسلّم على شمحوط .. جا الضيف ( الزاحف 2000 ) هو وخويلد عند عليان وأبوه جالس جنبه ..
خويلد :يا عليّان .. هذا الزاحف 2000 ..
عليّان " مستانس " : هلا والله .. وشلونك ؟ عساك بخير ..
وبعد ما راح الزاحف 2000 وخويلد ..قلط الضيف ( الزاحف 2000 ) طلع خويلد عند الباب .. جاهم مجموعة شباب لا بسين تكاميل ( ملابس رياضية ) وعليهم زبيريات .. وإللي عليه زنوبه ..
الشباب : مرحبا .. بالله هذا عرس شمحوط ؟
خويلد : إيه .. هلا .. هلا والله .. إقلطوا
وراحوا الشباب وخويلد للمعرس شمحوط علشان يسلّمون عليه .. وبعد ما سلّموا عليه
أبو عليان : من هذولا يا عليان ؟!!
عليان ( متوهّق ) : هذولا .. هذولا يبه .. خوياي ..
أبو عليان : إمحق خويا .. ما لقوا يجون إلا بهالملابس ..
شوي .. إلا نص أهل الرياض في داخل القصر والنصف الثاني في الشارع من الزحمه ..
أبو العروس و أخو ها مستغربين من هالضيوف الغريبين .. والكثيرين ..
أخو العروس : أقول يبه .. كل هذولا ربعهم وجماعتهم ..
أبو العروس : والله مدري وانا أبوك ..
أخو العروس : يبه الظاهر إنهم ما صدّقوا إن العشا والقصر علينا وعزموا كل جماعتهم ..
راح أبو العروس لأبو عليان ..
أبو العروس : وش ذا يا أبو علي ما إتفقنا كذا ؟
أبو عليان : خير وش فيه ؟!!
أبو العروس : كان قلتوا لنا إنكم بتعزمون كل جماعتكم علشان نحسب حسابنا في العشا ..
أبو عليان : وشلون ؟!! يعني هذولا مهوب جماعتكم ..؟!!
أبو العروس : ليه هذولا مهوب جماعتكم إنتم ؟!!
أبو عليان : إن كانك تعرف منهم واحد فأنا أعرف ..
والتفت أبو عليان على عليان..
أبو عليان : يا عليان .. إنت تعرف ذولا إللي جو ؟
عليان : إيه .. هذولا خوياي كلهم ..
المهم .. صار كل من دخل على عليان بيسلّم عليه .. يقول له أنا ( إللي عزمتني في التشات أو الماسنجر ) وأبوعليَّان وأبو العروس يسمعون ..
جاهم واحد جلف .. بشنب .. ما فيه من الزين شعره ..وبعد ما دخل على عليان علشان يسلم عليه ..
الجلف :هلا والله شمحوط .. ما عرفتني .. أنا ( نوال ) .. تعرفت عليك في غرفة ( الخلاعة ) ..
عليان : نوال ؟؟!!! إيه .. هلا نوال .. أنت منتب بنت صدق ..
أبو العروس وإخوانها وأبو عليان يسمعون هالحكي كلّه ..
أبو العروس : يا أبو علي .. أنت متأكد إن ولدك .. سَوي ..؟
أبو عليّان : وشلون سَوي ؟؟ ما فهمت ..
أبو العروس : يعني ولدك مهوب ......منحرف جنسياً ..
أبو عليّان : أفاااااا ..
أبو العروس : والله يا أبو علي شف من هم خوياه .. واحد شنبه أكثر من شعره وإسمه نوال .. والثاني ينادي ولدك يا لشمحوط .. ماب ذا علم ..
دخل عليهم شايب مهرقل .. مخرّف .. و يسأل عن شمحوط ..ودخل هندي ..
الهندي : فين هادا نفر " سمهوته " ؟
شوي إلاّ كل إللي عزمهم عليّان ( شمحوط ) داخل القصر .. وأهل المعرس والعروس صاروا برّا القصر من الزحمة ..
دخل أبو عليان وأبو العروس وإخوانها لغرفة ......ونادوا عليَّان ..
أبو عليان : الحين تقدر تقول لي .. من هذولا كلهم ..
عليان : والله يبه مدري وش أقول لك بس ..
أبو العروس : بس إيش .. عيب عليك .. حنّا زوّجناك بنتنا على إنك رجّال وفي الأخير تصير منحرف جنسياً ..
عليان : وين منحرف ؟؟ أنا .. هذولا ..
وقاموا إخوان العروس ومسكوا عليان مع حلقة وقالوا له ..
إما تطلق إختنا وإلا والله ما يفكك منا إلا الموت يالمنحرف
وصار في الموضوع طلق نار................
وصحا عليّان من النوم .. وهو متروّع ..و مفزوع .. وخايف
عليان : أشوى .. الحمد لله إنّه صار حلم .. الحمد لله .. الله لا يبارك في السواليف ولا يبارك فيك يا خويلد النكبة .. الحمد لله ..
وكان جنب عليان بطاقات دعوة للعرس .. مجهزها علشان باكر الصبح يروح يوزّعها على خوياه وإللي يعرفهم ..قام وقطَّع البطاقات ورماها في الزبالة ..
عليان : ما نيب عازمٍ أحد .. أبعرس سكَّاتي أحسن لي ..

إنتهى ،،،

ابو رندا

بعذره ,,,,,,,
ما يلام ,,

بس ابي اقول شيء ,

ما شاء الله عليك
الكتابه واجد ,, ومتكتها ,,

تسلم والله ويعطيك الف عافيه

تحياااااااااااااااااااتي

اووووووو ووو ما اطيب كوودن بااي

سمسار 15

اشوى انه حلم

والله ان يرووح فيها

شفتوا بلاوي الشااااات

اجل هالدلخ طلع نواااااااال هههههههههههههههه


مشكوووووووووور


سلام

هلا والله بأخوي سمسار وأخووووووووي هااااادي


حياكم الله و شاكر لكم ردكم ومروركم الكريم على الموضوع


ولكم تحياتي وأشواااقي