درعم هونيآآأ

السسسسسسسسسسسسسلام عليكم ورحمة الله
والله يانا مبطي ماشخمطت لكم
ومبطي بعد عنكم لبى خششكم



تصدقون اني البارح منضجعن على بطني بالصاله جالسن افكر
اقول ياربي انا من اي نوع
تهقون اني كدش !!؟
مدري .. بس كل ماجيت افكر واحلل نفسي
القى اني مانيب من ذولاك بني حساس ولاني من بني وسوسه
ولست ايضاً من قوم الرومانسسسسسين المتبكبكين على كتوف تلك الحسناوات
ولستو من بني هياط ومآزريه


اذا من انا !!؟


صدز تهقون اني جدار .. ولا تهقون اني ولد صالح
انا داخلن على الله ثم عليكم .. اللي يعرف يحلل نوعي يقولي
اكون له من الشاكرين .. واخلي اميميتي تصلح له رز ابيض على الغداء


على طاري الرز الابيض
صدز يمه ارفقي علي الله يخلي لتس وليدتس قولي آمين
قسمن بالله نشفتيني على ذا الرز .. ماعندتس غيره
وكل ماقلتها شي .. تقول مفيد لك ولـ أبوك
طيب .. انا وش دخلني << والله محد جاب الضغط والسكر لابوك الا انت يالتسلب
طيب انا وش دخلني .. تراني كنت امر بمرحلة مراهقه
احمدو ربكم انها عدت على خير .. ولا كان سببت لاحد افراد العائلة بجلطة بدماغه << كل تبن تكفى


عاد تدرون .. والله يانا كنت سربووووووت كبيييير << موب عاقل
لا صدز .. مدري كل ماجيت افكر بالماضي الأليم .. اقول اشوى ان ابوي هو ابوي وموهب ابو لواحد غيري
مدري وشلون ابوي تحملني خلال السنوات الماضيه
المدرسه يدقون عليه من جهة والشرطة من جهة لدرجة اني ماخليت قطاع حكومي الا ومخلي ابوي مسير عليه << الا الهيئة الله مير يوفقهم ان شاءالله ويبعدنا عنهم

ومن درجة الصفقه اللي كانت براسي .. التحفيظ قضبوووني الباب
تدرون ليه .. لاني يوم خلصت ذاك اليوم وطلعت من المسجد انا وشماغي ومطلعن طاقيتي من قدام
جاني المدرس حق الحلقه .. قال يااحمد خذ هؤلاء الفتيان معك وأوصلهم الى منازلهم
قلت سم وابشر .. ووصلتهم << والله اني حبيب
ومن باتسر يوم رحت للتحفيظ .. جاني المدير حق التحفيظ .. يقول لاعمرك توطوط علينا هنا بالتسلب الاجرب << هو ماقال تسذا بس حسيت انه وده يقولها
قلت له ليه
قال يالسريبيت .. حنا قلنا لك توصل طلاب تحفيظ معك .. وانت ياللي مانيب قايل شاغلهم معك ومشغلهم اغاني
طيب ذاك اليوم كنت منطرب مع خالد عبدالرحمن .. وش فيكم علي
بس الشرهه موب عليكم .. الشرهه علي انا اللي جاين عندكم ابيكم تدلوني الى طريق الصواب
بس اشوى ربي فتح على قليبي وصرت عاقل





الا صدز ساهر ذا العله وش الحل معه
قسمن بالله اقلقنا بالحياة وحنا ماكلين تبن بدونه .. اجل يوم حطوه وش بناكل << ودي اقولها لكم بس اكراماً لكم ابنطم

طيب اوكي انا مع هالنظام ومانيب ضده ابدن ابدن
بس اوكي يوم انك نزلت نظام .. سو له تخطيط
موب يابو مقبل تدرعمه لنا بالشوارع وتوهقنا فيه
اجل امشي بشارع السرعه المحدده فيه 120 ماأمشي لي 50 متر الا وتجي لوحه تقول السرعه المحدده 60 وعقبن تجيك لوحه بعدها تقولك السرعه المحدده 100
خييييييير عسى ماشر تحششون انتم
ولا اجل الدائري السرعه فيه 90
فين تبوني اودي وجهي من موتري يوم ان الشارع فاضي وانا امشي 90 بشارع ماهنا اوسع منه




الا صدز .. انا مدري وش فيه بطني صاير مضروب !!؟
صرت لو تجيب لي صحن ملوخيه مخلوط بلبن وعليه قطع جح .. ماعندي مشكله اكله
تهقون انه من عقب ذاك العشا اللي اكلته الله لايعيده من عشا
عاد ذاك اليوم .. والله يانا بغيت اسوي خلل فني في الجهاز الهضمي
قمت الساعه 2 بالليل صاكني الجوع ابي لي شي اكله
وبحكم ان البيت كله نااايم وانا ماغير اللي يقلب راسه بالبيت
نزلت وفتحت الثلاجه ادور لي شي اكله
امعنت النظر اكثر من مره بالثلاجه تسود القى شي اشتهيه
عاد مسسسسسكت معي بيض مقلي
الا واقوم اطلع لي حبتين بيض واطلع القلايه واطلع لي كاس


الوصفة السحرية كانت هي :

قم بكسر البيضتين واملئها بالكأس
ضع قليلاً من الزيت على المقلاة
اشعل الفرن بالنار حتى تولع النار
اجدع البيض بالمقلاة بعد ماتخلطه جيداً
اذا بدأت ان تشم ريحة بيض محترق .. فتأكد انه حان موعد اخراج البيض لكي يكون جاهزاً للاكل


المهم طلعت البيض وحطيته بصحن وجبت لي خبز .. وماغير ابلع وابلع وابلع
بس ماش حست ان البيض طعمه غريب ومره يصير حالي ومره ومره ومره مالح والوضع صار موب مريحني
قمت وفتحت الثلاجة اناظر البيض لايكون بس لونه غريب وماستوى << يمكن مثل الموز لا صار اخضر
بس البيض مافيه اي مشكله << طبعاً ايقنت كذا من راسي ولا ترا ماستندت على شي

حاولت وحاولت اني اعرف ليه البيض طعمه تسذا
وبعد جهد وبحث لعل وعسى اعرف سبب هذا التحول بالطعم
تم معرفة السبب .. وليتني ماعرفت السبب
والله ياهي حامت تسبدي صدز .. وحسيت اني حماااار على كلب على ضفدع


















<< اخونا في الله حاط صابون فيري بدال الزيت








الا صدز
والله ياعندنا بالدوام عامل حق الشاهي ( تي مان ) << اخس يالكرسي الافرنجي
صوته تقولون فيلم اباحي .. قسمن بالله احس اني لو انفرد معه لحاله انه بيروح غلطه
هو صدز انه شين وبقوووه .. وحتى صوووته اشين من وجهه
بس مدري ليه احس انه يتكلم بمايعه خشنه
هلا هابيبي .. ابغى شاهي هبيبي .. انا الهين جيب شاهي هبيبي << انا ابد ماشكيت بعمري
عاد صوته من جد خشن خشن خشن مره
حتى ان بعض علماء النبات المعاصرين قالوا ان صوت هالعامل هو احد اسباب هجره الطيور




واخيراً وليس اخيراً
عزيزتي المرأه حذاري حذاري من المشاغل اللي يحطون لوحه مكتوب عليها 15 خدمه فقط بـ 100 ريال
تراهم نصابين ولاعبين عليكم
ولارحتي لهم تقولين ابي اقص شعري وابي هالـ 15 خدمه
بيقولون لتس طيب .. وبتقصين شعرتس وبيعطونس هالـ 15 خدمه وانتي ماتدرين
ولاجيتي تقولين وين هالخدمات اللي تقولون عنها
بيقولون لتس اول شي يوم جينا بنقص شعرتس فكينا الشباصه وهذي تعتبر خدمه
وعقبن فلينا شعرتس ونثرناه عشان نقصه .. وهذي تعتبر خدمه ثانيه
وعقبن رشيناه بمويه وهذي خدمه ثالثه ومن هالحتسي الين تحسين انتس انغبنتي
وبتندمين لانتس درعمتي عليهم بذاك اليوم
وحتى لو كانت قصة شعرتس زينه .. بتحسين انها موب زينه لانهم غشوتس يادلخه










وآخر شي رسآلتي لكم :

عليكم بسوق الصواريخ بجدة وأقطعو محلات نعومي والله مادهوركم ودهورنا الا ذا التسلب











مايستفاد من الموضوع :

ولا حاقه
ومالا يستفاد :

جميع ماسبق ذكره

والله مافهمنا من كلامك شي ياأنك مهابول او تستهبل ولا انا ماعرف اقرا هبلتبنا من كلامك

هههههههههههههههههههههه حمدود من تآليفك ولا منقوول

الله مير يوسسع صدرك وسسعت صدرنآآآ ,,

وش الســـــــــــــــــالفة

ههههههههههههه
اوما صابون فيري هههههه
مشكور

خخخخخخخخ
الله يرج بليسك والله انك محشششششش

هههههههههههههههههههههههههه

ااااالله مير يسلمك على ها الكلام الحلو اللى ماينفهم هو عربى ولا تركي
بس ونستنا من صدز