ترحيب بالجميع + تهنئه خاصة للشاعر أحمد المانع بمناسبة فوز قصيدته بالمركز الاول في حفل اليوم الوطني

بسم الله والحمدلله والصلاة والسلام على رسول الله نبينا محمد وعلى آله وصحبه اجمعين... أما بعد

تحية طيبة لاعضاء المنتدى الكرام واتمنى ان تكونوا بأتم صحة وسلامه
كما يطيب لي ان اتقدم بأصدق التهاني والتبريكات لاهالي تمير الكرام بمناسبة فوز ابن تمير البار الشاعر / احمد بن ابراهيم المانع
(( شاعر المناطق )) بجائزة أفضل قصيدة في حفل امانة مدينة الرياض بمناسبة اليوم الوطني في مخرج 9 ، وقد انتزعت قصيدته الأفضلية وحازت على جائزة المركز الاول رغم مشاركة كوكبة من كبار الشعراء ، و قد كان بحق خير من يمثل اهل تمير ، وحق لكم يا اهل تمير ان تفخروا بهذا الشاعر .

وإليكم نص القصيدة التي حازت على الجائزة :

((( يوم الوطن ))))

عتيم ليل وخيل وذياب وركاب = وهذا غزى هذك من قلة الفود
وقت مخيف وضيع اعقول الألباب = كم واحد حيله من الخوف مهدود
اللي وقف مرتاب في زلفة الباب = البارحه من تالي الليل مهجود
يصفق بكف الكف ما حوله اصحاب = دمعه على الخدين والقلب ملهود
مستهدف الشايب ومستهدف الشاب = أمر محير ما بعد مر بركود
الباديه والحاضره عاشت اتعاب = اثر الأمن نعمه وفاقده مفقود
قبل يجي معزي وحنا على اعصاب = ما يهتني الرجال بمراح ورقود
يصامخ الفرسان بسلاح وحراب = وفي ساحة الميدان يزعزع احشود
صحيح قص الروس وتموت الأذناب = اعداء دين الله طعام للدود
طاحوا تحت رايتك عكفان الأشناب = نصرك ربي وانهزم كل مقرود
عشرين عام واثنعش عد واحساب = وعبدالعزيز بساحة الحرب موجود
من الشرق اخو نوره على عوج الأرقاب = جاء والسلاح اللي بيمناه بارود
له مطلب ما يدركه كل طلاب = ثمنه سفك الدم ومصادم زنود
نوخ ودون بويب له خط محراب = وصلى معه ستين ركاع وسجود
عشرين منهم عند عتاد وزهاب = أما اربعين دون ابو تركي اتذود
وعجلان ماله عنه لو طار مجناب = نصب الشرك ثم جاء على الراس مصيود
وقام المنادي واعتلى فوق مرقاب = الحكم لابن سعود والعالم شهود
حكم وهبه الله ما جاء من احزاب = والفضل لله صاحب المن والجود
يالله وانا طالبك يارب الارباب = رحمتك بالمدفون في حارة العود
وطن بوادي ومن أقراب وجناب = واللي اتوا للحج زوار ووفود
عسى القماش اللي من السندس ثياب = يرتاده الراحل وسط جنة خلود
مرحوم يا مرث صناديد وذياب = ساروا بنفس الدرب وأولهم سعود
أبو فهد غيث على الدار سكاب = طاحت هماليله بلا برق ورعود
طيب لكل الشعب والشعب له طاب = جزل العطايا لا عطى يصرف نقود
ثم حكم فيصل وفزنا به اعجاب = مع كل من في الغرب له دور محمود
يصدع بقول الحق في الجمع ما هاب = ويصغي لقوله قادة اشعوب وجنود
فيصل وحق الله لو اكتب كتاب = عن سيرته محتاج للزود والزود
ثم حكم خالد وحنا له احباب = يتودد النا ود والد لمولود
حط السعودي بين رمشه والاهداب = قال الامل في الله والشعب معقود
وقته حمام الورق يغرد اسراب = على الشجر يوقع شوي ويعود
ثم ابتدى حكم الفهد مسك وأطياب = لو الله إلا ازكى من العطر والعود
معنا ابو فيصل كل ما كلح الناب = دون الوطن فسر عن اذراع وعضود
ريحت شعبك ما تعرض للنشاب = تسوق دونه مال للحرب مرصود
يا ملوكنا دللتوا اقراب واغراب = نارد اقراح الماء ونشرب من اعدود
ندعي لأبوتركي عسى الدعوه تجاب = عساه وعياله بجنات موعود
وندعي لابو متعب ذرى الدار وحجاب = صقر العروبه دون هذا الوطن طود
والله نوده ود يفوق الأقراب = والي زعل يصك بالراس في حيود
بامي وابويه جيت والروح جلاب = اجدد البيعه واصادق على اعهود
صدق و ولاء واخلاص مانيب كذاب = يا سيدي ماني على الكذب محدود
لك ولولي العهد قدمت ترحاب = باسم السعوديين مع باقة ورود
اثر الهوى في شخص سلطان غلاب = الشعب كله مغرم بسيد الجود
زاد الوله والشوق في قلوبنا ذاب = وحبل الامل بالله لا زال ممدود
ودام الشعر معنى وفصل من خطاب = يزهى وزير الداخليه ابو سعود
النايب الثاني عمى عين الارهاب = رجل الامن نايف كما السيف مجرود
ويا نجد زينك كمله نقش وخضاب = ابو فهد سلمان خصص لك ابنود
تربعي يالعاصمه عالي هضاب = اميرنا المحبوب توجك بعقود
وسطام مثل اخوه ماجور ومثاب = العاصمه يشيل في عيونه السود
واللي نوى فيها العبث ياكل تراب = من الغبن يرجع ولا طال مقصود
نشكر أمانتنا على فعل الاسباب = الجهد واضح والعطا ماله حدود
واحد من الميزان طاريه ما غاب = نستعرض احداثه من وقوف لقعود
يا ململم الاطراف بخيول وركاب = دارك بامان الله من كل نمرود

صح لسآن شآعرهآ
قصيدة متميزة وتستآهل الفوز
ألف مبروك ...
وتمنيآتي له بالتوفيق
نبض تميم شكرآ لك على هـ البآدره الطيبه ..

صح لسان الشاعر احمد المانع

وصح بدنك يا نبض تميم على الخبر الجميل

ومن حصل شي يستاهله

قصيدة رائعه

صح لسان شاعرها

وجزاك الله خير نبض تميم على النقل

صح لسان الشاعر احمد المانع

والف الف الف مبروك الفوز
واشكر نبض تميم ع الخبر الرائع